Yintoni Enokunceda Abantu Beentlanga Ezahlukeneyo Bakwazi Ukunyamezelana?

KWILIZWE laseSpeyin usompempe unqumamisa umdlalo webhola ekhatywayo. Konakele phi bethu? Izihlwele zababukeli zithuka umdlali othile ovela eCameroon kangangokuba ufuna ukuphuma ebaleni. ERashiya sele ithande ukuqheleka into yokuhlaselwa kwabantu abavela eAfrika, eAsia nakwiLatin America; ibe ebudeni bowama-2004, ukuhlasela abantu bezinye iintlanga kuye kwanda ngama-55 ekhulwini kwaza kwafikelela kwiziganeko ezingama-394 ngowama-2005. Olunye uhlolisiso lwabonisa ukuba umntu omnye kwabathathu ababuzwayo kubemi baseAsia nabamnyama abahlala eBritani wayevakalelwa kukuba uye waphelelwa ngumsebenzi ngenxa yokucalucalulwa ngokobuhlanga. Le yimizekelo nje ebonisa oko kwenzeka ehlabathini.

Ukungakwazi kwabantu ukunyamezelana ngokobuhlanga kuyahlukahlukana—kuqala ekuthukeni okanye ukuthetha ungacinganga kuse kwimigudu yelizwe yokuzama ukutshayela uhlanga oluthile.a Yintoni ebangela abantu beentlanga ezahlukeneyo bangakwazi ukunyamezelana? Sinokuyiphepha njani thina loo nto? Ngaba kusengqiqweni ukuba nethemba lokuba ngenye imini bonke abantu baya kuze bakwazi ukuhlala ndawonye ngoxolo? IBhayibhile isinika iimpendulo ezibangela umdla kule mibuzo?

Ingcinezelo Nentiyo

IBhayibhile ithi: “Intliziyo yomntu ityekele ebubini kwasebutsheni bakhe.” (Genesis 8:21) Ngenxa yoku, abanye abantu iyabonwabisa into yokucinezela abanye. IBhayibhile yongezelela ithi: “Khangela! iinyembezi zabo bacinezelweyo, kodwa bengenamthuthuzeli; yaye kwicala labacinezeli kwakukho amandla.”—INtshumayeli 4:1.

IBhayibhile iphinde ibonise nokuba kudala ikho le nto yokuthiyana kwabantu ngokobuhlanga. Ngokomzekelo, kwinkulungwane ye-18 ngaphambi kweXesha Eliqhelekileyo, uFaro waseYiputa wacela uYakobi ongumHebhere nentsapho yakhe ukuba baye kuhlala eYiputa. Noko ke, kamva kwavela omnye uFaro owaziva esongelwa bubukho belo qela likhulu labaphambukeli. Le ngxelo ithi, ngenxa yoko: “Wathi kubantu bakhe: ‘Khangelani! Aba bantu aba, oonyana bakaSirayeli, baninzi kwaye banamandla kunathi. Yizani ke! Masiqhubane ngobuqili nabo, kuba hleze bande.’ . . . Ngoko bamisa phezu kwabo amadoda aziintloko okubasebenzisa ngokubaqhuba ngebhaxa ngenjongo yokubacinezela ngemithwalo yabo.” (Eksodus 1:9-11) AmaYiputa ade ayalela nokuba kubulawe amakhwenkwe asandul’ ukuzalwa aloo nzala kaYakobi.—Eksodus 1:15, 16.

Yintoni Unobangela Woku?

