Ukukhafula Kutheni Besanda Nje Abantu Abanomdla Kuko?
UFRANS uyintsika yecawa yasekuhlaleni yamaProtestanti. Ukuba kukho umsebenzi wecawa ekufuneka wenziwe, uba ngowokuqala ukufak’ isandla encedisa. NoWilhelmina uyamhlonela uThixo. Uthi, “Kufuneka ukuba uyihambe icawa,” ibe yena uyayihamba. Ngokukwanjalo noEsther uya rhoqo ecaweni ibe akaphoswa nalolunye usuku engathandazanga. Bobathathu kukho enye into abafana ngayo: Bakwangabantu abaneshologu.
Aba bemi bathathu baseSuriname ababodwa kule nto. Ehlabathini lonke, abantu abanomdla ekukhafuleni banda kakhulu. Khawuqwalasele oku: EUnited States kuphela, amaphephancwadi amalunga nama-30 anesilinganiselo semibhalo engaphezu kwe-10 000 000 ewonke athetha ngeenkalo ezahlukeneyo zemisebenzi yamandla angabonakaliyo. Abantu ekuthelekelelwa ukuba bazizi-2 000 000 eNgilani banomdla kulo mbandela ukwamnye. Uhlolisiso lwakutshanje lwezimvo zabantu olwenziwa eHolani lwabonisa ukuba abantu abakholelwa kwiziganeko ezibangelwa ngamandla angaphaya kwawemvelo bafumaneka phakathi kwabantu abahlala kwiidolophu ezinkulu, phakathi kwabantu abanemfundo ephakamileyo naphakathi kwabantu abaselula. Ngaphezu koko, njengokuba abemi baseAfrika, baseAsia nabaseMzantsi Merika benokukungqinela oko, kumazwe amaninzi ukukhafula kuye kwayinxalenye enkulu yobomi bemihla ngemihla. Ayimangalisi into yokuba kwincwadi yabo ethi Occult Shock and Psychic Forces umbhali uJohn Weldon noClifford Wilson baqukumbele ngokuthi: “Kubonakala ukuba abagqabazi abaninzi banoluvo lokuba sikwixesha lokuvuselelwa kobugqi ngendlela engazange ibonwe.”
Ewe, ukukhafula nobugqi—bokuvumisa ngeenkwenkwezi, bokulalisa ngomlingo, bokufundisisa ngezinto ezingafikelelwayo yingqondo, bokungenakuqondwa ngengqiqo, bomlingo nokuchaza amaphupha, njalo njalo—zizinto ezibenze bathabatheka abantu abaphuma kuzo zonke iinkalo zobomi. Kungani?
Phakathi kwezinye izinto, zimbi iicawa zeNgqobhoko zikubetha ngoyaba yaye zide zikuvumele ukukhafula. Zithi ukunxibelelana nemimoya kuyenye nje indlela yokusondela kuThixo.
Ngokomzekelo, khawucinge nje ngolzaak Amelo, ongumrhwebi waseSuriname onama-70 eminyaka ubudala. Kangangeminyaka esixhenxe wayelilungu lebhunga letyalike elihlonelwayo yaye kwangaxeshanye engoneshologu odume gqitha. Ukhumbula oku: “Ngayo yonke imiGqibelo ibhunga lethu lecawa liphela lalihlanganisana ngaphandle kwelali ukuze linxibelelane nemimoya. Sasisenza loo nto ubusuku bonke. Ngentsasa elandelayo, umdikoni wayejonga iwotshi yakhe, aze malunga nentsimbi yesihlanu, asiyalele ukuba siyeke. Sithi ke sihlambe imizimba, sinxibe ezinye iimpahla size sisinge ecaweni—kanye nje ngaphambi kokuqalisa kwenkonzo yakusasa ngeCawa. Kuyo yonke loo minyaka umalusi akazange akhuphe nelimdaka eligxeka loo nto.”
Emva kokuhlolisisa unxibelelwano oluphakathi kokukhafula neecawa eSuriname, uNjingalwazi waseHolani uR. van Lier uqinisekisa ukuba abaninzi bakujonga ukukhafula ‘njengenxalenye eyongezelelekileyo yonqulo.’ Kuhlolisiso olwapapashwa kutshanje yiYunivesithi yaseLeiden wakwathi ukukhafula kugqalwa “njengenxalenye yonqulo luphela yaye kuhambisana nobuKristu.”
Kodwa usenokubuza uthi, ‘Ngaba into yokuba iicawa zeNgqobhoko zikwamkela ukukhafula iqinisekisa ukuba uThixo uyakholiswa kuko? Ngaba ukunxibelelana nemimoya kuya kukusondeza ngakumbi kuye? Eneneni ithini iBhayibhile ngokukhafula?’
[Umfanekiso okwiphepha 3]
UIzaak Amelo ukhumbula ukuba ibhunga letyalike liphela laliba nenxaxheba kwintlanganiso yokuqhakamshelana nabakwelemimoya ngentetho