UMikayeli UMthetheli Omkhulu Usuka Eme

“Ngelo xesha uya kusuka eme uMikayeli, umthetheli omkhulu, omela oonyana babantu bakowenu.”—DANIYELI 12:1.

1. Yintoni eseza kwenzeka kwiziganeko zehlabathi exelwa kwangaphambili eBhayibhileni, ibe yiyiphi imibuzo ephakamayo mayela nabantu bakaThixo ngenxa yoku?

UYEHOVA uye wanikela esi silumkiso sifanelekileyo: Alusayi kuze lubekho uxolo emhlabeni lo gama nje ukruthakruthwano oluphakathi kokumkani wasentla nowasezantsi lusaqhubeka. La magunya mabini ebeya kusoloko enezilangazelelo ezingafaniyo. Ngaphezu koko, kwincopho yobutshaba babo, ukumkani wasentla uya kusongela imekobume yokomoya yabantu bakaThixo ngaphambi kokuba ‘afike ekupheleni kwakhe.’ (Daniyeli 11:44, 45) Ngaba abantu bakaThixo baya kusinda kolu hlaselo? Ibe kwenzeka ntoni kukumkani wasentla xa utshaba lwakhe olukhulu lufika ekupheleni kwalo?

2, 3. (a) Sisiphi isiprofeto esisifumana kwincwadi kaHezekile esisinceda ukuba siqonde isiprofeto esingokumkani wasentla nokumkani wasezantsi? (b) Ngokutsho kwesiprofeto sikaHezekile, uya kuba yintoni umphumo wokuhlaselwa kokugqibela nokuqatha kwabantu bakaThixo?

² Isiprofeto esabhalwa liqabane likaDaniyeli uHezekile siyasinceda ukuba siyiphendule le mibuzo. NoHezekile waphefumlelwa ukuba athethe ngexesha ‘lasekupheleni kwemihla,’ ibe walumkisa ngentlaselo ezayo ‘kaGogi wakwaMagogi’ ehlasela ilizwe labantu bakaThixo. (Hezekile 38:2, 14-16; Daniyeli 10:14) Kweso siprofeto, uGogi wafanekisela uSathana, ibe imikhosi yakhe yafanekisela bonke abameli bakaSathana abasemhlabeni ababeya kwenza ilinge lokugqibela nelokuncama lokubacim’ igama abantu bakaThixo. Ekubeni olu hlaselo lusenzeka ekupheleni kwemihla, njengolo lokumkani wasentla, kusengqiqweni ukugqiba kwelokuba ‘ukutwabulula iintente zebhotwe [okwenziwa ngukumkani wasentla] phakathi kweelwandle, nasentabeni engcwele eligugu’ kuyindlela yokuxhasa uhlaselo lukaGogi. (Daniyeli 11:40, 45) Ngaba olu hlaselo luya kuphumelela?

³ UHezekile waprofeta esithi: “Kuya kuthi ngaloo mini, ngemini yokuwufikela kukaGogi umhlaba wakwaSirayeli, itsho iNkosi uYehova, bunyuke ubushushu bam emathatheni am. Ndiya kumgweba ngendyikitya yokufa nangegazi; nangesiphango esikhukulayo, nangamatye esichotho, umlilo nesulfure ndiwunise phezu kwakhe, naphezu kwamahlelo akhe, naphezu kwezizwe ezininzi ezinaye.” (Hezekile 38:18, 22) Olu hlaselo aluyi kuphumelela. AmaKristu okwenyaniso aya kuhlangulwa, ibe isihlwele sikaGogi siya kutshatyalaliswa.—Hezekile 39:11.

