Umthetho Omkhulu—Kutheni Usasebenza Nje?
IGOLIDE esulungekileyo ayize imbatshe, ngoko izinto ezenziwe ngegolide zikumgangatho ophakamileyo yaye zixabisekile. Endaweni yokuzilahla izinto zegolide ezonakeleyo, abakhandi begolide bayalilungisa kwakhona elo litye lihle ukuze balisebenzise ngokutsha kwenye into yobugcisa kuba igolide ayitshitshi.
Ngokufanayo, nangona uYesu wathetha ngoMthetho Omkhulu malunga neminyaka engamawaka amabini eyadlulayo, ukuxabiseka kwawo akuphelelwanga. Ngokuvavanya okanye ngokuhlolisisa izizathu zokuba usasebenza sinokukuqonda ngakumbi ukuxabiseka kwawo kuthi namhlanje.
Xa uYesu wasinika uMthetho Omkhulu othi, “zonke izinto enisukuba ninga bangazenza abantu kuni yenzani ezikwanjalo nani kubo,” wongezelela ngelithi: “Kuba oko kungumthetho nabaprofeti.” (Mateyu 7:12) Bawuqonda njani abafundi bakaYesu nababephulaphule lo mthetho?
‘Oko Umthetho Nabaprofeti Ukuthethayo’
Ibinzana elithi “umthetho” lalibhekisela kwiincwadi ezabhalwa ngaphambili ezibumba iincwadi zokuqala ezintlanu zeBhayibhile, iGenesis ukuya kwiDuteronomi. Ezi ncwadi zityhila injongo kaYehova yokuvelisa imbewu eyayiya kushenxisa ububi. (Genesis 3:15) Okuqukwe kwezo ncwadi zamandulo zeBhayibhile yayinguMthetho okanye ingqokelela yemiyalelo uYehova awayinika uhlanga lwakwaSirayeli ngoMoses ngowe-1513 B.C.E. njengomlamleli kwiNtaba yeSinayi.
Umthetho kaThixo wawahlula kude lee amaSirayeli kwiintlanga ezingabahedeni ezaziwangqongile, ibe amaSirayeli ayengenakwenza nantoni na eyayiya kuba kukulalanisa kukuma kwawo okukholekileyo phambi koYehova. Ayeyimpahla yakhe ekhethekileyo yaye ayemele ahlale enjalo ukuze afumane iintsikelelo zakhe. (Eksodus 19:5; Duteronomi 10:12, 13) Kodwa ukongezelela kwiimbopheleleko zawo kuThixo, uMthetho kaMoses wayicacisa gca imbopheleleko yamaSirayeli yokwenza okulungileyo kwabo babengabaphambukeli kuSirayeli. Ngokomzekelo, wawusithi: “Kuni woba njengozalelwe phakathi kwenu ekhaya, umphambukeli ophambukele kuni; uze umthande ngoko uzithanda ngako; ngokuba nibe ningabaphambukeli ezweni laseYiputa: ndinguYehova, uThixo wenu.” (Levitikus 19:34) Ebudeni bexesha lookumkani kwaSirayeli, abo babengabaphambukeli babenandipha amalungelo amaninzi, anjengokuba nesabelo ekwakheni itempile kaThixo eYerusalem.—1 Kronike 22:2.
UMthetho owanikwa uSirayeli wawukwalela ukukrexeza, ukubulala, ubusela nokunqwenela izinto zabanye. Le miyalelo ndawonye “nokuba kukho wumbi umthetho,” yayinokuhlanganiswa kulo uthi, “Uze umthande ummelwane wakho ngoko uzithanda ngako.” Umpostile uPawulos wongezelela ngelithi: “Uthando alusebenzi bubi kuye ummelwane; ngoko uthando yinzaliseko yomthetho.”—Roma 13:9, 10.
Ukuba uMthetho wandlala esona siseko soMthetho Omkhulu, kuthekani ngebinzana elithi “abaprofeti”?
