Umniki Waso “Sonke Isipho Esilungileyo”
“Ngesinye isihlandlo ndakha ndabizwa ngumfundisi wecawa eHlaziyiweyo. Wayefuna ukwazi indlela endiqhuba ngayo kwicawa yam. Ndathi kuye: . . . ‘Akukho mvuzo siwuhlawulayo; akukho nto enokubangela abantu bakhalaze. Asiqokeleli mali yankongozelo.’ ‘Niyifumana njani imali?’ wabuza. Ndaphendula ndathi, ‘Uyabona, Gqr.——, ukuba ndikuxelela inyaniso emsulwa akuyi kuyikholelwa. Xa abantu besiba nomdla kule ndlela, abafumani sitya sankongozelo sijikeleziswa phambi kwabo. Kodwa bayabona ukuba ezi zinto zilapha zezemali. Bazixelela oku, “Le holo ixabisa okuthile. . . . Ndinokunikela njani ukuze kuhlangatyezwane nezi ndleko?”’ Wandijonga ngokungathi uza kuthi, ‘Ucinga ukuba ndiyintoni—ndilusana kakade?’ Ndathi, ‘Uyabona, Gqr.——, ndikuxelela inyaniso emsulwa. . . . Xa ubani efumana iintsikelelo yaye enezinto eziphathekayo, uye afune ukuzisebenzisela iNkosi. Ukuba akanazo, kutheni sifanele simnyanzelele ukuba anikele?’”—UCharles T. Russell, umongameli wokuqala weWatch Tower Society, “IMboniselo” (yesiNgesi), Julayi 15, 1915.
SINIKELA ngezipho kuba uYehova uThixo wanikela kuqala. Waqalisa ukupha kumawaka eminyaka eyadlulayo xa wayedala—intlahlela yendalo yakhe, “uNyana wakhe okuphela kwamzeleyo.” (Yohane 3:16) Eqhutywa luthando, wadlulisela isipho sobomi kwabanye.
UNyana kaThixo, uYesu Kristu, usesona sipho sibalaseleyo esisinikwe nguYehova. Kodwa uNyana kaThixo, yena ngokwakhe, akasosipho sokugqibela esisinikwe nguThixo. ‘Ubabalo lukaThixo oluncamisileyo’ lolo umpostile uPawulos alubiza ngokuba ‘sisipho sikaYehova esingenambali.’ (2 Korinte 9:14, 15) Ngokucacileyo esi sipho siquka konke ukulunga nobubele obunothando uThixo abudlulisela kubantu bakhe ngoYesu. Ubabalo olunjalo lumangalisa ngokwenene kangangokuba ludlulela ngaphaya kwamandla omntu okuluchaza nokulubonakalisa. Noko ke, kusekho nezinye iindlela ezingakumbi uThixo apha ngazo.
Mandulo phayaa, ngobulumko nangokuthobeka ukumkani othile wavuma ukuba ngokwenene naziphi na izinto ezilungileyo awayenikela ngazo njengezipho yayizezikaYehova. Wathi: “Konke okusezulwini nokusehlabathini kokwakho; bobakho, Yehova, ubukumkani; uphakamile wayintloko yeento zonke. . . . Ngokuba ndingubani na mna, bangoobani na abantu bam, ukuba side sibe namandla okunika ngokuqhutywa yintliziyo njengoku? Ngokuba zivela kuwe zonke izinto; sikunika okuvele esandleni sakho.”—1 Kronike 29:11-14.
Umzekelo KaThixo
UYakobi, umfundi kaYesu Kristu, wayesazi ukuba uYehova uThixo ngumthombo wento yonke elunge ngokupheleleyo. Zizipho ezigqibeleleyo kuphela ezivela kuye. UYakobi wabhala: “Sonke isipho esilungileyo, naso sonke isipho esigqibeleleyo, sesaphezulu; sihla sivela kuye uYise wezikhanyiso, ongenabuyambo nasithunzi sakujika.”—Yakobi 1:17.
