UYehova Uyasilondoloza
Ngokubaliswa NguErich Kattner
GQUM! Yatsho incwadi indibetha entloko. Oku kwakukokokuqala ukuba ndidibane neBhayibhile, yaye yayiphethwe ngumfundisi wamaKatolika. Kwakutheni? Kwakungenxa yombuzo endandiwubuzile.
Umfundisi wayefundisa ikatekizim nonqulo yaye wayezama ukusikhuthaza thina makhwenkwe ukuba sifundele ubufundisi. Kumgudu wakhe wokwenza oku, wasebenzisa isibhalo esikweyoku-1 kwabaseTesalonika 4:17, apho kuthethwa ngabo ‘baxwilelwa emafini ukuya kuyikhawulela iNkosi esibhakabhakeni.’
Ndandisoloko ndinemibuzo, ngoko ndabuza ndathi: “Kutheni le nto usithi abefundisi baya ngqo ezulwini, ngoxa uYesu kwanyanzeleka ukuba aye kwelabafileyo, njengoko iSivumo Sokholo sisitsho?” (IZenzo 2:31) Kwaba ngoko endathi ndabethwa ngeBhayibhile entloko.
Umnqweno Wokwazi
Kodwa ndandizifuna ngokwenene iimpendulo. Kwananjengenkwenkwana ndandikuthanda gqitha ukunqula uThixo. Ndandidla ngokungena ndithandaze phantse kuzo zonke iityalike endandidlula kuzo. Kanti andizange ndaneliseke. Ngezizathu endingazaziyo ndandisoloko ndisiba nomsindo ngezinto endandizibona, njengonqulo-zithixo olugqithiseleyo olwalusenziwa ngabantu abathile okanye indlela ababeziphethe ngayo abanye abefundisi.
Xa ndandimalunga neminyaka esibhozo kuphela ubudala, ndafunda incwadi yam yokuqala. Yayinomxholo othi The Christianization of Brazil, Ndothuka. Kum kwabonakala ngathi yayilibali lokubulala, ukubulawa kwabantu baseIndiya egameni lonqulo. Ukufunda ngezinto ezinjalo kwakwanele ukuyiguqula indlela endandiziqonda ngayo izinto ezininzi.
Konke oku kwenzeka emva apho ngeminyaka yee-1920. Ndazalelwa eVienna, eOstriya, ngoAgasti 19, 1919, ibe ndandingowokuqala nowokugqibela kubazali bam. Xa ndandimalunga neminyaka emithandathu, ubawo, owayeyinjineli yombane, wafumana umsebenzi kumantla eCzechoslovakia, kummandla waseSudetenland onabantu abathetha isiJamani. Ngoko intsapho yakowethu yafudukela apho, yaye ekugqibeleni yafudukela kwidolophana ebizwa ngokuba yiWarnsdorf.
Yandikruqula mpela iCawa yamaKatolika. Ngamhla uthile, xa ndandikhathazeke kakhulu ngenxa yesohlwayo endandiphinde ndasifumana kumfundisi, ndagoduka ndilila ndivela esikolweni. Ngoxa ndandihamba phakathi kwamasimi, ndacinga ukuba kwakungenakwenzeka ukuba uThixo ukho, ngenxa yezinto ezigwenxa ezininzi endandizibonile nendandizifundisiwe.
Kwandula ke kwavakala ukuntyiloza kweentaka, ndaza ndaphawula iintyatyambo, amabhabhathane, nabo bonke ubuhle bendalo. Yaye kwatsho kwasa kum ukuba kumele ukuba ukho uThixo onothando kodwa oko kufane kuthiwe ngabantu bakaThixo mhlawumbi babengengabo konke konke. Kwaye mhlawumbi uThixo wayebancamile abantu. Kwaba ngoko ekwathi ndathandaza umthandazo wokuqala onyanisekileyo nosengqiqweni, ndimcela uThixo ukuba andincede ukuze ndimazi ukuba wayeya kuze aphinde abe nomdla emntwini. Oko kwenzeka ngowe1928.
Malunga nenyanga kamva umama wayekwintlangano yosapho eVienna; yayingumbhiyozo womhla wama-60 wokuzalwa kukanina. Apho umama wabona umnakwabo uRichard Tautz, owayehlala eMaribor eYugoslavia ngelo xesha. Wayesandul’ ukuba ngomnye waBafundi beBhayibhile, njengoko amaNgqina kaYehova ayebizwa ngolo hlobo ngelo xesha. Umama wabuyela ekhaya echwayitiswe ziinyaniso ezintsha zeBhayibhile awayezifundile. Oko wakubalisayo kwaba nengqiqo kum. Kwabonakala ngathi isandla sikaYehova sasisebenza.—INdumiso 121:5.