Iicawa zehlabathi azifane zincede zilwe noku kunganyamezelani kwabantu ngokobuhlanga. Nakuba iyinyaniso into yokuba kukho abathile abaye bangamaqhawe balwa nengcinezelo, xa sithetha ngonqulo xa lulonke iicawa bezisoloko zisima kwicala labacinezeli. Kwakusenzeka kanye oko eUnited States, apho ukucinezelwa kwabamnyama kwakugunyaziswa ngumthetho, ngokubulawa nangokungavunyelwa kokutshatana kweentlanga okwaqhubeka de kwangowe-1967. Kwakunjalo naseMzantsi Afrika ngexesha localucalulo, apho igcuntswana labantu lalikhusela ukongama kwalo ngemithetho eyayisalela ukutshatana kweentlanga. Kwimeko nganye kwezi, abathile kula maqela ayekhuthaza ubuhlanga babephambili elunqulweni.

Noko ke, iBhayibhile isichazela oyena nobangela wokungakwazi kweentlanga ukunyamezelana, ikwasicacisela nesizathu sokucinezelana kwazo. Ithi: “Lowo ungenaluthando akamazi uThixo, kuba uThixo uluthando. Ukuba umntu uthi: ‘Ndiyamthanda uThixo,’ kodwa abe emthiyile umzalwana wakhe, ulixoki. Kuba lowo ungamthandiyo umzalwana wakhe, ambonileyo, akanako ukumthanda uThixo, angambonanga.” (1 Yohane 4:8, 20) La mazwi asichazela kakuhle esona sizathu sokucalulana kwabantu. Enoba bayanqula okanye akunjalo, abantu bacalulana ngenxa yokuba abamazi uThixo.

Ukwazi UThixo—Eyona Nto Inokwenza Iintlanga Zikwazi Ukunyamezelana

Ukwazi nokuthanda uThixo kuzenza njani iintlanga zikwazi ukunyamezelana? Luluphi ulwazi olufumaneka kwiLizwi likaThixo olunceda abantu abahlukeneyo bangenzakalisani? IBhayibhile ibonisa ukuba uYehova nguYise wabo bonke abaphilayo. Ithi: “Okunene kuthi thina kukho uThixo omnye, uYise, eziphuma kuye zonke izinto.” (1 Korinte 8:6) Iphinda isixelele oku: “Wazenza ngokuphuma kumntu omnye zonke iintlanga zabantu.” (IZenzo 17:26) Ngoko ke, bonke abantu bazalwa ngumntu omnye.

Zonke iintlanga zimele zivuyiswe yinto yokuba uThixo eziphe ubomi, nakuba zonke zimele zibe buhlungu ngento eyenziwa ngukhokho wazo. Umbhali weBhayibhile uPawulos wathi: “Isono sangena ngamntu mnye ehlabathini.” Ngenxa yoko, “bonke bonile baza basilela kuzuko lukaThixo.” (Roma 3:23; 5:12) UThixo wazidala ngeendlela ezahlukeneyo izidalwa zakhe—azikho izidalwa ezibini ezingumceph’ ucandiwe. Sekunjalo, akukho nalunye uhlanga alwenze longama kolunye. Ingcamango eqhelekileyo yokuba uhlanga lukabani lubhetele kunolunye ingqubana ngokupheleleyo noko kuthethwa ziZibhalo. Kucacile ukuba, ulwazi esilufumana kuThixo lukhuthaza ukumanyana kweentlanga.

UThixo Uzithanda Zonke Iintlanga

Bambi baye bazibuza enoba uThixo wakhuthaza ubuhlanga ngokukhetha amaSirayeli aze awafundise ukuba azahlule kwezinye iintlanga. (Eksodus 34:12) Ngaxa lithile, uThixo wakhetha uhlanga lwamaSirayeli walwenza olukhethekileyo kuye ngenxa yokholo luka-Abraham ukhokho walo. UThixo walawula uSirayeli wamandulo, ekhetha abalawuli bakhe yaye ebamisela imithetho. Ngelo xesha uSirayeli wayelamkele elo lungiselelo, ibe abanye abantu babeyibona imiphumo yokulawulwa nguThixo neyayahlukile kuleyo yokulawulwa ngabantu kwezinye iindawo. UYehova wafundisa amaSirayeli elo xesha ngemfuneko yokwenza imibingelelo ukuze abantu babe nolwalamano oluhle noThixo. Indlela uYehova awawaphatha ngayo amaSirayeli yaba luncedo kuzo zonke iintlanga. Oko kwakuvisisana noko wakuthetha kuAbraham esithi: “Ngokuqinisekileyo ziya kuzisikelela ngembewu yakho zonke iintlanga zomhlaba kuba uliphulaphule ilizwi lam.”—Genesis 22:18.

