Imibuzo Evela Kubafundi
◼ Ngaba amaKristu enkulungwane yokuqala ayekholelwa ukuba isiphelo sale nkqubo ingendawo sasiza kufika ngethuba lokuphila kwawo?
Abalandeli bakaYesu benkulungwane yokuqala babekulangazelela gqitha ukufika kwesiphelo. Njengoko siza kubona, abanye babo bade bafikelela kwisigqibo sokuba isiphelo sasisemnyango, sisendleleni yaso. Imbono yabo kwakufuneka ilungisiwe. Kodwa ngokuqinisekileyo akuyonto imbi ngamaKristu, ngoko okanye ngoku, ukukholelwa ngokunyanisekileyo ukuba isiphelo esaxelwa kwangaphambili simele sigqalwe njengesisondeleyo nokuhlala ekuphaphele mihla le ukufika kwaso.
Ephendula umbuzo wabafundi bakhe owawumalunga ‘nomqondiso’ wobukho bakhe, uYesu wabalumkisa wathi: “Phaphani ngoko; ngokuba ningazi ukuba lilixa liphi na eza ngalo iNkosi yenu.” (Mateyu 24:3, 42) Ukuphapha okunjalo kwakufanele kuyichaphazele ihambo yabo, ngenxa yokuba uYesu walek’ umsundulo esenjenje: “Zilumkeleni ke, hleze zisindwe iintliziyo zenu kukuzingxala, nakukunxila, nangamaxhala obu bomi, ize loo mini inifikele ngebhaqo . . . Phaphani ngoko, amaxesha onke nikhunga, ukuze kuthiwe nikufanele ukuzisaba zonke ezo zinto ziza kuhla, nokumiswa phambi koNyana woMntu.”—Luka 21:34-36.
Phawula ukuba uYesu wanikela eli cebiso kanye emva kokuchaza iziganeko ezaziya kwenza “umqondiso.” Ngoko abapostile babelunyukiswa ngesibakala sokuba kwakuya kufuneka kwenzeke iziganeko ezithile ezingokwembali ngaphambi kokufika kwesiphelo. Sekunjalo, kwiiveki ezimbalwa kamva, bambuza oku uYesu ovusiweyo: “Nkosi, wobubuyisela ngeli xesha na ubukumkani kuSirayeli?” Waphedula wathi: “Asikokwenu ukwazi amaxesha nokuba ngamathuba, awamise ngelakhe igunya uBawo.”—IZenzo 1:6, 7.
Sinokubona ngokusuka koku ukuba abona balandeli babesondele kuYesu babengxamele ukuba isiphelo sifike ngokukhawuleza kangangokuba bakubetha ngoyaba oko wayesandul’ ukubaxelela kona malunga nezinto zokoqobo ezibubungqina ekwakufuneka zenzekile ebudeni bobukho bakhe ngaphambi kokufika kweso siphelo.
Sifumana enye imbonakaliso yolangazelelo lwabo kwiincwadi zompostile uPawulos eziya kumaKristu aseTesalonika. Malunga nowama-50 C.E. wabhala oku: “Ke kaloku ngawo amaxesha namathuba, bazalwana, akufuneki nganto ukuba ndinibhalele; kuba nani ngokwenu niyazi ngokucacileyo, ukuba imini yeNkosi, njengesela ebusuku, yenjenjalo ukuza kwayo. Ngoko ke masingalali, njengabanye aba; masiphaphe sibe ziingcathu.” (1 Tesalonika 5:1, 2, 6) Wambi kuloo maKristu athanjiswe ngomoya akuthatha oko njengokwakuthetha ukuba ubukho bukaYesu (ngemini kaYehova yokugweba ubungendawo) babusiza kanye ngoko, ngokukhawuleza.
Kodwa kwakungenjalo. Enyanisweni, uPawulos wababhalela oku kwincwadi yesibini: “Siyanicela . . . ngenxa yokufika kweNkosi yethu uYesu Kristu, nokuhlanganiselwa kwethu kuyo, ukuba ningazanyazanyiswa kwakamsinya, nahlukane nengqiqo; ukuba ningabi navuso ngamoya, ngalizwi, ngancwadi ingathi, ivela kuthi, ngokungathi iselingene imini leyo kaKristu. Makungabikho bani unilukuhlayo nangalunye uhlobo; ngokuba ayinakufika yona, lungakhanga lufike ulahlo kuqala, atyhileke umntu wesono.”—2 Tesalonika 2:1-3.
