‘Ukucikidwa Kokunyaniseka Kothando Lwenu’

AKUKHUMBUZA ntoni la mazwi angasentla? Ngentshutshiso nangobunzima? Ngokufela ukholo? Loo mazwi abhalwa ntlandlolo ngumpostile uPawulos kwincwadi eya kumaKristu aseKorinte yamandulo. Abaluleke kakhulu kubantu bakaYehova namhlanje ekubeni ‘ukunyaniseka kothando lwabo’ kucikidwa ngendlela efanayo. Kodwa kucikidwa njani? Ukuze sifumane impendulo, makhe sihlolisise iimeko athethwe phezu kwazo amazwi kaPawulos.

Isizinzi Sokucikidwa

Kumashumi amabini eminyaka emva kokusekwa kobuKristu, ibandla eliseYerusalem lalikwingxaki enzulu engokwemali. Njengokuba ayehlala kwindawo apho kwakwesamele inkcaso nekhethe lamaYuda, amaKristu ‘anyamezela umzamo omkhulu weentlungu,’ ade aba namava ‘okuphangwa kweempahla zawo.’ (Hebhere 10:32-34) Uncedo oluvela ngaphandle lwalufuneka ngokungxamisekileyo.

Ngokuqinisekileyo, abazalwana babo abangabeeNtlanga babefanele bashukunyiselwe ukuba basabele kwingxaki ababekuyo. Ngapha koko, ‘babewatyala’ ngokukhethekileyo amaKristu aseYerusalem. Zazingasasazeki zisuka eYerusalem kusini na iindaba ezilungileyo ukuya eziNtlangeni? UPawulos wathi: “Kuba iintlanga, xa zadlelanayo nabo [namaKristu angamaYuda, NW] ngezinto zabo ezizezomoya, zifanele ukubabusela ngezizezenyama.”—Roma 15:27.

Ukulungelelanisa Ukuhlanganiswa Kweminikelo

UPawulos wayefumene ulwalathiso kwiqumrhu elilawulayo lokuba ‘awakhumbule [amaKristu] angamahlwempu.’ (Galati 2:10) Ngoko wathumela isigidimi kumaKristu aseYurophu nawaseAsia Minor ngokuphathelelene nemeko yaseYerusalem. Nantsi imiyalelo kaPawulos: “Ke kaloku, ngokubuthwa kwemali yokusiza abangcwele, njengokuba ndawamiselayo amabandla kaThixo akwelaseGalati, yenzani ngokunjalo nani. Ngolokuqala usuku, iiveki ngeeveki, elowo kuni makabeke ekhaya, eqweba, into asukuba esikelelwe ngayo; ukuze kungathi, ndakuba ndifikile, kwandule ukubuthwa imali.”—1 Korinte 16:1, 2.

Ngokuqingqa imali yabo ngale ndlela, akukho namnye obeya kuvakalelwa kukuba unyanzelwe okanye ucinezelwe xa kubuthwa imali ngokwenene. Abazalwana abazange babe noloyiko lokuba imali yabo yayiza kusetyenziswa ngokungafanelekanga okanye ichithwe. Kuphela ‘ngamadoda acikidiweyo’ ebeya kuvunyelwa ukuba ahambise imali eqokelelweyo, ephelekwa nguPawulos ukuba oko kwakubonakala kufanelekile.—1 Korinte 16:3-5.

Basabela njani abaseKorinte? Nangona abazalwana kubonakala ukuba basamkela ngezandla ezingenamikhinkqi isiluleko sikaPawulos, iminikelo ayizange ithunyelwe. (2 Korinte 8:6, 10, 11) Mhlawumbi abadala babezixakekisile ngokuhlangula ibandla kwimpikiswano, ekuziphatheni okubi, nakwezinye iingxaki uPawulos awayebabhalele ngazo.

‘Phuphumani Ekubabaleni’

Noko ke, uPawulos wababhalela enye incwadi esithi: “Ke kaloku, bazalwana, siyanazisa ubabalo lukaThixo oluhlakaziweyo phakathi kwamabandla akwelaseMakedoni; okokuba ekucikidweni kwawo okukhulu yimbandezelo, kuthe ukuphuphuma kovuyo lwawo, nobuhlwempu bawo obondeleyo, kwaphuphumela ekutyebiseni ukunyanisa kwawo. Ngokuba ndiyangqina ukuba bathe, ngokwamandla abo, ewe nangaphezu kwamandla, banikela ngokuqhutywa yintliziyo, besikhunga, besibongoza kakhulu, ukuba silwamkele ubabalo olo, ubudlelane ke obo bokulungiselela abangcwele. Abanelanga kwenza njengoko sathemba ngako; bathi kuqala bazinikela eNkosini, baza kamva bazinikela nakuthi ngokuthanda kukaThixo; ngokokude simyale uTito, ukuze athi, njengokuba ebeqalile, alufeze kuni ngokunjalo nolo lubabalo. Ke, kwanjengokuba niphuphuma iinto zonke, ukholo, nokuthetha, nokwazi, nokunyameka konke, nokusithanda kwenu, maniphuphume nakulo olu lubabalo.”—2 Korinte 8:1-7.