4. Ngaba ukumkani wasezantsi uya kusinda kwisiphelo sokumkani wasentla? Ziziphi ezinye iziprofeto ezixhasa le mpendulo?

⁴ Ngoko kuyacaca ukuba, ixesha lokuphela kokumkani wasentla lixesha lokuphela kukaGogi naso sonke isihlwele sakhe, kuquka nokumkani wasezantsi. Oku kuvisisana nezinye iziprofeto ezikwincwadi kaDaniyeli. Ngokomzekelo, sifunda ukuba bakuba bumiselwe uBukumkani bukaThixo, babuya “kuzicola buzigqibe zonke ezo zikumkani [kuquka ukumkani wasentla nokumkani wasezantsi], bona bume ngonaphakade.” (Daniyeli 2:44) Kwakhona, kumbono kaDaniyeli wenkunzi yegusha nenkunzi yebhokhwe, igunya lobupolitika lamaNgesi namaMerika limelwa luphondo oluncinane. Olu phondo luncinane, “ekupheleni kobukumkani babo,” lutshatyalaliswa nguthunywashe onamandla angaphaya kwawomntu, alutshatyalaliswa ngukumkani wasentla: “Aphulwe, ke kungabi ngasandla [somntu].”—Daniyeli 7:24-27; 8:3-10, 20-25.

UMikayeli Umthetheli Omkhulu

5. Ngubani oya kuba nguMmeli Oyintloko kaYehova ekusindiseni abantu Bakhe, ibe kutheni le nto kufanelekile nje oku?

⁵ Ngokulandelayo isithunywa sezulu sichaza uMmeli oya kusetyenziswa nguYehova ukuphelisa onke la magunya. Sithi: “Ngelo xesha uya kusuka eme uMikayeli, umthetheli omkhulu, omela oonyana babantu bakowenu. Kuya kubakho ixesha lembandezelo elingazanga libekho elinjalo, kususela koko lwabakhoyo uhlanga, kude kube nangelo xesha. Ngelo xesha baya kusinda abantu bakowenu, bonke abafunyenwe bebhaliwe encwadini.” (Daniyeli 12:1) Ekuqaleni kwesiprofeto sesithunywa sezulu, uMikayeli wachazwa njengalowo wayesilwela amaSirayeli kumthetheli wasePersi nowakwaYavan. (Daniyeli 10:20, 21) Ngoku, njengokuba isiprofeto sisiya ngasekupheleni, lo Mikayeli mnye ‘umela’ abantu bakuloDaniyeli. Ngubani le ntshatsheli imele abantu bakaThixo?

6, 7. (a) Ngokutsho kwabaphengululi abathile beNgqobhoko, ungubani uMikayeli? (b) Bubuphi ubungqina beBhayibhile obusinceda ukuba simfanise ngokuchanileyo uMikayeli?

⁶ Emva phayaa ekuqaleni kweminyaka yee-1800, umphengululi weBhayibhile uJoseph Benson wathi ingcaciso kaMikayeli njengokuba ifunyanwa eBhayibhileni “ngokucacileyo yalatha kuMesiya.” UE. W. Hengstenberg ongumLuthere wenkulungwane yeshumi elinesithoba wavuma ukuba “uMikayeli akamntu wumbi ngaphandle koKristu.” Ngokufanayo, umfundisi wezakwalizwi uJ. P. Lange, xa wayethetha ngeSityhilelo 12:7, wabhala oku: “Sicingela ukuba uMikayeli . . . , ukususela kwasekuqaleni, unguKristu olwa noSathana.” Ngaba iBhayibhile iyayixhasa le ndlela yokufaniswa kwakhe? Ewe, iyayixhasa.a

⁷ Ngokomzekelo, ngokutsho kwesithunywa sezulu, uMikayeli uza “kusuka eme.” Kwisiprofeto sesithunywa sezulu, ‘ukuma’ okanye ‘ukusuka ume’ (‛a·madhʹ, ngesiHebhere) kunokuthetha ‘ukuxhasa.’ (Daniyeli 11:1) Kwakhona ngokweendlela ezahlukahlukeneyo kunokuthetha ‘ukoyisa,’ ‘ukuvukela,’ ‘ukuchasa’ okanye ‘ukuxhathisa.’ (Daniyeli 11:6, 11, 14, 15, 16a, 17, 25) Kodwa ngokufuthi, kubhekisela kwinyathelo lokumkani, ethabatha igunya lakhe lasebukhosini okanye esebenza ngokunempumelelo kwisikhundla sakhe njengokumkani. (Daniyeli 11:2-4, 7, 16b, 20, 21, 25) Le yintsingiselo ewafanela kakuhle amazwi esithunywa sezulu akuDaniyeli 12:1. Ibe ngokuqinisekileyo isixhasa kakuhle isibakala sokuba uMikayeli nguYesu Kristu, ekubeni uYesu enguKumkani omiselwe nguYehova, othunywe ukuba atshabalalise zonke iintlanga eArmagedon. (ISityhilelo 11:15; 16:14-16; 19:11-16) Kwakhona ivisisana nezinye iziprofeto ezalatha kwixesha laxa uBukumkani bukaThixo, ekulawula uYesu Kristu kubo, buthabatha inyathelo nxamnye neentlanga zeli hlabathi.——Daniyeli 2:44; 7:13, 14, 26, 27.

