“Ofundayo Makasebenzise Ukuqonda”
“Xa nibona into elizothe ebangela isiphanziso . . . imi kwindawo engcwele, . . . mabandule abo bakwelakwaYuda baqalise ukusabela ezintabeni.”—MATEYU 24:15, 16.
1. Saba nawuphi umphumo isilumkiso esanikelwa nguYesu esikuLuka 19:43, 44?
XA SILUNYUKISIWE ngentlekele ezayo sinokukwazi ukuyiphepha. (IMizekeliso 22:3) Ngoko khawube nombono nje wemeko yamaKristu aseYerusalem emva kohlaselo lwamaRoma ngowama-66 C.E. UYesu wayelumkisile esithi eso sixeko sasiza kungqingwa size sitshatyalaliswe. (Luka 19:43, 44) Inkoliso yamaYuda ayizange isinanze isilumkiso sakhe. Kodwa abafundi bakhe basithobela. Ngenxa yoko, basindiswa kwintlekele yowama-70 C.E.
2, 3. Kutheni sifanele sibe nomdla kwisiprofeto sikaYesu esikuMateyu 24:15-21?
2 Kwisiprofeto esisichaphazelayo nathi namhlanje, uYesu wabala izinto ezaziyila umqondiso ezaziquka iimfazwe, ukunqongophala kokutya, iinyikima zomhlaba, iindyikitya zokufa kunye nokutshutshiswa kwamaKristu ashumayela ngoBukumkani bukaThixo. (Mateyu 24:4-14; Luka 21:10-19) Kwakhona uYesu washiya umzila owawuza kunceda abafundi bakhe bazi ukuba isiphelo sasisemnyango—‘into elizothe ebangela isiphanziso emi kwindawo engcwele.’ (Mateyu 24:15) Makhe siphinde siwahlolisise loo mazwi anentsingiselo ukuze sibone indlela anokubuchaphazela ngayo ubomi bethu ngoku nakwixesha elizayo.
3 Emva kokuchaza umqondiso, uYesu wathi: “Xa nibona into elizothe ebangela isiphanziso, njengoko kwathethwa ngayo ngomprofeti uDaniyeli, imi kwindawo engcwele, (ofundayo makaqiqe,) mabandule abo bakwelakwaYuda basabele ezintabeni. Umntu ophezu kwendlu makangehli aye kuthabatha iimpahla endlwini yakhe; umntu osentsimini makangabuyeli endlwini aye kuthabatha isambatho sakhe sangaphezulu. Yeha abafazi abamithiyo nabanyisa iintsana ngaloo mihla! Hlalani nithandazela ukuba intsabo yenu ingabi sebusika, okanye ngomhla wesabatha; kuba ngelo xesha kuya kubakho imbandezelo enkulu ekungazange kubekho injengayo ukususela ekuqaleni kwehlabathi.”—Mateyu 24:15-21.
4. Yintoni ebonisa ukuba uMateyu 24:15 wazaliseka ngenkulungwane yokuqala?
4 Ingxelo kaMarko nekaLuka zinikela ngeenkcukacha ezongezelelekileyo. Apho uMateyu asebenzisa ibinzana elithi “imi kwindawo engcwele,” uMarko 13:14 yena uthi “imi apho ingafanele ime khona.” ULuka 21:20 wongezelela amazwi kaYesu athi: “Xa niyibona iYerusalem ingqongwe yimikhosi emise iintente, yazini ke ukuba kusondele ukuphanziswa kwayo.” Oku kusinceda sibone ukuba inzaliseko yokuqala yayibandakanya uhlaselo lwamaRoma eYerusalem nakwitempile yayo—eyayingcwele kumaYuda kodwa ingasenjalo kuYehova—olwaqalisa ngowama-66 C.E. Yaphanziswa ngokupheleleyo xa amaRoma atshabalalisa eso sixeko kunye netempile ngowama-70 C.E. Yayiyintoni “into elizothe” ngoko? Ibe ‘yema njani kwindawo engcwele’? Iimpendulo zale mibuzo ziya kusinceda siyibone kakuhle inzaliseko yale mihla.
5, 6. (a) Kutheni kwakufuneka abo babefunda uDaniyeli isahluko 9 basebenzise ukuqonda? (b) Sazaliseka njani isiprofeto sikaYesu esiphathelele “into elizothe”?
