Ibali Lobomi

Ukunyamezela Kuzisa Uvuyo

KUBALISA UMÁRIO ROCHA DE SOUZA

“Limfiliba ithemba lokuba uMnu. Rocha uza kusinda kolu tyando.” Nakuba sekudlule iminyaka engama-20, watsho loo mazwi okuncama ugqirha, ndisaphila ibe ndisengumshumayeli wexesha elizeleyo wamaNgqina kaYehova. Yintoni eyandinceda ndanyamezela yonke le minyaka?

NDAKHULELA efama kufuphi naseSanto Estêvão, idolophana ekwiphondo laseBahia, kumntla-mpuma weBrazil. Ndathi ndakuba neminyaka esixhenxe, ndaqalisa ukuncedisa utata kumsebenzi wefama. Yonk’ imihla xa ndibuya esikolweni, wayethuma umsebenzi othile. Ethubeni, rhoqo xa esiya kwimicimbi ethile esixekweni iSalvador, elikomkhulu lelo phondo, wayeyishiya kum ifama.

Sasingenawo umbane, iitephu zamanzi, okanye ezinye izinto eziluncedo zanamhlanje, ukanti sasonwabile. Sasidla ngokudlala ngeekite okanye iimoto esizenzele ngamaplanga nabahlobo bam. Ndandidlala ixilongo kwimisitho yecawa, yaye ndicula kwikwayala yecawa. Kulapho ke ndabona khona incwadi ethi História Sagrada (Imbali Engcwele), neyanditsho ndanomdla eBhayibhileni.

Ngowe-1932, xa ndandineminyaka engama-20 ubudala, umntla-mpuma weBrazil wantlithwa kanobom, yimbalela eyatsala ixesha elide. Iinkomo zakuthi zafa, nasemasimini akwamila nto, ndaza ke ndafudukela eSalvador, apho ndafika ndafumana umsebenzi wokuqhuba itramu (ibhasi ehamba esiporweni). Ethubeni, ndaqesha indlu ndaza ndalanda intsapho yakuthi yaza kuhlala nam. Ngowe-1944, uTata wafa kwaza kwafuneka ndinyamekele uMama, oodadewethu abasibhozo nabaninawa bam abathathu.

Ndayeka Ukuqhuba Itramu Ndaya Kushumayela

Enye yezinto zokuqala endazenzayo ukufika kwam eSalvador kukuzithengela iBhayibhile. Emva kokuhamba icawa yaseBhaptizi iminyaka ethile, ndaba ngumhlobo kaDurval, naye owayeqhuba itramu. Sasidla ngokuxubusha ixesha elide ngeBhayibhile. Ngenye imini wandinika incwadana enomxholo othi, Where Are the Dead?a Nakuba ndandikholelwa ukuba umntu unomphefumlo ongafiyo, ndaba nomdla wokufun’ ukuqinisekisa ezo ndinyana zeBhayibhile zazicatshulwe kulo ncwadana. Ndamangaliswa kukufumanisa ukuba, iBhayibhile iyavuma ukuba umphefumlo owonayo uya kufa.—Hezekile 18:4.

Ebona umdla wam, uDurval wacela uAntônio Andrade, umlungiseleli wexesha elizeleyo wamaNgqina kaYehova ukuba andityelele ekhaya. Emva kotyelelo lwakhe lwesithathu, uAntônio wandimema ukuba ndimpheleke ukuya kushumayela kwabanye. Emva kokuthetha kwimizi yokuqala emibini, wathi, “Ngoku kuza kuthetha wena.” Ndandisoyika gqitha, kodwa into eyandivuyisayo kukuba, enye intsapho yaphulaphula ngenyameko yaza yazamkela iincwadi ezimbini endandizihambisa. Nanamhlanje, ndisavuya gqitha xa ndifumene umntu onomdla kwinyaniso yeBhayibhile.