8, 9. (a) Ekuqaleni babengoobani ‘abantu bakuloDaniyeli,’ ibe bangoobani ngoku? (b) Umdla omkhulu kaMikayeli ‘kubantu bakuloDaniyeli’ uye wabonakaliswa njani ukutyhubela izizukuIwana?

⁸ UMikayeli kudala wanxulumana ‘nabantu bakuloDaniyeli,’ abangamaSirayeli. Wayekunye nabo entlango, ibe wabaxhasa ekulweni ‘nabathetheli’ abayimimoya yobukhosi bamandulo. (Daniyeli 10:13, 21; Eksodus 23:20, 21; Yuda 9) Ibe wazalwa emhlabeni njengomntu onguYesu ukuze abe nguMesiya ekwakukudala elindelwe, “imbewu” eyathenjiswa kukhokho kaDaniyeli uAbraham. (Genesis 22:16-18; Galati 3:16; IZenzo 2:36) Okungonwabisiyo kukuba, xa ewonke uSirayeli wokwemvelo akazange amamkele uYesu; ngenxa yoko, uYehova akazange amamkele njengohlanga lwakhe olukhethekileyo. (Mateyu 21:43; Yohane 1:11) Wazimisela ukudlulisela igama lakhe kuhlanga olutsha, ‘uSirayeli kaThixo’ nowokomoya, obunjwe ngamaYuda okwemvelo nangabangemaYuda abanokholo kuYesu.—Galati 6:16; IZenzo 15:14; 1 Petros 2:9, 10.

⁹ Olu hlanga lutsha, ibandla lamaKristu athanjisiweyo, lwaqalisa ukuphila ngowama-33 C.E., lwaza emva koko lwasebenza njengoSirayeli kaThixo. Olu hlanga lwaluya kuthi ukususela ngoko ukuya phambili lube ‘ngabantu bakuloDaniyeli? (Roma 2:28, 29) Ngaphambi kokuvuselwa kwakhe ezulwini ngowama-33 C.E., uYesu wathembisa ukubaxhasa ngokuqhubekayo ‘abantu bakuloDaniyeli’ xa waxelela abo babeza kuba ngamalungu aloo Sirayeli mtsha oku: “Niyabona, mna ndinani yonke imihla, kude kube sekuphelisweni kwephakade eli.”—Mateyu 28:20; Efese 5:23, 25-27.

“Omela” Abantu BakuloDaniyeli

10. Ngokwamazwi isithunywa sezulu esawathetha kuDaniyeli, uMikayeli uya kulithabatha njani inyathelo elipheleleyo, ibe oku kuphakamisa yiphi imibuzo?

¹⁰ Kodwa ngoku isithunywa sezulu sithi uMikayeli uza kuthabatha inyathelo ngendlela ekhethekileyo. Sisebenzisa igama elithi ‘ukuma’ izihlandlo ezibini, sithi: “Ngelo xesha uya kusuka eme, uMikayeli, umthetheli omkhulu, omela oonyana babantu bakowenu.” (Daniyeli 12:1) Kuthetha ukuthini ukuthi uYesu ‘usuka eme’? Ibe inokwenzeka njani into yokuba ‘asuke eme’ ekubeni sele ‘ebamela kakade oonyana babantu [bakuloDaniyeli]’? Ngaphambi kokuba siyiphendule le mibuzo, khawuqwalasele inkcazelo ethile esisiseko.