Kwanakumbandela wokunikela izipho, uYakobi wabona indlela ahluke ngayo uThixo ebantwini. Abantu banokunikela ngezipho ezilungileyo kodwa abasoloko bekwenza oko. Ezi zipho basenokuzinikela ngenxa yentshukumisa yokuzingca, okanye zisenokusetyenziselwa ukulingela umntu othile ekwenzeni okubi. UYehova akanabuyambo; akaguquguquki. Ngenxa yoko, izipho zakhe aziguquki. Zisoloko zinyulu. Zisoloko zihambisela phambili intlalo-ntle nolonwabo loluntu. Zisoloko zilungile yaye ziluncedo, azize zonakalise nakanye.
Izinto Ezishukumisela Ekupheni
Ngemihla kaYakobi, iinkokeli zonqulo ezidumileyo zazinikela ngezipho kuphela nje ukuze zibonwe ngabantu. Zazinikela ngokuqhutywa yintshukumisa embi. Zifuna ukunconywa ngabantu, zazilalanisa kwimigaqo yazo yobulungisa. Noko ke, amaKristu, ayefanele ahluke. UYesu wawaluleka: “Xa sukuba uliza abantu, ungahlokomisi xilongo phambi kwakho, njengoko benza ngako abahanahanisi ezindlwini zesikhungu, nasezitratweni, ukuze bazukiswe ngabantu. Inene ndithi kuni, bawufincile umvuzo wabo. Ke wena, xa uliza abantu, masingazi isandla sakho sokhohlo into eyenziwa sisandla sakho sokunene, ukuze amalizo akho abe semfihlekweni; aze uYihlo obona emfihlekweni akubuyisele.”—Mateyu 6:2-4.
Isizathu somKristu sokunikela ngezipho kukunceda abanye banelise iimfuno zabo okanye ukubenza bonwabe okanye ikukuhambisela phambili unqulo lokwenyaniso. Akenzeli ukuba azukiswe. Ngapha koko, amehlo kaYehova anokubona nakwezona ngontsi zifihlakeleyo zentliziyo yethu. Unokubona intshukumisa yangaphakathi ebangela ukuba sinikele izipho zenceba.
AmaNgqina kaYehova azabalazela ukulandela umzekelo kaYehova noNyana wakhe ekunikeleni ngezipho. Anikela ngoko anako. Aneendaba ezilungileyo zoBukumkani yaye anikela ngazo ukuze kusikelelwe abanye. Ayazi ukuba IMizekeliso 3:9 ithi: “Mzukise uYehova ngobuncwane bakho, nangentlahlela yongeniso lwakho lonke.” Ngenxa yokuba iofisi yesebe nganye, ibandla nabantu ngabanye bekufuna ngokunyanisekileyo ukuba negalelo kwintlalo-ntle yabo bonke, bonke abazalwana benziwa bomelele yaye babe zizityebi ngokomoya. Ubutyebi bezinto eziphathekayo abukhokeleli kubutyebi bokomoya, kodwa ubutyebi bokomoya bubangela kubekho ubutyebi bezinto eziphathekayo obanele izinto eziyimfuneko kumsebenzi kaYehova.
Iindlela Onokufak’ isandla Ngazo
Kukho iindlela ezininzi anokuthi ubani ngamnye abe negalelo ngazo ngokobuqu ukuze axhase iindaba ezilungileyo. Enye indlela imayela neeHolo zoBukumkani. Onke amalungu ebandla ayayisebenzisa iHolo yoBukumkani. Uthile unikela ngemali yokuyakha okanye yokuyirhafela, yokukhanyisa, eyezixhobo zokufudumeza kwanokuyenza iphole neyeendleko zokuyigcina isemgangathweni. Ekubeni kufuneka wonk’ ubani alixhase ibandla, kwiHolo yoBukumkani kukho iibhokisi zomnikelo, yaye iminikelo yokuzithandela efunyanwayo isetyenziselwa ukuhlawula iindleko zebandla. Ngemali eseleyo, kusenokunikelwa kwisebe leWatch Tower lasekuhlaleni, ngokwendlela eligqibe ngayo ibandla.
