Ukuphumelela Umlo Nxamnye Nodandatheko

ULOLA wavuma wathi: “Eyona nto inzima gqitha ekwafuneka ndijamelane nayo yimvakalelo yokuba netyala lokuziva ndingento yanto ekubeni, njengomnye wabakhonzi bakaYehova ndandicinga ukuba ndandifanele ndingavakalelwa ngaloo ndlela.” Oku kungaziqondi kuqhelekileyo kusoloko kulutshaba lokuqala umKristu odandathekileyo amele aloyise. ULola wongezelela esithi: “Xa ndingaziqobi ngokwasengqondweni ngendlela endivakalelwa ngayo ndize ndizixhalabise ngokuba kwimeko entle, ndijamelana bhetele nodandatheko.” Ewe, udandatheko ngokunokwalo alusosizathu sokukwenza ucinge ukuba wone uThixo.

Njengokuba kukhankanywe kwinqaku elandulelayo, unobangela wodandatheko usenokuba ungowasengqondweni. Ngowe-1915, kuse lixesha elide ngaphambi kokwenziwa kohlolisiso lwakutshanje olunxulumanisa izigulo ezininzi ezingokwasemzimbeni nodandatheko, IMboniselo (yesiNgesi) yathi: “Lo mvandedwa, okanye imvakalelo yokuba lilolo nokudandatheka, iqhelekile maxa wambi kulo lonke uluntu . . . Ngokomlinganiselo othile ubukhulu becala ibangelwa ziimeko zokugula ngokwasemzimbeni.” Ngaloo ndlela, ukuba imvakalelo yokudandatheka iyazingisa kuwe, ukuhlolisiswa ngugqirha kusenokuba luncedo. Ukuba imeko iba qatha, ubani usenokufuna oku kuphazamiseka kunyangwe yingcali esebenzana nodandatheko.a

Kodwa kwanaxa unobangela ungengowasemzimbeni, kuyinto engeyoyamvelo ukulindela ukuba omnye wabakhonzi bakaThixo akanakuze abe buhlungu okanye adandatheke. Qwalasela nje indlela uHana onyanisekileyo ‘awaba nomphefumlo okrakra ngayo waza walila kabuhlungu.’ (1 Samuweli 1:7, 10) NoNehemiya ‘wenza isijwili waza wazila iintsuku’ ibe ‘wayenobubi bentliziyo.’ (Nehemiya 1:4; 2:2) UYobhi wakucaphukela ukuphila waza wavakalelwa kukuba uThixo wayemlahlile. (Yobhi 10:1; 29:2, 4, 5) UKumkani uDavide wathi umoya wakhe wawutyhafile yaye intliziyo yakhe yayenzakala. (INdumiso 143:4) Ibe umpostile uPawulos wathetha ‘ngokuba noloyiko ngaphakathi’ ‘nokuthobeka’ okanye ‘ukukhahlelelwa phantsi’ ngokweemvakalelo.—2 Korinte 4:9; 7:5, 6.

Nangona bonke aba babengabakhonzi bakaThixo abanyanisekileyo, iinkxwaleko ezahlukahlukeneyo, amaxhala, okanye ukudana ngokulusizi, ezo zinto ziye ngalo lonke ixesha zabangela ukuba babe buhlungu. Kanti, uThixo akazange abashiye okanye awususe kubo umoya wakhe oyingcwele. Ukudandatheka kwabo kwakungabangelwa kukusilela ngokomoya. Ngesinye isihlandlo xa uDavide wayebandezelekile, emthandazweni wacela oku: “Wuvuyise umphefumlo womkhonzi wakho.” Ebudeni ‘bemini yokubandezeleka kwakhe’ uThixo wamthuthuzela uDavide waza ngexesha elifanelekileyo wamnceda, ukuze achwayite. (INdumiso 86:1, 4, 7) Ngokukwanjalo uYehova uya kubanceda abakhonzi bakhe namhlanje.

Ekubeni ukudandatheka ngokwako kungebobungqina bokuba usilele ngokomoya okanye kungabonakalisi ukungaphaphi kakuhle ngokwasengqondweni, umKristu odandathekileyo akafanelanga athi cwaka ngenxa yemvakalelo yokuphoxeka. Endaweni yoko, ufanele athabathe elona nyathelo libalulekileyo ekulweni noku kuphazamiseka. Liliphi elo nyathelo?