11. Kungayiphi indlela ebekungaba kokufanelekileyo ngayo ukuthi uYesu ‘ebemile’ ukususela kowe-1914?

¹¹ Emva kokuvuswa kwakhe ngowama-33 C.E., uYesu wabaxelela oku abalandeli bakhe: “Linikwe mna lonke igunya emazulwini nasehlabathini.” (Mateyu 28:18) Kudala uYesu elisebenzisa elo gunya phezu kwabakhonzi bakhe abathanjisiweyo abasemhlabeni. (Kolose 1:13) Noko ke, lalingekafiki ixesha lokuba uYesu alisebenzise elo gunya njengoKumkani woBukumkani bukaThixo. Kunoko, emva kokunyuka kwakhe ‘wahlala ngasekunene kukaThixo ezulwini’ de kwalixesha lokumiselwa kobo Bukumkani. (INdumiso 110:1, 2; IZenzo 2:34, 35) Elo xesha lafika ngowe-1914, “ixesha elimisiweyo.” (Daniyeli 11:29) Ngaloo nyaka, uYesu wahlaliswa etroneni njengoKumkani olawulayo woBukumkani bukaThixo ibe engaphozisanga maseko, njengoMikayeli osisiphatha-zithunywa zezulu, wamkhuphela ngaphandle kwezulu uSathana. (ISityhilelo 11:15; 12:5-9) Ngoko ukususela ngowe-1914, uYesu ‘ebemile’ njengoKumkani.—INdumiso 2:6.

12, 13. Ziziphi iintsikelelo ezibalaseleyo abathe abantu bakaThixo bazinandipha kwiminyaka esusela kowe-1914, ezibonisa ukuba uYesu ‘ebebamele abantu bakuloDaniyeli’?

¹² ‘Ukuma’ kukaYesu kube yintsikelelo enkulu ‘koonyana babantu bakuloDaniyeli’. Ukwamkela kwakhe igunya lasebukhosini nokuphosela kwakhe uSathana emhlabeni kwalicoca ikhaya labo lasezulwini lexesha elizayo. (Yohane 14:2, 3) Emva koko, abo babesele befe ngokuthembeka babenokuvuselwa kwilifa labo lasezulwini. (1 Tesalonika 4:16, 17) Intsalela yabo esesemhlabeni yeva ubunzima bentshutshiso eqatha ebudeni bemfazwe yehlabathi yokuqala, eyaphantse yawunqumamisa umsebenzi wayo wokushumayela. Kodwa ngowe-1919 yayivusiwe yaza yabonakala ehlabathini njengohlanga olutsha.—Isaya 66:7, 8; ISityhilelo 9:14; 11:11, 12.

¹³ Emva koko, uYesu walizalisekisa idinga lakhe ‘lokubutha aze akhuphe ebukumkanini bakhe zonke izikhubekiso, nabo benza okuchasene nomthetho.’ (Mateyu 13:41) Ngale ndlela, uye walondoloza ibandla elicocekileyo lamaKristu athanjisiweyo athe ‘amazi uThixo wawo, abalasela, aza asebenza ngokunempumelelo.’ Aye azishumayela iindaba ezilungileyo zoBukumkani ehlabathini jikelele, ngaloo ndlela ‘eluqondisa uninzi.’ (Daniyeli 11:32, 33; Mateyu 24:14) Ukususela ngowe-1935 uYehova uye wongeza kweli bandla inani elandayo ‘lezinye izimvu,’ ezinethemba lasemhlabeni nezithe ngokuthembekileyo zanesabelo kulo msebenzi wokushumayela iindaba ezilungileyo zoBukumkani bukaThixo.—Yohane 10:16; ISityhilelo 7:9, 14, 15.

14. Ube yintoni umphumo wokuba uYesu ‘emele abantu bakuloDaniyeli’ kwimihla yokugqibela?

¹⁴ Ubukho beli qela lamaKristu namhlanje buyaphawuleka. Kwihlabathi elahluleleneyo ngenxa yeepolitiki, aye alondoloza ubundilele obungqongqo njengabalawulwa boBukumkani bukaThixo. (Yohane 17:14) Ngenxa yoko, aye atshutshiswa ngabo bobabini aba kumkani. Kwanonqulo lobuxoki, luye lwaceba lwaza Iwenza iyelenqe lokubacim’ igama. Endaweni yokuba oko kwenzeke, aye anda ibe namhlanje afumaneka kumazwe angaphezu kwama-200 ibe inani lawo lithe kratya kuhle kwizigidi ezithathu zabantu abathembekileyo. Anandipha iparadisi yokomoya phantsi kolawulo lukaKristu olwahluke ngokupheleleyo kubumnyama nokuphelelwa lithemba kweli hlabathi. (Isaya 65:13, 14) Ngaloo ndlela, uYesu uye ‘wamela oonyana babantu [bakuloDaniyeli]’ kuyo yonke le mihla yokugqibela.—Daniyeli 12:1.

