Isahluko 39
UKumkani OnguMphumi-mkhosi Uyoyisa EArmagedon
Umbono 13—ISityhilelo 19:11-21
Umbandela: UYesu ukhokela imikhosi yasezulwini ukuya kutshabalalisa inkqubo yezinto kaSathana
Ixesha lokuzaliseka: Emva kokutshatyalaliswa kweBhabhiloni Enkulu
1. Iyintoni iArmagedon, yaye yintoni ekhokelela kuyo?
IARMAGEDON—elo ligama eloyikekayo kubantu abaninzi! Kodwa kubathandi bobulungisa, lithetha imini ekudala ilindelwe yaxa uYehova eya kuphumeza umgwebo wokugqibela kwiintlanga. Asiyomfazwe ebangelwa ngabantu kodwa ‘yimfazwe yemini enkulu kaThixo, uSomandla’—imini yakhe yempindezelo nxamnye nabalawuli bomhlaba. (ISityhilelo 16:14, 16; Hezekile 25:17) Xa kutshatyalaliswa iBhabhiloni Enkulu, imbandezelo enkulu iya kuba sele iqalisile. Ngoko, liphenjelelwa nguSathana, irhamncwa elimbala ungqombela neempondo zalo ezilishumi ziya kuhlasela abantu bakaYehova. UMtyholi, onomsindo ngakumbi kunanini na ngaphambili kwintlangano kaThixo ebumfazi, uzimisele ukusebenzisa abantu bakhe abakhohliseka ngokulula ekwenzeni imfazwe epheleleyo nxamnye nabaseleyo bembewu yomfazi. (ISityhilelo 12:17) Eli lithuba lokugqibela likaSathana!
2. Ungubani uGogi wakwaMagogi, yaye uYehova umenza njani ukuba ahlasele abantu Bakhe?
2 Intlaselo kaMtyholi yenkohlakalo ichazwe ngokucacileyo kuHezekile isahluko 38. Apho, uSathana othotyiweyo ubizwa ngokuba ‘nguGogi welizwe lakwaMagogi.’ UYehova ufaka amakhonkco okomfuziselo kwimihlathi kaGogi, evumela yena nomkhosi wakhe omninzi oxhobileyo ukuba bahlasele. Ukwenza njani oku? Ngokubangela uGogi abone amaNgqina Akhe enjengabantu abangakhuselekanga ‘abahlanganiselwe ndawonye bephuma ezintlangeni, beziqwebela indyebo nempahla, behleli esazulwini somhlaba.’ Aba bantu ngabona babalaseleyo emhlabeni njengoko ingabo kuphela abangavumanga ukunqula irhamncwa nomfanekiso walo. Amandla nempumelelo yabo yokomoya ziyamcaphukisa uGogi. Ngoko uGogi nomkhosi wakhe omninzi oxhobileyo, kuquka nerhamncwa eliphuma elwandle neempondo zalo ezilishumi, bayabahlasela ukuze bababulale. Noko ke, ngokungafaniyo neBhabhiloni Enkulu, abantu bakaThixo abacocekileyo banandipha inkuselo yobuthixo!—Hezekile 38:1, 4, 11, 12, 15; ISityhilelo 13:1.
3. UYehova uyitshabalalisa njani imikhosi exhobileyo kaGogi?
3 UYehova umtshabalalisa njani uGogi naso sonke isihlwele sakhe? Khawuphulaphule! “‘Ndiza kumbizela ikrele kuwo wonke ummandla wam weentaba,’ itsho iNkosi enguMongami uYehova. ‘Ikrele lakhe ngamnye liya kuba nxamnye nomntakwabo.’” Kodwa izixhobo zenyukliya okanye ezizezinye nje aziyi kusebenza kuloo mfazwe, kuba uYehova uthi: “Ndiza kumgweba, ngendyikitya yokufa nangegazi; ndiza kunisa izantyalantyala zemvula ekhukulayo namatye esichotho, umlilo nesalfure phezu kwakhe naphezu kwamabutho akhe naphezu kwezizwana ezininzi ezinaye. Ngokuqinisekileyo ndiya kuzikhulisa ndizingcwalise ndize ndizazise phambi kwamehlo eentlanga ezininzi; zazi ukuba ndinguYehova.”—Hezekile 38:21-23; 39:11; thelekisa uYoshuwa 10:8-14; ABagwebi 7:19-22; 2 Kronike 20:15, 22-24; Yobhi 38:22, 23.