Ukuqhelisela Oko Ndandikufundile
Kamva, aBafundi beBhayibhile bagaleleka bevela eJamani, ukushumayela kwaqaliswa kummandla wethu. Kwiinyanga ezithile kamva, iintlanganiso ezithe rhoqo zaqaliswa ukuqhutyelwa kwidolophu eselumelwaneni eJamani, yaye sasihamba iikhilomitha ezimbalwa siwela umda ukuya kuzo. Kwaba ngeli xesha endathi ndadibana no-Otto Estelmann, lowo ndathi ndasebenza naye ngokusondeleyo kwiminyaka yamva.
Ngowe-1932 intsapho yasekhaya yafudukela eBratislava, ikomkhulu leSlovakia, malunga nama-72 eekhilomitha ukusuka eVienna. Ngelo xesha kwakungekho maNgqina angamanye apho. Ndagqiba kwelokuba ndandimele ndikhuthale kumsebenzi wokushumayela. Ngoko ndakhetha intsimi endandicinga ukuba yeyona ilukhuni, yayisisakhiwo esiyindlu enamagumbi adibeneyo eyayihlaliwa ikakhulu ziintsapho zamagosa karhulumente. Kwakuthethwa iilwimi ezine ngoko eBratislava: isiSlovak, isiCzech, isiJamani nesiHungary.
Ndandihamba ndedwa ndinkqonkqoza ngokukhalisa iintsimbi kwiminyango yamagumbi, ndiphethe amaqweqwe awayenentshumayelo emfutshane eshicilelwe ngeelwimi ezine. Maxa wambi ubawo, owayengekabilo Ngqina, wayesima kwelinye icala lendlela, andibukele aze anikine intloko. Ngokukhawuleza emva koko naye wammela ngokuqinileyo uYehova.
NgoFebruwari 15, 1935, mna nabanye sabhaptizelwa ebhafini kwintlanganiso ekhethekileyo yomveleli ohambahambayo eyaqhutyelwa kwikhaya lethu. Ngaloo nyaka ndagqiba kwisikolo somsebenzi ndaza ndathenjiswa ngokunikwa umsebenzi onomtsalane, kodwa kwangaxeshanye ndamenyelwa ukuya kusebenza kwiofisi yesebe yeWatch Tower Society esePrague, eCzechoslovakia. Emva kwengxoxo enzulu nabazali bam, lo mcimbi sawusa kuYehova ngomthandazo. Ngoko, ngokukhawuleza phambi kokufikelela i-16 leminyaka, ndangenela inkonzo yexesha elizeleyo ngoJuni 1, 1935.
Ukukhonza Ngamaxesha Anobunzima
Kwiofisi yoMbutho esePrague, ndafunda ukusebenzisa oomatshini bokuchwetheza nabacwangcisa amagama nokuhlanganisa oko kubhaliweyo emaphepheni. Savelisa amaphecana sisenzela abazalwana bethu eJamani, umsebenzi wabo owawuvaliwe nguHitler, ibe sakwavelisa neMboniselo ngeelwimi eziliqela. Noko ke, la yayingamaxesha anobunzima ngomsebenzi wethu eYurophu, yaye ekugqibeleni amagunya alivala isebe lethu ngoDisemba 1938.
Ndabhekisa umbombo ekhaya eBratislava, apho urhulumente wayesele ephantsi kwabaxhasi bamaNazi, yaye ndasebenza ngokungaqondakaliyo iinyanga ezimbini ndishumayela kwindlu ngendlu. Malunga neli xesha iOfisi eyiNtloko yeWatch Tower Society kwelaseYurophu eBern, eSwitzerland, yandibhalela indichazela ukuba ndiye eBern ukuba ndandikuvuma ukukhonza njengovulindlela naphi na ehlabathini.
Ndasamkela esi simemo ndaza ndalinikel’ umva ikhaya. Ndandimbona okokugqibela ubawo, yaye kwakuza kudlula ama-30 eminyaka ukuze ndibone umama kwakhona. Kodwa uYehova wasilondoloza sobathathu kuzo zonke iinzima ezathi zalandela. Ngokomzekelo, kamva ndafumanisa ukuba iHlinka Guarda eyayidume kakubi (uhlobo lwamaSS angamaSlovak) yayindifuna kwasekushiyeni kwam iBratislava. Yaye endleleni, xa amagosa amaNazi aqondayo ukuba ndandingomnye wamaNgqina kaYehova, azama ukubangela ukuba ndibanjwe kwimida yeYugoslavia neItali. Kodwa uYehova waqhubeka endilondoloza.—INdumiso 48:14; 61:3.
