‘Ukuhlaziyeka Emiphefumlweni Yenu’

“Yizani kum nonke nina nibulalekayo, nisindwayo ngumthwalo, . . . noyifumanela ukuphumla [“ukuhlaziyeka,” NW] imiphefumlo yenu. Kuba idyokhwe yam imnandi, nomthwalo wam ulula.”—MATEYU 11:28-30.

1, 2. Ibinjani imeko yentsapho yoluntu kangangeenkulungwane, ibe oku kwahluke njani koko uThixo wayekucebile ntlandlolo?

“SIYAZI ukuba yonke indalo iyancwina, inenimba kunye, unangoku.” Lawo ngamazwi enye indoda eyawabhalela abahlobo bayo ababeseRoma kwiinkulungwane ezadlulayo. (Roma 8:22) Ekubeni sekuyiminyaka ukususela ngoko, ukuncwina nenimba yentsapho yoluntu iphela kuye nje kwanda. Ikhethe, ubuhlwempu, ulwaphulo-mthetho, nendlala ziye zanda ngokoyikisayo kuyo yonke indawo. Inkqubo yokungekho sikweni yezoqoqosho inyanzelela izigidi ekubeni ziyeke emisebenzini de ziphulukane namakhaya azo, ibe impembelelo kaSathana isingela phantsi imigudu yokukhulisa abantwana ngendlela efanelekileyo.

² Kodwa mhlawumbi eyona ntlekele inkulu ibakho xa ukugula, isifo okanye ukwaluphala kubangela abantu baphelelwe ngamandla abo kuze kubenze baphulukane nesidima sabo njengoko bedodobala besiba zizinto ezingento. Le ntlungu inganyamezelekiyo nokubandezeleka, okudla ngokuthabatha iiveki, iinyanga, ibe maxa wambi kwaneminyaka, kubangela iintliziyo ezingamahlwili nokuphalala kweenyembezi. Anjani wona ukuba buhlungu amagqabaza angobomi! Ngokuphathelele imeko yomntu, ukumkani osisilumko wamaxesha akudala wathi: “Imihla yakhe yonke inomvandedwa, nasekuzameni kwakhe ukhathazekile.” (INtshumayeli 2:23; 4:1) Ngokuqinisekileyo ubomi namhlanje abunjengokuba uThixo wayecebe ukuba bube njalo ntlandlolo!—Genesis 2:8, 9.

3. UThixo wamdala umntu wakweyiphi imeko, ibe ngoku siyinandipha njani ukusa kumkhamo olinganiselweyo?

³ UYehova uThixo wamdala umntu wagqibelela, ekwimeko yokuhlala enandipha ubomi bokwenene. (Duteronomi 32:4, 5) Khawucinge nje ngoyolo lokungcamla ukutya okumnandi, ukuphefumla umoya opholileyo nococekileyo, okanye ukubukela ukungcangca kwelanga okuqaqambileyo! Kwalo kumkani usisilumko wamaxesha akudala wathi, “Ndiwubonile umzamo, awunike oonyana babantu uThixo, ukuba bawuzame. Zonke izinto uzenze zantle ngexesha lazo. . . . Ndiyazi ke ukuba akukho nto ilungileyo phakathi kwabo, ingekukuvuya nokuzizuzela okulungileyo ebomini babo. Kwanokuba wonke umntu adle, asele, abone okulungileyo emigudwini yakhe yonke: sisipho sikaThixo eso.”—INtshumayeli 3:10-13.

4. (a) Njengoko kwaboniswayo ngamava kaYesu, yiyiphi imeko elusizi abakuyo abaninzi? (b) Sithini isimemo esifudumez’ intliziyo esadluliselwa nguYesu, ibe sibangela kuphakame yiphi imibuzo?

⁴ Kanti, hayi indlela abambalwa ngayo abakwaziyo ukunandipha izinto ezintle esazilungiselelwa nguThixo! UYesu Kristu wayeyiqonda imeko yoluntu enxunguphalisayo nelusizi. IBhayibhile ithi, “Kweza kuye izihlwele ezininzi, zinazo iziqhwala, iimfama, izidenge, izilima, nabanye abaninzi, zababeka phantsi ezinyaweni zikaYesu.” Hayi indlela awaba nosizi ngayo uYesu ngabo bantu babeseshweni ngolo hlobo! (Mateyu 9:36; 15:30) Ngesinye isihlandlo, wadlulisela esi simemo sifudumez’ intliziyo: “Yizani kum nonke nina nibulalekayo, nisindwayo ngumthwalo, ndoninika ukuphumla. Thabathani idyokhwe yam niyithwale, nifunde kum; ngokuba ndinobulali, ndithobekile ngentliziyo; noyifumanela ukuphumla [“ukuhlaziyeka,” NW] imiphefumlo yenu.” (Mateyu 11:28, 29) Ngokuqinisekileyo, la ngamazwi abangel’ ithemba! Kodwa luhlobo olunjani lokuhlaziyeka olu wayethetha ngalo uYesu? Ibe sinokulufumana njani?