Lowo Ubizwa Ngokuba “NguThembekile, NguNyaniso”
4. UYohane umchaza njani uYesu Kristu enxibe iimpahla zokulwa?
4 UYehova uyalela ukuba kuze ikrele. Ngubani ophethe eli krele? Xa sibuyela kwiSityhilelo, impendulo siyifumana komnye umbono ochulumancisayo. Phambi kwamehlo kaYohane amazulu ayavuleka ukuze kutyhilwe into eyoyikeka ngokwenyaniso—uYesu Kristu ngokwakhe enxibe iimpahla zokulwa! UYohane uyasixelela esithi: “Ndabona izulu livulekile, yaye khangela! nalo ihashe elimhlophe. Lowo wayehleli kulo ubizwa ngokuba nguThembekile, nguNyaniso, yaye ugweba aze enze imfazwe ngobulungisa. Amehlo akhe alidangatye lomlilo, nasentlokweni yakhe unezithsaba ezininzi.”—ISityhilelo 19:11, 12a.
5, 6. Yintoni efuziselwa (a) ‘lihashe elimhlophe’? (b) ligama elithi “nguThembekile, nguNyaniso”? (c) ngamehlo ‘anjengedangatye lomlilo’? (d) ‘zizithsaba ezininzi’?
5 Njengakumbono ongaphambilana wabakhweli-mahashe abane, eli ‘hashe limhlophe’ lingumfuziselo ofanelekileyo wemfazwe yobulungisa. (ISityhilelo 6:2) Yaye ngubani koonyana bakaThixo onokuba lilungisa elingakumbi kunalo Mphumi-mkhosi unamandla? Ekubeni ‘ebizwa ngokuba nguThembekile yaye nguNyaniso,’ umele ukuba ‘ulingqina elithembekileyo neliyinyaniso,’ elinguYesu Kristu. (ISityhilelo 3:14) Ulwa imfazwe ukuze aphumeze imigwebo kaYehova yobulungisa. Ngaloo ndlela, usebenzisa isigxina sakhe njengoMgwebi omiselwe nguYehova “uThixo Onamandla.” (Isaya 9:6) Amehlo akhe ayoyikeka, ‘anjengedangatye lomlilo,’ akhangele kwintshabalalo ezayo neyoyikekayo yeentshaba zakhe.
6 Kukho izithsaba ezikwintloko yalo Kumkani unguMphumi-mkhosi. Irhamncwa elabonwa nguYohane liphuma elwandle lalinezithsaba ezilishumi, nto leyo eyafanekisela ulawulo lwalo lokwexeshana kummandla womhlaba. (ISityhilelo 13:1) Noko ke, uYesu “unezithsaba ezininzi.” Ulawulo lwakhe oluzukileyo alunakuthelekiswa nanto, ekubeni ‘enguKumkani wookumkani, neNkosi yeenkosi.’—1 Timoti 6:15.
7. Liyintoni igama elibhaliweyo uYesu analo?
7 UYohane uyaqhubeka nengcaciso yakhe esithi: “Unegama elibhaliweyo ekungekho bani ulaziyo ngaphandle kwakhe.” (ISityhilelo 19:12b) IBhayibhile sele ibhekisela kuNyana kaThixo ngamagama anjengoYesu, uImanuweli noMikayeli. Kodwa eli “gama” lingachazwanga libonakala limela isigxina namalungelo ananditshwa nguYesu ebudeni bemini yeNkosi. (Thelekisa iSityhilelo 2:17.) Xa echaza ngoYesu ukususela ngowe-1914, uIsaya uthi: “Igama lakhe liya kubizwa ngokuba nguMcebisi Omangalisayo, uThixo Onamandla, uBawo ongunaPhakade, iNkosana yoXolo.” (Isaya 9:6) Umpostile uPawulos wanxulumanisa igama likaYesu namalungelo Akhe enkonzo angawona aphakamileyo xa wabhala oku: “UThixo wamphakamisela kwisigxina esongamileyo [uYesu] waza ngobubele wamnika igama elingaphezu kwawo onke amanye amagama, ukuze egameni likaYesu agobe onke amadolo.”—Filipi 2:9, 10.
8. Kutheni le nto inguYesu kuphela nje onokulazi igama elibhaliweyo, yaye ngoobani abelana nabo ngamanye amalungelo akhe aphakamileyo?
