Ubomi Nobulungiseleli BukaYesu

Waba Nemfesane Kwabalusizana

EMVA kokugxeka abaFarisi ngezithethe zabo zokuzikholisa, uYesu uyanduluka ehamba nabafundi bakhe. Usenokukhumbula ukuba kungethuba lide ngaphambi koko, ilinge lakhe lokubaleka ukuze aphumle nabafundi bakhe laphazanyiswa kukufika kwesihlwele. Ngoku, ekunye nabafundi bakhe, uyanduluka esinge kummandla waseTire neTsidon, iikhilomitha ezininzi ukuya emantla. Kuyabonakala ukuba olu kuphela kohambo olungaphaya kwemida yakwaSirayeli uYesu aluthabatha nabafundi bakhe.

Emva kokufumana indlu aza kuhlala kuyo, uYesu wazisa into yokuba akafuni kubekho namnye ubaziyo apho bakhoyo. Kanti, kwanakulo mmandla ungengowakwaSirayeli, wayengenakuzifihla phakathi kwabantu. Kufika umfazi owayezalelwe eKanan yelaseSiriya yaye uyamcela esithi: “Ndenzele inceba, Nkosi, nyana kaDavide; intombi yam iphethwe yidemon kakubi.” Noko ke, uYesu akamphenduli nelizwi eli.

Ekugqibeleni, abafundi bakhe bamxelela oku uYesu: “Mndulule, ngokuba usilandela ekhala.”

Echaza isizathu sokungamnanzi, uYesu uthi: “Ndithunywe kwizimvu ezilahlekileyo zendlu kaSirayeli zodwa.”

Noko ke, lo mfazi akanikezeli. Uya kuYesu, aze aqubude phambi kwakhe, ambongoze esithi, “Nkosi, ndisize.”

Hayi indlela ekumele ukuba yachukumiseka ngayo intliziyo kaYesu sisicelo esinyanisekileyo salo mfazi! Kanti, uyaphinda achaze ukuba imbopheleleko yakhe yokuqala, kukufundisa abantu bakaThixo amaSirayeli. Kwangaxeshanye, ngokucacileyo ukuze avavanye ukholo lwakhe, usebenzisa imbono yamaYuda yokuba nomkhethe kwezinye iintlanga, esima ngelithi: “Asinto intle ukusithabatha isonka sabantwana, siphoswe ezinjaneni.”

Ngelizwi lovelwano nembonakalo yobuso, ngokuqinisekileyo uYesu utyhila iimvakalelo zothando lwakhe ngabangemaYuda. Ude ayidambise imbono yokufanisa abeentlanga nezinja ngokubhekisela kubo “njengezinja ezincinane,” okanye iinjana. Endaweni yokukhubeka, lo mfazi ngokuthobekileyo uyangenelela kwintetho kaYesu engomkhethe wamaYuda aze ngokuzithoba athi: “Ewe, Nkosi; kuba neenjana zidla kwiimvuthuluka eziwa etafileni yabaninizo.”

UYesu uphendula esithi: “Mfazi, lukhulu ukholo lwakho; makwenzeke kuwe njengokuthanda kwakho.” Yaye kwenzeka njalo! Xa ebuyela ekhaya, ufumana intombi yakhe ilele phezu kwesingqengqelo, iphile qete.

Ukusuka kummandla ongaselunxwemeni waseTsidon, uYesu nabafundi bakhe bacanda ilizwe besiya ngasemthonjeni woMlambo iYordan. Kuyabonakala ukuba bayiwela iYordan kwinyoba ndaweni ithile ngasentla koLwandle lwaseGalili baze bangene kummandla waseDekapoli, kwimpuma yolwandle. Apho benyuka intaba, kodwa izihlwele ziyabafumana yaye ziza kuYesu neziqhwala, izilima, iimfama, izidenge, nenye inkitha eyayigula neyayineziphene ngezinye iindlela. Zibabeka kakuhle ezinyaweni zikaYesu, yaye uyabaphilisa. Izihlwele ziyamangaliswa kukubona izidenge zithetha, iziqhwala zihamba, neemfama zibona yaye zizukisa uThixo kaSirayeli.

Kuziswa kuYesu indoda esisithulu nekwalithintitha ukuba ayinyamekele ngokukhethekileyo. Izithulu ngokuqhelekileyo zicaphuka ngokulula, ingakumbi phakathi kwesihlwele. UYesu usenokubuphawula ubuphakuphaku bale ndoda. Ngoko uYesu esikwe yimfesane uyayithabatha ayisuse esihlweleni aze aye nayo ngasese. Ngoxa bebodwa, uYesu uyibonisa oko aza kuyenzela kona. Ufaka iminwe yakhe ezindlebeni zayo, athi etshicile, achukumise ulwimi lwayo. Emva koko, uYesu ukhangela ezulwini aze aphefumle enesingqala esithi kuyo: “Vuleka.” Kwaoko, zavuleka iindlebe zayo, yakwazi nokuthetha kakuhle.

Akuba uYesu ephilise abaninzi, izihlwele zibonisa uxabiso ngako oku zisithi: “Uzenze iinto zonke kakuhle; uzenza nezithulu zive, nabangenakuthetha bathethe.” Mateyu 15:21-31; Marko 7:24-37.

◻ Kutheni le nto uYesu engamphilisi ngokukhawuleza nje umntwana womKananekazi?

◻ Emva koko, ubasa phi uYesu abafundi bakhe?

◻ Esikwe yimfesane uYesu uyiphatha njani indoda esisithulu nelithintitha?