Imbono YeBhayibhile

Ngaba Intiyo Yobuhlanga Iyathetheleleka?

UBUYA kuvakalelwa njani ukuba abantu bebecinga ukuba ungumhanahanisi, unogonyamelo, usisidenge okanye ungumntu ongcolileyo kuba nje ungowohlanga oluthile?a Ngokuqinisekileyo ubungayi kukuthanda oko. Okubuhlungu kukuba oku kuye kwehlela izigidi zabantu. Ngapha koko, ukutyhubela imbali kuye kwaxhatshazwa abantu abangenatyala abaninzi yaye bambi baye babulawa kuba nje ingabohlanga okanye isizwe esahlukileyo. Eneneni, iimfazwe ezimanyumnyezi ezikhoyo namhlanje ziphenjelelwa yintiyo yobuhlanga. Sekunjalo, abantu abaninzi abaxhasa ezi mfazwe bemi ngelithi bakholelwa kuThixo naseBhayibhileni. Kukho nabo bathi ucalucalulo lobuhlanga alusoze luphele—bathi lusegazini kuthi sonke.

Ngaba iBhayibhile iyayixhasa intiyo yobuhlanga? Ngaba zikho iimeko apho kuvumelekileyo ukuthiya abantu bolunye uhlanga okanye isizwe? Ngaba likho ithemba lokuba iya kuze iphele intiyo yobuhlanga? Ithini iBhayibhile ngalo mbandela?

Batshatyalaliswa Ngenxa Yezenzo Zabo

Ukuwukha phezulu umbandela wendlela uThixo awayeqhubana ngayo nabantu mandulo, kunokubangela ukuba ubani afikelele kwisigqibo esiphosakeleyo—acinge ukuba uThixo wayeyixhasa intiyo yobuhlanga. Ngaba iingxelo zeBhayibhile azibonisi ukuba uThixo wayekhe atshabalalise lonke uhlanga okanye isizwe? Kunjalo, kodwa xa uziqwalasela nzulu ezo ngxelo, uya kuphawula ukuba uThixo wayetshabalalisa olo hlanga ngenxa yokuba lungayithobeli imithetho yakhe kungekhona ngenxa yokuba iluhlanga oluthile.

Ngokomzekelo, uYehova uThixo watshabalalisa amaKanan ngenxa yokuziphatha kakubi kwawo ngokwesini nangenxa yokusebenzelana kwawo needemon. Ayede abingelele ngabantwana koothixo bobuxoki! (Duteronomi 7:5; 18:9-12) Noko ke, kwezinye iimeko amaKanan athile ayebonisa ukholo kuThixo aze aguquke. Xa esenjenjalo, uYehova wayewasindisa aze awasikelele. (Yoshuwa 9:3, 25-27; Hebhere 11:31) Elinye ibhinqa elingumKanan, uRahabhi, lada laba ngukhokokazi kaMesiya othenjisiweyo, uYesu Kristu.—Mateyu 1:5.

UMthetho uThixo awawunika amaSirayeli ubonisa ukuba akakhethi buso. Kunoko, ufuna ukuba bonke abantu baphile kakuhle. KwiLevitikus 19:33, 34, sifumana lo myalelo wothando uThixo awunika amaSirayeli: “Ukuba uthe umphambukeli waphambukela ezweni lenu, nize ningamphathi kakubi. Makabe njengenzalelwane yenu umphambukeli lowo uphambukele kuni; yaye uze umthande njengawe, ngokuba nani naningabaphambukeli ezweni laseYiputa. NdinguYehova uThixo wenu.” Imiyalelo efana nalo iyafumaneka nakwi-Eksodus nakwiDuteronomi. Kucacile ukuba uYehova wayengayixhasi intiyo yobuhlanga. Wayefuna kubekho imvisiswano phakathi kwazo zonke iintlanga.

UYesu Wakhuthaza Uxolo Phakathi Kweentlanga Ezahlukahlukeneyo

Ngoxa uYesu wayesemhlabeni, amaYuda namaSamariya ayejongelana phantsi. Ngesinye isihlandlo abantu ababehlala kwidolophana yaseSamariya bamgxotha uYesu kuba nje engumYuda owayesiya eYerusalem. Wawuza kuvakalelwa njani ukuba yayinguwe ogxothwa ngaloo ndlela? Kusenokwenzeka ukuba abafundi bakaYesu babenentiyo yobuhlanga eyayikho ngexesha labo xa bambuzayo: “Nkosi, uyafuna na ukuba sitsho kuhle umlilo ezulwini, ubabhubhise?” (Luka 9:51-56) Ngaba intiyo ababenayo abafundi bakhe yamchaphazela uYesu? Akunjalo, kunoko wabakhalimela waza wafuna indawo yokulala kwenye idolophana. Kamsinya emva koko, uYesu wenza umzekeliso womSamariya olungileyo. Ngokuqinisekileyo, oku kwabenza babona ukuba umntu akabi lutshaba kuba nje engowolunye uhlanga. Eneneni, usenokude abe ngoyena mmelwane ulungileyo!

Iintlanga Ezahlukahlukeneyo Kwibandla LamaKristu

Ebudeni bobulungiseleli bakhe basemhlabeni, uYesu wanikel’ ingqalelo ekwenzeni abafundi abantu bohlanga lwakhe kuphela. Kodwa wathi ekugqibeleni nabantu bezinye iintlanga babeza kuba ngabalandeli bakhe. (Mateyu 28:19) Ngaba kwakuza kwamkelwa abantu bazo zonke iintlanga? Ewe! Umpostile uPetros wathi: “Ngokuqinisekileyo ndiyaqonda ukuba uThixo akakhethi buso, kodwa kwiintlanga zonke umntu omoyikayo aze asebenze ubulungisa wamkelekile kuye.” (IZenzo 10:34, 35) Kamva umpostile uPawulos wayibethelela le ngongoma xa wathi ayibalulekanga into yokuba umntu ngowaluphi uhlanga kwibandla lamaKristu.—Kolose 3:11.

Ubungqina obungakumbi bokuba uThixo wamkela abantu bazo zonke iintlanga bufumaneka eBhayibhileni kwincwadi yeSityhilelo. Ephefumlelwe nguThixo, umpostile uYohane wabona “isihlwele esikhulu . . . siphuma kuzo zonke iintlanga nezizwe nezizwana neelwimi,” yaye safumana usindiso kuThixo. (ISityhilelo 7:9, 10) Esi ‘sihlwele sikhulu’ siza kuba sisiseko sehlabathi elitsha apho abantu bazo zonke iintlanga beya kuhlala ndawonye ngoxolo, yaye into eya kubenza bamanyane luthando abanalo ngoThixo.

Okwangoku, amaKristu afanele azabalazele ukungagxeki abantu ngenxa nje yokuba bengabohlanga olwahlukileyo. Kukubonisa uthando ukujonga abantu ngendlela abajonga ngayo uThixo, singajongi uhlanga abalulo. Ngaba leyo asiyondlela obungathanda ukujongwa ngayo? UYesu wasibongoza: “Zonke izinto, ngoko, enifuna abantu bazenze kuni, yenzani ngokunjalo nani kubo.” (Mateyu 7:12) Ukungabi nantiyo yobuhlanga kuyahlaziya. Kwenza ukuba umntu abe noxolo lwengqondo aze ahlalisane ngoxolo nabanye abantu. Okubaluleke nangakumbi kukuba, kubangela ukuba senze izinto ngendlela azenza ngayo uMdali wethu ongakhethi buso, uYehova uThixo. Esinjani sona isizathu sokungabi nantiyo yobuhlanga!

[Umbhalo osemazantsi]