Ukudumisa UYehova Esikolweni
EHLABATHINI jikelele, amaNgqina kaYehova aselula adumisa uThixo esikolweni—ngentetho nangehambo yawo. Khawuve la mava abonisa inzondelelo yawo.
INgqina eliselula laseGrisi kwathiwa malibhale isincoko ngokungcoliswa komhlaba. Emva kokuphanda kwiWatch Tower Publications Index, lafumana inkcazelo eluncedo kwiphephancwadi uVukani!, yaye kumqukumbelo walo lachaza ukuba loo mbandela laliwuthabathe kwelo phephancwadi. Utitshala walo walichazela ukuba isincoko salo sesinye sezincoko ezisemagqabini awakhe wazifunda. Kamva loo titshala wasebenzisa loo nkcazelo kwingqungquthela yootitshala waza weza neziphumo ezincumisayo. Lo dade uselula wagqiba ekubeni aphathele utitshala iinkupho ezingakumbi zikaVukani!, kuquka nongcelele lwamanqaku olwalunomxholo othi “Abafundisi-ntsapho—Besinokuba Yintoni Ngaphandle Kwabo?” Kamva lo titshala walincoma iphephancwadi uVukani! phambi kwabanye abafundi baze nabo bazifunela eyabo imibhalo. Lo dade kwafuneka eze nemibhalo engakumbi yeli phephancwadi ukuze ifundwe ngabafundi.
Kwilizwe laseBenin, eAfrika, udade okwishumi elivisayo wajamelana nohlobo olungaqhelekanga lwenkcaso. Ngokuqhelekileyo, abazali babafundi badla ngokuqesha ootitshala babucala abaza kufundisa abantwana babo izifundo ezinzima ukuze balungele iimviwo. Aba titshala babucala bakhetha iintsasa zangoMgqibelo. Eli Ngqina liselula alizange livume lisithi: “Intsasa yangoMgqibelo lixesha elishumayela ngaloo ibandla. Lelona xesha limnandi evekini kum elo, kwaye andinakuze ndilincame!” Utata walo, ongumzali ongenaqabane okwaliNgqina, wavuma waza wazama ukuthetha nabanye abazali naba titshala babucala ukuze batshintshe ucwangciso. Bonke bakhaba ngaw’ omane. Le ntombazana yazifundela ngaphandle kwaba titshala babucala. Yasuka yashumayela nebandla. Abantwana efunda nabo bayigculela, besithi mayiyeke ukushumayela noThixo wayo. Babeqinisekile ukuba iza kuzitshona iimviwo. Ekugqibeleni aba bafundi babefundiswa ngootitshala babucala batshona, ngoxa udade wethu waphumelelayo. Latsho lanqum’ inqatha kwabo babemgculela. Ngoku abo bafundi bathi, “Ufanele uqhubeke ukhonza uThixo wakho.”
Kwilizwe laseCzech, intombazana eneminyaka eli-12 ubudala yayiza kubalisa ngencwadi ethile. Unina wayicebisa ukuba isebenzise incwadi ethi Oyena Mntu Ubalaseleyo Wakha Waphila. Isincoko sayo yasiqalisa ngombuzo othi: “Ucinga ntoni? Ngubani oyena mntu ubalaseleyo wakha waphila?” Yaxubusha ngobomi neemfundiso zikaYesu xa wayelapha emhlabeni. Emva koko yaxubusha isahluko esinomxholo othi: “Isifundo Ngokuxolela.” Utitshalakazi wayo wathi: “Sesona sincoko sisemagqabini wakha wasibalisa esi!” waza wayamkela loo ncwadi. Nabanye abafundi bazifunela ezabo. Ngosuku olulandelayo le ntombazana yayivuya kuba yahambisa iincwadi ezili-18.
Olu lutsha luvuyiswa kukudumisa uYehova esikolweni. Sonke sakuba senza kakuhle ukuba sixelisa umzekelo walo omhle.