Umzekelo wabaseMakedoni wokuzincama wazixhokonxa iingcinga zabaseKorinte. IKorinte yayidume ngobutyebi bayo, ubuyokoyoko, norhwebo. Bambi babazalwana apho basenokuba babehlwempuzekile ngentelekiso, sekunjalo, njengeqela, ibandla ngokungathandabuzekiyo lalinobuncwane obuthe chatha kunamaKristu aseMakedoni ‘awayendele kubuhlwempu.’ Sekunjalo, abaseMakedoni babenikele ‘ngaphezu kwamandla abo.’ Abazange bafune ukhuthazo oluvela kuPawulos ukuze banikele. Ewe ‘bamkhunga, bambongoza’ uPawulos ukuba nabo babe nesabelo kulo mnikelo! Oku kwakububungqina bokuba ngokwenyaniso amaKristu aseMakedoni ‘ayezinikele [ngokuzahlulela ngokungagogotye lutho] eNkosini [nakuPawulos namaqabane akhe],’ ezithoba kulwalathiso lwabo olungokobuthixo.

Ukucikidwa Kothando Nokuba Nesisa Kwabo

Ngaba amaKorinte ayeya kushukunyiswa ngokufanayo ukuba ‘aphuphume ekubabaleni’? Xa watyelela eKorinte okwesihlandlo sokuqala, uPawulos wanyanzeleka ukuba azixhase njengomenzi weentente. (IZenzo 18:1-3) Waqhubeka ezixhasa nangona kwasekwa ibandla apho, engafuni ukusebenzisa ‘igunya’ lakhe njengomshumayeli wexesha elizeleyo ukuze afumane inkxaso engokwemali.—1 Korinte 9:3-12.

Umgqabazi ngeBhayibhile uThomas Scott uthi: “Ngokunokwenzeka, wayephawule okuthile kwisimo sengqondo samaKristu aseKorinte, okwathi kwasekuqaleni kwamenza akafuna ukwamkela nayiphi na inkxaso evela kuwo.” Mhlawumbi ephenjelelwe ngumoya wokuzingca wokuthanda izinto eziphathekayo owawuwangqongile amaKorinte afumileyo ngokwentelekiso ngokulula asenokuba akazange atyekele ekubeni nganesisa. Kwakhona uPawulos usenokuba waba noloyiko lokuba amaKorinte awayenesimo sengqondo sezorhwebo ayesenokuyithandabuza intshukumisa yokwamkela kwakhe uncedo olungokwemali. Kusenokuba kwakukho nkqu nabo, njengabathile baseTesalonika, ababengamavila yaye befuna ukwenza isingxengxezo sokuba baxhaphaze amaKristu angoowabo.—2 Tesalonika 3:7-12.

Kungakhathaliseki ukuba yayiyintoni na imeko, uPawulos namaqabane akhe bakhetha ukuzixhasa, ‘ukuze bangazibambezeli ngabo iindaba ezilungileyo ezingoKristu.’ (1 Korinte 9:12) Noko ke, ekuhambeni kwexesha, uPawulos waba kwimeko enzima ngokwemali, nto leyo eyathi yafikelela kubazalwana abahlwempuzekileyo abahlala eFilipi. UPawulos wawachazela oku amaKorinte: “Amanye amabandla kaThixo ndawabhunyula, ndisamkela umvuzo ukuze ndilungiselele nina. Kanjalo xa ndandikho kuni, ndiswele, andibanga mthwalo mntwini; kuba ukuswela kwam bakwenzelelela abazalwana, bakuvela kwelaseMakedoni; ndathi ngeendawo zonke ndazigcina, andaba bunzima kuni, ndisaya kuzigcina nangoku.”—2 Korinte 11:8, 9; thelekisa amaFilipi 4:15, 16.