NgoAprili 19, 1943, ngomhla wesikhumbuzo sokufa kukaKristu kuloo nyaka, ndabhaptizwa kuLwandlekazi lweAtlantiki kufuphi neSalvador. Ngenxa yokunqongophala kwamadoda anamava, ndamiselwa ukuba ndincedise iqela lamaNgqina awayedibana kwikhaya likaMzalwan’ uAndrade kwesinye sezitrato ezincinane ezidibanisa inxalenye ekumantla nakumazantsi eso sixeko.

Inkcaso Yokuqala

Umsebenzi wethu wokushumayela wawungathandwa kangako ebudeni beMfazwe Yehlabathi II (ngowe-1939-45). Bambi abasemagunyeni baberhanela ukuba siziintlola zeUnited States kuba inkoliso yeempapasho zethu yayivela kwelo. Ngenxa yoko, yayixhaphakile into yokubanjwa size sincinwe. Xa kukho iNgqina elingabuyanga entsimini, sasivele siqonde ukuba libanjiwe, size ke sisuke siye kwisikhululo samapolisa sizame ukuba likhululwe.

NgoAgasti 1943, apho eSalvador kwafika uAdolphe Messmer, iNgqina laseJamani, eze kusinceda ukulungiselela indibano yethu yokuqala. Emva kokufumana imvume yokuqhuba loo ndibano kwabasemagunyeni, kwapapashwa izibhengezo zentetho yesidlangalala eyayinomxholo othi “Inkululeko Kwihlabathi Elitsha” kumaphephandaba asekuhlaleni, kwiifestile zeevenkile nakwiitramu. Kodwa kusuku lwesibini lwaloo ndibano, saxelelwa lelinye ipolisa ukuba imvume yethu yokuqhuba loo ndibano irhoxisiwe. Ubhishophu omkhulu waseSalvador waphathel’ imbengwana umphathi wamapolisa ukuba ayivale loo ndibano. Noko ke, kuAprili olandelayo sade savunyelwa ukuqhubeka naloo ntetho yesidlangalala yayibhengeziwe.

Usukelo Olufanelekileyo

Ngowe-1946, ndamenyelwa kwiNdibano Yobuthixo Yezizwe Ezivuyayo kwisixeko saseSão Paulo. Umphathi wenqanawa yemithwalo yaseSalvador wavuma ukuba iqela lethu lihambe ngenqanawa yakhe ukuba nje liza kukwazi ukulala kumgangatho wayo. Phezu kwezaqhwithi nokugula lulwandle, emva kweentsuku ezine safika sikhuselekile kwisixeko saseRio de Janeiro. AmaNgqina aseRio asamkela kwimizi yawo ukuze siphumle iintsukwana ngaphambi kokuba sidlule ngololiwe. Ukufika kwethu eSão Paulo samkelwa liqela elaliphethe iibhodi ezinombhalo othi, “MaNgqina KaYehova Namkelekile.”

Kungekudala sibuyele eSalvador, ndaxelela uHarry Black, umvangeli wasemazweni owayevela eUnited States ngomnqweno wam wokuba nguvulindlela, indlela ababizwa ngayo abalungiseleli bexesha elizeleyo bamaNgqina kaYehova. UHarry wandikhumbuza ngentsapho endandimele ndiyinyamekele watsho ecebisa ukuba ndibe nomonde. Ekugqibeleni, ngoJuni 1952, abaninawa bam noodadewethu babesele beyekile ukuxhomekeka kum, ngoko ndathunyelwa ukuze ndibe nguvulindlela kwibandla elincinane laseIlhéus malunga neekhilomitha ezingama-210 kumazantsi onxweme lwesixeko saseSalvador.