8 Amalungelo kaYesu akhethekile. Ngaphandle koYehova, nguYesu kuphela onokuyiqonda into ekuthetha yona ukuba kwisigxina esikhulu ngolo hlobo. (Thelekisa uMateyu 11:27.) Ngoko ke, kuzo zonke izidalwa zikaThixo, nguYesu kuphela onokuliqonda ngokupheleleyo eli gama. Sekunjalo, uYesu uquka umtshakazi wakhe kwathile ala malungelo. Ngoko uvakalisa esi sithembiso: ‘Lowo woyisayo ndiya kulibhalela kuye elo gama litsha lilelam.’—ISityhilelo 3:12.
9. Kufuzisela ntoni (a) ‘ukuvathiswa kukaYesu ngesambatho sangaphezulu esifefwe ngegazi’? (b) ukubizwa kukaYesu ngokuba ‘nguLizwi likaThixo’?
9 UYohane wongezelela esithi: “Yaye uvathiswe ngesambatho sangaphezulu esifefwe ngegazi, kwaye igama abizwa ngalo nguLizwi likaThixo.” (ISityhilelo 19:13) ‘Ligazi’ likabani eli? Lisenokuba ligazi lobomi bukaYesu, elaphalazwa ngenxa yoluntu. (ISityhilelo 1:5) Kodwa, kulo mongo, kusenokwenzeka ukuba libhekisela kwigazi leentshaba zakhe eliphalazwa xa kuphunyezwa imigwebo kaYehova kuzo. Sikhunjuzwa ngombono wangaphambilana ekuchazwa kuwo ngokuvunwa komdiliya womhlaba nokunyathelwa kwawo kwisixovulelo sewayini esikhulu somsindo kaThixo de igazi lifikelele ‘emikhaleni yamahashe’—nto leyo efanekisela ukoyiswa ngokupheleleyo kweentshaba zikaThixo. (ISityhilelo 14:18-20) Ngokukwanjalo, igazi esithiwe nkxu kulo isambatho sangaphezulu sikaYesu liqinisekisa ukuba uloyiso lwakhe lolokugqibela yaye luphelele. (Thelekisa uIsaya 63:1-6.) Ngoku kwakhona uYohane uthetha ngokubizwa kukaYesu ngegama. Ngeli thuba ligama elaziwa ngokubanzi—“uLizwi likaThixo”—elifanisa lo Kumkani unguMphumi-mkhosi njengeSithethi sikaYehova Esiphambili noMxhasi wenyaniso.—Yohane 1:1; ISityhilelo 1:1.
Abalwi Abakunye NoYesu
10, 11. (a) UYohane ubonisa njani ukuba uYesu akayedwa kweli dabi? (b) Ibonisa ntoni into yokuba amahashe emhlophe nokuba abakhweli bamahashe bambethe ‘ilinen emhlophe, ecocekileyo, necikizekileyo’? (c) Ngoobani ababumba ‘imikhosi’ yasezulwini?
10 UYesu akayedwa ekulweni kweli dabi. UYohane uyasixelela esithi: “Wayelandelwa yimikhosi yasezulwini, ikhwele amahashe amhlophe, yambethe ilinen emhlophe, ecocekileyo, ecikizekileyo.” (ISityhilelo 19:14) Into yokuba amahashe abe “amhlophe” ibonisa ukuba le yimfazwe yobulungisa. ‘Ilinen ecikizekileyo’ ifanelekile kubakhweli bamahashe boKumkani, yaye ubumhlophe bayo obuqaqambileyo nobucocekileyo buthetha ukuma okunyulu nokobulungisa phambi koYehova. Ngoko, ngoobani ababumba le ‘mikhosi’? Alithandabuzeki elokuba, iquka iingelosi ezingcwele. Kwakusekuqaleni kwemini yeNkosi awathi uMikayeli neengelosi zakhe bakhupha uSathana needemon zakhe ezulwini. (ISityhilelo 12:7-9) Ngokungakumbi, “zonke iingelosi” ziya kuba kunye noYesu njengoko ehleli kwitrone yakhe yobuqaqawuli yaye egweba iintlanga nabantu bomhlaba. (Mateyu 25:31, 32) Ngokuqinisekileyo, kwimfazwe yokugqibela, xa imigwebo kaThixo iphunyezwa ngokupheleleyo, kwakhona uYesu uya kuphelekwa ziingelosi zakhe.