Liyinyaniso elokuba, uPawulos ngokunokwakhe wavuma ukuba ‘wayengayi kwamkela mvuzo’ ovela kwabaseKorinte. Kodwa xa uPawulos wathi wazama ukubàla ububele bentokazi yaseFilipi enguLidiya bokubamemela ekhayeni layo ‘yabathundeza ukuba baye.’ (IZenzo 16:15, TE) Ngaba amaKorinte abonakalisa inkxalabo ezingisileyo efanayo ngokulungelwa kukaPawulos ngokwezinto eziphathekayo? Ubani usengabuza atsho. Sekunjalo, uPawulos wakwazi ukuyicalula imeko eyayibandakanya ibandla laseYerusalem njengaleyo enikela ithuba elihle lokucikida enoba amaKristu ayenotyekelo lokuba ngamagqolo okanye ayekhulile ekubeni nganesisa. Ngaloo ndlela wabongoza esithi:

“Anditsho ngakwammiselo; ukutsho . . . ndicikida nenyaniso yolwenu uthando. Kuba andithi mabaphumle abanye, nibandezeleke nina [okuthetha ukuba, kungekhona ukuba abanye bafanele balale emqokozweni ukuze nina nibulaleke] ndithi, ukuze kubekho ukulingana ngexesha lakalokunje, ukuphuphuma kwenu makufikelele ekusileleni kwabo; ukuze nokuphuphuma kwabo kufikelele ekusileleni kwenu, ukuze ke kubekho ukulingana; njengokuba kubhaliwe kwathiwa, Owabutha kakhulu akabanga nakusalelayo; nowabutha kancinane akabanga nakusilela.”—2 Korinte 8:8, 13-15.

Ngokucacileyo, amaKorinte aluphumelela uvavanyo lwawo. Kwixesha elithile kamva uPawulos wanikela le ngxelo: “Kuba kwakholeka kwabelaseMakedoni nabelaseAkaya [apho iKorinte yayimi khona], ukuba badlelane namahlwempu abo bangcwele baseYerusalem ngokuwapha okuthile.”—Roma 15:26.

Ukuhlangabezana Nokucikidwa Namhlanje

Noko ke, ngaba thina siyaluphumelela uvavanyo lothando nokuba nesisa esijamelana nalo namhlanje? Siphila ‘kumaxesha anomngcipheko.’ (2 Timoti 3:1-5) Iingcinezelo ezingokwemali zithe zinzi phezu kwethu sonke. Ibe maxa wambi “inkanuko yenyama, nenkanuko yamehlo, noqhankqalazo lobu bomi” zidala ezazo iingcinezelo. (1 Yohane 2:16) Hayi indlela ekulula ngayo ukuba ngabazingcayo, abangazikhathalelanga iintswelo zabanye!

Njengeqela, amaNgqina kaYehova namhlanje aye ahlangabezana nokucikidwa kothando lwawo lobuzalwana ngendlela ebalaseleyo. Ngokomzekelo, ngoMatshi 3, 1985, inyikima yantlitha iSantiago, eChile. Amakhulukhulu abazalwana balahlekelwa ngamakhaya abo nezinto zabo. Ngokukhawuleza, amabandla enza imigudu yokunikela uncedo. Abazalwana banikela ingxelo yokuba: “Kwiiyure nje ezimbalwa, bambi baqalisa ukufika nokutya, iimpahla, iingubo nezinye izinto eziluncedo.” Kwakhona iminikelo yathunyelwa ivela kulo lonke ihlabathi. Iziganeko ezifanayo ziye zenzeka izihlandlo eziliqela kwiminyaka edluleyo.

Kodwa akufuneki ukuba silinde intlekele ukuze singqine uthando lwethu lobuzalwana. Ukuba umzalwana onguwethu uva ubunzima obungokwemali, sisenokuvelana naye kwiintswelo zakhe, sisenza okungaphezulu kunokuthi, “Yothani, hluthani.” (Yakobi 2:15, 16) Yaye kuthekani ngabo bakhonza ixesha elizeleyo ‘abaphila ngeendaba ezilungileyo.’ NjengoPawulos, abanjalo abafuni ngegunya okanye balindele uncedo olungokwemali kwabo babakhonzayo. Sekunjalo, abaninzi baye bashukunyiselwa ukuba babonakalise ububele ngakwabo basebenza nzima ‘ekubahlwayeleleni izinto ezizezomoya.’—1 Korinte 9:11, 14.

Ibe kuthekani ngeentswelo zentlangano yehlabathi lonke yamaNgqina kaYehova? I1989 Yearbook of Jehovah’s Witnesses inikela ingxelo yokuba “ebudeni bonyaka wenkonzo we-1988 iWatch Tower Society yachitha izi-74 586 692,43 zeerandi ekunyamekeleni oovulindlela abakhethekileyo, abavangeli basemazweni, nabaveleli abahambahambayo kwizabelo zabo zenkonzo yasentsimini.” Kuye kwahlangatyezwana neendleko ezinkulu ekunyamekeleni nasekuthengeni iimfuno zamasebe, izixhobo zokusebenza, oomashini, iphepha—kungasathethwa ngeendleko zokuphila ezisisiseko zentsapho yazwenibanzi yaseBheteli, ngoku efikelela ngaphezulu kwama-9 000! Ngokongezelelekileyo, izakhiwo ezili-18 nokuhlaziywa kuyaqhubeka ngoku sithethayo kumasebe amaninzi, kuquka ezili-19 kwiiofisi zethu ezilikomkhulu, eziseBrooklyn, eNew York. Ngaba unesabelo ekuxhaseni ngemali lo msebenzi wazwenibanzi?

