Unokulufumana Uvuyo Kwihlabathi Elidandathekisayo!

UMARIE unoncumo oluhle noluqaqambileyo. Kunzima ukukholelwa ukuba kwiminyaka nje embalwa edluleyo, eli bhinqa linama-32 eminyaka ubudala lazichaza linjengelibindekileyo. UMarie uye walixhoba lokudandatheka ngokunzulu. Uchaza esithi: “Kwakufana nelifu elikhulu elimnyama eliye lasuswa ngokuthe ngcembe phezu kwam.” Ewe, okuvuyisayo kukuba waphinda wangumntu owonwabileyo.

Nyaka ngamnye abantu abalikhulu lezigidi baye benzakala ludandatheko oluqatha! Oku kuphazamiseka asikokuguquguquka nje okudlulayo kweemvakalelo inkoliso yethu iba namava ako ngokuphindaphindiweyo. Ukudandatheka okunzulu kubandakanya ukunxunguphala okungapheliyo. Umntu odandathekileyo akabi namdla ebomini, akafumani luyolo nakweyiphi na into, ibe unemvakalelo zokungabi nathemba okanye zokungaxabiseki. Ngowe-1983 iNtlangano Yempilo Yehlabathi yachaza oku: “Ngoku sincinane isizathu sokulithandabuza elokuba izinto ezidandathekisayo ziyenzeka kuyo yonke imimandla yehlabathi.”

Abafundi beBhayibhile abalumkileyo abothuswa yile ngxelo. IBhayibhile ichaza imihla yethu ‘njengemihla yokugqibela,’ ephawulwa ‘ngamaxesha anomngcipheko.’ (2 Timoti 3:1-5) Indlela ekwakuphilwa ngayo eyayisithi kumaxesha adlulileyo inikele inkxaso ngamaxesha engcinezelo engokweemvakalelo iye yawohloka. Kwinqaku elithi “Ngaba Eli li xesha Lokudandatheka?”, uGqr. Gerald Klerman uthi ukwanda okukhoyo kokudandatheka kubangelwa yile nguqulelo. Uchaza athi: “Ezona nkqubo zintathu ziqhelekileyo zasekuhlaleni zokunikela inkxaso ibiyintsapho, icawa nabamelwane abakufuphi. . . . Kweli xesha lethu le mithombo mithathu ibinikela inkxaso ngoku iphawulwa ngokudala isiphithiphithi ukusa kwimilinganiselo eyahlukahlukeneyo.”

Yayiyingxwabangxwaba kwintsapho yakuloMarie eyamkhokelela ekubeni azive ephelelwe lithemba. UMarie ukhumbula oku: “Xa umama wam wesibini wahamba engakhuphanga nelimdaka, ndaziva ndingazi ukuba ndenze ntoni yaye ndililolo. Ndandineminyaka eli-12 ubudala, ibe ngokukhawuleza ubomi bam babonakala bungamahlandinyuka.” Kungekudala emva koko kwafuneka alishiye ikhaya kuba uyise wayemxhaphaza ngokwesini, ibe uvuma esithi: “Ndaziva ndingaphilanga kakuhle ngokwasengqondweni ibe ndilahlekelwe kuko konke ukuzithemba.” Ngaloo ndlela waqalisa ukudandatheka ngokunzulu.

Ngenye imini xa uMarie wayedandatheke ngokugqithiseleyo, kwafika amaNgqina kaYehova amabini ekhayeni lakhe. Ngokukhawuleza wabonakalisa umdla omkhulu kwisigidimi sawo seBhayibhile esibangela uvuyo. “Ngaphambili, bendibona nje ukungabaluleki kobomi nezinto ezininzi ezimbi, kodwa ngoku ndeyisekile kukuba ndinokuphila kwihlabathi elitsha apho uThixo aya kulungisa konke okungekho sikweni. Ngoncedo lukaThixo ndinokuyifanelekela loo ntsikelelo; ngaloo ndlela, ubomi bam baba nentsingiselo yokwenene.” Njengoko wayesiya kwiintlanganiso zamaNgqina, wafumana uthando olunyanisekileyo nenkxaso engokwemvakalelo. (Yohane 13:34, 35) Ukululekwa ngokunobuchule ngabadala bebandla kwamnceda ukuba aqalise ukuguqula ukucinga kwakhe okuphosakeleyo. (Yakobi 5:14) Udandatheko lwakhe lwaya lusihla ngomlinganiselo othile. Izigidi zabanye abantu, njengoMarie, ezidandathekileyo ngenxa yeemeko zehlabathi ziye zafumana “uvuyo lukaYehova” ngokufumana ulwazi oluchanileyo lwenyaniso efumaneka eBhayibhileni.—Nehemiya 8:10; 1 Timoti 2:4.