11 Nabanye baya kubandakanyeka. Xa wayethumela isigidimi sakhe kwibandla laseTiyatira, uYesu wavakalisa esi sithembiso: “Lowo woyisayo nogcina izenzo zam kude kuse ekupheleni ndiya kumnika igunya phezu kweentlanga, yaye uya kubalusa abantu ngentonga yentsimbi, abaqhekeze njengezitya zodongwe, njengoko nam ndilifumene kuBawo elo gunya.” (ISityhilelo 2:26, 27) Ngokungathandabuzekiyo, xa lifika elo xesha, abo bazalwana bakaKristu sele besezulwini baya kuba nenxaxheba ekwaluseni abantu neentlanga ngaloo ntonga yentsimbi.
12. (a) Ngaba abakhonzi bakaThixo abasemhlabeni baya kuba nenxaxheba ekulweni eArmagedon? (b) Abantu bakaYehova abasemhlabeni babandakanyeke njani kwiArmagedon?
12 Noko ke, kuthekani ngabakhonzi bakaThixo abalapha emhlabeni? Udidi lukaYohane aluyi kuba nanxaxheba ekulweni eArmagedon; kungayi kuba njalo nangamaqabane alo anyanisekileyo, abo bantu baphuma kuzo zonke iintlanga abebengumsinga ukuya kwindlu kaYehova yokomoya yonqulo. Aba bantu bathanda uxolo sele bewakhandile amakrele abo aba ngamakhuba. (Isaya 2:2-4) Kanti babandakanyeke ngokwenene! Njengoko sesiphawulile, ngabantu bakaYehova ababonakala bengakhuselekanga abahlaselwa ngenkohlakalo nguGogi naso sonke isihlwele sakhe. Lowo ngumqondiso wokuba uKumkani onguMphumi-mkhosi kaYehova, exhaswa yimikhosi yasezulwini, aqalise ukulwa kwimfazwe yembubhiso nxamnye nezo ntlanga. (Hezekile 39:6, 7, 11; thelekisa uDaniyeli 11:44–12:1.) Njengababukeli, abantu bakaThixo abasemhlabeni baya kuba nomdla wokwenene. IArmagedon iya kuthetha usindiso lwabo, yaye baya kuphila ngonaphakade njengabaye baba ngamangqina okuzibonela imfazwe enkulu kaYehova yokuzithethelela.
13. Sazi njani ukuba amaNgqina kaYehova akachasananga nabo bonke oorhulumente?
13 Ngaba oku kuthetha ukuba amaNgqina kaYehova achasene nabo bonke oorhulumente? Akunjalo konke konke! Athobela isiluleko sompostile uPawulos esithi: “Yonke imiphefumlo mayiwathobele amagunya awongamileyo.” Ayaqonda ukuba logama nje inkqubo yangoku isekho, loo ‘magunya awongamileyo’ akho ngokuvunyelwa nguThixo ukuze alondoloze umlinganiselo othile wolungelelwano kwibutho labantu. Ngaloo ndlela, amaNgqina kaYehova ayazihlawula iirhafu zawo, ayayithobela imithetho, ayayihlonela imithetho yendlela, ayayithobela nemithetho yobhaliso, njalo njalo. (Roma 13:1, 6, 7) Ngokungakumbi, alandela imigaqo yeBhayibhile ekubeni nganyanisekileyo nathembekileyo; ebonisa uthando lommelwane; esakha umanyano lwentsapho eyomeleleyo neziphethe kakuhle; yaye eqeqesha nabantwana bawo ukuba babe ngabemi abangumzekelo. Ngale ndlela akanikeli nje kuphela ‘izinto zikaKesare kuKesare, kodwa akwanikela nezinto zikaThixo kuThixo.’ (Luka 20:25; 1 Petros 2:13-17) Ekubeni iLizwi likaThixo libonisa ukuba amagunya oorhulumente beli hlabathi akho okwexeshana, ngoku amaNgqina kaYehova alungiselela ubomi obupheleleyo, ubomi bokwenene, obuza kunanditshwa kungekudala phantsi kolawulo loBukumkani bukaKristu. (1 Timoti 6:17-19) Nangona engayi kuba nanxaxheba ekubhukuqeni amagunya eli hlabathi, amaNgqina ayakuhlonela oko iLizwi likaThixo eliphefumlelweyo, iBhayibhile Engcwele, likuthethayo ngomgwebo uYehova aza kuwuphumeza eArmagedon.—Isaya 26:20, 21; Hebhere 12:28, 29.
Ukuya Kwidabi Lokugqibela!
