Ubomi Nobulungiseleli BukaYesu

Abanekratshi Nabathobekileyo

EMVA kokukhankanya iimpawu zikaYohane uMbhaptizi, uYesu uphethulela ingqalelo yakhe kubantu abanekratshi nababenochuku ababemngqongile. Uvakalisa oku, “Esi sizukulwana . . . sifana namakhwenkwana ahleli ezindaweni zeembutho, ekhwaza abalingane bawo, esithi, Sanigwalela, naza nina anaduda; sanihlabela isililo, naza nina anambambazela.”

Uthetha ukuthini uYesu? Uyacacisa: “UYohane weza engadli, engaseli, basuka bathi. Unedemon. UNyana woMntu yena weza esidla, esela, basuka bathi, Khanibone umntu olidla-kudla, oliselawayini, umhlobo wababuthi berhafu naboni.”

Kuyinto engenakwenzeka ukwanelisa abantu. Akukho nto ebenza bakholwe. UYohane uye waphila ubomi obungaquki izinto ezininzi nobubobokuzincama njengoZahluleyo, ngokuvisisana nesibhengezo sesithunywa sezulu sokuba “angakhe asele wayini nasiselo sinxilisayo.” Sekunjalo abantu bathi unedemon. Kwelinye icala, uYesu uphila njengabanye abantu, engenguye umntu oqhelisela ubungqongqo ngokugqithiseleyo, ibe yena utyholwa ngokuzifica ngokugqith’ emgceni.

Hayi indlela ekunzima ngayo ukubakholisa aba bantu! Banjengabantwana abadlalayo, abathi abanye babo bangavumi ukududa xa abanye abantwana bedlala ugwali okanye abangavumiyo ukuba buhlungu xa abahlobo babo besentlungwini. Sekunjalo, uYesu uthi: “Ubulumko bugwetyelwe kokuvela ebantwaneni babo.” Ewe, ubungqina—imisebenzi—benza kucace ukuba izityholo ezinxamnye noYohane noYesu zibubuxoki.

UYesu uhlabela mgama ekhetha aze ahlasele izixeko iKorazin, iBhetesayida neKapernahum, apho enze inkoliso yemisebenzi yakhe yamandla. UYesu uthi ukuba wayeyenze kwizixeko zamaFenike, iTire neTsidon, ezi zixeko ngezaziguqukile zikwezirhwexayo naseluthuthwini. Egxeka iKapernahum, ngokucacileyo ebiliziko elilikhaya lakhe ebudeni bobulungiseleli bakhe, uYesu uvakalisa oku: “Kuya kuba nokunyamezeleka okomhla waseSodom ngomhla womgwebo kunawe.”

Uthetha ukuthini uYesu ngoku? Ngokucacileyo ubonisa ukuba, ebudeni boMhla Womgwebo xa abanekratshi baseKapernahum bevuswa, kuya kuba nzima ngakumbi kubo ukuvuma iimpazamo zabo baze bamkele uKristu kunokuba kuya kuba njalo kumaSodom amandulo avusiweyo ukuguquka ngokuthobekileyo aze afunde ubulungisa.

Ngokulandelayo uYesu umdumisa ekuhleni uBawo wakhe wasezulwini. Ushukunyiselwa ukwenjenjalo kuba uThixo ufihla iinyaniso ezixabisekileyo kwabazizilumko nakwiingqondi kodwa azityhile ezi zinto zimangalisayo kwabathobekileyo, kwiintsana, ngokungathi kunjalo.

Ekugqibeleni, uYesu unikela esi simemo sinomtsalane: “Yizani kum nonke nina nibulalekayo, nisindwayo ngumthwalo, ndoninika ukuphumla. Thabathani idyokhwe yam niyithwale, nifunde kum; ngokuba ndinobulali, ndithobekile ngentliziyo; noyifumanela ukuphumla imiphefumlo yenu. Kuba idyokhwe yam imnandi, nomthwalo wam ulula.”

UYesu ubangela njani kubekho ukuphumla? Wenjenjalo ngokulungiselela inkululeko kwizithethe ezikhobokisayo iinkokeli zonqulo eziye zasindisa abantu ngazo, kuquka oku, ngokomzekelo, imimiselo enemiqathango yokugcinwa kweSabatha. Kwakhona, ubonisa indlela yokukhululeka kwabo beva umthwalo ocinezelayo wokulawulwa ngamagunya obupolitika nakwabo beva ubunzima bezono zabo ngenxa yesazela esibuhlungu. Kubantu abasentlungwini elolo hlobo utyhila indlela izono zabo ezinokuxolelwa ngayo nendlela abanokulunandipha ngayo ulwalamano oluxabisekileyo noThixo.

Idyokhwe yobubele enikelwa nguYesu yileyo yokuzahlulela ngokupheleleyo kuThixo, ukukwazi ukukhonza uBawo wethu wasezulwini onemfesane nenceba. Ibe umthwalo olula onikelwa nguYesu kwabo beza kuye ngulowo wokuthobela izinto uThixo azifunayo ukuze kuzuzwe ubomi, imiyalelo Yakhe, engekho nzima konke konke. Mateyu 11:16-30; Luka 1:15; 7:31-35; 1:15; 1 Yohane 5:3.

◆ Isizukulwana sikaYesu sifana njani nabantwana?

◆ Kuya kwenzeka njani ukuba kube nokunyamezeleka ngakumbi kwiSodom kunokuba kuya kuba njalo ngeKapernahum?

◆ Abantu basindiswa ngomthwalo ngaziphi iindlela, ibe yiyiphi inkululo uYesu ayinikelayo?