“UThixo Uthanda Umphi Ochwayitileyo”

UYEHOVA usisisa simntwisiwe. Eneneni, iBhayibhile ithi unguMphi waso “sonke isipho esilungileyo naso sonke isipho esigqibeleleyo.” (Yakobi 1:17) Ngokomzekelo, khawucinge ngezinto uThixo azidalileyo. Wenza ukutya okuluncuthu, kungekhona okujavujavu; iintyatyambo ezimibalabala, kungekhona ezimbatshileyo; ukutshona kwelanga okubukekayo, kungekhona indinisa. Ewe, kwiinkalo zonke indalo kaYehova isinika ubungqina bothando nesisa sakhe. (INdumiso 19:1, 2; 139:14) Ngaphezu koko, uYehova nguMphi ochwayitileyo. Uyayoliswa kukwenzela abakhonzi bakhe okulungileyo.—INdumiso 84:11; 149:4.

AmaSirayeli ayalelwa ukuba axelise uThixo ekuboniseni isisa kwiindlela aqhubana ngazo omnye nomnye. UMoses wawaxelela oku: “Uze ungayenzi ingqoshomba intliziyo yakho, usivale isandla sakho kumzalwana wakho olihlwempu. Uze umnike, ingabi mbi intliziyo yakho ekumnikeni kwakho.” (Duteronomi 15:7, 10) Ekubeni ayeza kupha ngokusuka entliziyweni, amaSirayeli ayefanele avuyiswe kukuba nesisa.

AmaKristu abongozwa ngendlela efanayo. Eneneni, uYesu wathi “kukho uyolo . . . ekupheni.” (IZenzo 20:35) Abafundi bakaYesu babengumzekelo ekupheni ngokuchwayita. Ngokomzekelo, iBhayibhile isixelela ukuba eYerusalem abo baba ngamakholwa “bathi bathengisa ngezinto abanazo nempahla baza babela bonke ingeniso yabo, kanye ngokokuswela kwakhe nabani na.”—IZenzo 2:44, 45.

Kodwa la maYuda ayenesisa kamva ahlwempuzeka. IBhayibhile ayisichazeli ngokuthe ngqo ngesizekabani soko. Bambi abaphengululi bathi indlala echazwe kwiZenzo 11:28, 29 isenokuba ngunobangela. Enoba kwakutheni na, amaKristu akwaYuda ayekwimeko emaxongo, yaye uPawulos wayefuna ukuqinisekisa ukuba iintswelo zawo ziyanyanyekelwa. Wayeza kukwenza njani oko?

Ukuqokelelela Abangamahlwempu

UPawulos wahlab’ ikhwelo emabandleni amgama njengelaseMakedoniya, yaye wenza amalungiselelo okuqokelela ngenxa yabo babethwaxwa bubuhlwempu obabugqugqisa amaKristu akwaYuda. Ebhalela abaseKorinte, uPawulos wathi: “Kanye njengoko ndanika amabandla akwelaseGalati imiyalelo, yenzani ngaloo ndlela nani. Usuku ngalunye lokuqala evekini ngamnye wenu endlwini yakhe makabekele bucala okuthile kuvimba njengoko esenokuba uyaphumelela.”a—1 Korinte 16:1, 2.

UPawulos wayenenjongo yokuba le ngxowa-mali igqithiselwe ngokukhawuleza kubazalwana baseYerusalem, kodwa abaseKorinte balibazisa ukusabela kwikhwelo likaPawulos. Kwakutheni? Ngaba babengavakalelwa yintlungu yabazalwana babo bakwaYuda? Akunjalo, uPawulos wayesazi ukuba abaseKorinte ‘babephuphuma yonk’ into, ukholo nelizwi nolwazi nenyameko.’ (2 Korinte 8:7) Mhlawumbi, babexakeke zezinye izinto ezibalulekileyo awayexubusha ngazo uPawulos kwileta awayebabhalele yona kuqala. Kodwa ngoku imeko yaseYerusulem yayingxamisekile. Ngoko uPawulos waxubusha ngalo mbandela kwileta yakhe yesibini eya kwabaseKorinte.

Isibongozo Sokuba Nesisa

Okokuqala, uPawulos wachazela abaseKorinte ngabaseMakedoniya, abasabela ngendlela eyaba ngumzekelo kumgudu wokunceda. UPawulos wabhala wathi: “Ebudeni bovavanyo olukhulu bexhwalekile intabalala yovuyo lwabo nobuhlwempu babo obunzulu benza ubutyebi besisa sabo baphuphuma.” AbaseMakedoniya babengafuni kubongozwa ukuze banikele. Ngokuchasene noko, uPawulos wathi “ngokuzithandela kwabo bathi gqolo besibongoza ngokubongoza okukhulu ukuba babe nelungelo lokunikela ngobubele.” Sibalasela ngakumbi isisa nokuchwayita kwabaseMakedoniya xa sicinga ngento yokuba kwabona ‘babenobuhlwempu obunzulu.’—2 Korinte 8:2-4.