14. Lifuzisela ntoni ‘ikrele elibukhali’ eliphuma emlonyeni kaYesu?
14 UYesu uluphelelisa ngaliphi igunya uloyiso lwakhe? UYohane uyasazisa esithi: “Emlonyeni wakhe kuphuma ikrele elide elibukhali, ukuze azixabele ngalo iintlanga, azaluse ngentonga yentsimbi.” (ISityhilelo 19:15a) Elo ‘krele libukhali’ lifuzisela igunya uYesu alinikwe nguThixo lokukhupha imiyalelo yokutshatyalaliswa kwabo bonke abangavumiyo ukuxhasa uBukumkani bukaThixo. (ISityhilelo 1:16; 2:16) Lo mfuziselo ucacileyo ufana nokuchazwe kumazwi kaIsaya: “[UYehova] umlomo wam wawenza wanjengekrele elibukhali. Undifihle emthunzini wesandla sakhe. Kwaye undenze ndalutolo olukhazimlisiweyo.” (Isaya 49:2) Apha uIsaya wafanekisela kwangaphambili uYesu, ovakalisa imigwebo kaThixo aze ayiphumeze ngokungathi kungotolo olungenakuphosa.
15. Ngeli xesha, ngoobani abaya kuba sele bebhenciwe baza bagwetywa ukuze kuphawulwe ukuqalisa kwantoni?
15 Ngeli xesha, uYesu uya kuba sele ezalisekise amazwi kaPawulos athi: “Uya kwandula ke ngoko umchasi-mthetho atyhileke, lowo iNkosi uYesu eya kumbhangisa ngomoya womlomo wayo ize imtshitshise ngembonakaliso yobukho bayo.” Ewe, ubukho (pa·rou·siʹa ngesiGrike) bukaYesu bubonakaliswe ukususela ngowe-1914 ukusa phambili ngokubhenca nangokugweba umchasi-mthetho, abefundisi beNgqobhoko. Obo bukho buya kubonakala ngendlela ekhwankqisayo xa iimpondo ezilishumi zerhamncwa elimbala ungqombela ziphumeza loo mgwebo zize ziyihlasele iNgqobhoko, nayo yonke iBhabhiloni Enkulu. (2 Tesalonika 2:1-3, 8) Eso iya kuba sisiqalo sembandezelo enkulu! Emva koko, uYesu uya kunikela ingqalelo yakhe kwintlangano kaSathana esaseleyo, ngokuvisisana nesi siprofeto: ‘Awubethe umhlaba ngentonga yomlomo wakhe, ambulale ongendawo ngomoya wemilebe yakhe.’—Isaya 11:4.
16. IiNdumiso nencwadi kaYeremiya ziyichaza njani indima yoKumkani onguMphumi-mkhosi omiselwe nguYehova?
16 UKumkani onguMphumi-mkhosi, njengalowo umiselwe nguYehova, uya kubahlula abo baya kusinda kwabo baya kufa. UYehova, ethetha ngokuprofetayo nalo Nyana kaThixo, uthi: ‘Uya kubaqhekeza abalawuli bomhlaba ngentonga yobukhosi yentsimbi, ngokungathi sisitya sombumbi uya kubaqhekeza babe ziingceba.’ Yaye uYeremiya ubhekisa kwezo nkokeli zaseburhulumenteni zonakeleyo nabaxhasi bazo, esithi: “Bhombolozani, balusi, nize nidanduluke! Bhuqabhuqani, zingangamsha zomhlambi, ngenxa yokuba izalisekile imihla yenu yokuxhela nokuchithachitheka kwenu, yaye niya kuwa njengesitya esinqwenelekayo!” Enoba aba balawuli bebebonakala benqweneleka kangakanani na kwihlabathi elingendawo, isithonga esinye esivela kwintonga yentsimbi yoKumkani siya kubahlekeza, ngokungathi kwaphulwa isitya esithandekayo. Kuya kwenzeka kanye njengoko uDavide waprofetayo ngeNkosi uYesu: “Intonga yamandla akho uYehova uya kuyithumela iphuma eZiyon, esithi: ‘Hamba usoyisa phakathi kweentshaba zakho.’ UYehova ngasekunene kwakho ngokuqinisekileyo uya kuqhekeza ookumkani ngemini yomsindo wakhe. Uya kuphumeza umgwebo phakathi kweentlanga; uya kubangela ukuba kuzale izidumbu.”—INdumiso 2:9, 12; 83:17, 18; 110:1, 2, 5, 6; Yeremiya 25:34.