Inyaniso Ehlaziyayo

5. UYesu wayalatha njani indlela esa kwinkululeko nasekuhlaziyekeni kokwenyaniso kwemiphefumlo yethu?

⁵ Xa uYesu wayekuMthendeleko weMinquba malunga neenyanga ezintandathu ngaphambi kokufa kwakhe, walatha kwindlela yokukhululeka kuze ngaloo ndlela kufunyanwe ukuhlaziyeka kokwenyaniso. Ebhekisa kwabo babenokholo kuye, wathi: “Ukuba nina nithe nahlala elizwini lam, noba ningabafundi bam, inyaniso. Naniya kuyazi inyaniso, yaye inyaniso iya kunikhulula.” (Yohane 8:31, 32) Yiyiphi le nyaniso wayethetha ngayo uYesu? Yintoni le iza kusikhulula kuyo? Abaphulaphuli bakhe babengamakhoboka ngayiphi indlela?

6. (a) Bachasa ngelithini abachasi bonqulo, ibe ngoba? (b) Kungayiphi indlela esingamakhoboka ngayo sonke?

⁶ Abachasi bonqulo bamphazamisa uYesu, bethetha ngamandla besithi: “Thina siyimbewu ka-Abraham; asizanga sibe sebukhobokeni nakubani; utsho ngani na wena ukuthi, Noba ngabakhululekileyo?” Abo bachasi bangamaYuda babezidla ngelifa labo. Nakubeni olo hlanga lwalusithi ngokufuthi lulawulwe zezinye iintlanga zasemzini, amaYuda awazange avume ukubizwa ngokuba ngamakhoboka. Kodwa uYesu wawabonisa indlela awayengamakhoboka ngayo, esithi: “Inene, inene, ndithi kuni, Bonke abenza isono bangamakhoboka esono.” Ewe, bonke abo baphulaphuli bakhe ‘babengabenzi besono,’ kanye njengokuba thina sonke namhlanje sinjalo. Oku kungenxa yokuba thina sonke sisizuze ilifa isono kubazali bethu bokuqala. Kodwa uYesu wathembisa oku: “Ukuba uNyana uthe wanikhulula, noba nikhululekile inene.”—Yohane 8:33-36; Roma 5:12.

7. Inokufunyanwa njani inkululeko yokwenyaniso, ibe yiyiphi inyaniso esikhululayo?

⁷ Ngaloo ndlela inkululeko yokwenyaniso inokufunyanwa kuphela ngoNyana kaThixo, uYesu Kristu, owanikela ubomi bakhe bobuntu obufezekileyo njengedini lentlawulelo. Leli dini elisikhululayo kwisono esibulalayo lize lenze kube nokwenzeka ngathi ukuba sinandiphe ubomi obungunaphakade kwimpilo nakulonwabo olugqibeleleyo kwihlabathi elitsha likaThixo lobulungisa. (Yohane 3:16; 1 Yohane 4:10) Ngoko ke, inyaniso esikhululayo yinyaniso engoYesu Kristu nendima anayo ekuzalisekeni kweenjongo zikaThixo. UBukumkani, uKristu anguKumkani kubo, bubo obuya kuphumeza ukuthanda kukaThixo ngomhlaba, ibe uYesu waqhubeka enikela ubungqina ngale nyaniso.—Yohane 18:37.