Kanti, ngaba udandatheko uMarie awayenalo lwaphela ngoko nangoko? Ngaba sifanele sicinge ukuba amaKristu awanakudandatheka? Ukuphendula le mibuzo, sifanele siqwalasele ngokungakumbi oku kuphazamiseka ndawonye noonobangela bako. Ukwazi oonobangela bokwenene bodandatheko kunokwenza ukuba uphumelele ngakumbi ekuqhubaneni nalo okanye ekuncedeni omnye oye wafunyanwa lulo.

Oonobangela Abayintloko Bokudandatheka Okunzulu

Kwezinye iimeko ukudandatheka kunoonobangela abangokwasemzimbeni, njengesifo esithile, ukungondleki neengxaki zokutyekeza kwamadlala. Kwakhona kusenokuba kukungamkelwa kwetyhefu ethile ngumzimba wakho, amayeza athile nezinto ezithile ezalana nempilo yakho.a Phofu ke, iBhayibhile ityhila ukuba ‘ubuninzi beengcinga-ngcinga zomntu’ zisekwanokuba ngunobangela.—INdumiso 94:19.

Inkoliso yabantu abaye badandatheka, njengoMarie, iye yahlangabezana namava abuhlungu nangonwabisiyo okanye iimeko ezicinezelayo. Abaninzi bavakalelwa njengomdumisi owathi: “Ngokuba umphefumlo wam uhluthi zizinto ezimbi . . . Zindizungulezile kwaphela. Umsusile [Yehova] kum ondithandayo nonguwethu; abo ndazana nabo babubumnyama.” (INdumiso 88:3, 17, 18) Ngoko njengomdumisi, bavakalelwa kukuba boyisiwe ziingxaki okanye babugqala ubomi babo ngokuqhelekileyo njengobunganiki themba. Basenokuvakalelwa kukuba babodwa kwindawo emnyama nokuba kwanoThixo uye wabalahla.

Kutheni befikelela kwisigqibo esidimaza ngolu hlobo, ngenxa yoko beziva bedakumbile? Akungenxa nje yeengxaki zabo zobuqu; kukwangenxa yeemvakalelo ezibuhlungu okanye ukuzisizela kwabo. Baziva bengakufanelekelanga ukujamelana neengxaki okanye nelahleko ethile. IMizekeliso 15:13 icacisa oku: “Ekubulalekeni kwentliziyo umoya uthi dakumba.” Ukubulaleka okunjalo kwentliziyo kusenokongezelela kwimvakalelo yokuba ubani azibone engongaphumeleliyo okanye acinge ukuba nabanye bacinga njalo. KwanomKristu wenkulungwane yokuqala uEpafrodito, emva kokuchacha kwisigulo esinzulu ebudeni bobuvangeli bakhe obabulungiselelwe libandla awayekulo, ‘wadandatheka ngenxa yokuba [ibandla] levayo ukuba wayesifa.’—Filipi 2:25-30.

Ekubeni ‘umoya odakumbileyo womisa amathambo,’ okanye umenza ubani azijongele phantsi, ukuziva ungaxabisekanga kusoloko kungunobangela onzulu wodandatheko. (IMizekeliso 17:22) Ukuba buhlungu kwentliziyo kusenokubangelwa kukucinga indlela abanye abantu abasijonga ngayo, ukufuna ukuba ngabagqibeleleyo, umsindo ongalawulekiyo, intiyo, iingxaki ezingaconjululwayo nabanye, okanye imvakalelo yokuba netyala (elokwenene okanye elibaxiweyo).

Ngoko baninzi oonobangela bokudandatheka okunzulu. Kanti, uMarie wafumana uvuyo lokwenene emva kokuba ngumKristu. Wathi: “Ngoku ndinalo ithemba.” Kodwa sekunjalo kwafuneka enyamezele udandatheko kangangexesha elithile. Abantu abanjalo banokuloyisa njani ekugqibeleni?

[Umbhalo osemazantsi]