Ukunyaniseka Kunomvuzo
UKUNYANISEKA kukhuthazwa gqitha eBhayibhileni yaye kuyimfuneko kumaKristu okwenyaniso. (Mateyu 22:39; 2 Korinte 8:21) Ngaphezu koko, ukunyaniseka kunomvuzo, njengoko kuboniswa kwindlela abaphila ngayo abaninzi namhlanje abo bangqondo neentliziyo zabo ziye zaguqulwa lulwazi oluchanileyo lweBhayibhile. Umzekelo woku ngulowo uvela eLiberia.
Emva kokukuqwalasela ngokunzulu oku ngomthandazo, umdala ongumKristu nomfazi wakhe bayivala ivenkile yabo yokusika impahla. Kwakutheni? Kuba yayisidla ixesha labo elininzi yaye ibathintela emsebenzini wabo wobulungiseleli nowofundisiso lobuqu. Bavumelana ukuba bayakwaneliswa ngumvuzo omncinane ababeya kuwuzuza ngokuthengisa idayi yamalaphu. Noko ke, zisuka nje emva kokuthabatha kwabo eli nyathelo, amaxabiso edayi ehla kwiivenkile zasekuhlaleli. Ngoku ingeniso yabo yayingayi kukwazi ukuxhasa intsapho. Babeza kuthini?
Bacela umzi othengisa idayi ukuba uhlise amaxabiso awo, ngaloo ndlela ubavumela ukuba bazuze umlinganiselo omhle wengeniso. Akuzange kuvunywe oku. Noko ke, lo mzi-mveliso wabathembisa ukubathumelela ii-invoyisi ezimbini, enye ebonakalisa elona xabiso lililo nenye ebonakalisa ixabiso elithotyiweyo ababenokuyithumela kuMagosa Erhafu ukuze bahlawule irhafu encinane. Oku kwakuya kubangela ukuba umdala afumane ingeniso engekho ngokwasemthethweni ezii-R5 200 ngesixa asithengisileyo.
Lo mzalwana wakwala ukuba yinxalenye yoshishino lokunganyaniseki nolwaluza kuqhatha urhulumente. Amagosa alo mzi-mveliso othuka. Abhala: “Siyasihlonela isazela sakho,” yaye anyula lo mdala ukuba abe ngummeli ophambili wemveliso yawo eLiberia. Ekubeni ngoku iintswelo zentsapho ezingokwenyama zazinyanyekelwa ngendlela efanelekileyo, lo mdala nomfazi wakhe baye bakwazi ukuba ngoovulindlela babancedani besebenza ngokusondeleyo nabazalwana ekomelezeni ibandla. Enyanisweni, ukuthembeka kwabo kwangqineka kuyintsikelelo kubo.
UAlfonso, eSpeyin, naye wafumanisa ukuba ukunyaniseka kunomvuzo. Lo mfana walishiya ikhaya lakhe eneminyaka eli-12 ubudala, yaye kungekudala waqalisa ukuthengisa iziyobisi, ndawonye nokuba iinqwelo-mafutha, ukuqhekeza izindlu neevenkile. Maxa wambi wayeqhekeza iivenkile ezilishumi ngosuku. Xa wayeneminyaka engama-21 ubudala, oogxa bakhe abane bambetha kanobom, bambela zonke iziyobisi zakhe, baza bamsongela ngokumbulala ukuba wayenokubaxela emapoliseni. Ekubeni wayesaziwa ngamapolisa, wayesoyika nokuya esibhedlele ukuze afumane unyango.
Ngoxa wayechacha ngokuthe ngcembe kumanxeba akhe, uAlfonso wacingisisa nzulu ngendlela yakhe yobomi. Wakhumbula izinto ezithile eziseBhayibhileni nemigaqo engokobuKristu awayeyixelelwe ngunina esengumntwana. Ngoko, akazange awaphulaphule amazwi akhe, kodwa ngoku wacela ukuqhutyelwa isifundo seBhayibhile ngamaNgqina kaYehova. Kwiinyanga ezintandathu wayesele esiguqule ngokupheleleyo isimo sakhe nobuntu bakhe yaye efanelekele ubhaptizo.
Noko ke, kusuku olungaphambi kokubhaptizwa kwakhe, wafumana isigidimi sokuba avele phambi kwenkundla ngesityholo sokuphanga enezixhobo. Esi yayisisenzo solwaphulo-mthetho awayesenze kwixesha elithile elidluleyo. Sekunjalo, ngokuphandle uAlfonso waluvuma olu lwaphulo-mthetho yaye wavalelwa elindele ukuvavanywa kwetyala lakhe. Igqwetha lakhe elaliza kumthethelela lambongoza ukuba athi akazange abe nto yaye akazange abe nawo umpu. Kodwa uAlfonso wagxininisa ukuba uya kuthetha inyaniso. Ngenxa yeli tyala nengxelo embi awayenayo emapoliseni, umlomo wenkundla wamwisela isigwebo seminyaka eli-13. Kodwa ngenxa yesimilo sakhe esihle nesimo sengqondo sokunyaniseka, wagwetywa iinyanga ezintandathu, ixesha awayesele eligqibile ngoxa wayelindela ukuvavanywa kwetyala lakhe.
Ngoku uAlfonso nomfazi wakhe bakhonza uYehova ngokuthembeka, bayakuvuyela ukufumana injongo eyiyo ebomini yaye nokungqinwa ngamava abo ukuba ukunyaniseka kunomvuzo.