17. (a) UYohane usichaza njani isenzo sokugweba esiphunyezwa nguKumkani onguMphumi-mkhosi? (b) Chaza ezinye iziprofeto ezibonisa indlela eya kuba yintlekele ngayo imini yomsindo kaThixo kwiintlanga.
17 Lo Kumkani onguMphumi-mkhosi noligorha uyabonakala kwakhona kwingcaciso elandelayo yombono: “Uxovula nesixovulelo sewayini yomsindo wengqumbo kaThixo uSomandla.” (ISityhilelo 19:15b) Kumbono ongaphambilana, uYohane wayesele ekubonile ukunyathelwa ‘kwesixovulelo sewayini yomsindo kaThixo.’ (ISityhilelo 14:18-20) KuIsaya kuchazwa isixovulelo sewayini yomgwebo, yaye nabanye abaprofeti bachaza ngendlela eya kuba yintlekele ngayo imini yomsindo kaThixo kuzo zonke iintlanga.—Isaya 24:1-6; 63:1-4; Yeremiya 25:30-33; Daniyeli 2:44; Zefaniya 3:8; Zekariya 14:3, 12, 13; ISityhilelo 6:15-17.
18. Yintoni echazwa ngumprofeti uYoweli mayela nokugweba kukaYehova zonke iintlanga?
18 Umprofeti uYoweli unxulumanisa isixovulelo sewayini nokuza kukaYehova ukuze ‘agwebe zonke iintlanga ezijikelezileyo.’ Yaye nguYehova okhupha lo myalelo, ngokungathandabuzekiyo ewubhekisa kuMgwebi anxulumene Naye, uYesu nemikhosi yakhe yasezulwini: “Fakani irhengqa, kuba isivuno sivuthiwe. Yizani, yihlani, kuba isixovulelo sewayini sizele. Okunene iifatyi zesixovulelo ziyaphuphuma; kuba ububi babo buninzi. Izihlwele, izihlwele zisentilini yesigqibo, kuba imini kaYehova isondele entilini yesigqibo. Ilanga nenyanga ngokuqinisekileyo ziya kuba mnyama, nazo kanye iinkwenkwezi okunene ziya kukufinyeza ukuqaqamba kwazo. UYehova uya kugquma eseZiyon, uya kulivakalisa ilizwi lakhe eseYerusalem. Izulu nomhlaba ngokuqinisekileyo ziya kunyikima; kodwa uYehova uya kuba yindawo yokusabela yabantu bakhe, nenqaba koonyana bakaSirayeli. Kuya kufuneka nina nazi ukuba ndinguYehova uThixo wenu.”—Yoweli 3:12-17.
19. (a) Uya kuphendulwa njani umbuzo ophakanyiswe kweyoku-1 kaPetros 4:17? (b) Liliphi igama elibhalwe kwisambatho sangaphezulu sikaYesu, yaye kutheni liya kungqineka lifanelekile?
19 Ngenene, le iya kuba yimini yembubhiso kwiintlanga nakubantu abangathobeliyo kodwa iya kuba yimini yokukhululeka kubo bonke abaye bamenza ikhusi labo uYehova noKumkani wakhe onguMphumi-mkhosi! (2 Tesalonika 1:6-9) Umgwebo owaqalisa ngendlu kaThixo ngowe-1918 uya kube ufikelele kwincopho yawo, nto leyo eya kunikela impendulo kumbuzo okweyoku-1 kaPetros 4:17 othi: “Siya kuba yintoni na isiphelo sabo bangazithobeliyo iindaba ezilungileyo zikaThixo?” UMoyisi ozukileyo uya kuba esinyathele ngokupheleleyo isixovulelo sewayini, ebonisa ukuba unguLowo uphakamileyo uYohane athi ngaye: “Kwisambatho sakhe sangaphezulu, kanye ethangeni lakhe, unegama elibhaliweyo kwathiwa, uKumkani wookumkani neNkosi yeenkosi.” (ISityhilelo 19:16) Ungqineke engonamandla angaphezulu lee kwawakhe nawuphi na umlawuli wasemhlabeni, naye nawuphi na ukumkani okanye inkosi engumntu. Isidima nozuko lwakhe zigqwesile. Uhambe ‘ngenyaniso, nentobeko nobulungisa’ yaye woyise ngonaphakade! (INdumiso 45:4) Kwizambatho zakhe ezifefwe ngegazi kubhalwe igama alijizekwe yiNkosi enguMongami uYehova, anguMthetheleli wayo!
