UMthetho Omkhulu—Uyasebenza

Nangona inkoliso yabantu iwugqala uMthetho Omkhulu njengemfundiso yendlela yokuziphatha eyayilwa nguYesu, yena wathi: “Oko ndikufundisayo asikokwam, kodwa kokwalowo wandithumayo.”—Yohane 7:16.

EWE, uMdali, uYehova uThixo, lowo wathuma uYesu, unguMsunguli woko uYesu wakufundisayo, kuquka oko kwaziwa njengoMthetho Omkhulu.

Ekuqaleni uThixo wayenenjongo yokuba lonke uluntu luphathane ngendlela olungathanda ukuphathwa ngayo. Wabeka umzekelo omhle ngokubonakalisa inkxalabo ngentlalo-ntle yabanye ngendlela awadala ngayo abantu: “UThixo wamdala umntu ngokomfanekiso wakhe, wamdala ngokomfanekiso kaThixo; wadala indoda nebhinqa.” (Genesis 1:27) Oko kuthetha ukuba ngothando uThixo wajizeka abantu ngomlinganiselo weempawu zakhe ezibalaseleyo ukuze banandiphe ubomi ngoxolo, ngovuyo nangemvisiswano—ngonaphakade. Isazela sabo abasinikwe nguThixo, xa siqeqeshwe kakuhle, sasiya kubakhokelela ekubeni baphathe abanye ngendlela abafuna ukuphathwa ngayo.

Ukuzingca Kwathabath’ Unyawo

Ekubeni uluntu lwaba nesiqalo esihle, konakala phi? Xa ibekwa ngendlela elula, kwabakho ukuzingca. Inkoliso yabantu iyayazi ingxelo yeBhayibhile yoko isibini sokuqala esingabantu sakwenzayo, njengoko kuchazwe kwiGenesis isahluko 3. Bebongozwa nguSathana, umchasi wayo yonke imigaqo kaThixo elungileyo, uAdam noEva ngokuzingca balukhaba ngawo omane ulawulo lukaThixo bekhetha ukuzimela geqe nokuzibonela. Isenzo sabo sokuzingca nesokuvukela sakhokelela kungekuphela nje kukulahlekelwa kwabo okukhulu kodwa nemiphumo emibi kuyo yonke inzala yabo yexesha elizayo. Oko kwawubonisa ngokucacileyo umphumo ombi wokutyeshela imfundiso eyaziwa njengoMthetho Omkhulu. Ngenxa yoko, “njengokuba isono sangena ngamntu mnye ehlabathini nokufa ngaso isono, ngaloo ndlela ukufa kwasasazeka kubo bonke abantu ngenxa yokuba bonke bonayo.”—Roma 5:12.

Nangona uluntu ngokubanzi lwazigatya iindlela zothando zikaYehova uThixo, akazange alulahle. Ngokomzekelo, uYehova wanika uhlanga lwakwaSirayeli uMthetho wakhe ukuze ulukhokele. Walufundisa ukubaphatha abanye ngendlela lona olwalufuna ukuphathwa ngayo. UMthetho walunika ulwalathiso ngendlela yokuphatha amakhoboka, iinkedama nabahlolokazi. Wawusandlala indlela ekwakufanele kusingathwe ngayo ukuhlasela, ukuqweqwedisa nobusela. Imithetho engokucoceka yayibonisa inkxalabo ngempilo yabanye. Kwakukho nemithetho ngemibandela yesini. UYehova washwankathela uMthetho wakhe ngokuxelela abantu esithi: “Uze umthande ummelwane wakho njengawe siqu,” amazwi awacatshulwa nguYesu kamva. (Levitikus 19:18; Mateyu 22:39, 40) UMthetho wawuchaza nendlela yokuphatha abaphambukeli phakathi kwamaSirayeli. Lo Mthetho wawusithi: “Uze ungamcinezeli umphambukeli, njengoko niwazi nina umphefumlo womphambukeli, kuba naningabaphambukeli nani ezweni laseYiputa.” Ngamanye amazwi, amaSirayeli ayefanele abonise ububele obunovelwano kwabatsala nzima.—Eksodus 23:9; Levitikus 19:34; Duteronomi 10:19.