Zivakalise Iimvakalelo Zakho

Ufanele athethe komnye ngako oku. IMizekeliso 12:25 ithi: “Isithukuthezi esisentliziyweni yendoda siyenza igobe; liyayivuyisa ilizwi elihle.” Akakho omnye umntu onokukwazi ukuxhalaba okukhulu okusentliziyweni yakho ngaphandle kokuba uthethe ngako. Ngokuxelela umntu onovelwano onokukunceda, mhlawumbi uya kufunda ukuba abanye baye baneemvakalelo neengxaki ezifanayo. Kwakhona, ukuxelela uthile ngeemvakalelo zakho kudambisa intlungu, kuba kubangela intliziyo ibonakalise oko kubangela intlungu kunokuba kuyigcine ngaphakathi. Ngoko ke, abo badandathekileyo bafanele bathethe ngezo zinto zingamahlebo kumaqabane abo omtshato, umzali, okanye umhlobo onovelwano nofanelekileyo ngokomoya.—Galati 6:1.

Inxalenye yengxaki kaMarie (okhankanywe kwinqaku elandulelayo) yayikukuba wazigcina ngaphakathi kuye iimvakalelo ezenzakalisayo ezamkhokelela ekudandathekeni. Wathi: “Kwiminyaka edluleyo, ndandizenza ngathi ndonwabile. Abanye babengenakuze bacinge ukuba ndandinengxaki enjalo yokuhlangabezana neemvakalelo zokuziva ndingento.” Kodwa uMarie wazityanda igila kumdala othile ebandleni. Ngemibuzo yobulumko umdala ‘warhola’ entliziyweni yakhe ixhala awayenalo waza wamnceda ukuze aziqonde bhetele. (IMizekeliso 20:5) Amazwi alo mzalwana alungileyo avela eZibhalweni amthuthuzela. UMarie wacacisa esithi: “Okwesihlandlo sokuqala, ndaqala ukufumana uncedo ukuze ndihlangabezane neemvakalelo ezithile ezafaka isandla kudandatheko endandinalo.”

Ngoko ukuthetha nomdala oqondayo kusenokunikela ‘amanzi’ ahlaziyayo okomoya kulowo ‘unomphefumlo onjengelizwe elibharhileyo.’ (Isaya 32:1, 2; INdumiso 143:6) Umcebisi onobulumko obungokomoya usenokukunceda uze ubone indlela onokuthabatha ngayo amanyathelo asebenzisekayo ukuze ujamelane noko ubukuphawula njengemeko enganik’ ithemba kwaphela. (IMizekeliso 24:6) Kodwa kufuneka okungakumbi kunokuxelela nje omnye umntu iinzulu zakho.

Ziqonde Ukuba Uxabiseke Ngokwenene

Iimvakalelo zokuziva ungaxabisekanga zingunobangela omkhulu wodandatheko. Mhlawumbi ngenxa yokungonwabi kwasebuntwaneni, wambi amaKristu azicingela engemntu. Kodwa nangona ukuziphatha okubi ngokwasemzimbeni, ngokweemvakalelo, okanye ngokwesini kwixa elidluleyo kuye kwashiya iziva ezingokweemvakalelo, kodwa oko akwenzi nguqulelo kuwe njengomntu. Ngaloo ndlela, umele ulwele ukuba nembono elungeleleneyo ngendlela oxabiseke ngayo ngokwenene njengomntu. Umpostile uPawulos wabongoza ngelithi: “Mabangazicingeli ngaphezu koko bamele ukuzicingela ngako; mabazicingele ingcinga ephilileyo.” (Roma 12:3) Ngoxa uzilumkela nxamnye nekratshi, ufanele uzame ukuba ungafikeleli kwamanye amanqanaba agabadeleyo. Abo banolwalamano noThixo bahle, bayanqweneleka kuye, kuba uzinyulela abantu ukuba, babe “yinqobo, kuye.” Elinjani lona ukuzuka ilungelo!—Malaki 3:17; Hagayi 2:7.