Ekufikeni kwam eBern ndeva ukuba ndandiza kuthunyelwa eShanghai, eTshayina, kodwa kamva esi sabelo satshintshelwa eBrazil. Ndasebenza kwisebe laseBern de ndafumana imvume yokungena eBrazil. Ngeli xesha iingxaki eYurophu zazikhula. Imida yayivalwa, ngoko ngoAgasti 1939 uMbutho wandibongoza ukuba ndiye eFransi. Inqanawa yorhwebo yaseBrazil uSiqueira Campos yayiphuma eLe Havre, eFransi ngoAgasti 31, yaye ndandiza kukhwela kuyo. Kwathi kwiiyure ezine nje ngaphambi kokuba iMfazwe Yehlabathi II iqhambuke, le nqanawa yanduluka.
Kamva ndaphawula ukuba abahambi ababemalunga neshumi elinesibini endandikunye nabo kwicandelo legumbi lokulala lodidi lwesibini babengabameli bamaNazi. Babengakuthandi ukushumayela kwam konke konke. Izihlandlo ezininzi babezama ukundehlisa enqanaweni. Xa safikayo eVigo, eSpeyin, umphathi onobuhlobo wandilumkisa ukuba ndingayi elunxwemeni ngoxa babeselapho. ELisbon, ePortugal, abameli bamaNazi balitshintsha ngobuqhophololo ixesha lokunduluka kwenqanawa kwibhodi yezaziso ukuze ndishiywe apho. Kodwa kwakhona uYehova wayendilondolozile. (INdumiso 121:3) Ndafika eSantos, eBrazil ngengokuhlwa yama-24 kuSeptemba we-1939. Ngemini elandelayo ndenjenjeya ukuya eSão Paulo, apho kwakukho iofisi yoMbutho.
Ukukhonza EBrazil
NgoSeptemba we-1939 kwakukho i-127 kuphela lamaNgqina eBrazil, ngoko eyayinabemi abamalunga nama-41 ezigidi. Malunga nasemva kweveki ndiseSão Paulo, ndanduluka ukuya kwisabelo sam sobuvulindlela kummandla osemazantsi elizwe, eRio Grande do Sul. Ndandiza kuhlala namanye amaNgqina awayethetha isiJamani asinqe sawo sisePoland nawayehlala kummandla osemagqagaleni wehlathi elishinyeneyo.
Uhambo ngololiwe lwaqhubeka kangangeentsuku ezine. Umgaqo kaloliwe wawuphela eGiruá, ndawo leyo eyayifana nedolophu yaseNtshona esemagqagaleni yemihla yamandulo kummandla woMntla Merika. Ukusuka eGiruá ndandiza kuhamba ezinye iikhilomitha ezingama-32 kwihlathi elishinyeneyo ukuze ndifike apho la maNgqina ayehlala khona. Inqwelo eyayihambisa impahla kaloliwe yandikhwelisa, yaza yandehlisa endleleni enothuli. Ndibetha ngezikaTshiwo umgama omalunga nekhilomitha enesiqingatha ukutyhubela ihlathi lendalo nokuhamba ndiwela umsinga omncinanana, ekugqibeleni ndafika kule ndawo.
Ngenxa yokuba lo mmandla wawusemagqagaleni, inkonzo yam yobuvulindlela yayilinganiselwe kumaxesha axa uthile wayenokundikhwelisa kwinqwelo encinane etsalwa ngamahashe. Ukufumana abantu kwakuthetha ukuhamba iintsuku eziliqela, ukulala kwiindlela ezinothuli ukwenzela ukuphepha iinyoka okanye phantsi kwenqwelo xa lisina. Sashumayela nakwiidolophu ezinjengeCruz Alta.
Ngowe-1940 uMbutho waphinda wandithumela ePorto Alegre, ikomkhulu lelizwe laseRio Grande do Sul. Apho ndathelela owayesakuba ngugxa wam kwasebuntwaneni uOtto Estelmann, naye owayethunyelwe eBrazil. Kwabonakala ukuba abasemagunyeni balapho babengabaxhasi bamaNazi. Sabanjwa saza sanikwa ukhetho lokutyobela iphepha sikhanyela ukholo lwethu okanye sikhweliswe kuloliwe wangokuhlwa ukuze siye kuvalelwa sodwa kumda weUruguay. Sasikuloo loliwe ngaloo ngokuhlwa.