Lo gama nje amaSirayeli ayewulandela ngokunyanisekileyo lo Mthetho, uYehova wayelusikelela olu hlanga. Phantsi kolawulo lukaDavide noSolomon, uhlanga lwaluchuma yaye abantu babonwabile yaye bonelisekile. Ingxelo yembali iyasixelela: “UYuda noSirayeli babebaninzi njengentlabathi yolwandle, besidla kwaye besela benemihlali. Kwaye uYuda noSirayeli baqhubeka behleli ngonqabiseko, wonk’ ubani phantsi komdiliya wakhe naphantsi komkhiwane wakhe.”—1 Kumkani 4:20, 25.

Okubuhlungu kukuba, olu hlanga aluzange luhlale luseluxolweni yaye lunqabisekile ixesha elide. Nangona ayenoMthetho kaThixo, amaSirayeli akazange awugcine; avumela ukuzingca kwayidodobalisa inkxalabo yawo ngabanye. Oku, kwakunye nowexuko, kwaphumela kubunzima ebantwini ngabanye nanjengohlanga. Ekugqibeleni, ngonyaka wama-607 B.C.E., uYehova wavumela amaBhabhiloni atshabalalise ukumkani wakwaYuda, isixeko saseYerusalem, kwakunye netempile ebalaseleyo eyayilapho. Ngasiphi isizathu? “‘Ngenxa yokuba ningawathobelanga amazwi am, yabona, ndiya kuthumela kuzo zonke iintsapho zasemntla,’ utsho uYehova, ‘ndithumele nakuNebhukadenetsare ukumkani waseBhabhiloni, umkhonzi wam, ndibazise nxamnye neli lizwe nabemi balo nazo zonke ezi ntlanga zijikelezileyo; ndiza kubatshabalalisa ndize ndibenze into yokukhwankqiswa nento yokubethelwa umlozi neendawo eziphanzileyo ukusa kwixesha elingenammiselo.’” (Yeremiya 25:8, 9) Onjani ukuba yintlekele umphumo ngokutyeshela unqulo olunyulu lukaYehova!

Umzekelo Wokuxeliswa

Kwelinye icala, uYesu Kristu akazange afundise uMthetho Omkhulu kuphela kodwa wamisela owona mzekelo mhle wokulandelwa. Wayenenkathalo enyanisekileyo ngentlalo-ntle yabanye. (Mateyu 9:36; 14:14; Luka 5:12, 13) Ngenye imini, kufuphi nesixeko saseNayin, uYesu wabona umhlolokazi onentliziyo ebuhlungu esiya kungcwaba okuphela konyana wakhe. Ingxelo yeBhayibhile ithi: “Yathi yakumbona iNkosi, yaba nosizi ngaye.” (Luka 7:11-15) Amazwi athi “yaba nosizi,” ngokutsho kweVine’s Expository Dictionary of Old and New Testament Words, athetha “ukuchukumiseka ngaphakathi.” Wayiva intlungu awayenayo entliziyweni, yaye oko kwamshukumisela ekuthabatheni amanyathelo ukuze amkhulule kuloo ntlungu yakhe. Hayi indlela awavuya ngayo loo mhlolokazi xa uYesu wavusa lo mfana waza “wamnikela kunina”!

Ekugqibeleni, ngokuvisisana nenjongo kaThixo, uYesu wavuma ukubandezeleka waza wanikela ngobomi bakhe njengentlawulelo ukuze uluntu lukwazi ukukhululwa kubukhoboka besono nokufa. Lo yayingowona mzekelo wokuphila ngoMthetho Omkhulu.—Mateyu 20:28; Yohane 15:13; Hebhere 4:15.

Abantu Abasebenzisa UMthetho Omkhulu

Ngaba bakho abantu kwixesha lethu abaphila ngokwenene ngoMthetho Omkhulu? Ewe, yaye abaphili nje ngawo xa izinto ziza kubalungela. Ngokomzekelo, ebudeni beMfazwe Yehlabathi II kwiJamani yamaNazi, amaNgqina kaYehova agcina ukholo lwawo kuThixo nothando lwawo ngommelwane aza akwala ukuwutyeshela uMthetho Omkhulu. Nangona uRhulumente wanyanzela iphulo lokuthiya nokucalucalula onke amaYuda, amaNgqina aqhubeka elandela uMthetho Omkhulu. Nakwiinkampu zoxinaniso, aqhubeka enyamekela abanye abantu, esabelana nabo ngokutya kwawo, nangona kwakunqongophele, amaYuda nababengengawo amaYuda ababelambile. Ngokubhekele phaya, nangona ayalelwa nguRhulumente ukuba asebenzise izixhobo ukuze abulale abanye, akwala ukwenjenjalo, njengokuba ayengazange afune ukubulawa ngabanye. Kunokwenzeka njani ukuba abulale abo ayefanele abathande njengeziqu zawo? Ngenxa yokwala kwawo, uninzi lwawo lwathunyelwa kungekuphela nje kwiinkampu zoxinaniso kodwa lwabulawa.—Mateyu 5:43-48.