Ukongezela koko, amaYuda ayenelungelo lokufumana izibhengezo ezingcwele zikaThixo nelokuba sisizwe awazalelwa kuso uMesiya. Nako oku kwakusenzelwa ukuze kuzuze zonke iintlanga. IZibhalo zesiHebhere ezanikwa amaYuda zichaza ngexesha elimnandi apho zonke iintlanga zabantu ziya kufumana iintsikelelo ezingathethekiyo: “Ngokuqinisekileyo iintlanga ezininzi ziya kuhamba zize zithi: ‘Yizani, masinyuke siye entabeni kaYehova nasendlwini kaThixo kaYakobi; yaye uya kusiyalela ngeendlela zakhe’ . . . Uhlanga aluyi kuphakamisela uhlanga ikrele, zingayi kuphinda zifunde nemfazwe kwakhona. Kwaye okunene baya kuhlala, ngamnye phantsi komdiliya wakhe naphantsi komkhiwane wakhe, yaye akuyi kubakho bani ubangcangcazelisayo.”—Mika 4:2-4.

Nakuba uYesu Kristu washumayela kumaYuda, wathi: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.” (Mateyu 24:14) Akukho nalunye uhlanga olwaluya kuphoswa ziindaba ezilungileyo. Ngoko uYehova umisele umzekelo ogqibeleleyo kwindlela aye waziphatha ngokungenakhethe ngayo zonke iintlanga. “UThixo akakhethi buso, kodwa kwiintlanga zonke umntu omoyikayo aze asebenze ubulungisa wamkelekile kuye.”—IZenzo 10:34, 35.

Imithetho eyanikwa uhlanga lukaSirayeli mandulo nguThixo ikwabonisa ukuba ukhathalela zonke iintlanga. Khangela nje indlela uMthetho owafuna ngayo ukuba amaSirayeli angapheleli nje ekunyamezeleni abo babehlala phakathi kwawo bangengomaSirayeli, xa wathi: “Makabe njengenzalelwane yenu umphambukeli lowo uphambukele kuni; yaye uze umthande njengawe, ngokuba nani naningabaphambukeli ezweni laseYiputa.” (Levitikus 19:34) Imithetho emininzi kaThixo yayifundisa amaSirayeli ukuba abe nobubele kubaphambukeli. Ngoko xa uBhohazi, ukhokho kaYesu wabona ibhinqa elisweleyo lasemzini libhikica, wenza oko wayekufundiswe nguThixo waqinisekisa ukuba abavuni bashiya okuthile ukuze likufumane.—Rute 2:1, 10, 16.

UYesu Ufundisa Ububele

NguYesu oyena mntu wasincedayo samazi kakuhle uThixo. Wabonisa abalandeli bakhe indlela yokuba nobubele kubantu abahlukileyo. Wakha wancokola nebhinqa elingumSamariya. AmaSamariya ayeluhlanga apha olwaluthiyiwe yinkoliso yamaYuda, ngoko eli bhinqa lalimangalisiwe koku. Ngoxa babencokola, ngobubele uYesu wanceda eli bhinqa laqonda ukuba lalinako ukuzuza ubomi obungunaphakade.—Yohane 4:7-14.