Indlela Ehlaziya Ngayo Inyaniso

8. Inokuzekeliswa njani indlela ehlaziya ngayo inyaniso?

⁸ Indlela ehlaziya ngayo inyaniso inokuzekeliswa ngebhinqa eliye laxelelwa ukuba linesifo somhlaza esanda ngokukhawuleza. Ingcinezelo ebangelwa kukwazi kwalo oko iyaligqiba njengoko licinga ngemiphumo eza kubakho ebuhlungu nebulalayo. Noko ke, ekuhambeni kwexesha liya komnye ugqirha lize lixilongwe ngakumbi. Xa oko kufunyanisiweyo emva kokuxilongwa kubonisa ukuba kumele ukuba kwakukho imposiso ethile koko kwafunyaniswayo emva kokuxilongwa kokuqala okanye mhlawumbi liye lachacha ngokuphawulekayo, unokuyithelekelela indlela eliziva likhululeke ngayo ngokumangalisayo. Hayi indlela oko okuwuhlaziya ngayo umphefumlo walo!

9. UYesu wabakhulula njani abantu ngokubafundisa inyaniso?

⁹ Ngokufanayo, xa uYesu weza emhlabeni, abantu babecinezelekile ziinkqubo zesithethe ezingento zaloo mhla. Ethetha ngababhali nabaFarisi ababebangele oko, uYesu wathi: “Babopha imithwalo enzima, esindayo, bayibeke emagxeni abantu, babe ke bona bengathandi kuyishukumisa nangomnwe lo wabo.” (Mateyu 23:4; Marko 7:2-5) Hayi indlela abantu abaziva bekhululeke ngayo xa uYesu wabalungiselela inyaniso eyabakhululayo kwezo zithethe zikhobokisayo! (Mateyu 15:1-9) Kunjalo ke nanamhlanje.

10. Yiyiphi imithwalo ephanga uvuyo abaye bayithwala abaninzi, ibe umntu usenokuvakalelwa njani xa le mithwalo ishenxiswa ngenxa yokufunda kwakhe inyaniso?

¹⁰ Mhlawumbi nawe ungomnye othe, ngenxa yomthwalo onzima weemfundiso zonqulo lobuxoki, wahlala esoyika ukuthuthunjiswa kwisihogo somlilo okanye kwindawo yentlambululo miphefumlo emva kokufa. Okanye xa kwafa othandekayo, usenokuba waba buhlungu gqitha xa umfundisi wakuxelela ukuba nguThixo owayethabathe usana lwakho oluthandayo ngenxa yokuba Wayefuna esinye isithunywa sezulu—ngokungathi uThixo wayefuna umntwana wakho ngaphezu kokuba wena wawunjalo. Maxa wambi abefundisi bakwaxelela abantu abanezifo ezithile ukuba oko kubangelwa kukuqalekiswa nguThixo. Ngaba ngokwenyaniso akuhlaziyi ukufunda iinyaniso zeBhayibhile ezikhulula umntu kobo bubhedengu bonqulo bucinezelayo? Enjani yona imvakalelo yokukhululeka ebangelwa koku!—INtshumayeli 9:5, 10; Hezekile 18:4; Yohane 9:2, 3.

11. (a) Nguwuphi omnye weyona mithwalo inzima, ibe unokushenxiswa njani? (b) Kukuphi ukuhlaziyeka okwabangelwa nguYesu kuboni xa wayesemhlabeni?

¹¹ Omnye weyona mithwalo ekunzima ukuyithwala ngulowo wemvakalelo yokuba netyala ngenxa yezono esizenzileyo. Kukwenza ukhululeke ukwazi ukuba ngenxa yexabiso ledini lentlawulelo likaKristu, ezi zono zinokushenxiswa. IBhayibhile isiqinisekisa ukuba, ‘igazi likaYesu lisihlambulula kuso sonke isono.’ (1 Yohane 1:7) Phezu kwazo nje naziphi na izinto ezimbi esisenokuba sizenzile, ukuba siye saguquka ngokwenyaniso saza sazilungisa iindlela zethu, sinokunandipha ukukhululeka okuhlaziyayo kwesazela esicocekileyo size sibe nesiqinisekiso sokuba uThixo akasayi kuze azikhumbule ezo zono zethu. (INdumiso 103:8-14; 1 Korinte 6:9-11; Hebhere 10:21, 22) Okunjani kona ukuhlaziyeka okwabangelwa nguKristu kwabo babesindwa sisono, abanjengamahenyukazi nababuthi berhafu njengoZakeyu! UYesu wabathuthuzela ngeenyaniso zeBhayibhile ngoxa wayesitya nabo.—Luka 5:27-32; 7:36-50; 19:1-10.

12. (a) Ziziphi iimeko ezazicinezela abantu awathi uYesu wabangela ukuhlaziyeka kuzo? (b) Kwinkulungwane yokuqala, kukoobani awathi uYesu wabonisa ngendlela ephawulekayo ukuba ‘uyindlela nenyaniso nobomi’?

