Imibuzo Evela Kubafundi

◼ Ngaba umpostile uPawulos wayebonisa ikhethe lobuhlanga ekuvumelaneni namazwi okuhlaba amadlala awayebhekiswa kubantu abangamaKrete xa bebonke?

Hayi, uPawulos akazange azinikele kuqheliselo lokuthetha kakubi ngabantu bolunye uhlanga okanye imvelaphi yobuzwe.

Lo mbuzo uveliswe ngamagqabaza akwincwadi kaPawulos eya kumfundi onguTito. UPawulos wayemshiye kwisiqithi saseKrete solwandle olukhulu lweMeditera ukuze ‘alungise izinto eziseleyo, amise amadoda amakhulu kwimizi ngemizi.’ UPawulos wazandlala ezinye zemfaneleko zabadala bebandla kodwa wacebisa uTito ngelithi: “Baninzi abathethi bezinto ezingento nabakhohlisi, abaswele intobeko, ngokukodwa abo bolwaluko, abamelwe kukuvingcwa imilomo; abathi izindlu ziphela bazibhukuqe.”—Tito 1:5, 10, 11.

UPawulos wahlabela mgama kwindinyana 12 esithi: “Wathi omnye wabo, kwaumprofeti wakowabo, amaKrete ahlala engamaxoki, amarhamncwa amabi, amadlakudla angasebenziyo.” Kwindinyana 13, wongezelela wathi “obo bungqina buyinene. Ngenxa yeli thuba bohlwaye kabukhali, badane, ukuze baphile elukholweni.”

Abaguquleli abaninzi beBhayibhile bavumela amazwi kaPawulos athi “obo bungqina buyinene” alandele kanye emva koko wakucaphula kumprofeti wamaKrete. Abanye baqalisa isiqendu esitsha ngendinyana 13. aKuyo nayiphi na yezi meko, yintoni le uPawulos wayevumelana nayo?

Ngokuqinisekileyo wayengavumelani nalo naluphi na uhlobo lokuthetha kakubi ngobuzwe okanye ubuhlanga nxamnye namaKrete. Sinokuqiniseka ngako oko, kuba uPawulos wayesazi ukuba eKrete kwakukho amaKristu alungileyo uThixo awayekholiswa ngawo nawawathambisa ngomoya wakhe oyingcwele. (Izenzo 2:5, 11, 33) Kwakukho amaKristu azinikeleyo awaneleyo okwakha amabandla “kwimizi ngemizi.” Ngoxa amaKristu anjalo ayengengobantu bafezekileyo, sinokuqiniseka ukuba ayengengawo amaxoki namadlakudla angasebenziyo; kungenjalo ayengayi kuqhubeka engakholekileyo kuThixo. (Filipi 3:18, 19; ISityhilelo 21:8) Ibe njengoko namhlanje sifumanisa kunjalo kuzo zonke iintlanga, kunokwenzeka ukuba eKrete kwakukho abantu abantliziyo zinyanisekileyo ababegcunyiswa yimilinganiselo ephantsi yikuziphatha yabantu ababebangqongile yaye babekulungele ukusabela kwisigidimi samaKristu.—Hezekile 9:4; thelekisa iZenzo 13:48.

Kwelinye icala, babekho nabantu ababengenayo imilinganiselo ephakamileyo yokuziphatha apho eKrete. UPawulos wabona kufanelekile ukucaphula amazwi ekubonakala ukuba ayephuma kuEpimenides, imbongi yamaKrete (umprofeti okanye umthetheli) ngenkulungwane yesithandathu Ngaphambi Kwexesha Eliqhelekileyo. Kodwa uPawulos wayevumelana nalo nkcazelo njengoko yayibhekiswa kwisahlulo esithile sabemi baseKrete.

Aba ‘babengabathethi bezinto ezingento nabakhohlisi’ ababedibana namaKristu athembekileyo nababezama ‘ukubhukuqa izindlu ziphela.’ Abakhohlisi ababhukuqayo abanjalo bayifanelekela ngokwenene inkcazelo ethi: ‘Bangamaxoki, amarhamncwa amabi,’ eyayiyinyaniso ngokulinganayo ngabantu abanjalo naphi na. (2 Timoti 3:6, 13) Ngaphezu koko, nabani na owayesele esebandleni owathi wakhohliselwa ekuthabatheni ezo ndlela kwakufuneka ‘ohlwaywe kabukhali.’ Ngaloo ndlela abo bangenelwayo kwisohlwayo banokuncedwa ukuba babe ngumzekelo ngokwasemisebenzini emihle nasekubeni ‘ngabalizwi liphilileyo, lingenakugwetywa.’—Tito 2:6-8.

Thina sonke sifanele sifumane isilumkiso koku. Ikhethe lobuhlanga okanye lobuzwe lisenokwesamela kwindawo esikuyo. (Thelekisa uYohane 7:47-52.) Kunokwenzeka ukuba siyabeva abamelwane, amaqabane esikolo, okanye abantu esisebenza nabo besenza amagqabaza okucalula abanye abantu, anjengala, ‘A!, abo bantu basemntla abanabuntu yaye abanaluvelwano’; ‘Kaloku uyabazi indlela abanekratshi ngayo abantu basemazantsi’; okanye ‘Kuyingozi ukubathemba abo bantu baphesheya komda.’

Sifanele sizabalazele ukukuphepha ukuzinikela ekuchazeni banzi isimo sabantu ngendlela egxekayo ekunokwenzeka ukuba ayinabunyaniso okanye ibaxwe ngokugqithiseleyo. Bambi basenokuba nobuhlobo ngakumbi yaye bathethe ngakumbi, abanye babe ngamayebeyebe ngakumbi okanye babe ngabazekelelayo ekubeni ngabanomdla kubantu basemzini. Kanti, sifanele sikhumbule ukuba bambi babazalwana bethu abangamaKristu ngokungathandabuzekiyo bayafumaneka phakathi kwabantu bolo hlanga okanye isizwe, kwanabaninzi abangekabi ngomaKristu okwenyaniso kodwa abaneempawu ezincomekayo yaye belambele ubulungisa.

Umpostile uPetros wayibethelela inyaniso yokuba “uThixo akamkhethi wabuso bamntu; kwiintlanga zonke, lowo umoyikayo, asebenze ubulungisa, wamkelekile kuye.” (IZenzo 10:34, 35) Sinokuqiniseka ngokupheleleyo ukuba uPawulos wavumelana noko, ebonakalisa imbono ekwanye kwiincwadi zakhe nakwintetho yakhe. Nathi sifanele sibe njalo.

[Umbhalo osemazantsi]