Phantsi Kokuvalelwa
Apho emdeni sachitha phantse iminyaka emibini sivalelwe endiwini. Kodwa kwakhona uYehova wasinceda. Oosomashishini abathile abangamaJuda banikela uncedo lwabo. Ngenxa yoko, endaweni yokugcinwa entolongweni, ndavunyelwa ukuba ndiphangele, kodwa sasigcinwe phantsi kweliso elibukhali. Sasingakwazi ukunxibelelana neofisi yesebe yoMbutho.
Noko ke, ngenye imini xa sasisesitratweni sadibana nomzalwana onguvulindlela owayabelwe eUruguay evela eYurophu. Kwenzeka nje ukuba atyelele emdeni. Okunjani ukumanyana kwakhona! Wasinika iBhayibhile yesiJamani neMboniselo yesiNgesi. Kwaba ngoko endathi ndaqalisa ukufundisisa isiNgesi.
Ngoko, ngoAgasti 22, 1942, iBrazil yabhengeza imfazwe nxamnye neJamani neltali, nto leyo eyathetha inguqulelo kwimeko yethu. Sabuyiselwa ePorto Alegre, yaye emva kokuncinwa, ndakhululwa. Emva koko, ndadibana namaNgqina aselula endandiwazi kwangaphambili kummandla wamahlathi apho ndandabelwe khona kuqala. Ngoko ndakwazi ukunxibelelana neofisi yesebe, yaye ndabuyela kwakwinkonzo yobuvulindlela. Abane kolu lutsha bandithelela kumsebenzi wobuvulindlela, yaye safumana abantu abasamkelayo isigidimi soBukumkani, abanye babo abasashumayelayo nangoku.
Amagosa amatsha awayesegunyeni ayenobuhlobo kuthi, ngoko ngowe1943 salungiselela indibano yokuqala encinane ePorto Alegre. Abantu abezayo babengama-50, phantse isiqingatha sabo babezile yayingabakwantsasana ababengafakanga sinxibo sabo. Kunyaka kamva, ngowe-1944, salungiselela enye indibano. Emva koko ndabizelwa ukuya kukhonza kwiofisi yesebe yoMbutho, eyayifuduselwe eRio de Janeiro isuswa eSão Paulo.
IGiliyadi Nasemva Koko
Ngowe-1950 ndamenyelwa ukuba ngomnye wabafundi bodidi lwe-16 kwisikolo seBhayibhile seWatchtower saseGiliyadi eSouth Lansing, eNew York. Emva kokugqiba apho ngoFebruwari 1951, ndafumana isabelo sokwexeshana sobuvulindlela obukhethekileyo kwiBandla laseSouth Bronx, eNew York, kodwa kamva ndabuyela eBrazil.
Malunga nonyaka onesiqingatha ndakhonza njengommeli ohambahambayo woMbutho, njengomveleli wesithili nowesiphaluka. Kwandula ke, ngoFebruwari 1953, ndabuyiselwa kwiofisi yesebe eRio de Janeiro ndaza ndabelwa ukwenza umsebenzi wokuguqulela. Kamva, ukususela ngoSeptemba 1961 ukusa kuSeptemba 1963, ndaba nelungelo lokusebenza kwisabelo esikhethekileyo sokuguqulela kwikomkhulu loMbutho eBrooklyn, eNew York. Ngoxa ndandilapho, ndadibana nesibini endandisazele eBrazil. Indoda yakuvuma ukufundisisa nam kwihotele ababehlala kuyo yaza yeyiseka yinyaniso.
Kwiinyanga ezimbalwa emva koko, xa sasibuyele eBrazil, ndadibana naye kwakhona. Kodwa wayethande ukuyekelel’ umxakatho noko. Ngoko ndathi kuye: “Uyabona Paul, wena uyinjineli yokwakha. Kodwa masithi bendiyinjineli yokwakha ndize ndikuxelele ukuba uphahla lwendlu luza kukuwela. Ubuya kwenza ntoni? Kaloku, ‘njengenjineli’ yeBhayibhile, ndiyakuxelela ngaphandle kokubhinqa omfutshane wenze oko ukwaziyo, usenyuleni.”
Ngokukhawuleza wabhaptizwa yaye ebekhonza njengomdala ongumKristu kangangeminyaka eliqela. Wayekwaluncedo kakhulu ekwakhiweni kwezakhiwo zesebe ezitsha nezikhulu eCesário Lange, eSão Paulo, apho ama-480 ethu asebenza khona ngoku ukukhonza iimfuno zokomoya zamaNgqina alinani elandayo eBrazil.