Ilungiselelo Lobubele

Kunyaka olandelayo ndathunyelwa eJequié, isixeko esikumbindi welo phondo nekwakungekho maNgqina kuso. Umntu wokuqala ukuthetha naye yaba ngumfundisi walapho. Wathi loo dolophu ithi yena, waza wandalela ukushumayela apho. Walumkisa amarhamente akhe ngokufika ‘komprofeti wobuxoki’ watyala noongcothoza bokubek’ esweni umsebenzi wam kuyo yonke loo dolophu. Nakuba kwakunjalo, loo mini ndahambisa imibhalo engama-90 yoncwadi lweBhayibhile ndaqalisa nezifundo zeBhayibhile ezine. Yaba mibini nje iminyaka kwaba sele kukho iHolo yoBukumkani namaNgqina angama-36 eJequié! Namhlanje, kukho amabandla asibhozo namaNgqina amalunga nama-700 apho.

Kwiinyanga zokuqala ndilapho eJequié, ndaqesha igunjana elalisekuphumeni kwaloo dolophu. Emva koko ndadibana noMiguel Vaz de Oliveira, umnikazi weHotele iSudoeste, enye yeehotele eziphambili eJequié. UMiguel wasamkela isifundo seBhayibhile waza wandicenga ukuba ndiye kuhlala kwelinye lamagumbi ehotele yakhe. Kamva, yena nomfazi wakhe baba ngamaNgqina.

Enye into evuyisayo xa ndicinga ngeJequié nguLuiz Cotrim, utitshala wesikolo samabanga aphakamileyo endafunda naye iBhayibhile. ULuiz wathembisa ukundinceda ndiphucule kulwimi lwesiPhuthukezi nezibalo. Ndandingafundanga kuyaphi, ngoko ndayamkela loo nyhweba. Ezo zifundo sasizenza emva kwesifundo seBhayibhile noLuiz veki nganye zandinceda ndakwazi ukusingatha amalungelo angakumbi endawafumana kungekudala kwintlangano kaYehova.

Ukujamelana Nocelomngeni Olutsha

Ngowe-1956, ndafumana ileta endibizela kwiofisi yesebe lethu elaliseRio de Janeiro ngoko, ndandiza kuqeqeshelwa ukuba ngumveleli wesiphaluka, igama ababizwa ngalo abalungiselele abahambahambayo bamaNgqina kaYehova. Olo qeqesho, nekwakukho abanye abasibhozo kulo lwathabatha ixesha elingaphezu kwenyanga. Njengoko olo qeqesho lwaluphela, ndabelwa ukuya kukhonza eSão Paulo, nto leyo eyanditsho ndangcangcazela. Ndandizibuza: ‘Yintoni endiza kuyenza apho, umntu omnyama, phakathi kwamaTaliyane? Khona, aza kundamkela njani?’b

Kwibandla lokuqala endatyelela kulo kwisithili saseSanto Amaro, ndakhuthazwa gqitha kukubona iHolo yoBukumkani izele ngamaNgqina nabantu abanomdla. Ndabona ukuba yayingekho into endandiyoyika kuba bonke abo bangama-97 kwelo bandla bahamba nam entsimini kulo veki. Ndicinga ndathi, ‘Ngabazalwana bam ngokwenene.’ Bububele babo bazalwana noodade bathandekayo obandomelezayo ndanyamezela.

Iidonki, Amahashe, Nee-anteater

Enye yezinto ezinzima ababejamelana nayo abaveleli abahambahambayo ngezo mini, yimigama emide besiya kumabandla namaqela amancinane amaNgqina asemaphandleni. Apho zazinqaba okanye zingabikho kwaukubakho izinto zokuhamba, ibe inkoliso yeendlela zazimxinwa izezomhlaba.

Ukuze zicombulule le ngxaki, ezinye iziphaluka zazithenga idonki okanye ihashe eliza kusetyenziswa ngumveleli wesiphaluka. NgoMvulo, ndandithabatha impahla yam ndikhwele ehasheni ndize ndihambe iiyure ezili-12 ukuya kwibandla elilandelayo. ESanta Fé do Sul, amaNgqina ayenedonki egama linguDourado (Goldie) eyayizazi zonke iindlela eziya kumaqela ezifundo ezikuloo mmandla wasemaphandleni. Le donki yayisuka ime phambi kwesango lefama ilinde ngomonde de ndivule. Emva kotyelelo lweqela elithile, yayisuka idlulele kwiqela elilandelayo.