Iincwadi zesiprofeto zeZibhalo zesiHebhere ngokukwanjalo ziyavuma ukuba uMthetho Omkhulu usasebenza. Zimbonisa uYehova njengoThixo othi ngokunyanisekileyo azalisekise injongo yakhe. Uyabasikelela abakhonzi bakhe abathembekileyo abathi, nangona bengafezekanga bazame ukwenza imithetho yakhe baze babonise inguquko epheleleyo kwiindlela zabo ezingendawo. “Zihlambeni, ziqaqambiseni; susani ububi beentlondi zenu phambi kwamehloam; yekani ukwenza ububi; fundani ukwenza okulungileyo; khathalelani ukugweba; lulekani isibhovubhovu; gwebani ityala lenkedama; lithetheni ityala lomhlolokazi.”—Isaya 1:16, 17.
Xa abantu bakaThixo benza okulungileyo kwabanye nakuThixo, ngoko uYehova ngokuqinisekileyo wabaxhasa. “Utsho uYehova ukuthi gcinani isiko, nenze ubulungisa. . . . Hayi, uyolo lomntu okwenzayo oku, nonyana womntu obambelela kuko oku.”—Isaya 56:1, 2.
UYesu Ukhokela Ibandla Lakhe
UKristu weza kuzalisekisa uMthetho nabaProfeti, ibe ukususela ngexesha lakhe, injongo kaThixo engunaphakade iye yaqhubela phambili. (Mateyu 5:17; Efese 3:10, 11, 17-19) Umthetho omdala kaMoses uye wathatyathelwa indawo ngumnqophiso omtsha, oquka kokubini amaKristu athanjisiweyo angamaYuda naziintlanga. (Yeremiya 31:31-34) Sekunjalo, ibandla lamaKristu omhla wethu lisalandela uMthetho Omkhulu. Ibe nasi isizathu esingakumbi sokwamkela inkqubo yokuba lo mthetho ube usasebenza: UKristu uyiNtloko yebandla langoku lamaKristu. Akayiguqulanga imiyalelo yakhe. Icebiso lakhe eliphefumlelweyo liseyingenelo.
Ngaphambi kokuba anduluke kulo mhlaba uYesu wayalela abalandeli bakhe ukuba benze abafundi bazo zonke iintlanga babafundise ‘ukugcina zonke izinto abawisele umthetho ngazo.’ Lo myalelo uquka uMthetho Omkhulu. UYesu uqinisekisa abafundi bakhe ngokuthi: “Yabona, mna ndinani yonke imihla, kude kube sekuphelisweni kwephakade eli.”—Mateyu 28:19, 20.
Njengoko kubhalwe kuLuka 6:31, uYesu wayalela oku: “Enithanda ukuba abantu benze ngako kuni yenzani nani kwangokunjalo kubo.” Onjani wona ukuba mhle umzekelo owamiselwa nguYesu ekwenzeni okulungileyo kwabanye!
Ebudeni bobulungiseleli bakhe basemhlabeni, uYesu wakuphawula ngenyameko oko abantu babekunyamezela, waze wasikwa yimfesane ngabo. Ebudeni bolunye ukhenketho lwakhe lokushumayela, wabona izihlwele waza wasikwa yimfesane zizo. Kodwa okungakumbi kunoko, wenza amalungiselelo okuzinceda. Njani? Ngokulungiselela iphulo elikhulu lokushumayela elathi lazisa abafundi bakhe ezindlwini zabantu. Njengokuba wayalela: “Emzini ke enithe nangena kuwo, nokuba kusemzaneni, nize nibuzise ukuba ngubani na kuwo ofanelekileyo; nihlale ke khona apho nide nimke.” Into yokuba lo msebenzi wawuxhaswa yaye usikelelwa nguYise ibonwa ngokucacileyo kumazwi kaYesu abhekele phaya: “Lowo wamkela nina, wamkela mna; nalowo wamkela mna wamkela owandithumayo. . . . Nothe waseza noko amnye waba bangabona bancinane indebe eyodwa yamanzi abandayo egameni lomfundi inene ndithi kuni, akayi kukha alahlekelwe ngumvuzo wakhe.”—Mateyu 9:36–10:42.