Ngaba ngokuncoma abaseMakedoniya, uPawulos wayezama ukuvuselela umoya wokhuphiswano phakathi kwabaseKorinte? Akunjalo konke konke, kuba wayesazi kakuhle ukuba leyo asiyondlela ilungileyo yokukhuthaza abantu. (Galati 6:4) Ukongezelela koko, wayesazi ukuba kwakungeyomfuneko ukuba abaseKorinte bade benziwe bazive beneentloni ukuze benze okulungileyo. Kunoko, wayeqinisekile ukuba abaseKorinte babebathanda ngokwenene abazalwana babo bakwaYuda yaye babenqwenela ukunikela kwelo linge lokunceda. Wabaxelela: “Kwakunyaka odlulileyo nanisele niqalisile kungekuphela nje ukwenza kodwa kwanokufuna ukwenza.” (2 Korinte 8:10) Eneneni, kwezinye iinkalo zeli linge lokunceda, abaseKorinte babengumzekelo. Esongezelela, uPawulos wathi kubo: “Ndiyakwazi ukukulungela kwenu kwengqondo oko ndithi ngako ndiqhayisele abaseMakedoniya ngani . . . inzondelelo yenu iye yavuselela uninzi lwabo.” (2 Korinte 9:2) Noko ke, ngoku, kwakufuneka abaseKorinte baguqulele inzondelelo nengqondo yabo ehlala ilungile esenzweni.

Kungoko, uPawulos wabaxelela esithi: “Ngamnye makenze kanye njengoko egqibile entliziyweni yakhe, kungekhona ngokukrokra okanye ngokunyanzelwa, kuba uThixo uthanda umphi ochwayitileyo.” (2 Korinte 9:7) Ngoko ke, injongo kaPawulos yayingekokunyanzela abaseKorinte, kuba akanakuba ngumphi ochwayitileyo umntu ukuba uyanyanzelwa. Kuyabonakala ukuba, uPawulos wayeqonda ukuba babesele beneentshukumisa ezintle, kangangokuba ngamnye wayesele egqibile ukuba aphe. Ukongezelela, uPawulos wabaxelela esithi: “Ukuba kukho ukukulungela kuqala, kwamkeleka ngokukodwa ngokoko umntu anako, kungekhona ngokoko umntu angenako.” (2 Korinte 8:12) Ewe, xa ehleli ekulungele—umntu oshukunyiswe luthando—lo nto ayinikelayo iya kwamkeleka kuThixo, kungakhathaliseki ukuba ikhangeleka incinane kangakanani na.—Thelekisa uLuka 21:1-4.

Abaphi Abachwayitileyo Namhlanje

Ilinge lokunceda amaKristu akwaYuda lisinika owona mzekelo ubalaseleyo kumhla wethu. AmaNgqina kaYehova aye amkela umsebenzi wokushumayela ehlabathini lonke, esondla izigidi zabo bafa yindlala yokomoya. (Isaya 65:13, 14) Oku akwenza kuba ethobela umyalelo kaYesu othi: “Hambani ke ngoko nize nenze abafundi abantu beentlanga zonke, nibabhaptiza . . . nibafundisa ukuba bagcine zonke izinto endiye ndaniyalela zona.”—Mateyu 28:19, 20.

Akuyondlwan’ iyanetha ukuzalisekisa olu thumo. Kubandakanya ukunyamekela amakhaya abavangeli basemazweni nezakhiwo zamasebe angaphezu kwekhulu ehlabathini lonke. Kusafuneka kwakhiwe iiHolo ZoBukumkani neeHolo ZeNdibano ukuze abanquli bakaYehova babe neendawo ezifanelekileyo zokuhlanganisana baze bakhuthazane. (Hebhere 10:24, 25) Maxa wambi, amaNgqina kaYehova anikela uncedo kwiindawo ezitshatyalaliswe yintlekele yokwemvelo.

Kwakhona, cinga ngeendleko ezinkulu zokushicilela. Veki nganye, kushicilelwa umlinganiselo wemibhalo yeMboniselo engaphezu kwezi-22 000 000 okanye imibhalo kaVukani! ezizi-20000 000. Ukongezelela koku kudla komoya kufumaneka rhoqo kukho izigidi zeencwadi, iincwadana, iikhasethi neekhasethi zevidiyo eziveliswa nyaka ngamnye.

