Ngaba Wakha Wanxulumana Nentlangano KaYehova?
LE NDODANA yayiziva ineentloni yaye idandatheke gqitha. Iimpahla zayo, ezazingamadlavu yaye zikrazukile, zazinemiqondiso yokuba zakha zasisinxibo esisexesheni. Ngoku zazingashiyi mathandabuzo mayela nokuba yayifikelele kumaxesha anzima. Njengoko yathi yacinga ngelizwe lakowayo elikude, yaqala ukubucekisa ngokukrakra ubomi bokuzibhubhisa eyayibuphila kwanendlela eyayilichithe ngayo ilifa eyathi yazingisa ngelokuba iyalifuna ngaphambi kwexesha elililo. Ukuphathwa kwayo liphango kongezelela kwintlungu yayo, ibe yaziva ikhumbula ikhaya. Ewe, kwanabakhonzi bakayise emva ekhayeni layo babephucuke kakhulu kunayo! Hayi indlela ebingakuthanda ngayo ukuba sezikhundleni zabo!
Kodwa yayinokulindela ukwamkelwa njani nguyise ukuba ngoku yayinokubuyela emva? Yayingakulindele nakancinane ukwamkelwa ngezandla ezishushu okanye kwanokuvunyelwa ukuba ingene ngaphakathi endlwini emva kwendlela eziintloni eyabusebenzisa kakubi ngayo ububele bukayise. Sekunjalo, kwakukho imvakalelo enzulu eyayilawula ingqondo nentliziyo yayo: Yayimele igoduke.
Hayi indlela awayengaziqondi kakuhle ngayo lo mfana iimvakalelo zikayise ngaye! Enjani yona ukumangalisa into eyayimlindele njengoko wayesiya esondela kwikhaya lakhe lakudala! Enyanisweni, “akubon’ ukuba usekude lee, uyise wambona, wasikwa yimfesane, wagidima, wawa entanyeni yakhe, wamanga.”—Luka 15:20.
Njengalo nyana wolahleko, ngaba ulishiyile ikhaya lakho? Ngaba uye wamshiya uBawo wakho, uYehova, nentlangano yakhe? Ngaba ngoku unqwenela ‘ukubuyela ekhaya’?
Kwiimeko ezininzi, abo bathe bemka kwintlangano kaYehova abakhange bade bafane ncam nonyana wolahleko. Kwabaninzi, yaba yinkqubo nje ethe ngcembe, phantse engaqondakaliyo yokumka ngokumka—njengephenyane elincinane, elikhukulisekayo nelidada ngokuthe ngcembe lisiya lisimka ngokumka emhlabeni. Bambi baye baxinzelelwa phantsi ziingxaki zemali okanye ezentsapho, kukugula okanye kwanokuba ‘nenkqubela’ ehlabathini, kangangokuba imicimbi yokomoya iye ayabi nandawo. Abanye baye bazivumela ukuba bakhutyekiswe ngabanye abanxulumene nebandla lamaKristu okanye baye bashiya kwabandla elo kuba bengavumelani nendlela intlangano kaYehova ewuqonda ngayo umbandela othile ongokweZibhalo. Kanti abanye baye bazivumela ukuba batyhafiswe ibe baye bayeka xa le nkqubo ikhoyo yezinto ingakhange iphele ngexesha ababelilindele.
Ukuba ungomnye wabo bangasanxulumenanga ngokukhutheleyo nentlangano kaYehova, kunokwenzeka ukuba kukho isizathu esinye okanye ezingakumbi kwezi zichaziweyo apha esiye saba ngunobangela woko. Kodwa enoba unobangela uyintoni na, ngaba ngoku eli asiloxesha lokucinga ngokubuyela kwintlangano?—Mateyu 18:12-14.
Ngaba Uye Wakhutyekiswa
Eqwalasela indlela uluntu olungafezekanga gqitha ngayo, ubani unokulindela ukuba indlela esizenza ngayo izinto iya kungqubana amaxesha ngamaxesha. Oku kuye kwabakhubekisa abathile. Abanye baye bakhubeka xa uthile ebebemhlonela ngokunzulu ethe ngequbuliso wenza ngobudenge okanye wahamba ngendlela engeyoyabuKristu okanye wabandakanyeka kwisenzo esiphosakeleyo.