Into yokuba uMthetho Omkhulu ubethelela ukuthatyathwa kwenyathelo elingqalileyo ekwenzeleni abanye izinto kubonakala kwindlela uYesu awaqiqa ngayo ngesinye isihlandlo: “Ukuba nithanda abo banithandayo ninambulelo mni na? Ngokuba naboni bayabathanda abo babathandayo. Xa nithi nenze okulungileyo kwabanenzela okulungileyo ninambulelo mni na? Ngokuba naboni benza kwaloo nto. Ke nina, zithandeni iintshaba zenu, nenze okulungileyo; woba mkhulu ke umvuzo wenu.” (Luka 6:32, 33, 35) Ekugqibeleni, ukugcina uMthetho Omkhulu oyimfuneko kusiqhubela ekubeni sibenzele okulungileyo abantu kwanabo singabaziyo ngokobuqu.
Usasebenza, Awukaphelelwa Lixesha
Mhlawumbi obona bungqina bucacileyo bokuba uMthetho Omkhulu usasebenza bubonakala kumava abo baphila ngawo. AmaKristu avisisanisa ukuphila kwawo nemithetho kaThixo afumana uvuyo olukhulu ibe ngokufuthi iintsikelelo ezingalindelekanga. Ngokuba nembeko nangokuba nobubele kubasebenzi bekliniki yamayeza eliyisebenzisayo, elinye ibhinqa elingumKristu lazifumanisa lingenelwa yindlela abongikazi noogqirha ababezinikela ngayo ekulincedeni.
Ukubandakanyeka kwamaNgqina kaYehova kumaphulo okwakhiwa okukhawulezileyo kweeHolo zoBukumkani nako kunokuba sisiqinisekiso sokuba uMthetho Omkhulu usasebenza. Ukutyelela ngobubele abantu abahlala ngakwiziza ekwakhiwayo kuzo ngenjongo yokubazisa ngoko kucetyiweyo kudla ngokuba nemiphumo emihle. Abantu ababewachasa amaNgqina ngaphambili bathe ngaloo ndlela baphawula ukuba angabantu abalungileyo kubamelwane, ibe okokuqala babona indlela abantu bakaThixo abasebenzisana ngayo kumsebenzi wabo. Ngokomphumo, abanye baye bazinikela ngokusebenza esakhiweni, ngokuthe ngqo okanye ngokwenza ukuba kufumaneke izinto zokwakha.—Thelekisa uZekariya 8:23.
Xa elinye iNgqina laseIran elihlala eLondon eNgilani, lathenga ukutya okuthile evenkileni, umnini-venkile walithuka kuba lalingumntu wasemzini. Lingatyhafanga, iNgqina ngobubele nangobuchule lachaza ukuba, njengomnye wamaNgqina kaYehova akanamvakalelo zimbi nxamnye nabantu bezinye iintlanga. Endaweni yoko, wayetyelela abantu bonke elumelwaneni ngesigidimi seBhayibhile. Waba yintoni umphumo? Umnini-venkile wongeza ukutya okumnandi okongezelelekileyo kukutya okwakufunwa leli Ngqina.
Kakade ke, uMthetho Omkhulu awupheleliselwanga kwizenzo ezinjalo ezincinane zobubele. Ngokuqinisekileyo, eyona ndlela ilungileyo amaNgqina kaYehova awubonakalisa ngayo kungokutyelela ngokuthe rhoqo abamelwane bawo enezigidimi ezilungileyo zoBukumkani bukaThixo.
Ukuphila Ngomthetho Omkhulu
Ukusebenzisa uMthetho Omkhulu kuthetha ukuphethulela ingqalelo yakho kwabanye abantu. Ungumgaqo okhokelayo ocacileyo. Kuya kufuneka ukhangele amathuba okwenza okulungileyo kwabo bakungqongileyo. Ibe ngokufanelekileyo unenkxalabo ngabanye, usiba nomdla wobuqu kubo! (Filipi 2:4) Ngokwenza njalo, uya kuvuna iintsikelelo ezityebileyo. Uya kuba ulandela icebiso likaYesu elithi: “Malukhanye ngokunjalo ukhanyiselo lwenu phambi kwabantu; ukuze bayibone imisebenzi yenu emihle, bamzukise uYihlo osemazulwini.” (Mateyu 5:16) Ngembuyekezo, uYehova uya kuba nguMvuzi wakho njengoko ngokunyanisekileyo umfuna yaye uphila rhoqo ngoMthetho Omkhulu.—Hebhere 11:6.