ISIFUNDO 17
Ukusetyenziswa Kombhobho Wesandisi-lizwi
ABAZALWANA noodade wethu abangamaKristu bachitha ixesha elininzi yaye benza umgudu ukuze babekho kwiintlanganiso zamaKristu. Ukuze bangenelwe koko kuthethwayo, bamele bakwazi ukuva kakuhle.
Ngemihla yoSirayeli wamandulo sasingekho isandisi-lizwi esisebenza ngombane. Xa uMoses wayethetha nohlanga lwakwaSirayeli kumaThafa akwaMowabhi ngaphambi nje kokuba angene kwiLizwe Lesithembiso, zakwazi njani ukumva ezo zigidi zazimphulaphule? Kusenokwenzeka ukuba uMoses wayesebenzisa amadoda awayewasasaze phakathi kwabantu ukutyhubela inkampu ukuba aphinde loo nto wayeyithetha. (Dut. 1:1; 31:1) Kungekudala emva kokuba amaSirayeli eqalise ukulwela ilizwe elikwintshona yeYordan, uYoshuwa wahlanganisa uhlanga phambi kweNtaba yeGerizim neNtaba ye-Ebhali, yaye kubonakala ukuba abaLevi babekwintlambo eyayisahlula ezi ntaba. Apho bonke abantu beva baza basabela kwiintsikelelo nakwiziqalekiso zikaThixo ababexelelwa ngazo. (Yosh. 8:33-35) Kusenokwenzeka ukuba nakwesi sihlandlo kwasetyenziswa abantu ukudlulisa isigidimi, kodwa ngokuqinisekileyo ukukwazi kwaloo mmandla ukudlulisa izandi ngokucacileyo nako kwaba luncedo.
Kwiminyaka emalunga ne-1 500 kamva xa “isihlwele esikhulu kakhulu sahlanganisana” kuLwandle lwaseGalili ukuze siphulaphule uYesu, wakhwela isikhephe, wasingenisa kancinane elwandle, waza wahlala phantsi ukuze athethe nesihlwele. (Marko 4:1, 2) Kwakutheni ukuze uYesu athethe ehleli kwisikhephe? Ubungqina bubonisa ukuba kungenxa yokuba ilizwi lomntu livakala ngokucace gqitha xa ephezu kwamanzi amaninzi.
De kwasebutsheni benkulungwane yama-20, ukuvakala nokucaca kwelizwi lesithethi kwakudla ngokugqiba ngenani labaphulaphuli baso ababekuva oko sikuthethayo. Noko ke, ukususela ngeminyaka yee-1920, abakhonzi bakaYehova babekwazi ukusebenzisa izandisi-lizwi ezisebenza ngombane ezindibanweni zabo ezinkulu.
Izixhobo Zesandi. Ezi zixhobo zinokulandisa ilizwi lesithethi ngokuphindaphindwe kaliqela ngoxa ziwulondoloza ngokwaneleyo umgangatho kunye nethoni yelizwi laso. Akuyomfuneko ukuba isithethi sikhwaze. Kungeyomfuneko nokuba abaphulaphuli batsale iindlebe ukuze beve oko kuthethwayo. Kunoko, banokunikela ingqalelo kwisigidimi.
Kuninzi okuye kwenziwa ukuze kuqinisekwe ukuba kukho izixhobo zesandi ezisemgangathweni kwiindibano zamaNgqina kaYehova ezinkulu nezincinane. Ukongezelela koko, iiHolo zoBukumkani ezininzi zisebenzisa izixhobo zesandi ukuze zandise amazwi abo banikela iintetho, baqhuba iintlanganiso, okanye bafunda beseqongeni. Yaye amanye amabandla anemibhobho yokwandisa ilizwi esetyenziswa ngabaphulaphuli xa begqabaza ebudeni beentlanganiso. Ukuba ibandla lakho linazo ezo zixhobo, funda ukuzisebenzisa kakuhle.
