UDariyo—Ukumkani Onokusesikweni
NGOKUPHATHELELE imisebenzi yokwakha awayenzayo, ukumkani othile odumileyo wakha wazingomb’ isifuba esithi: “Ukubiyela iBhabhiloni ndiyibiyele ngodonga olomeleleyo kwicala lasempuma. Ndombe umjelo wamanzi . . . Ndakhe udonga oluluqilima ngetha nezitena, njengentaba, alinakushukunyiswa.” Ewe, uKumkani waseBhabhiloni uNebhukadenetsare wayenze umsebenzi omkhulu wokwakha yaye wazibhokoxa ukuze anqabise isixeko esilikomkhulu lobukhosi bakhe. Kodwa isixeko saseBhabhiloni asizange singqineke njengesingenakoyiswa njengokuba wayecinga.
Oku kwangqineka ngo-Oktobha 5, 539 B.C.E. Ephelekwa ngumkhosi wamaMedi, owayengumlawuli wamaPersi ngoko uKoreshi II wayoyisa iBhabhiloni waza wambulala umlawuli wayo ongumKaledi, uBheleshatsare. Ngubani owayeza kuba ngumlawuli wokuqala wesi sixeko sasisandul’ ukuthinjwa? Umprofeti kaThixo uDaniyeli, owayekwesi sixeko ukuwa kwaso, wabhala: “UDariyo, umMedi, wabuthabatha ubukumkani, eminyaka ikumashumi omathandathu anamibini ezelwe.”—Daniyeli 5:30, 31.
Wayengubani uDariyo? Wazingqina engumlawuli onjani? Wamphatha njani umprofeti uDaniyeli, owayesele ethinjwe eBhabhiloni iminyaka engaphezu kwama-70?
UKUMKANI ONEMBALI EMFUTSHANE
Kuncinane gqitha okwaziwayo ngembali kaDariyo umMedi. Phantse amaMedi ashiya kungekho ngxelo ibhaliweyo ngaye. Ukongezelela koko, amakhulu amawaka amatye akroliweyo awafunyanwa kuMbindi-mpuma anembali engaphelelanga nengavisisaniyo. Eminye imibhalo yamandulo engokwembali neye yasinda imbalwa yaye yabhalwa emva kwenkulungwane okanye ngaphezulu zenzekile iziganeko eziphathelele uDariyo.
Sekunjalo, ubungqina bubonisa ukuba emva kokuthimba iEcbatana, ikomkhulu lamaMedi, umlawuli wamaPersi uKoreshi II wazuza inkoloseko yamaMedi. Emva koko, amaMedi namaPersi alwa ngokumanyeneyo phantsi kokhokelo lwakhe. Ngokuphathelele unxulumano lwawo, umbhali uRobert Collins uthi kwincwadi yakhe ethi The Medes and Persians: “AmaMedi ayephilisana ngoxolo namaPersi. Ngokufuthi ayesonyulelwa kwizikhundla eziphezulu eburhulumenteni nakwizikhundla zokhokelo kumkhosi wamaPersi. Abaphambukeli babethetha ngamaMedi namaPersi, nto leyo eyayisenza singaziwa isizwe esoyiswayo nesoyisayo.” Ngaloo ndlela amaMedi adibana namaPersi ukubumba uBukhosi bamaMedi namaPersi.—Daniyeli 5:28; 8:3, 4, 20.
Ngokuqinisekileyo amaMedi aba nendima ephambili ekubhukuqweni kweBhabhiloni. IZibhalo zichaza ‘uDariyo unyana ka-Ahaswerosi, wasembewini yamaMedi,’ njengokumkani wokuqala woBukhosi bamaMedi namaPersi ukulawula eBhabhiloni. (Daniyeli 9:1) Igunya lobukumkani bakhe laliquka ukumisela imithetho ebhaliweyo ‘engenakutshitshiswa bani ngomthetho wamaMedi namaPersi.’ (Daniyeli 6:8) Oko iBhayibhile ikuthethayo ngoDariyo kusenza sibone ubuntu bakhe kwanesizathu esiqondakalayo sokungabikho kwenkcazelo engokwembali ephathelele yena.