Kwakhona, hayi indlela ekulilungelo ngayo ukuba ‘ngumsebenzisi kaThixo’ ngokubandakanyeka kumsebenzi wamaKristu wokwenza abafundi. (1 Korinte 3:9; Mateyu 28:19, 20) AmaKristu amaninzi adandathekileyo aye afumanisa ukuba lo msebenzi wakha uxabiso lobuqu. UMarie wavuma: “Kwanasemva kokuba ngumKristu, ndaziva ndingafanelekanga kwaphela.” Sekunjalo, waqhubeka nomsebenzi wokushumayela, ibe ngenye imini wadibana nenenekazi eliselula elaligula ngengqondo nelalifuna ukufundiswa iBhayibhile. UMarie wathi: “Wayefuna ubani owayeya kuba nomonde kuye, ekubeni wayetsala nzima ekufundeni.” Ekubeni kwakufuneka ndinikele ingqalelo enkulu kuye, ndalibala ngam nokungapheleli kwam. Wayefuna uncedo lwam ibe ndaqonda ukuba ndandinokulunikela ngamandla kaYehova. Ukumbona ebhaptizwa kwandikhuthaza ngendlela emangalisayo. Ndaya ndizixabisa nanjengomntu, ibe ukudandatheka okunzulu kwaphela kude kube namhlanje.” Hayi indlela okuyinyaniso ngayo ukuba “oseza ahluthise abanye, uyasezwa ahluthe naye”!—IMizekeliso 11:25.

Sekunjalo, abantu abaninzi abadandathekileyo basabela njengelinye ibhinqa elingumKristu elalidandatheke ngokunzulu, elavuma lathi: “Nangona ndisebenza nzima ukucoca nokupheka nokwamkela iindwendwe, ndijika ndingcungcutheke ndibe yiloo nto ndisakubona iimpazamo ezincinane endizenzayo.” Ukufumana iimpazamo ezingekho ngqiqweni ngolo hlobo kukubangela ukungazixabisi okukhulu. Khumbula ukuba uThixo wethu uyaqonda ibe ‘akenzi kuthi ngokwezono zethu.’ (INdumiso 103:8-10, 14) Ukuba uYehova, ochukumiseka nzulu kokulungileyo kunokuba sinjalo thina, akabambi sixhiba ngayo nayiphi na impazamo encinane esiyenzayo yaye ekulungele ukubonisa ukuxolela, ngaba asifanele thina sizimisele ukumxelisa ekuqhubaneni kwethu neziqu zethu?

Sonke sineziphoso neentsilelo. Kanti, sikwanamandla. Umpostile uPawulos wayengalindelanga ingqibelelo kuyo yonke imizamo yakhe. Wathi: “Nakuba ke ndiliyilo ngentetho, andinjalo ngokwazi.” UPawulos akazange azive engento ngenxa nje yokuba wayesenokungagqwesi njengesithethi sasesidlangalaleni. (2 Korinte 11:6) Ngokukwanjalo, abo badandathekileyo bafanele banikel’ ingqalelo kwizinto abazenza kakuhle.

“Bunabathozamileyo ubulumko,” okanye bunabo baziqondayo baze baqonde ukuba bangabantu abasikelwe umda. (IMizekeliso 11:2) Ngamnye wethu ungumphefumlo owahlukileyo oneemeko ezahlukileyo, amandla angokwasemzimbeni nobuchule. Njengokuba ukhonza uYehova ngomphefumlo uphela, usenza oko unokukwenza, yena uyakholiswa koko. (Marko 12:30-33) UThixo akanguye lowo unganelisekiyo yimigudu yabakhonzi bakhe abazinikeleyo. ULeora, umKristu owalwa nodandatheko lwakhe ngokunempumelelo, wathi: “Andenzi kakuhle njengaye wonke ubani kwizinto ezithile, njengokuqalisa incoko entsimini. Kodwa ndiyazama. Ndenza okusemandleni am.”