UMikayeli ‘Usuka Eme’

15. Kungayiphi indlela athi uYesu ‘asuke eme,’ ibe kwenzeka nini oku?

¹⁵ Ngoko kwenzeka njani ukuba uYesu, osele ‘emile,’ ‘asuke eme’ ngelo xesha? (Daniyeli 12:1) Ngokungathi kunjalo, kungokuthi ulawulo lwakhe lufikelele kwinqanaba elitsha. Lixesha lokuba athabath’ inyathelo ngendlela ebalaseleyo ukuze asindise ‘abantu bakuloDaniyeli’ ekutshatyalalisweni ngoorhulumente babantu. (Hezekile 38:18, 19) ‘Ixesha’ ekubhekiselwa kulo apha ngokucacileyo ‘lixesha lokuphela’ lokumkani wasentla nokumkani wasezantsi, xa ukumkani wasentla esongela imekobume yokomoya yabantu bakaThixo. (Daniyeli 11:40-45) Ngaphambi kweli xesha, ngabalawulwa bakhe abathembekileyo kuphela abebeluthabatha nzulu ulawulo lukaYesu. (INdumiso 2:2, 3) Noko ke, ngoku lixesha ‘lokutyhileka kweNkosi uYesu,’ xa wonk’ ubani eya kunyanzelelwa ukuba akugqale ukuba ngukumkani kwakhe. (2 Tesalonika 1:7, 8) Oku kuya kubandakanya ukutshatyalaliswa kwayo yonke imikhosi echasene naye, okuya kulandelwa luLawulo Lweminyaka Eliwaka lukaYesu nabalawuli abangoowabo, xa uBukumkani buya kuba kuphela korhulumente olawula uluntu.—ISityhilelo 19:19-21; 20:4.

16. Nguwuphi umphumo ‘ukusukuma’ kukaYesu okunawo kwiintlanga ezingahloneli Thixo?

¹⁶ Ngokuvisisana noku, isithunywa sezulu sithi xa uMikayeli esuka eme, “kuya kubakho ixesha lembandezelo elingazanga libekho elinjalo, kususela koko lwabakhoyo uhlanga, kude kube nangelo xesha.” (Daniyeli 12:1; thelekisa uMateyu 24:21.) Kuya kuba lixesha lokutshatyalaliswa kwabangendawo nokusindiswa kwabathembekileyo. (IMizekeliso 2:21, 22) Phulaphula indlela uluntu olungathembekanga olubonisa ngayo uloyiko ngelo xesha: “Bathi kwiintaba nakumawa, Siweleni, nisifihle ebusweni balowo uhleli phezu kwetrone, nasengqumbeni yeMvana; ngokuba ufikile umhla omkhulu wengqumbo yayo; ngubani na ke onako ukuma?”—ISityhilelo 6:16, 17.

17. Kuya kuthi kwenzeke ntoni kwimikhosi kaSathana yasemhlabeni ngelo xesha, kuquka ukumkani wasentla nokumkani wasezantsi?

¹⁷ Umphumo weli “xesha lembandezelo” eyehlela imikhosi kaSathana yasemhlabeni uchazwe kwisiprofeto sikaHezekile esichasene noGogi wakwaMagogi: “Uya kuwa ezintabeni zakwaSirayeli, wena namahlelo akho onke, nezizwe ezinawe.” (Hezekile 39:4) UYeremiya, ethetha ngexesha lembandezelo elikwalinye, wathi: “Ababuleweyo nguYehova ngaloo mini, bathabathele ekupheleni kwehlabathi, bese ekupheleni kwehlabathi.” (Yeremiya 25:33) Ngenene eli iya kuba lixesha lembandezelo. UYesu uya kuyigqiba imbali ende yemfazwe yabantu xa ‘esuka eme’ ukuze ashenxise amagunya abantu anetyala.—INdumiso 46:9; 1 Korinte 15:25.