UDANIYELI UYATHANDWA
Kungekudala emva kokubamb’ iintambo eBhabhiloni, ngokokutsho kweBhayibhile, uDariyo wamisa “iirhuluneli ezilikhulu elinamashumi amabini, ukuze zibe sebukumkanini bonke. Wamisa phezu kwazo ezo abongameli babathathu, omnye kubo inguDaniyeli.” (Daniyeli 6:1, 2) Noko ke, ukuba kwisikhundla esiphezulu kukaDaniyeli kwawaphath’ emanyeni amanye amagosa. Ngokungathandabuzekiyo ingqibelelo yakhe eyayikuthintela ukunganyaniseki, ngokuqinisekileyo yambangela wacatshukelwa. Amele ukuba ayenomona amagosa akwizikhundla eziphezulu, ekubeni uDaniyeli wayethandwa ngukumkani yaye ecinga ukumenza inkulumbuso.
Enethemba lokuyiphelisa le meko, la magosa mabini neerhuluneli enza umgibe esebenzisa umthetho. Aya kukumkani efuna ukuba atyobele umthetho owawusalela “umthandazo nakongubani, uthixo nomntu,” ongenguye uDariyo kangangeentsuku ezingama-30. Bacela ukuba nabani na owaphulayo lo mthetho umele ajulelwe emhadini weengonyama. Edyojwe intshongo emehlweni uDariyo wacinga ukuba lo mthetho uza kuthandwa zizo zonke izidwangube zaseburhulumenteni, yaye neso sicelo sasingathi yimbonakaliso yokunyaniseka kwabo kukumkani.—Daniyeli 6:1-3, 6-8.
UDariyo wawutyobela lo mthetho yaye kungekudala wajamelana nemiphumo yawo. UDaniyeli waba ngowokuqala ukwaphula lo mthetho, ekubeni wayeqhubeka ethandaza kuYehova uThixo. (Thelekisa IZenzo 5:29.) UDaniyeli othembekileyo waphoswa emhadini weengonyama phezu kwawo nje amatiletile anyanisekileyo kakumkani okuzama indlela yokuthintela lo mthetho ungenakuguqulwa ukuba ungasebenzi. UDariyo wayivakalisa indlela awayeqiniseke ngayo ukuba uThixo kaDaniyeli wayenokumsindisa lo mprofeti.—Daniyeli 6:9-17.
Emva kokungalali ubusuku bonke ezile ukudla, uDariyo wenz’ amatshe ukuya emhadini weengonyama. Hayi indlela awavuya ngayo kukufumana uDaniyeli ephila yaye engenawo nomkrwelo! Njengempindezelo esesikweni, engaphozisanga maseko ukumkani wayalela ukuba bajulelwe emhadini weengonyama abancethezi bakaDaniyeli kwaneentsapho zabo. Wakhupha nomyalelo wokuba ‘ezindaweni zonke zegunya lobukumkani bakhe, badidizele bothuke abantu phambi koThixo kaDaniyeli.’—Daniyeli 6:18-27.
Kuyacaca ukuba, uDariyo wayemhlonela uThixo kaDaniyeli nonqulo lwakhe yaye wayelangazelela ukulungisa le mpazamo. Sekunjalo, ukohlwaywa kwabancethezi bakaDaniyeli kumele ukuba kwabangela ubutshaba kumagosa aseleyo. Ukongezelela koko, umyalelo kaDariyo wokuba bonke ebukumkanini ‘mabothuke phambi koThixo kaDaniyeli’ umele ukuba wabagqushalazisa abefundisi ababenempembelelo baseBhabhiloni. Ekubeni ngokuqinisekileyo ababhali babephenjelelwe zezi zibakala, bekungayi kuba ngumnqa ukuba zibe zaguqulwa iingxelo zomsebenzi wakhe ukuze kushenxiswe inkcazelo ephathelele uDariyo. Sekunjalo, ingxelo emfutshane ekwincwadi kaDaniyeli imchaza uDariyo njengomlawuli owayenobulungisa nokusesikweni.