¹² Abanye abantu abaninzi bathwele imithwalo enzima yokugula nezifo, ukudandatheka okuqatha nentlungu engathethekiyo ebangelwa kukufa kothandekayo. Noko ke, uYesu wabahlaziya bonke abanjalo ‘ababebulaleka yaye besindwa ngumthwalo.’ (Mateyu 4:24; 11:28, 29) Waphilisa elinye ibhinqa elalisele lihambe koogqirha abaninzi kangangeminyaka eli-18 kodwa lingade liphile. Kwakhona uYesu waphilisa umntu owayegule kangangeminyaka engama-38, nomnye owazalwa eyimfama. Ngaba unokuyithelekelela indlela abakhululeka ngayo aba bantu xa uYesu wabaphilisayo? (Luka 13:10-17; Yohane 5:5-9; 9:1-7) Inyaniso ikukuba bonke abo beza kuYesu benokholo beza kumthombo wenyaniso, uthile ohlaziya ngokwenene nobubomi. Kumhlolokazi owamkela okuphela konyana wakhe owayevuke ekufeni nakubazali eyathi ekuphela kwentwazana yabo eneminyaka eli-12 eyayifile yabuyiselwa kubo iphilile, ngenene uYesu wazingqina ngendlela ephawulekayo ukuba ‘uyindlela nenyaniso nobomi.’—Yohane 14:6; 17:3; Luka 7:11-17; 8:49-56.

13. UYesu wasifundisa ukuba siphethukele kubani ukuze sifumane uncedo, yaye yintoni eyenzekayo xa sisisebenzisa isiluleko sakhe?

¹³ Ngokungathandabuzekiyo kukho amaxesha axa ujamelana neengxaki ezinkulu ongenakukwazi ukuzisingatha ngokobuqu. UYesu wasifundisa ukuba siphethukele kuYehova ukuze sifumane uncedo, kanye njengokuba naye wenzayo. (Luka 22:41-44; Hebhere 5:7) Xa siphethukela kuThixo ngomthandazo rhoqo, siba neemvakalelo zomdumisi owabhala wathi: “Mayibongwe iNkosi; ithwala imithwalo yethu imihla ngemihla; nguThixo umsindisi wethu.” (INdumiso 55:22; 68:19) Ewe, ukwazi inyaniso ngokwenene kuyahlaziya. Kusisondeza ngakumbi kuYehova kuze kusincede siqonde ukuba ngoncedo lwakhe kunokwenzeka ngathi ukuba sisingathe ngokunempumelelo nezona meko zinzima ebomini.

Ukuhlaziywa Lithemba LoBukumkani

14. Yintoni eyazimasa uYesu kwizilingo awazifumanayo, ibe yintoni ebalulekileyo ukuba siza kuhlaziyeka emiphefumlweni yethu?

¹⁴ Ukuze sihlaziyeke ngokwenyaniso emiphefumlweni yethu, simele sibe nethemba eliqinileyo. UYesu wazinyaswa lithemba. IBhayibhile ithi: “Ngenxa yovuyo olwalubekwe phambi kwakhe, wawunyamezela [“umthi wentuthumbo,” NW] elidelile ihlazo, waza wahlala phantsi ngasekunene kwetrone kaThixo.” (Hebhere 12:2) Ithemba elibangela uvuyo elazimasa uYesu yayilelo lokufak’ isandla ekungcwalisweni kwegama likaYise ngokugcina ingqibelelo, kuquka nelo lokungqineka ekufanelekele ukulawula njengoKumkani woBukumkani bukaThixo. Ukuba nombono ocacileyo wethemba lethu, enoba lelokulawula kunye noKristu ezulwini okanye lelokuba ngomnye wabalawulwa bakhe abaphila kumhlaba oyiParadisi, kuya kusizimasa nathi enkonzweni kaThixo. Ngenene, elo themba libalulekile ekuhlaziyekeni emiphefumlweni yethu.—Roma 12:12.