Njengakwinkulungwane yokuqala, namhlanje bonke banesabelo ekuphumezeni le mbopheleleko, kuquka nabo bangenazinto kangako, abathe, ngokuncinane abanikela ngako, bazingqina beyintsika yokuxhasa uMbutho ngemali. Bambi bakufumanise kuluncedo ukulandela umzekelo owandlalwe kweyoku-1 yabaseKorinte 16:2 ibe ngokuthe rhoqo baqingqa imali yabo yobuqu ukuze banikele kwiHolo yoBukumkani yasekuhlaleni. Bambi basenokugqiba ukuba banikele ngemali ngokuthe ngqo kwiWatch Tower Society e-25 Columbia Heights, Brooklyn, New York 11201, okanye kwenye yeeofisi zayo zamasebe.

Qiniseka ukuba uYehova uyababona abo bathi, ngokuba nesisa kwabo, bangqine ukunyaniseka kothando lwabo. Musa ukuziphulukanisa neentsikelelo! UPawulos wathembisa oku: “Unako ke uThixo ukuphuphumisela kuni ubabalo lonke, ukuze nithi, nihlala ninako nje ukwanela konke ngeendawo zonke, niphuphumele emsebenzini wonke olungileyo.”—2 Korinte 9:8.

[Ibhokisi ekwiphepha 26]

INDLELA ABANYE ABANIKELA NGAYO KUMSEBENZI WOBUKUMKANI

◻ IZIPHO: Iminikelo yokuzithandela yemali isenokuthunyelwa ngqo kwiWatch Tower Bible and Tract Society of Pennsylvania, 25 Columbia Heights, Brooklyn, New York 11201, okanye kwiofisi yesebe yoMbutho yasekuhlaleni. Usenokunikela nangezinto onazo ezinjengomhlaba, kuquka ezenziwe ngamatye anqabileyo okanye ezinye izinto ezixabisekileyo. Kufanele kubekho ileta emfutshane epheleka le minikelo nechaza ukuba le yiminikelo.

◻ ILUNGISELELO LOMNIKELO WOXHOMEKEKO: Imali isenokunikelwa kwiWatch Tower Society ibe selugcinweni lwayo, kukho ilungiselelo lokuba xa kufuneka isetyenziselwe ingxaki yobuqu, iya kubuyiselwa kulowo ebenikele ngayo.

◻ I-INSHORENSI: IWatch Tower Society isenokubhaliswa njengaleyo iya kufumana imali kwi-inshorensi akuba ubani lowo efile okanye kwilungiselelo lemali yomhlala-phantsi. UMbutho umele waziswe ngawo nawaphi na amalungiselelo anjalo.

◻ IMALI ESELUGCINWENI: Imali esebhankini inokunikelwa njengaleyo igcinelwe uMbutho. Ukuba oku kwenziwe, nceda wazise uMbutho. Imali eselugcinweni okanye eyengeniso yeshishini esetyenziswa njengesibopho (ibond) kunye nempahla (enjengomhlaba) kunokunikelwa ngayo ngaphantsi kwelungiselelo elinokuba yingenelo kulowo unikela ngayo ngethuba lokudla kwakhe ubomi. Le ndlela inciphisa iindleko nokungaqiniseki kwendlela umnqophiso oya kusetyenziswa ngayo, ngoxa iqinisekisa ukuba uMbutho uya kuyifumana loo mpahla xa ubani lowo anokuthi afe.

◻ IMINQOPHISO YAMAFA: Impahla okanye imali isenokushiyelwa iWatch Tower Society ngokwenziwa komnqophiso welifa ongokwasemthethweni. Kumele kuthunyelwe umbhalo walo myolelo kuMbutho. (EMzantsi Afrika iminqophiso yamafa ifanele ibhaliswe ngeJehovah’s Witnesses of South Africa.)

Ukuze ufumane inkcazelo engakumbi namacebiso ngokuphathelele imibandela elolo hlobo, bhalela kwiTreasurer’s Office, Watch Tower Bible and Tract Society of Pennsylvania, Private Bag 2067, Krugersdorp, 1740, okanye kwiofisi yesebe yoMbutho yasekuhlaleni.