Abavakalisi BoBukumkani Bayabalisa
Ukunyaniseka Kuhambisela Phambili Ubulungiseleli Bethu
UKUNYANISEKA kuyimfuneko esisiseko kumaKristu. KumaHebhere 13:8 (NW) umpostile uPawulos wabhala oku: “Sikholosekile kukuthi sinesazela esinyanisekileyo, singa ezintweni zonke singahamba ngokunyaniseka.” Ukuhlala sinyanisekile ‘kuvathisa imfundiso yoMsindisi wethu uThixo ezintweni zonke.’ (Tito 2:10) Ukunyaniseka, nokushumayela ngoBukumkani, kwamaKristu amabini kubukumkani besiqithi iTonga esikuMzantsi Pasifiki kunikela ubungqina obunamandla. Iofisi yesebe yeWatch Tower Society kwiNtshona Samoa ibalisa oku:
“Kangangeminyaka emininzi isibini esingamaNgqina sasithetha ngoBukumkani bukaThixo ebantwini kwiidolophana ezine zesiqithi saso kodwa kwakungekho miphumo ibonakalayo. Kwaza, ngoxa indoda yakhe yayigula, umfazi kwafuneka anyamekele amasimi abo ecopra (iinqoba ezomileyo zekoko ekuthi kukhutshwe kuzo ioli yokwenza isepha nezinye izinto), ekuphela kwento eyayibangenisela imali. Xa kwafika ixesha lokuba icopra ihlolwe ngabathengi, ingxowa yomnye umntu yadibana neengxowa zakhe ezintlanu. Abahlali balapho bamcenga ukuba ayigcine loo ngxowa aze ayigqale njengentsikelelo evela kuThixo. Noko ke, lo dade walandula yaye, kwanaxa wayehlawulwa imali yeengxowa ezintandathu, wamkela kuphela leyo awayefanele ayifumane. Ukunyaniseka kwakhe kwaphawulwa.
“Kamva, xa indoda yakhe yayiza kuthabatha uhambo lokuya kwesinye isiqithi, unovenkile wayicela ukuba imthengele ezinye izinto. INgqina lenza njengoko laliceliwe laza labuyisela imali eseleyo kuloo ndoda. Le ndoda yamangaliswa. Yathi yayisisihlandlo sokuqala ukuba kubekho umntu oyibuyiselayo imali eseleyo. Abanye awayebacela bamthengele izinto babengayibuyisi imali eseleyo. Ngesinye isihlandlo, xa eli Ngqina lalifuna nto ithile kwivenkile yale ndoda, le ndoda yalinika isitshixo sevenkile, iliyalela ukuba lithabathe loo nto liyifunayo lize lishiye imali evenkileni. Abanye ababekho babuza ukuba kwakutheni unovenkile enika iNgqina isitshixo engakwenzi oko kubo. Unovenkile wachaza ukuba elo Ngqina lalikuphela komntu owayenokumthemba kulo dolophana.
“Ihambo entle yesi sibini kuncokolwa ngayo ngabemi balapho. AmaNgqina, ayaziwa ngokunyaniseka kwawo, ukungathabathi cala kwawo kwezobupolitika nangokunikela ubungqina kwawo ngoBukumkani bukaThixo, nto leyo ebonisa umahluko phakathi kweenkolelo zabemi neemfundiso zeBhayibhile. Ngoku xa kuphakama imibuzo enokuthanani neBhayibhile, abantu ngokufuthi baya kumaNgqina ukuze bafumane iimpendulo. Le ndoda ikhe yavuswa nasebusuku, yaya kwintlanganiso yabemi, ukuze iphendule imibuzo yeBhayibhile. Xa isiya kwimingcwabo ekule dolophana, ngokufuthi iyacelwa ukuba ichaze oko iBhayibhile ikutshoyo ngokufa, yaye amagqabaza ayo ayamkelwa.”
Ngoko ukunyaniseka kwesi sibini esingamaNgqina nokushumayela kwaso ngoBukumkani kunikela ubungqina obuhle kwesi siqithi sithandekayo soMzantsi Pasifiki. Sinethemba lokuba abanye baya kufundisisa iBhayibhile baze bayimele inyaniso. Ukuba benjenjalo, ngokuqinisekileyo uYehova uThixo uya kubasikelela.—Yohane 8:32.