Kunokwenziwa iminikelo eya kwisebe loMbutho ukuze kuqeqeshwe kuze kuxhaswe abavangeli basemazweni noovulindlela abakhethekileyo abakwiinxalenye zomhlaba iindaba ezilungileyo ezingafikeleli kubo bonke abantu kuzo. Ezinye iindleko ezichithelwa ekusasazweni kweendaba ezilungileyo zinxulumene nomsebenzi wabaveleli abahambahambayo. Umpostile uPawulos, owamisela umzekelo kumsebenzi wokuhambahamba ngenkulungwane yokuqala, walincoma ibandla laseFilipi wenjenje: “Kwaba kanye nakabini nithumela, nindinceda ekusweleni kwam.” (Filipi 4:14-16) Ukongezelela kwiindleko ezisetyenziselwa ezi nkalo zenkonzo yexesha elizeleyo, ndleko ezo onke amasebe anazo, kukho ukuxhaswa kwekhaya ngalinye laseBheteli kunye nabo bahlala nabasebenza kulo. Ngokwenene ukubhala nokushicilela uncwadi oluqulethe isigidimi esihle seendaba ezilungileyo ngamalungelo esiwanikwe nguThixo, kodwa kwakhona kufuneka olo ncwadi lusasazwe yaye oko kuziindleko. Kwakhona kukho iindleko ezinokuthanani neendibano, akusathethwa ke ngamatyala asenkundleni apho kulwelwa ‘ukukhusela nokumisela ngokusemthethweni iindaba ezilungileyo.’—Filipi 1:7, NW.
Mkhonzi ngamnye kaYehova ixesha alichithele ekushumayeleni iindaba ezilungileyo lelokuzithandela, yaye kukwanjalo nangokunikela ngemali. Umpostile uPawulos ucebisa ukuba rhoqo kubekelw’ ecaleni imali ukuze isetyenziselwe ukuhambisela phambili unqulo lokwenyanyiso: “Ngokubuthwa kwemali yokusiza abangcwele, . . . Ngolokuqala usuku, iiveki ngeeveki, elowo kuni makabeke ekhaya, eqweba, into asukuba esikelelwe ngayo.”—1 Korinte 16:1, 2.
Xa ubani enikela, akasoloko eyazi ngokuthe ngqo indlela oya kusetyenziswa ngayo umnikelo wakhe, kodwa imiphumo uyibona kwindlela ohambela phambili ngayo umsebenzi wokushumayela ngoBukumkani. Iingxelo ezikwi-1993 Yearbook of Jehovah’s Witnesses zibonisa ukuba iindaba ezilungileyo zoBukumkani zishunyayelwa kumazwe nakwiziqithi zolwandle ezingaphezu kwama-200 ngabalungiseleli bamaKristu abangaphezu kwezi-4 500 000. Ezi ziingxelo ezifudumez’ intliziyo. Ngoko nasiphi na isipho, enokuba singakanani na, sinceda ekusasazweni kweendaba ezilungileyo ehlabathini lonke.
Lo msebenzi uxhaswa ngeminikelo eyintlanganisela yabo bonke. Bambi bayakwazi ukunikela kakhulu, nto leyo enceda kumsebenzi wokushumayela ngomlinganiselo ophakamileyo. Abanye banikela kancinane. Kodwa abo banikela kancinane abamele bazive beneentloni okanye bavakalelwe kukuba isabelo sabo sincinane kakhulu. Ngokuqinisekileyo uYehova akavakalelwa ngaloo ndlela. UYesu wakucacisa oku xa wabonisa indlela uYehova awawuxabisa ngayo umnikelo omncinane womnye umhlolokazi. “Wabona ke mhlolokazi uthile ulihlwempu, ephosa apho iimalana ezimbini. Wathi, Inyaniso ndithi kuni, lo mhlolokazi usweleyo uphose ngaphezu kwabo bonke; kuba bonke aba baphose eminikelweni kaThixo, bethabatha kwintabalala yabo; ukanti lo, ekusweleni kwakhe, uphose yonke impilo abenayo.”—Luka 21:2-4.