Ulwando Oluqhubekayo
Ngowe-1945 saba notyelelo lokuqala lomongameli weWatch Tower Society, uNathan H. Knorr, nolwesekela-mongameli langoko, uFrederick Franz. Kwalungiselelwa indibano kwigumbi lokuqeqeshela ukuthamba lasePacaembu kwisiXeko saseSão Paulo, yaye ndandiguqulela iintetho zabazalwana ababesityelele. Incopho yabantu ababezile yayingama-765.
Ndikhumbula uMzalwana uKnorr ejonge ibala lemidlalo elikhulu elalimelene nathi yaye ezibuza enoba sasiya kuze silizalise na. Kaloku, salizalisa ngoDisemba 1973, xa ama94 586 ayezalise iPacaembu Stadium kwindibano “Yoloyiso Lobuthixo.” Oku kwagqwesa ngoAgasti 1985 kwindibano “Yabagcini Bengqibelelo” eMorumbi Stadium, kwisiXeko saseSão Paulo, apho kwakukho abali-162 941. Yaye kwangaxeshanye, amanye ama-86 410 ayekho kwibala laseRio de Janeiro. Kamva, ama-23 eendibano ezongezelelekileyo zalenza likhulu inani labantu ababekho kwiindibano “Zabagcini Bengqibelelo” eBrazil ukusa kuma-389 387!
Ukutyhubela iminyaka ndiye ndanelungelo lokuguqulela iintetho zezithethi ezityeleleyo ezivela kwikomkhulu laseBrooklyn, eNew York. Kutshanje, xa esinye sazo besihamba nam saza saphawula abantu abaninzi endandibafundela ukutyhubela iminyaka besiza kundibulisa, ngeliqhulayo siye sathi: “Andizange ndiyibone indoda engatshatanga inabantwana abaninzi kangaka.”
Iimbalasane zokwenene ebomini bam ibikwaziindibano zezizwe ngezizwe endiye ndakwazi ukuya kuzo kwamanye amazwe. Kwindibano eyayiseNuremberg ngowe-1969, ndabona umama okokuqala emva kweminyaka engama-30. Wafa ethembekile ngowe-1973. Ubawo akazange avunyelwe ukuba aye kwindibano ekwelinye ilizwe, yaye andizange ndiphinde ndimbone emva kokushiya ikhaya. Ngowe-1978 ndaba nelungelo lokunikela intetho yesidlangalala kwindibano yezizwe ngezizwe eVienna, eOstriya indibano yokuqala enkulu endathi ndaya kuyo kwisixeko endazalelwa kuso.
Ebudeni bale minyaka mininzi ndiseBrazil, ndiye ndangqina ukuba uYehova unguLowo “uhlumisayo.” (1 Korinte 3:7) Ngowe-1948 satsho ngaphaya kwabavakalisi abali-1 000. Emva koko, inani labavakalisi lantinga ukuya kutsho kwi-12 992 ngowe-1958 nakuma60 139 ngowe-1970. Endaweni ye-127 labavakalisi boBukumkani esasinabo ngoSeptemba 1939, sasine-196 948 ngoAgasti 1986. Ngokuqinisekileyo, ‘omncinanana uye waba luhlanga olunamandla’ nakweli lizwe.—Isaya 60:22.
Kodwa abemi baseBrazil nabo baye banda, ukususela kuma-41 ezigidi ngowe-1939 ukuya kutsho kwabangaphezulu kwe-135 lezigidi ngoku. Ngoko sisenentsimi enkulukazi emele isetyenzwe. Bekuluvuyo kum ukubandakanyeka kolu lwando lumangalisayo uYehova alunikeleyo, yaye hayi indlela ekuye kwachwayitisa ngayo! Ngoko kuye nabani na ofuna ukukhonza uYehova ixesha elizeleyo ndinokuncomela ndithi: Phambili! Musa ukoyika nantoni na enokuhla, kuba “uYehova uya kukugcina ukuphuma kwakho nokungena kwakho.”—INdumiso 121:7, 8.
[Amagama acatshuliweyo akwiphepha 26]
“Ndiyakuxelela ngaphandle kokubhinqa omfutshane wenze oko ukwaziyo, usenyuleni”
[Umfanekiso okwiphepha 25]
UN. H. Knorr ethetha, njengoko uErich Kattner wayetolika, eSão Paulo, eBrazil, ngowe-1945