Kumzekeliso wakhe womSamariya olungileyo, uYesu wasifundisa indlela esimele sibaphathe ngayo abantu bezinye iintlanga. Lo mSamariya wadibana nomYuda ohlaselwe ngabaphangi bamshiya enzakele gqitha. Lo mSamariya wayenokusuka nje athi: ‘Ndingayenza njani into yokunceda umYuda? AmaYuda ayabacekisa abantu bakowethu.’ Noko ke, uYesu wachaza loo mSamariya njengowayenembono eyahlukileyo kubantu basemzini. Nakuba abanye abahambi badlulayo kuloo ndoda ingxwelerhekileyo, lo mSamariya “waba nosizi” waza wayinceda. UYesu waqukumbela lo mzekeliso ngokuthi nabani na ofuna ukukholisa uThixo umele enze okufanayo.—Luka 10:30-37.

Umpostile uPawulos wafundisa abo banqwenela ukukholisa uThixo ukuba batshintshe ubuntu babo baze baxelise uThixo kwindlela ababaphatha ngayo abanye. Wathi: “Buhlubeni ubuntu obudala kunye noqheliselo lwabo, nize nambathe ubuntu obutsha, obuthi ngolwazi oluchanileyo benziwe bube butsha ngokomfanekiso waLowo wabudalayo, apho kungekho mGrike namYuda, kwaluka nakungaluki, kungekho wasemzini, namSkitiya . . . Ke, phezu kwazo zonke ezi zinto, yambathani uthando, kuba lungumxokelelwane ogqibeleleyo womanyano.”—Kolose 3:9-14.

Ngaba Ukwazi UThixo Kuyabanceda Abantu Batshintshe?

Ngaba ukwazi uYehova uThixo kubanceda ngokwenene abantu batshintshe indlela abaziphatha ngayo ezinye iintlanga? Khawuqwalasele la mava omnye umphambukeli waseAsia owayehlala eKhanada owayedane gqitha lucalucalulo awalufumana apho. Wadibana namaNgqina kaYehova, aza aqalisa ukufunda naye iBhayibhile. Kamva, wawabhalela ileta ebulela, waza wathi: ‘Naba ngabelungu abanobubele gqitha. Ndathi ndakuphawula ukuba nahluke gqitha kwabanye abelungu, ndazibuza isizathu soko. Ndacinga into engapheliyo de ndafikelela kwisigqibo sokuba ningamaNgqina kaThixo. Imele ukuba ikho le nto iseBhayibhileni. Ndabona kwiintlanganiso zenu izihlwele zabamhlophe, abamnyama, abebala nabaseAsia bonke beneentliziyo ezifanayo—ezicinga ntonye kuba babengabazalwana noodade. Ngoku ndiyazi ukuba ngubani obangele ukuba babenjalo. NguThixo wenu.’

ILizwi likaThixo laxela kwangaphambili ngexesha apho “umhlaba ngokuqinisekileyo uya kuzaliswa kukwazi uYehova.” (Isaya 11:9) Ngenxa yokuzaliseka kwesi siprofeto seBhayibhile, nangoku sele kukho isihlwele esikhulu esifikelela kwizigidi “siphuma kuzo zonke iintlanga nezizwe nezizwana neelwimi” yaye simanyene kunqulo lokwenyaniso. (ISityhilelo 7:9) Sikhangele phambili ekuboneni intiyo ithatyathelwa indawo luthando kwihlabathi labantu bonke eliza kuzalisekisa kungekudala injongo kaYehova awayichaza kuAbraham esithi: “Ziya kusikelelwa ngembewu yakho zonke iintsapho zomhlaba.”—IZenzo 3:25.

[Umbhalo osemazantsi]

[Umfanekiso okwiphepha 4, 5]

UMthetho kaThixo wafundisa amaSirayeli ukuba athande abaphambukeli

[Umfanekiso okwiphepha 5]

Yintoni esinokuyifunda kumzekeliso womSamariya olungileyo?

[Imifanekiso ekwiphepha 6]

Akukho nalunye uhlanga olwenziwe nguThixo ukuba longame kunolunye