Oku akuzange kuthethe ukuba babenokubonakalisa inkxalabo encinane ngobukho bukaYesu nokuphela kwenkqubo. Nyaka ngamnye owawudlula, isilumkiso sikaYesu sasiba sesichukumisa ngakumbi: “Phaphani ngoko; ngokuba ningazi ukuba lilixa liphi na eza ngalo iNkosi yenu.”
Ngaloo ndlela, malunga neminyaka emihlanu emva kokubhala incwadi yeSibini yabaseTesalonika, uPawulos wabhala: “Lilixa lokuba ngoku sivuke ebuthongweni; kuba ngoku usindiso lukufuphi kuthi, kunokuya saqalayo ukukholwa. Ubusuku buhambile, ukusa ke kusondele. Masiyilahle ngoko imisebenzi yobumnyama, sixhobe iintonga zokukhanya.” (Roma 13:11, 12) Emva kweminyaka emihlanu engakumbi, uPawulos wacebisa amaKristu angamaHebhere: “Kufuneka ukuba nibe nomonde, ukuze nithi, nakuba nikwenzile ukuthanda kukaThixo, nizuzane nalo idinga. Kuba kusaya kuba mzuzwana mncinanana, athi lowo uzayo afike, angalibali.” (Hebhere 10:36, 37) Wandula ke, kwindinyana eyandulela eyokugqibela yeSityhilelo, umpostile uYohane wabhala: “Uthi lowo uzingqinayo ezi zinto, Ewe, ndiyeza kamsinya. Amen. Ewe, yiza, Nkosi Yesu.”—ISityhilelo 22:20.
Ngokungathandabuzekiyo, umKristu owayephila ngoko asikuko ukuba wayengaqiqi xa wayevakalelwa kukuba isiphelo sasinokufika ngethuba lokuphila kwakhe. Ibe ukuba ngenxa yengozi okanye inkqubo engokwemvelo, kwakufanele afe ngaphambi kokufika kwesiphelo, wayeya kuba ebephila ngengqiqo eqinileyo yongxamiseko eyabethelelwa nguYesu naziZibhalo eziphefumlelweyo.
Konke oku kukwasebenza ngokude kwangakumbi kuthi, kule yure yokugqibela esiphila kuyo. Siwachaza ngenye indlela amazwi kaPawulos, asinakulikhanyela elokuba ‘ngoku usindiso lwethu lukufuphi kunokuba kwakunjalo ngexesha lokuqalisa kwamaKristu okuqala ukuba ngamakholwa kwanangexesha thina ngokunokwethu esaqala ngalo ukuba ngamakholwa. Ubusuku buhambile; ukusa ke kusondele.’
Ukususela kwiMfazwe Yehlabathi I siye sakwazi ukubona kwimbali ubungqina obuninzi bokoqobo, ubungqina bokuba sikwisiphelo sale nkqubo yezinto. Kunokuba sizixakekise ngokuqikelela nje ixesha esiya kufika ngalo isiphelo, sifanele sizixakekise ngokushumayela iindaba ezilungileyo, ezinokusindisa ubomi bethu nobomi babanye abaninzi.—1 Timoti 4:16.
Sinezizathu eziqinileyo zokulindela ukuba oku kushumayela kuya kufikelela esiphelweni kwixesha lethu. Ngaba oku kuthetha ukuba ngaphambi kokuphela kwenyanga ezayo, konyaka ozayo, kweminyaka elishumi ezayo nokwenkulungwane ezayo? Akukho mntu waziyo, kuba uYesu wathi ‘kwanezithunywa zamazulu’ zazingakwazi oko. (Mateyu 24:36) Ngaphezu koko, akuyomfuneko ukuba sazi njengoko siqhubeka sisenza oko iNkosi isiyalela ukuba sinikele ingqalelo ekukwenzeni. Okona kubalulekileyo kukuba ukuthanda kukaThixo nomsebenzi wenziwe nokuba sibe nesona sabelo sipheleleyo kuso. Ngaloo ndlela ‘sinokukufanelekela ukuzisaba zonke ezo zinto ziza kuhla, nokumiswa phambi koNyana woMntu.’—Luka 21:36.