Ngaba oku kwenzekile kuwe? Enoba yintoni na ekukhubekisileyo, ngokuqinisekileyo ibingenguye uYehova obangele ukuba ukhubeke. (Thelekisa amaGalati 5:7, 8.) Ngoko ngaba ngokwenene kukho nto ibalulekileyo siyizuzayo ngokuphelisa ulwalamano lwethu naye ngenxa yoko kuye kwenziwa ngomnye umntu? Kunoko, ngaba asimele siqhubeke simkhonza ngokuthembekileyo, sinentembelo yokuba uYehova uyakwazi oko kuqhubekayo ibe uya kuqhubana nathi ngokunothando?—Kolose 3:23-25.
Ngokuhamba kwexesha, bambi baye bafumanisa ukuba oko kwakubakhubekisile ekuqaleni phantse akubonakali kubaluleke kangako ngoku okanye kusenokuba akusekho kwaukubakho. Okanye ekuwuqwalaseleni ngokuzolileyo umcimbi, ngoku basengade bagqibe kwelokuba eneneni babengabona baphosisileyo. Ngokufuthi oku kuba njalo xa umntu ethe akavumelana waza wakhutyekiswa sisiluleko okanye uqeqesho alufumeneyo. Kamva, usenokuqonda ukuba waqeqeshwa kuba wayethandwa ngokwenene ibe oko ikokokulungelwa kwakhe. (Hebhere 12:5-11) Ngoko, hayi indlela ekulunge ngayo, ukusebenzisa isiluleko sompostile uPawulost Wabhala oku: “Zimiseni izandla eziwileyo, namadolo anedumbe; iinyawo zenu nizenzele imizila ethe tye, ukuze into eqhwalelayo ingaphambuki endleleni, kanye ke iphiliswe.”—Hebhere 12:12, 13.
Ngaba Kukho Imfundiso Ongazange Uvumelane Nayo?
Kusenokwenzeka ukuba wayishiya intlangano kaYehova ngenxa yokuba wayiqonda ngenye indlela ingongoma ethile engokweZibhalo. Kanye njengokuba amaSirayeli akhululwa eYiputa athi akhawuleza ‘azilibala izenzo [zikaThixo]’ awazenza ngenxa yawo yaye ‘awalilinda icebo lakhe,’ usenokuba uye wangxama wagqiba kwelokuba ekubeni intlangano ingazange iyixhase imbono owawuyijonga ilungile, uya kwahlukana nayo. (INdumiso 106:13) Kusenokwenzeka ukuba le ngongoma sele yacaciswa, ngokuthi iguqulwe okanye iqondwe ngophengululo oluthe chatha lweZibhalo phantsi kolwalathiso lomoya kaThixo. Bekungayi kuba kokulungileyo na ukuba ube uhleli nentlangano, ulindele kuYehova?
Kulungile ukukhumbula ukuba uYehova usoloko esebenza ngentlangano enye kuphela. Kumhla wethu, ‘umkhonzi othembekileyo noqondayo’ ulungiselela ukudla kokomoya “ngexesha elifanelekileyo.” Phawula ukuba lo mkhonzi yayiza ‘kumfumana esenjenjalo yakufika iNkosi yakhe.’ (Mateyu 24:45-47) Ngokwenene, ngubani namhlanje owaziyo ukuba le Nkosi sele ifikile? Ibe ngubani oxakeke ngulo msebenzi kuthethwe ngawo apha? Kuphela ngabo banxulumene nentlangano kaYehova yamangqina angamaKristu!
Xa abanye bamshiyayo uYesu, umpostile uPetros wathi: “Nkosi, sosuka siye kubani na? Nguwe onamazwi obomi obungunaphakade.” UPetros wayesazi ngaphandle kwamathandabuzo ukuba uYesu wayenguMesiya. Ngoko xa abafundi abaninzi bafumanisa amanye amazwi kaYesu esothusa, uPetros waqonda ukuba kwakungayi kuba bubulumko ukushiya umthombo ‘wamazwi obomi obungunaphakade.’ Ekuhambeni kwexesha nawaphi na amathandabuzo okanye ukungaqondi kwakuya kulungiswa. (Yohane 6:51-68; thelekisa uLuka 24:27, 32.) Oku kukwanjalo nanamhlanje, njengoko uYehova ebakhokelela ngokunenkqubela abakhonzi bakhe kwindlela yenyaniso.—IMizekeliso 4:18.