Ukusingatha Iimvakalelo Zokwenza Iimpazamo Nokungaqondani

Ngoko, kuthekani ukuba wenze impazamo enzulu? Mhlawumbi usenokuvakalelwa njengoKumkani uDavide, ‘owayehambahamba imini yonke ngezimnyama zokuzila’ ngenxa yeempazamo zakhe, okanye isono awayesenzile. Kodwa le mvakalelo isenokungqina ukuba akugabadelanga waza wenza isono esingaxolelekiyo! (INdumiso 38:3-6, 8) Ukuba neemvakalelo zetyala kusenokubonisa ukuba ubani lowo wonileyo unentliziyo enyanisekileyo nesazela esilungileyo. Ngoko kunokuqhutywana njani naloo mvakalelo? Kambe ke, ngaba uye wathandazela ukuxolelwa nguYehova waza wathabatha amanyathelo okukulungisa oko kubi? (2 Korinte 7:9-11) Ukuba kunjalo, yiba nokholo kwinceba yaLowo uxolela ngokukhulu, ngoxa uzimisele ukungasiphindi eso sono. (Isaya 55:7) Ukuba uye waqeqeshwa, ‘musa ukutyhafa wakohlwaywa, kuba lowo amthandayo uYehova uyamqeqesha.’ (Hebhere 12:5, 6) Ukulungiswa okunjalo kunenjongo yokunceda ukubuyisela imvu elahlekayo. Akususi kuye ukuxabiseka kwakhe njengomntu.

Kwanaxa intliziyo yethu isigweba, asifanele sigqibe ngelokuba uYehova usilahlile. “Siya kuzileleza iintliziyo zethu phambi kwakhe, ngokuba ukuba intliziyo iyasigweba, uThixo mkhulu kunentliziyo yethu, ezazi izinto zonke.” (1 Yohane 3:19, 20) UYehova ubona ngaphaya kwezono neziphoso zethu. Wazi neemeko ezinciphisa ubutyala ngokuzithethelela, ikhondo lobomi bethu bonke, iintshukumisa neenjongo zethu. Ulwazi lwakhe oluphangeleleyo lumenze ukuba akwazi ukuyiphulaphula ngokunovelwano imithandazo yethu enyanisekileyo yokufuna ukuxolelwa, njengokuba wayivayo ekaDavide.

Ukungaqondani nabanye nokufuna ngamandla ukunconywa ngabo kukwafaka isandla ekubeni ngoziva ungaxabisekanga, mhlawumbi ude ufikelele nakwinqanaba lokuba uzive ulahliwe. Ngenxa yokungafezeki, umKristu onguwenu usenokuthetha kuwe ngendlela ebonakala ingekho ngqiqweni okanye yokungabonakalisi thando. Sekunjalo, ukungaqondani okuninzi kunokupheliswa ngokuxelela loo mntu indlela oye wavakalelwa ngayo yintetho yakhe. (Thelekisa uMateyu 5:23, 24.) Kwakhona, uSolomon wacebisa oku: “Musa ukuyinikela intliziyo yakho kumazwi onke athethwayo.” Ngoba? “Ngokuba intliziyo yakho nayo iyazi izihlandlo ezininzi, ukuba uyabatshabhisa abanye.” (INtshumayeli 7:21, 22) Musa ukucinga ukuba ufezekile kwiinkqubano zakho nabanye abantu abangafezekanga. Yiba ngokhawulezayo ukuxolela uze ubanyamezele abanye.—Kolose 3:13.

Okungakumbi, ngokuyintloko ukuxabiseka kwakho akulinganiswa ngokuba uyathandwa okanye awuthandwa kusini na ngabanye. UKristu ‘wadelwa . . . akabekwa,’ ibe ‘wamiselwa ixabiso elingengangani’ umlinganiselo nje ophantsi. (Isaya 53:3; Zekariya 11:13) Ngaba oku kwatshintsha ukuxabiseka kwakhe kokwenene njengomntu okanye indlela uThixo awayemjonga ngayo? Akunjalo, kuba nokuba besifezekile, njengoYesu, besingenakukholisa wonke ubani.

Amandla Okunyamezela

Maxa wambi, usenokuqhubeka udandatheka ngokunzulu phezu kwayo nje imizamo yokukoyisa. Intlungu engokweemvakalelo isenokubangela amanye amaKristu avakalelwe njengokuba wenzayo uYona xa wathi: “Kuba ukufa kum kulungile kunokuba ndidle ubomi.” (Yona 4:1-3) Kanti, intlungu yakhe ayizange ihlale ixesha elide. Wayoyisa. Ngoko ukuba ukudandatheka kwenza ukuba ubone ubomi bunzima, khumbula ukuba kufana nembandezelo awathi uPawulos ‘yeyokwexeshana.’ (2 Korinte 4:8, 9, 16-18) Iya kufikelela esiphelweni! Akukho meko ingancedakaliyo. UYehova uthembisa “ngokuhlaziya intliziyo yabo basentlungwini.”—Isaya 57:15, Lamsa.