Ulwalathiso Olusisiseko. Ukuze uzisebenzise kakuhle ezi zixhobo, gcina ezi ngongoma zilandelayo engqondweni: (1) Umbhobho wesandisi-lizwi ngokuqhelekileyo umele ube kumgama oziisentimitha ezili-10 ukuya kwezili-15 ukusuka emlonyeni wakho. Ukuba umbhobho wesandisi-lizwi ukufutshane kakhulu, amagama akho asenokungavakali kakuhle. Ukuba ukude kakhulu, ilizwi lakho liya kufiphala. (2) Umbhobho wesandisi-lizwi ufanele ube phambi kwakho, ungabi secaleni. Ukuba ujika intloko yakho iye ngasekunene okanye ekhohlo, thetha xa ubuso bakho bujonge kumbhobho wesandisi-lizwi kuphela. (3) Ilizwi lakho liphakamise kancinane kunendlela ebeliya kuvakala ngayo xa uncokola. Kodwa ke akuyomfuneko ukukhwaza. Izixhobo zesandi ziya kulithwala lula ilizwi lakho zilise kwabona bantu bakude kubaphulaphuli bakho. (4) Ukuba kufuneka uthinte isikhohlela okanye ufuna ukukhohlela okanye ukuthimla, qiniseka ukuba uyayijika intloko ingajongi kumbhobho wesandisi-lizwi.
Xa Unikela Intetho. Xa ukhwela eqongeni, ngokuqhelekileyo kubakho umzalwana okulungiselela umbhobho wesandisi-lizwi. Yima ngendlela oqhele ukuma ngayo ujonge kubaphulaphuli ngelixa awulungisayo. Beka amanqaku akho phezu kweqonga, uze uqiniseke ukuba umbhobho wesandisi-lizwi awuwasithi.
Xa uqalisa ukuthetha, phulaphula indlela elivakala ngayo ilizwi lakho kwizipikha. Ngaba ukhwaza kakhulu, okanye ngaba amagama athile anezandi ezibukhali? Kusenokufuneka ubuye umva iisentimitha ezimbini ezinesiqingatha ukusa kwezintlanu. Xa ukrwaqula amanqaku akho, khumbula ukuba ufanele uthethe yaye ufunde kuphela xa ubuso bakho bujonge kumbhobho wesandisi-lizwi okanye ngentla kancinane kuwo, kungekhona ngaphantsi kwawo.
Xa Ufunda Useqongeni. Kuhle ukuba uphathe iBhayibhile yakho okanye enye impapasho ngohlobo lokuba ubuso bakho bujonge kubaphulaphuli. Ekubeni umbhobho wesandisi-lizwi uza kube uphambi kwakho ngqo, kusenokufuneka uwubambele ecaleni kancinane loo mbandela uwufundayo. Oku kuthetha ukuba intloko yakho ifanele ijonge ecaleni kancinane kombhobho wesandisi-lizwi. Uya kuthi ke wakufunda, ilizwi lakho liye ngqo kumbhobho wesandisi-lizwi.
Inkoliso yabazalwana abafundayo kwiSifundo seMboniselo bema ngeenyawo baze bathethe kumbhobho wesandisi-lizwi omileyo. Ukuma ngolo hlobo kubenza bakwazi ukuphefumla ngokukhululeke nangakumbi baze bafunde ngokuzinikela. Khumbula ukuba ukufundwa kweziqendu kuyinxalenye ephambili yentlanganiso. Ingenelo efunyanwa ngabaphulaphuli ixhomekeke, ubukhulu becala, ekuveni loo mbandela ufundwayo.
Xa Ugqabaza Ebudeni Beentlanganiso. Ukuba ibandla okulo lisebenzisa imibhobho yokwandisa ilizwi nakwiimpendulo zabaphulaphuli, khumbula ukuba nalapho kusafuneka uthethe uvakale ngokwaneleyo. Xa ugqabaza, zabalazela ukuyiphatha ngesandla loo mpapasho ifundisiswayo okanye iBhayibhile yakho. Oku kuya kukwenza ukwazi ukuwubona kakuhle umbandela ngoxa uthetha kumbhobho wesandisi-lizwi.