15. Yintoni esiyilindelayo ebomini xa singenalo ithemba loBukumkani?

¹⁵ Qwalasela oko sikulindeleyo ebomini xa singenalo ithemba loBukumkani. Umzekelo wobomi obunokuphilwa buyiminyaka engama-70 kuphela okanye ukuba kunokwenzeka engama-80. Ibe loo mihla idlula ngokukhawuleza, kanye njengokuba nabani na owaluphalayo eya kukuxelela! Ewe, ngokuyinyaniso iBhayibhile ithi ngobomi: “Ithe phe yakhawuleza, saphaphazela semka.” (INdumiso 90:10) Kanti, sifuna iintsuku zethu ziqhubeke. Sifuna ukuphila. Zininzi izinto esinokuzenza size sizinandiphe.

16. Ukuze sihlaziyeke emiphefumlweni yethu, yintoni ekufuneka seyenzile?

¹⁶ Ngoko ke, hayi indlela ekubaluleke ngayo ukuba size sinokholo ‘kuYesu Kristu, iThemba lethu’! (1 Timoti 1:1) Kunjengokuba wathi: “Kuko ke oku ukuthanda kowandithumayo, ukuthi babe nobomi obungunaphakade bonke abambonayo uNyana, bakholwe kuye.” (Yohane 6:40, 51) Ngaba siyakukholelwa oko? Ukuze sihlaziyeke emiphefumlweni yethu, simele nakanjani na senjenjalo. Akukho ndlela yimbi. Ngenene, simele sinxibe ‘isigcina-ntloko esilithemba losindiso.’ (1 Tesalonika 5:8; thelekisa amaHebhere 6:19.) Elo themba limele ligcine iingqondo zethu, nokucinga kwethu. Kungenjalo, siya kusindwa yimithwalo naziingxaki ngokokude sinikezele size siphulukane nobomi obungunaphakade. Ngoko ke, ukuze uhlaziyeke emphefumlweni wakho, qiniseka ukuba ithemba lakho loBukumkani uligcina liqinile.

Ukuhlaziywa Kukwenza Umsebenzi KaThixo

17. (a) Ukuze sihlaziyeke, yintoni efunekayo, ibe kutheni oko kungekho ngaphezu kwamandla ethu? (b) Kubandakanya ntoni ukwamkela idyokhwe kaKristu?

¹⁷ Kodwa ukuze sihlaziyeke, kufuneka okungakumbi kunokuza nje kuYesu. Wongezelela wathi: “Thabathani idyokhwe yam [okanye, “Ngenani nam edyokhweni yam”] niyithwale, nifunde kum; ngokuba ndinobulali, ndithobekile ngentliziyo; noyifumanela ukuphumla [“ukuhlaziyeka,” NW] imiphefumlo yenu. Kuba idyokhwe yam imnandi, nomthwalo wam ulula.” (Mateyu 11:29, 30, umbhalo osemazantsi weNew World Translation Reference Bible) Ukuthabatha idyokhwe kufanekisela umsebenzi. Kodwa phawula ukuba uYesu akasiceli ukuba siyithabathele kuthi idyokhwe size siwenze wonke umsebenzi sodwa. Sifanele singene naye edyokhweni. Kule meko, ukwamkela idyokhwe enikelwa nguKristu kubandakanya ukuzahlulela kuThixo, ukufuzisela oko ngokubhaptizwa emanzini, uze ke emva koko wamkele imbopheleleko yokuba ngumfundi kaKristu. Kodwa kunokwenzeka njani ukuba idyokhwe enjalo yokuba ngumfundi ibe yehlaziyayo?

18. (a) Kutheni le nto ukwamkela idyokhwe kaKristu kuhlaziya? (b) Umsebenzi wokushumayela usivuyisa uze usihlaziye njani?

¹⁸ Ukwamkela idyokhwe kaKristu kuyahlaziya kuba uYesu unobulali yaye uthobekile ngentliziyo. Ekubeni engumntu oqiqayo, kuyahlaziya ukusebenza naye phantsi kwedyokhwe enye. Ubunikela ingqalelo ubungakanani bamandla ethu nobuthathaka bethu. Kunjengokuba wathi, “Idyokhwe yam imnandi.” Kuyinyaniso ukuba, idyokhwe yokuba ngumfundi ibandakanya umsebenzi, umsebenzi ofanayo wokushumayela nokufundisa owenziwa nguYesu nawathi wawuqeqeshela abalandeli bakhe bokuqala. (Mateyu 28:19, 20; IZenzo 1:8) Kanti, onjani wona ukuhlaziya umsebenzi ukuxelela abanye ngoThixo wethu onothando, ngoNyana wakhe nangoBukumkani! Hayi indlela ekuhlaziya ngayo ukuxelela abantu indlela abanokuphila ngayo ngonaphakade eParadisi! Ibe xa besabela kweso sigidimi soBukumkani sinik’ ubomi baze basithelele ekukhonzeni uYehova uThixo, hayi indlela esiphuphuma ngayo luvuyo!—1 Timoti 4:16.