Nokunqongophala kweendlela zonxibelelwano ezinokuthenjwa kwakuwenza nzima lo msebenzi. Ngokomzekelo, ukuze ndityelele iqela elincinane lamaNgqina elalihlanganisana kwifama ekwiPhondo laseMato Grosso, kwakufuneka ndiwele uMlambo iAraguaia ngephenyana ndize ke ndifike ndilindwe ngehashe okanye idonki endiza kunqumla ngayo ehlathini ndihamba umgama weekhilomitha ezingama-25. Ndabhalela eli qela ndilazisa ngotyelelo lwam, kodwa kuyacaca ukuba loo leta ayizange iye kufika, kuba ndafika kungekho mntu undilindeleyo emva kokuwela umlambo. Laliseliza kutshona, ngoko ndagcinisa impahla yam kwenye ibhari encinane, ndahamba ngeenyawo ndiphethe ibrifkheyisi nje kuphela.

Zange kube kudala kwarhatyela. Njengoko ndandithwabaza ebumnyameni, ndeva ianteater (isilwanyana esitya iimbovane okanye iintubi) ibeth’ ithatha. Ndakhe ndeva ukuba esi silwanyana sinokuvuka size simbulale umntu ngaloo milenze yaso yangaphambili yomeleleyo. Ndandisithi ke ndakuva into erhwashazayo, ndixhume ndibambe ibrifkheyisi ngaphambili ndizama ukuzikhusela. Emva kokuthwabaza iiyure, ndafika komnye umfula omncinane. Ngendlela ekwakumnyama ngayo, andizange ndibone ukuba kukho ucingo oluhlabayo ekubiywe ngalo kwelinye icala lomlambo. Ndatsiba kakuhle apho emanzini, kodwa ndaya kuwa phezu kocingo lwaza lwandikrazula!

Ndade ndagaleleka efama ndaza ndakhonkothwa zizinja. Yayixhaphakile into yokuhlaselwa kwabantu ngamasela eegusha ebusuku, ngoko lathi livulwa nje ucango, ndabe sendizichaza. Ewe kona ndandingumbono olusizi, impahla ikrazukile yaye ilujaja ligazi, kodwa abazalwana bavuya gqitha bakundibona.

Phezu kwabo nje ubunzima esasijamelana nabo, kwakumnandi gqitha ngezo mini. Ndandihamba ngehashe nangeenyawo, imigama emide, maxa wambi ndiphumle phantsi komthunzi wemithi, ndiphulaphule iintaka zintyiloza ngoxa ndibukele iimpungutye zinqumla phambi kwam kwezo ndlela. Enye into eyayivuyisa kukwazi ukuba utyelelo lwam lubanceda ngokwenene abanye abantu. Abaninzi babendibhalela bebulela. Abanye babendibulela ngokobuqu xa sidibana ezindibanweni. Ndandivuyiswa gqitha kukubona abantu besoyisa iingxaki zabo baze benze inkqubela ngokomoya!

Ekugqibeleni Ndafumana Umncedi

Kuloo minyaka yokutyelela amabandla, ndandisoloko ndindedwa, ibe oko kwandifundisa ukuthembela kuYehova ‘njengengxondorha negwiba lam.’ (INdumiso 18:2) Ngaphezulu, ndaqonda ukuba ukungatshati kundinceda ndinikele ingqalelo epheleleyo kwizilangazelelo zoBukumkani ngaphandle kokuphazanyiswa.