Njengokuba ufunda eli nqaku, ungenelwa ngomnye umzekelo wokusetyenziswa koMthetho Omkhulu. AmaNgqina kaYehova ayaqonda ukuba namhlanje abantu abaninzi bayabandezeleka bengenathemba kwaye bengakwazi ukuzinceda. Ngenxa yoku, ngokuzithandela amaNgqina enza okuthile ukuze ancede abanye bafunde ngethemba nolwalathiso olusebenzayo oluseBhayibhileni. Konke oku kuyinxalenye yomsebenzi wokufundisa wazweni-banzi ngoku owenziwa ngomlinganiselo ongazange ubonwe ngaphambili. Uba yintoni umphumo? Njengokuba kwaprofetwa kuIsaya 2:2-4, “izizwana ezininzi,” enyanisweni ngaphezu kwezigidi ezithandathu zabantu emhlabeni, ziye ‘zayalelwa ngeendlela zikaYehova, ukuze zihambe emendweni wakhe.’ Ngokufuziselayo, ziye zafunda ‘ukuwakhanda amakrele azo abe ngamakhuba nemikhonto yazo ibe zizikere zokuthena imithi.’ Ziye zafumana uxolo nonqabiseko kula maxesha enkathazo.

Kuthekani Ngawe?

Khawucinge nje okomzuzwana ngokungcungcutheka nokubandezeleka okubangelwa kukutyeshela uMthetho Omkhulu kuluntu ukususela ekuvukeleni e-Eden, okwaphenjelelwa nguSathana uMtyholi. UYehova unenjongo yokuyiguqula le meko kungekudala. Njani? “Wabonakaliselwa le njongo uNyana kaThixo, yokuba ayichithe imisebenzi kaMtyholi.” (1 Yohane 3:8) Oku kuya kwenzeka phantsi kolawulo loBukumkani bukaThixo, kwizandla zikaYesu Kristu onobulumko nofanelekileyo, owafundisa waza waphila ngoMthetho Omkhulu.—INdumiso 37:9-11; Daniyeli 2:44.

UKumkani uDavide woSirayeli wamandulo wathi: “Ndakha ndangumfana, kungokunje ndimdala, kodwa andikaboni nabani na olilungisa eshiywe ngokupheleleyo, nenzala yakhe ifuna isonka. Imini yonke uyababala yaye uyabolekisa, ngoko inzala yakhe imele ifumane iintsikelelo.” (INdumiso 37:25, 26) Ngaba akuvumi ukuba inkoliso yabantu namhlanje iyathabatha yaye iyohlutha kunokuba ‘ibabale yaye ibolekise’? Kucacile ukuba, ukusebenzisa uMthetho Omkhulu kunokukhokelela kuxolo nonqabiseko lokwenyaniso kuba wenza ufumane iintsikelelo ngoku nakwixesha elizayo phantsi koBukumkani bukaThixo. UBukumkani bukaThixo buya kuphelisa konke ukuzingca nobubi obusemhlabeni buze buthabathel’ indawo inkqubo ekhoyo yolawulo olonakeleyo lomntu ngenkqubo entsha uThixo aza kuyizisa. Ngoko, bonke abantu baya kunandipha ukuphila ngoMthetho Omkhulu.—INdumiso 29:11; 2 Petros 3:13.

[Imifanekiso ekwiphepha 4, 5]

UYesu akazange afundise nje uMthetho Omkhulu kuphela kodwa wamisela owona mzekelo mhle ekuwusebenziseni

[Imifanekiso ekwiphepha 7]

Ukusebenzisa uMthetho Omkhulu kunokukhokelela kuxolo nonqabiseko lokwenyaniso