Abaya Kusinda ‘Kwixesha Lembandezelo’

18. (a) Yintoni abaya kuyibona abanquli bokwenyaniso xa uMikayeli ‘esuka eme’? (b) Kuthetha ntoni ‘ukubhalwa encwadini’?

¹⁸ Ngoxa abantu bakaThixo beya kuyiva imiphumo yengqumbo yotshaba, eli iya kuba ‘lixesha lembandezelo’ ngokuyintloko kubantu abangendawo. (INdumiso 37:20) Isithunywa sezulu simxelela oku uDaniyeli: “Ngelo xesha baya kusinda abantu bakowenu, bonke abafunyenwe bebhaliwe encwadini.” (Daniyeli 12:1) Abantu abaninzi ‘koonyana babantu bakuloDaniyeli’ baya kube befile baza bafumana umvuzo wabo wasezulwini ngeli xesha. Ngokungathandabuzekiyo aba bantu baya kuncedisa uMikayeli kolu loyiso lukhulu lwasemkhosini. (ISityhilelo 2:26, 27; INdumiso 2:8, 9) Abasaseleyo emhlabeni abayi kuba nasabelo kulo mlo; kodwa baya kuba ngabagcini bengqibelelo, ngoko baya kuba ngabasindi. (ISityhilelo 17:14; 19:7, 8) Kwanamaqabane abo, “isihlwele esikhulu,” aya kuba ngabasindi. (ISityhilelo 7:9, 14) Ngaloo ndlela intsalela ethanjisiweyo “nezinye izimvu” ziya kungqineka ‘zibhaliwe encwadini,’ oko kukuthi, amagama abo aya kuba ekho kwingxelo njengabalungele ukufumana isipho sobomi obungunaphakade, ezulwini okanye emhlabeni.—Yohane 10:16; Eksodus 32:32, 33; Malaki 3:16; ISityhilelo 3:5.

19. (a) ‘Ukusukuma’ kukaMikayeli kuya kuluzisa njani uxolo kulo mhlaba? (b) Nguwuphi umbuzo ekusafuneka uphenduliwe?

¹⁹ Aba baya kuba nelungelo lokubona ukumiselwa koxolo lokwenyaniso ehlabathini lonke. Baya kuba ngamangqina okuzibonela ukuzaliseka kwedinga likaYehova elileli: “Ngokuba abenzi bobubi baya kunqunyuIwa; ke bona abamthembayo uYehova, baya kulidla ilifa ilizwe.” (INdumiso 37:9) Ngenxa yokuba ngelo xesha uBukumkani bukaThixo buya kube bukuphela korhulumente okhoyo emhlabeni, wonk’ ubani ophilayo uya kuba ngumkhonzi kaYehova. (Isaya 11:9) Ngaloo ndlela, “ngexesha lokuphela” lookumkani ababini, uMikayeli “uya kusuka eme” ukuze azise uxolo kuluntu. Akukho zixhobo zenziwe ngamagunya amakhulu okanye amanye amanyathelo anokuthintela ezi ziganeko. Noko ke, ngaba oko kuthetha ukuba kuya kufuneka silinde de kube lelo xesha ukuze sinandiphe uxolo? Hayi, kukho uxolo olunokunanditshwa ngamaKristu kwanangoku—eneneni, uhlobo oluncomekayo loxolo kunokungabikho nje kwemfazwe. Luyintoni olu xolo? Isiprofeto isithunywa sezulu esasisinikela kuDaniyeli sihlabela mgama sikhanyisa le ngongoma.

[Umbhalo osemazantsi]

Uyakhumbula Na?

◻ Ngubani uMikayeli onguMthetheli Omkhulu?

◻ Ngoobani abantu bakuloDaniyeli namhlanje?

◻ UMikayeli ngoku ubamela njani abantu bakuloDaniyeli?

◻ Uya kusuka eme njani uMikayeli ngokukhawuleza ngendlela ebalaseleyo?

◻ Ngoobani abaya kusinda kwixesha lokusukuma kukaMikayeli?

[Umfanekiso okwiphepha 16]

Ilinge lokugqibela nelokuncama lokubacim’ igama abantu bakaThixo liya kusilela—kodwa njani?

Umfanekiso okwiphepha 18]

Abantu bakaThixo baya kusindiswa xa uMikayeli ‘esuka eme’ ukuze aphelise ukruthakruthwano lookumkani ababini