Isidlo SikaThixo Esikhulu Sangokuhlwa
20. UYohane usichaza njani ‘isidlo sangokuhlwa esikhulu sikaThixo,’ yaye oku kusikhumbuza ngasiphi isiprofeto sangaphambilana esifanayo nesi?
20 Kumbono kaHezekile, emva kokutshatyalaliswa kwesihlwele sikaGogi, iintaka nezilwanyana zasendle zimenyelwa kwisidlo! Zicoca umhlaba ngokudla izidumbu zeentshaba zikaYehova. (Hezekile 39:11, 17-20) Amazwi alandelayo kaYohane asenza sisikhumbule ngokucacileyo isiprofeto esichazwe ngaphambilana: “Ndabona nengelosi imi elangeni, yaza yadanduluka ngelizwi elikhulu yathi kuzo zonke iintaka eziphaphazela esazulwini sezulu: ‘Yizani apha, nihlanganisane ndawonye kwisidlo sangokuhlwa esikhulu sikaThixo, ukuze nidle inyama yookumkani nenyama yabaphathi-mikhosi nenyama yabantu abomeleleyo nenyama yamahashe neyabakhweli bawo, nenyama yabo bonke, abakhululekileyo namakhoboka nabancinane nabakhulu.’”—ISityhilelo 19:17, 18.
21. Uyintoni umfuziselo (a) ‘wokuma kwengelosi elangeni’? (b) wokushiywa kwabafileyo belele phezu komhlaba? (c) woludwe lwabo bazidumbu zabo ziya kushiywa zilele emhlabeni? (d) webinzana elithi ‘isidlo sangokuhlwa esikhulu sikaThixo’?
21 Le ngelosi “imi elangeni,” indawo yokuyalela ukuze kutsalwe ingqalelo yeentaka. Izimema ukuba zizilungiselele ukuzifikisela kwinyama yabo baza kubulawa nguKumkani onguMphumi-mkhosi nemikhosi yakhe yasezulwini. Into yokuba abafileyo beza kushiywa phezu komhlaba ifuzisela ukuba baya kufa bahlazeke kuwonke-wonke. NjengoIzebhele wakudala, abayi kungcwatywa ngokubekekileyo. (2 Kumkani 9:36, 37) Uludwe lwabo bazidumbu zabo ziya kushiywa ziqungquluze apho lubonisa umkhamo wale ntshabalalo: ookumkani, abaphathi bemikhosi, abantu abanamandla, abakhululekileyo nabangamakhoboka. Abakho abashiywayo. Yonke inxalenye yehlabathi elinemvukelo elichasene noYehova iya kupheliswa. Emva koku, akusayi kuphinda kubekho ulwandle olungazolanga lwabantu abadidekileyo. (ISityhilelo 21:1) Esi ‘sisidlo sangokuhlwa esikhulu sikaThixo,’ ekubeni inguYehova omema iintaka ukuba zidle apho.
22. UYohane ukushwankathela njani okuya kwenzeka kwimfazwe yokugqibela?
22 UYohane ushwankathela okuya kwenzeka kwimfazwe yokugqibela esithi: “Yaye ndabona irhamncwa nookumkani bomhlaba nemikhosi yabo behlanganisene ndawonye ukuba benze imfazwe nalowo uhleli ehasheni kunye nomkhosi wakhe. Laza irhamncwa labanjwa, kunye nalo kwabanjwa umprofeti wobuxoki owayesenza phambi kwalo imiqondiso awathi ngayo walahlekisa abo bamkela uphawu lwerhamncwa nabo banqula umfanekiso walo. Bobabini baphoswa bephila edikeni lomlilo elivutha isalfure. Abaseleyo babulawa ngekrele elide lalowo uhleli ehasheni, krele elo laliphuma emlonyeni wakhe. Zadla zahlutha zonke iintaka yinyama yabo.”—ISityhilelo 19:19-21.
23. (a) ‘Imfazwe yaloo mini inkulu kaThixo uSomandla’ ilwelwa ‘eArmagedon’ ngayiphi ingqiqo? (b) Sisiphi isilumkiso ‘ookumkani bomhlaba’ abangasithobelanga, yaye uyintoni umphumo?
