UMthetho Omkhulu—Imfundiso Yehlabathi Lonke

“Zonke izinto, ngoko, enifuna abantu bazenze kuni, yenzani ngokunjalo nani kubo.”—Mateyu 7:12.

LOO mazwi athethwa phantse iminyaka engamawaka amabini eyadlulayo nguYesu Kristu kwiNtshumayelo yakhe edumileyo yaseNtabeni. Kwiinkulungwane ukususela ngoko, kuye kwathethwa kwaza kwabhalwa okuninzi ngaloo mazwi alula. Ngokomzekelo, aye anconywa kusithiwa “ngoyena ndoqo kwiZibhalo,” “ushwankathelo lomsebenzi womKristu kummelwane wakhe,” yaye “ngumgaqo obalulekileyo wabantu.” Aye aziwa kakhulu kangangokuba ngokufuthi kuye kwabhekiselwa kuwo njengoMthetho Omkhulu.

Noko ke, ingcamango yoMthetho Omkhulu ayiphelelanga nje kwabo bafane babizwe ngokuba ngamaKristu. UbuYuda, ubuBhuda nengcamango yamaGrike zonke zicacisa lo mgaqo ubalulekileyo wobuntu ngeendlela ezininzi. Amazwi aziwa kakhulu, ingakumbi kubantu abakwiMpuma Ekude, ngamazwi kaConfucius, ohlonelwayo eMpuma njengenkcuba-buchopho nomfundisi omkhulu. KwiThe Analects, eyesithathu kwiiNcwadi Ezine zikaConfucius, sifumana le ngcamango ikhankanywe izihlandlo ezithathu. Kabini, ephendula imibuzo evela kubafundi, uConfucius wathi: “Oko ungafuni kwenziwe kuwe, ungakwenzi kwabanye.” Ngesinye isihlandlo, xa umfundi wakhe uZigong waqhayisa esithi “Oko ndingafuni ukuba abanye bakwenze kum, nam andifuni ukukwenza kubo,” umfundisi-ntsapho waphendula ngobulali esithi: “Ewe, kodwa oku awukakwazi ukukwenza.”

Efunda la mazwi, umntu unokubona ukuba amazwi kaConfucius yinguqulelo esisichasi soko uYesu akuthethayo kamva. Umahluko obonakalayo kukuba uMthetho Omkhulu owachazwa nguYesu ufuna izenzo zokwenza okuhle kwabanye. Masithi abantu bebesenza ngokuvisisana noko uYesu wakuthethayo, benyamekela baze bathabathe amanyathelo okunceda abanye, yaye bephila ngalo mgaqo yonke imihla. Ngaba ucinga ukuba oko bekuya kwenza ihlabathi lanamhlanje libe yindawo ebhetele? Ngokungathandabuzekiyo bekuya kuba njalo.

Enoba lo mthetho ubekwe ngendlela yokwenza isenzo, okanye isichasi soko, okanye ngenye indlela, okuphawulekayo kukuba abantu abaphila kumaxesha nakwiindawo ezahlukahlukeneyo nabaneemvelaphi ezahlukahlukeneyo baye bakholelwa kule ngcamango yoMthetho Omkhulu. Ngokulula oku kubonisa ukuba oko uYesu wakuthethayo kwiNtshumayelo yaseNtabeni yimfundiso echaphazela ubomi babantu kuyo yonke indawo nakubo bonke ubudala.

Zibuze, ‘Ngaba ndingathanda ukuphathwa ngentlonelo, ngaphandle kwekhethe, ngokunyaniseka? Ngaba ndingathanda ukuphila kwihlabathi elingenamkhethe wobuhlanga, ulwaphulo-mthetho nemfazwe? Ngaba ndingathanda ukuba kwintsapho apho wonke umntu ebonisa inkxalabo ngeemvakalelo nangentlalo-ntle yabanye?’ Eneneni, ngubani obenokuthi hayi kwezi zinto? Kodwa ngokwenene bambalwa abanandipha ezi meko. Inkoliso yabantu ayinakuba nalo nethemba lezi zinto.

UMthetho Omkhulu Waphela

Ukutyhubela imbali, kuye kwabakho amatyala olwaphulo-mthetho nxamnye noluntu apho amalungelo abantu atyeshelwa ngokupheleleyo. La matyala aquka ukuthengiswa kwamakhoboka avela eAfrika, iinkampu zamaNazi ekwakubulawa kuzo abantu, ukusetyenziswa ngenkani kwabantwana, nokutshatyalaliswa kakubi kohlanga kwiindawo ezininzi. Olu ludwe luhlasimlis’ umzimba lunokuba lude nangakumbi.

Namhlanje, ihlabathi lethu eliphambili kwezobugcisa liyazingca. Bambalwa abantu abacinga ngabanye abantu xa izinto zabo okanye amalungelo abo esengozini. (2 Timoti 3:1-5) Kutheni abaninzi bezingca, bekhohlakele yaye bengenalo ulwazelelelo? Ngaba asikukuba uMthetho Omkhulu, nangona usaziwa kakhulu, ubekelwa ecaleni njengongekho ngqiqweni, umlinganiselo wokuzenza ngathi ungcwele? Okubuhlungu kukuba, kunjalo naphakathi kwabantu abaninzi abathi bakholelwa kuThixo. Yaye xa sijonga izinto ngendlela ezihamba ngayo, abantu baza kuzingca nangakumbi.

Ngoko ke, imibuzo ebalulekileyo emayiqwalaselwe yile: Kubandakanya ntoni ukuphila ngoMthetho Omkhulu? Ngaba kusekho umntu ophila ngawo? Yaye ngaba kuya kuze kubekho ixesha xa lonke uluntu luya kuphila ngokuvisisana noMthetho Omkhulu? Ukuze ufumane iimpendulo eziyinyaniso kule mibuzo, nceda ufunde inqaku elilandelayo.

[Umfanekiso okwiphepha 3]

UConfucius nabanye bafundisa ezinye iindlela zoMthetho Omkhulu