Kwamanye amabandla kukho abazalwana ababelwe ukuhambisa imibhobho yesandisi-lizwi bayise kwabo balathiweyo ukuba bagqabaze. Ukuba kunjalo kwibandla lakho, xa usalathwa, qhubeka usiphakamisile isandla sakho ukuze loo mzalwana uphethe umbhobho wesandisi-lizwi akubone apho uhleli khona aze afike ngokukhawuleza kuwe. Ukuba umbhobho wesandisi-lizwi lolu hlobo luphathwa ngesandla, kulungele ukolula ingalo ukuze uwuthabathe. Musa ukuqalisa ukugqabaza de umbhobho wesandisi-lizwi ube ufikile. Xa ugqibile ukugqabaza, wubuyisele ngokukhawuleza umbhobho wesandisi-lizwi.
Xa Ukumboniso. Ukusebenzisa umbhobho wesandisi-lizwi xa usenza umboniso kufuna ubani acingisise kusengaphambili. Ukuba loo mbhobho wesandisi-lizwi unkqangiyelwe kwiqonga lawo, izandla zakho zozibini ziya kukhululeka ukuze ukwazi ukuphatha iBhayibhile yakho namanqaku. Ukusebenzisa umbhobho wesandisi-lizwi ophathwayo kunokukunika inkululeko engakumbi yokushukuma, kodwa kusenokufuneka ucele loo mntu wenza naye umboniso ukuba akubambele. Ngaloo ndlela izandla zakho ziya kukhululeka ukuze ukwazi ukuphatha iBhayibhile yakho. Wena nomninimzi wakho nifanele nikuqhelisele oku ukuze ayazi indlela efanelekileyo yokuwubamba. Ukhumbule kwakhona ukuba, xa useqongeni, akufanelanga ubafulathele abaphulaphuli, ngokukodwa xa uthetha.
Kwimiboniso yeNtlanganiso Yenkonzo, basenokuba baninzi abantu ababa nenxaxheba, kwaye basenokuhamba-hamba eqongeni. Ngaloo ndlela, kusenokufuneka imibhobho yesandisi-lizwi eliqela. Le mibhobho ifanele ibekwe endaweni yayo kusengaphambili okanye inikwe abo baza kuba nenxaxheba xa bekhwela eqongeni. Ukuqiniseka ukuba imibhobho yesandisi-lizwi ikwindawo efanelekileyo ngexesha elifanelekileyo kufuna ubani acebe kusengaphambili. Ukuqhelisela imiboniso ngaphambi kokuba yenziwe kuveza ithuba lokufundisa abo baza kuba nenxaxheba ngendlela yokusebenzisa imibhobho yesandisi-lizwi. Xa kungenakwenzeka ukuba baqhelisele eqongeni, kusenokuba bubulumko ukuba abo baza kuba nenxaxheba baphathe into ebulingana nombhobho wesandisi-lizwi ukuze baqhelisele indlela yokuwubamba. Emva komboniso, abo babe nenxaxheba bafanele bayibeke ngononophelo imibhobho ephathwayo, balumke bangarhintyelwa ziintambo ezivela kweminye imibhobho yesandisi-lizwi njengoko besihla eqongeni.
Ukunikela kwethu ingqalelo ekusetyenzisweni kwemibhobho yesandisi-lizwi kunxibelelene ngokungqalileyo nenye yezona njongo ziphambili zeentlanganiso zethu, ukukhuthazana ngokuxubusha iLizwi likaThixo. (Heb. 10:24, 25) Ngokufunda ukuyisebenzisa kakuhle imibhobho yesandisi-lizwi, sinokufak’ isandla ngokungqalileyo kule njongo ibalulekileyo.