23 Emva kokuphalazwa kwesitya sesithandathu sengqumbo kaYehova, uYohane wathi ‘ookumkani bomhlaba omiweyo uphela’ bahlanganiswa yinkqubo ephembelelayo yeedemon “kwimfazwe yemini enkulu kaThixo uSomandla.” Le mfazwe ilwelwa eArmagedon—engeyiyo indawo yokoqobo, kodwa eyimeko esehlabathini lonke ebangela ukuba kuphunyezwe umgwebo kaYehova. (ISityhilelo 16:12, 14, 16) Ngoku uYohane ubona idabi. Apho, abachasene noThixo ngabo bonke ‘ookumkani bomhlaba nemikhosi yabo.’ Bakugatye ngenkani ukuzithoba kuKumkani kaYehova. Wabanika isilumkiso esifanelekileyo kwesi sigidimi siphefumlelweyo: “Mangeni unyana, ukuze [uYehova] angabi nomsindo nani ningatshabalali endleleni.” Ekubeni bengazithobanga kulawulo lukaKristu, bamele bafe.—INdumiso 2:12.
24. (a) Nguwuphi umgwebo ophunyezwa kwirhamncwa nakumprofeti wobuxoki, yaye ‘baphila’ ngayiphi ingqiqo? (b) Kutheni le nto ‘idike lomlilo’ limele libe lelokomfuziselo?
24 Irhamncwa elineentloko ezisixhenxe neempondo ezilishumi eliphuma elwandle, elifanekisela intlangano kaSathana yobupolitika, liyatshabalala lingabikho, kunye nomprofeti wobuxoki, igunya lesixhenxe lehlabathi. (ISityhilelo 13:1, 11-13; 16:13) Ngoxa ‘bephila,’ okanye besasebenza ngokumanyeneyo ekuchaseni kwabo abantu bakaThixo emhlabeni, baphoselwa “edikeni lomlilo.” Ngaba eli lidike lomlilo lokoqobo? Akunjalo, kanye njengokuba irhamncwa nomprofeti wobuxoki bengezozilwanyana zokoqobo. Kunoko, lifuzisela intshabalalo epheleleyo neyokugqibela, indawo ekungenakubuywa kuyo. Apha kulapho, kamva, ukufa neHadesi noMtyholi ngokwakhe, baya kuphoselwa khona. (ISityhilelo 20:10, 14) Ngokuqinisekileyo asiyondawo ekuthuthunjiswa kuyo ngonaphakade abangendawo, ekubeni kwaingcamango yendawo enjalo icekiswa nguYehova.—Yeremiya 19:5; 32:35; 1 Yohane 4:8, 16.
25. (a) Ngoobani abo “babulawa ngekrele elide lalowo uhleli ehasheni”? (b) Ngaba simele silindele ukuba nabaphi na babo ‘babuleweyo’ baya kuvuswa?
25 Bonke abanye ababengeyonxalenye engqalileyo yorhulumente, kodwa abathi sekunjalo baba yinxalenye engenakulungiseka yeli hlabathi lonakeleyo loluntu, nabo ngokukwanjalo “babulawa ngekrele elide lalowo uhleli ehasheni.” UYesu uya kubavakalisa njengabafanelwe kukufa. Ekubeni kwimeko yabo idike lomlilo lingakhankanywa, ngaba sinokulindela ukuba baya kuvuswa? Akukho apho sixelelwa khona ukuba abo babulewe nguMgwebi kaYehova ngelo xesha baza kuvuswa. Njengokuba uYesu wachazayo, bonke abo bangezizo “izimvu” baya “emlilweni ongunaphakade, owalungiselelwa uMtyholi neengelosi zakhe,” oko kukuthi, “kwintshabalalo engunaphakade.” (Mateyu 25:33, 41, 46) Oku kuyifikisa encotsheni “imini yomgwebo neyentshabalalo yabantu abangenabuthixo.”—2 Petros 3:7; Nahum 1:2, 7-9; Malaki 4:1.
26. Ngokufutshane chaza umphumo weArmagedon.
26 Ngale ndlela, yonke intlangano kaSathana yasemhlabeni ifikelela esiphelweni. “Izulu langaphambili” elilulawulo lobupolitika lidlulile. ‘Umhlaba,’ oyinkqubo ebonakala ihleli ngokusisigxina neyakhiwe nguSathana kwiinkulungwane ezidlulileyo, ngoku utshatyalaliswa ngokupheleleyo. ‘Ulwandle,’ olungabantu abaninzi abangendawo abachase uYehova, alusekho. (ISityhilelo 21:1; 2 Petros 3:10) Noko ke, uYehova umgcinele ntoni uSathana? UYohane uhlabela mgama esixelela.