19. Kutheni le nto isiluleko somkhwe kaMoses sibalulekile kubadala bamabandla namhlanje?

¹⁹ Kwiminyaka yakutshanje, izigidi ezifuna uncedo ekwamkeleni idyokhwe kaKristu ziye zeza kwintlangano kaYehova, ibe oku kwandisa umsebenzi ongumthwalo kubavakalisi boBukumkani nakwabo babalusayo. Kubalusi bokomoya abanjalo, isiluleko awasifumanayo umprofeti uMoses kumkhwe wakhe sisesibalulekileyo. Wanika uMoses eli cebiso: “Ayilungile le nto uyenzayo. Uya kuzigqiba uphele amandla, naba bantu unabo; kuba lo msebenzi unzima kuwe, akunakuwenza wedwa.” Ngoko wacebisa uMoses ukuba akhethe amanye amadoda anobunkunkqele ukuze abelane nawo ngomsebenzi wokwalusa abantu. Ukulandela eli cebiso kwangqineka kunempumelelo. (Eksodus 18:18-27) Namhlanje, uqeqesho oluqhubekayo luya kuvelisa amadoda amaninzi anobunkunkqele, ‘izipho kubantu,’ anokuba nesabelo ekwaluseni umhlambi khon’ ukuze abadala bebandla bangapheli amandla.—Efese 4:8, 16.

20. UYesu Kristu noYise bafuna ntoni kuthi?

²⁰ Nangona uKristu wabongoza abalandeli bakhe ukuba bazibhokoxe ngamandla, yena noYise abafuni ukuba kubekho nabani na kuthi owenza ngaphezu koko anokukwenza. Ngasihlandlo sithile, xa abathile babegxeka uMariya udade boLazaro ngemigudu awayenzayo ngenxa kaYesu, wabakhalimela, esithi: “Myekeni; . . . yena ukwenzile abenako.” (Marko 14:6-8; Luka 13:24) Ibe koko kuphela okulindelweyo kuthi—ukwenza oko sinokukwenza. Umsebenzi onjalo wobuKristu awuloxanduva kodwa uyinto ehlaziyayo. Ngoba? Kuba ubangela ulwaneliseko lokwenyaniso ngoku nethemba eliqinisekileyo leengenelo zikanaphakade zexesha elizayo.

21. (a) Uyintoni umthwalo olula kaKristu, ibe yintoni ngokufuthi eyenza umsebenzi wokushumayela ube nzima? (b) Sifanele sibe yintoni isigqibo sethu esiqinileyo, ibe oko kuhambisana naliphi ithemba eliqinisekileyo?

²¹ Kuyinyaniso ukuba, uSathana uya kuzama indlela yokuba sitshutshiswe, kanye njengokuba nalowo sikunye naye edyokhweni, uYesu Kristu, watshutshiswayo. (Yohane 15:20; 2 Timoti 3:12) Kodwa khumbula ukuba asingomthwalo olula kaKristu osindayo. Kunoko, yinkcaso kaSathana nabameli bakhe ethi ngokufuthi yenze umsebenzi wethu ube nzima kangaka. Umthwalo kaKristu ubunjwe nje kuphela kukuphila ngokuvisisana nezinto ezifunwa nguThixo, ibe zona aziloxanduva. (1 Yohane 5:3) Ngoko ngamana thina, singaqhubeka sihleli noYesu Kristu kwidyokhwe yakhe, sizibhokoxa emsebenzini wokushumayela nokufundisa, kanye njengokuba naye wenzayo. Ngokwenjenjalo, njengoko wathembisayo, ‘siya kuhlaziyeka emiphefumlweni yethu.’

Unokuphendula Uthini?

◻ Ngokutsho kwabaseRoma 8:22, ibinjani imeko yoluntu?

◻ Kungaziphi indlela ekuthi ukwazi inyaniso kuhlaziye?

◻ Kutheni le nto ithemba loBukumkani lihlaziya kangaka nje?

◻ Iyintoni idyokhwe kaYesu, ibe kutheni le nto imnandi?

◻ Kukuthwala wuphi umthwalo okuya kusihlaziya?