Noko ke, ngowe-1978 ndadibana nodade onguvulindlela uJúlia Takahashi. Wayencame umsebenzi ohlawula kakuhle wokuba ngumongikazi kwisibhedlele esikhulu saseSão Paulo ukuze akhonze apho kukho intswelo engakumbi yabavakalisi boBukumkani. Abadala abathile abangamaKristu ababemazi bamncoma gqitha ngokomoya nokufanelekela kwakhe ukuba nguvulindlela. Njengokuba nawe unokuzicingela, isigqibo sam sokutshata emva kweminyaka emininzi kangako sabothusa abanye. Omnye umhlobo wam wayengakholelwa, waze wandithembisa ngenkomo ebunzima buziikhilogram zingama-270 ukuba ndiza kutshata ngokwenene. Ngokwenene kwakuxhelw’ eXhukwane sisosa inyama yaloo nkomo emtshatweni wethu ngoJulayi 1, 1978.

Ukunyamezela Nakuba Impilo Imaxongo

Sikunye noJúlia satyelela amabandla akumzantsi ukusa kumzantsi-mpuma weBrazil kwiminyaka esibhozo elandelayo. Kanye ngelo xesha ndahlaselwa yintliziyo. Izihlandlo ezibini ndawa isiduli ngoxa ndisathetha nomnini-mzi kumsebenzi wokushumayela. Ngenxa yokugula, savuma ukuya kuba ngoovulindlela abakhethekileyo kwidolophu yaseBirigüi, kwiPhondo laseSão Paulo.

Ngelo xesha, amaNgqina aseBirigüi andithabatha ngemoto andisa kwagqirha kwisixeko saseGoiânia esimalunga neekhilomitha ezingama-500 ukusuka apho. Yathi imeko yam yakuthembisa, ndenziwa uqhaqho ndafakelwa ipacemaker (umatshini oncedisa ukubetha kwentliziyo). Oko kwenzeka kwiminyaka emalunga nama-20 eyadlulayo. Nakuba kwaye kwafuneka ndenziwe utyando lwentliziyo kabini emva koko, ndisaphila yaye ndisashumayela ndisenza abafundi. Njengabafazi abaninzi abathembekileyo bamaKristu, uJúlia ebesoloko engumthombo wokhuthazo kum.

Nakuba impilo yenze kwanzima kum ukushumayela yaye maxa wambi kundidimaza oko, ndisakwazi ukuba nguvulindlela. Ndihlala ndizikhumbuza ukuba uYehova akazange asithembise ubomi obutofotofo kule nkqubo indala. UPawulos namanye amaKristu athembekileyo okuqala kwafuneka banyamezele, ngoko asikho isizathu sokulindela ukuba izinto ziya kusuke ziguquke kuthi.—IZenzo 14:22.

Kutshanje, ndiye ndafumana iBhayibhile yam yokuqala endayifumana kwiminyaka ye-1930. Kuqweqwe olungaphakathi, ndandibhale kulo ama-350, inani labavakalisi boBukumkani baseBrazil ukufika kwam kwiintlanganiso zamaKristu ngowe-1943. Akukholeleki oko xa ucinga ukuba ngoku kukho amaNgqina angaphezu kwama-600 000 eBrazil. Lilungelo gqitha ukwazi ukuba ndiye ndanenxaxheba kolu lwando! Ngokuqinisekileyo, uYehova uye wandisikelela ngendlela engathethekiyo ngokunyamezela. Njengomdumisi, ndinokutsho ndithi: “Inkulu into asenzele yona uYehova. Siye savuya.”—INdumiso 126:3.

[Imibhalo esemazantsi]

[Umfanekiso okwiphepha 9]

AmaNgqina ebhengeza intetho yesidlangalala kwindibano yokuqala kwisixeko saseSalvador, ngowe-1943

[Umfanekiso okwiphepha 10]

AmaNgqina afika eSão Paulo eze kwiNdibano Yezizwe Ezivuyayo, ngowe-1946

[Imifanekiso ekwiphepha 10, 11]

Xa ndandityelela amabandla ekupheleni kweye-1950

[Umfanekiso okwiphepha 12]

Ndikunye nomfazi wam, uJúlia