Ungaze uyeke ukuthandaza, kwanokuba imithandazo yakho ibonakala ingaphendulwa. UDavide wabongoza: “Kuve, Thixo, ukuhlahlamba kwam; . . . ekutyhafeni kwentliziyo yam; ndikhaphele eweni elisemalengalengeni kum.” (INdumiso 61:1, 2) UThixo usikhokelela njani kumoya wentembelo yangaphakathi ebonakala ingenakufikeleleka ngamandla ethu? UEileen, obesilwa nokudandatheka kangangeminyaka, uyaphendula: “UYehova akazange andivumele ukuba ndinikezele. Oku kundinika ithemba lokuba ukuba ndiqhubeka ndizama, uya kuqhubeka endinceda. Ukwazi inyaniso efumaneka eBhayibhileni kuye kwandigcina ndiphaphamile ngokoqobo. Ngeendlela ezahlukahlukeneyo ezininzi—ngomthandazo, ngobulungiseleli, ngeentlanganiso, ngeempapasho, ngentsapho, nangezihlobo—uYehova uye wandinceda wandinika amandla ukuze ndiqhubeka ndizama.”

Ukuphazamiseka kujonge njengovavanyo lokholo lwakho. Umpostile uPawulos uyasiqinisekisa: “Uthembekile uThixo, ongayi kuvumela ukuba nilingwe ngaphezu kweninako; owothi, kunye nesilingo eso, avelise ithuba lokuphuma kuso; ukuba nibe nako ukusithwala.” (1 Korinte 10:13) Ewe, uThixo uya kukunika “incamisa yamandla” ukuze uthwale nabuphi na ubunzima obungokweemvakalelo.—2 Korinte 4:7.

Ihlabathi Elitsha Ekungasayi Kubakho Kulo Udandatheko!

NgoBukumkani bakhe basezulwini, uThixo wathembisa ukuba uza kushenxisa ngokukhawuleza zonke iimeko ezidandathekisayo kumhlaba wethu. ILizwi lakhe liyavakalisa: “Ndidala amazulu amatsha nehlabathi elitsha; angakhunjulwa awokuqala, angenyuki athi qatha entliziyweni. Hayi, yibani nemihlali, nigcobe nanini yiloo nto ndiyidalayo; ngokuba, yabonani, ndiyayidala iYerusalem ukuba igcobe, nabantu bayo ukuba babe nemihlali.” (Isaya 65:17, 18) La mazwi azaliseka okokuqala emva phayaa ngowama-537 B.C.E., ngexesha laxa uhlanga lwamandulo lukaSirayeli labuyiselwa kwilizwe lalo. Ngoko abantu bakhe bacula: “Saba njengabaphuphayo; waza wazala kukuhleka umlomo wethu, lwazala kukumemelela ulwimi lwethu.” (INdumiso 126:1, 2) Hayi indlela ekuya kuba kokuzuke ngakumbi ukuzalisekiswa kokugqibela kwesi siprofeto sifudumeza intliziyo sikaThixo sehlabathi elitsha esiza kuzalisekiswa ngokhawuleza!—2 Petros 3:13; ISityhilelo 21:1-4.

Phantsi koBukumkani bukaThixo (‘amazulu amatsha’), ibutho labantu abangamalungisa emhlabeni (‘ihlabathi elitsha’) liya kubuyiselwa kwimeko efezekileyo engokwemvakalelo, engokwasemzimbeni, nephilileyo ngokomoya. Oku akuthethi ukuba abo abayi kukhumbula okudlulileyo, kodwa ngenxa yezinto ezintle abaya kube becinga ngazo neziya kube zibonwabisa, akuyi kubakho sizathu sokuba bacinge ngenzinto ezidluleyo. Khawuthelekelele, ukuvuka ntsasa nganye unengqondo epholileyo, ekulungeleyo ukusebenza imini yonke—ungasakhathazwa yimeko yokudandatheka!

Eyiseke ngokupheleleyo ngobunyaniso beli themba, uLola (okhankanywe ekuqaleni), wathi: “Ukukhumbula ukuba uBukumkani bukaYehova buya kuyilungisa le ngxaki kwaba yeyona nto yandincedayo. Ndandisazi ukuba udandatheko aluyonto kanaphakade.” Ewe, unokuqiniseka ukuba uThixo ngokukhawuleza uya kwenza kube nokwenzeka ukoyisa udandatheko ngokupheleleyo!

[Umbhalo osemazantsi]