Kungakhathaliseki ukuba injani imeko yethu engokwemali, sinokunikela ngeendlela ezimkholisayo uYehova. Umdumisi uyishwankathela kakuhle indlela esinokumzukisa ngayo uKumkani kwanoMgwebi wethu. Uthi: “Mnikeni uYehova uzuko lwegama lakhe; thwalani umnikelo, nize ezintendelezweni zakhe.” (INdumiso 96:8) Ngoko ke, kwanga singaxelisa umzekelo wothando kaBawo wethu osemazulwini ngokupha sichwayitile kuba yena wasipha kuqala.
[Ibhokisi ekwiphepha 30]
INDLELA ABANYE ABANIKELA NGAYO KUMSEBENZI WOKUSHUMAYELA UBUKUMKANI
◻ IZIPHO: Iminikelo yokuzithandela yemali isenokuthunyelwa ngqo kwiWatch Tower Bible and Tract Society of Pennsylvania, 25 Columbia Heights, Brooklyn, New York 11201, okanye kwiofisi yesebe yoMbutho yasekuhlaleni. Kusenokunikelwa nangamatye anqabileyo okanye ezinye izinto ezixabisekileyo. Le minikelo ifanele iphelekwe yileta emfutshane echaza ukuba ezi zizipho.
◻ LUNGISELELO LOMNIKELO WOXHOMEKEKO: Imali isenokunikelwa kwiWatch Tower Society ibe selugcinweni lwayo de afe lowo unikeleyo, ilungiselelo ibe lelokuba xa kuvela ingxaki yobuqu, iya kubuyiselwa kulowo ebenikele ngayo.
◻ I-INSHORENSI: IWatch Tower Society isenokubhaliswa njengaleyo eya kufumana imali kwi-inshorensi yobomi okanye kwilungiselelo lemali yomhlala-phantsi. UMbutho umele waziswe ngawo nawaphi na amalungiselelo anjalo.
◻ IMALI ESELUGCINWENI NEEBOND: Imali eselugcinweni neebond zinokunikelwa kwiWatch Tower Society njengezipho okanye ngaphantsi kwelungiselelo lokuba ingeniso iqhubeke ihlawulwa kulowo wenze umnikelo.
◻ ISIZA NEZINDLU EZIKUSO: Isiza esinokuthengiswa sinokunikelwa kwiWatch Tower Society mhlawumbi njengesipho okanye ngokusigcina elungelweni lalowo unikele ngaso, aqhubeke ehlala kuso ebudeni bokuphila kwakhe. Ubani ufanele aqhagamshelane noMbutho ngaphambi kokwenza isivumelwano sokunikela ngomhlaba kuMbutho.
◻ IMINQOPHISO YAMAFA: Imihlaba okanye imali isenokushiyelwa iWatch Tower Bible and Tract Society of Pennsylvania ngokwenziwa komnqophiso welifa ongokwasemthethweni. Umbhalo waloo myolelo ufanele uthunyelwe kuMbutho.
Ukuze ufumane inkcazelo engakumbi namacebiso ngokubhekisele kwimibandela elolo hlobo, bhalela kwiTreasurer’s Office, Watch Tower Bible and Tract Society of Pennsylvania, Private Bag X2067, Krugersdorp, 1740, okanye kwiofisi yesebe yoMbutho ekufutshane.
[Imifanekiso ekwiphepha 31]
Indlela esetyenziswa ngayo iminikelo yakho:
1. Abasebenzi bokuzithandela baseBheteli
2. Ukwakhiwa kweofisi yeSebe
3. Ukunikel’ uncedo kwintlekele
4. IiHolo zoBukumkani
5. Abavangeli basemazweni