Buyela Ngoku
Umprofeti uYeremiya wabongoza esithi, “Masiziphengulule iindlela zethu, sizigocagoce, sibuyele kuYehova.” (IZililo 3:40) Kanti, bambi basenokurhoxobisa, mhlawumbi besoyika ukungamkelwa ngezandla ezishushu ngabo basebandleni. Kodwa kwenzeka ntoni xa unyana wolahleko wabuyela ekhaya? Lo bawo wacacisa wathi, “Besimele kukuthi . . . sivuye; ngokuba umninawa wakho lo ubefile, wabuya waphila; ubelahlekile, wafunyanwa.” (Luka 15:32) Ulwamkelo olufudumeleyo olukwanjalo lulindele abo ‘babuyela kuYehova’ benomnqweno onyanisekileyo wokwenza ukuthanda kwakhe.—Thelekisa uLuka 15:7.
Kodwa ibandla lamaKristu belingahlelanga nje emaqandeni lilindele ukwamkela abo banjalo ukuba bathe benza izigqibo nangexesha abathe bazenza ngalo izigqibo ezo ‘zokubuyela ekhaya.’ Kumzekeliso kaYesu, lo bawo wabaleka ukuya kumkhawulela unyana wakhe “akubon’ ukuba usekude lee.” Ngokufanayo, amaNgqina kaYehova akujonga kuyimfanelo yomntu siqu ukufuna abo babekhe banxulumana nathi nokubanceda ukuba babuyele kwintlangano kaYehova.
Kodwa kuthekani ukuba ubani uthe wanetyala lehambo embi ngokunzulu ngoxa ebengaphandle kwentlangano kaYehova? Okanye kuthekani ukuba uthile kwafuneka esusiwe ekunxulumaneni nabantu bakaYehova ngenxa yokwenza isiphoso esinzulu kodwa wathi ukususela ngoko wayeka ukubandakanyeka kwihambo engeyiyo eyobuKristu? Abadala baya kukwazi ukumnceda ngendlela enobubele nenothando ukuze kulungiswe imicimbi noYehova. Ngoko nabani na ngoku onqwenela ukubuyela nokuhlala ngokuvisisana nokuthanda kukaThixo umele azise abadala ngalo mnqweno. “Khanize sibonisane, utsho uYehova; nokuba izono zenu zide zavela zanjengengubo ebomvu, zoba mhlophe njengekhephu.”—Isaya 1:18.
Hayi indlela anobubele, anobuntu nanothando ngayo uBawo wethu osemazulwini! Ibe hayi indlela anomonde ngayo nendlela anomdla ngayo kuye ngamnye wethu! Ngokuqinisekileyo, akafuni ukuba sitshatyalaliswe nale nkqubo ingendawo yezinto. (2 Petros 3:9) YayinguYehova owabongoza abantu bakhe bamandulo esithi: “Buyelani kum, ndibuyele kuni.” Eso simemo sikwasinye sisekho nanamhlanje.—Malaki 3:7.
Ixesha liyaphela, ngoko musa ukulibazisa. Ukunye nabantu bakaYehova, kwakhona nandipha ‘uxolo olukhulu lwabo bawuthandayo umyalelo kaThixo.’ Umdumisi wathi, “Akukho sikhubekiso kubo.” (INdumiso 119:165) Ngaba umyalelo kaYehova uwuthanda, ngokusuka emazantsi entliziyo yakho? Ukuba ungumkhonzi kaThixo ozahluleleyo, esi sisizathu sokuzahlulela kwakho kuye. Ayikhoewe, ayikho ngokupheleleyointo enokubaluleka ngaphezu kokuhlaziya ulwalamano lwakho noYehova. Musa ukumnikela umva. Wucingisise ngononophelo nangomthandazo lo mcimbi. Ukba ubusele ukhumbula umanyano nothando lwabantu bakaYehova, akukashiywa kakhulu lixesha ekubeni ubuyele kwintlangano kaYehova. Yenjenjalo ngaphandle kokulibazisa.