Uxhaswa njani wonke lo msebenzi? Ngeminikelo yokuzithandela. Oku akwenziwa ngenjongo yokukhalisa ixilongo okanye ngokuzingca, kodwa kwenzelwa ukuhambisela phambili unqulo lokwenyaniso. Kungoko, ukupha okunjalo kumzisela uyolo kwanentsikelelo kaThixo lowo uphayo. (Malaki 3:10; Mateyu 6:1-4) Kwanabantwana kumaNgqina kaYehova bazibonakalisa njengabanesisa, abaphi abachwayitileyo. Ngokomzekelo, emva kokuva ngokutshatyalaliswa yinkanyamba komnye ummandla eUnited States, uAllison oneminyaka emine wanikela ngee-$2 (R12). Wabhala: “Le kuphela kwemali endinayo. Ndiyazi ukuba abantwana balahlekelwe zizo zonke izinto zabo zokudlala iincwadi noonodoli. Mhlawumbi ninokusebenzisa le mali ukuze nithengele intombazana esencinane neyintanga yam incwadi.” UMaclean, oneminyaka esibhozo ubudala, wabhala echaza ukuba wavuyiswa yinto yokuba kungekho mzalwana ubuleweyo sisaqhwithi. Esongezelela wathi: “Ndenze ii-$17 [R107] ndithengisa iziciko zamavili enqwelo-mafutha notata. Ikho into ebendiza kuyithenga ngale mali, kodwa ndicinge ngabazalwana.”—Kwakhona bona ibhokisi engasentla.

Enyanisweni, uYehova uyavuyiswa kukubona abaselula nabadala bebeka kuqala izilangazelelo zoBukumkani bakhe ‘ngokumzukisa ngobuncwane babo.’ (IMizekeliso 3:9, 10) Kakade ke, akukho mntu unokumenza isityebi uYehova, kuba zonke izinto zezakhe. (1 Kronike 29:14-17) Kodwa ukuxhasa lo msebenzi lilungelo elinika umnquli ithuba lokuba akwazi ukubonakalisa uthando lwakhe ngoYehova. Sibulela wonke ubani ontliziyo imshukumisela ukuba enjenjalo.

[Imibhalo esemazantsi]

[Ibhokisi ekwiphepha 26, 27]

Iindlela Abanye Abakhetha Ukunikela Ngazo Iminikelo Eya Kumsebenzi Owenziwa Ehlabathini Lonke

Abaninzi babekela bucala, okanye benze uqingqo-mali, lwemali abaza kuyifaka kwiibhokisi zeminikelo. Nyanga nganye amabandla athumela ezi zixa zemali kwikomkhulu lehlabathi eliseBrooklyn, eNew York, okanye kwiofisi yesebe ekufutshane.

Iminikelo yokuzithandela yemali isenokuthunyelwa ngqo kwiTreasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, okanye kwiofisi yoMbutho enyamekela ilizwe lakho. Kusenokunikelwa ngezinto ezenziwe ngamatye anqabileyo okanye ngezinye izinto ezixabisekileyo. Le minikelo imele iphelekwe yileta emfutshane echaza ukuba le yiminikelo.

Ilungiselelo Lomnikelo Woxhomekeko

Imali isenokunikelwa kwiWatch Tower Society phantsi kwelungiselelo elikhethekileyo, lokuba lowo unikelayo ayifumane xa efuna ukuyisebenzisa. Ukuze ufumane inkcazelo engakumbi, nceda ubhalele iAccounting Office kule dilesi ibhalwe kwiphepha elilandelayo.

Ukunikela Okucetyiweyo

Ukongezelela kwiminikelo yemali neminikelo yemali yoxhomekeko, zikho ezinye iindlela zokunikela eziluncedo kwinkonzo yoBukumkani ehlabathini lonke. Ezi ziquka:

I-Inshorensi: IWatch Tower Society isenokubhaliswa njengeya kufumana imali kwi-inshorensi yobomi okanye kwilungiselelo lemali yomhlala-phantsi.

Imali Eselugcinweni NeeBond: Imali eselugcinweni neebond zinokunikelwa kwiWatch Tower Society njengezipho okanye ngaphantsi kwelungiselelo lokuba ingeniso iqhubeke ihlawulwa kulowo wenze umnikelo.

ISiza Nezindlu Ezikuso: Isiza esinokuthengiswa sinokunikelwa kwiWatch Tower Society njengomnikelo okanye ngokusigcina elungelweni lalowo unikele ngaso, aqhubeke ehlala kuso ebudeni bokuphila kwakhe. Ubani ufanele aqhagamshelane noMbutho ngaphambi kokwenza isivumelwano sokunikela ngomhlaba kuMbutho.

Iminqophiso Yamafa: Imihlaba okanye imali isenokushiyelwa iWatch Tower Society ngokwenziwa komnqophiso welifa ngokwasemthethweni.

IAccounting Office imele yaziswe yaye ifumane umbhalo wamaxwebhu afanelekileyo ngokuphathelele naliphi na kula malungiselelo. Abo banomdla kulo naliphi na kula malungiselelo acetyiweyo okunikela bamele baqhagamshelane neAccounting Office, basenokubhalela okanye batsalele umnxeba, kwidilesi engezantsi okanye kwiofisi yoMbutho enyamekela ilizwe labo.

ACCOUNTING OFFICE

Watch Tower Bible and Tract Society of Pennsylvania

Private Bag X2067, Krugersdorp, 1740,

South Africa

Inombolo Yefoni: (011) 761-1000

[Umfanekiso okwiphepha 25]

Imisebenzi yamaNgqina kaYehova ixhaswa ngeminikelo yokuzithandela