5 UYesu wabongoza abo babefunda ukuba basebenzise ukuqonda. Babefunda ntoni kanene? Kusenokwenzeka ukuba yayiyincwadi kaDaniyeli isahluko 9. Kuloo ncwadi sifumana isiprofeto esibonisa ixesha uMesiya awayeza kubonakala ngalo yaye sixela kwangaphambili ukuba wayeza “kunqunyulwa” emva kweminyaka emithathu enesiqingatha. Esi siprofeto sithi: “Kumaphiko ezinto ezinezothe kuza kube kuhleli lowo uphanzisayo; yaye kuya kuzaliseka oko kugqitywe kuko ngalowo uphanzileyo de kufike intshabalalo.”—Daniyeli 9:26, 27, NW; bona noDaniyeli 11:31; 12:11.
6 AmaYuda ayecinga ukuba oku kwakubhekisela ekuhlanjelweni kwetempile nguAntiochus IV malunga neminyaka engama-200 ngaphambilana. Noko ke, uYesu wabonisa ukuba kwakungenjalo, esithi makusetyenziswe ukuqonda kuba “into elizothe” yayiseza kubonakala ize ime “endaweni engcwele.” Kuyabonakala ukuba uYesu wayebhekisela kwimikhosi yamaRoma eyayiza kufika ngowama-66 C.E. iphethe iimbasa ezaziyenza yahluke. Ezo bhanile, ekwakukudala zisetyenziswa, zazizizithixo ezithile yaye zazinezothe kumaYuda.a Noko ke, yayiza kuma nini ‘kwindawo engcwele’? Oko kwenzeka xa imikhosi yamaRoma, eyayiphethe iimbasa zayo, yahlasela iYerusalem netempile yayo eyayingcwele emehlweni amaYuda. AmaRoma ade aqalisa ukudiliza udonga lwentendelezo yetempile. Ngokwenene, laa nto ekwakukudala ilizothe ngoku yayimi kanye kwindawo engcwele!—Isaya 52:1; Mateyu 4:5; 27:53; IZenzo 6:13.
“Into Elizothe” Yale Mihla
7. Sisiphi isiprofeto sikaYesu esizaliseka kwixesha lethu?
7 Ukususela ngeMfazwe Yehlabathi I, siye sayibona inzaliseko enkulu yomqondiso owanikelwa nguYesu obhalwe kuMateyu isahluko 24. Kodwa ke, khumbula amazwi akhe athi: “Xa nibona into elizothe ebangela isiphanziso . . . imi kwindawo engcwele, . . . mabandule abo bakwelakwaYuda baqalise ukusabela ezintabeni.” (Mateyu 24:15, 16) Le nxalenye yesiprofeto imele izaliseke nakweli xesha siphila kulo.
8. Kangangexesha elide, amaNgqina kaYehova ebeyifanisa njani “into elizothe” yale mihla?
8 Ibonisa intembelo abanayo abakhonzi bakaYehova yokuba esi siprofeto siza kuzaliseka, IMboniselo (yesiNgesi) kaJanuwari 1, 1921, yajolisa ingqalelo kuso isinxibelelanisa neziganeko ezazisenzeka kuMbindi Mpuma. Kamva, inkupho yeMboniselo (yesiNgesi) kaDisemba 15, 1929, iphepha 374, yaqinisekisa ngelithi: “Eyona nto iphambili kuManyano Lwezizwe kukwenza abantu bamnikele umva uThixo noKristu, ibe ngenxa yoko luyinto ephanzisayo, luyimveliso kaSathana, yaye lulisikizi emehlweni kaThixo.” Ngoko “into elizothe” yabonakala ngowe-1919. Ethubeni, uManyano lwadeda kwaza kwangena iZizwe Ezimanyeneyo. Kudala amaNgqina kaYehova ezibhenca ezi ntlangano zabantu ezilwela uxolo esithi zilizothe emehlweni kaThixo.
9, 10. Indlela ebesiyiqonda ngayo imbandezelo enkulu ngaphambilana iye yayichaphazela njani imbono yethu ngexesha “into elizothe” eyayiza kuma ngalo kwindawo engcwele?
9 Inqaku elandulela eli liye lamshwankathela ngokucacileyo uMateyu isahluko 24 nesama-25. Ngaba kufanelekile ukuba kucaciswe ‘into elizothe emi kwindawo engcwele’? Kubonakala kunjalo. Isiprofeto sikaYesu sikunxibelelanisa ngokusondeleyo ‘ukuma kwayo kwindawo engcwele’ kunye nokuqhambuka ‘kwembandezelo’ exelwe kwangaphambili. Ngenxa yoko, nangona “into elizothe” kukudala ikho, unxibelelwano olukhoyo phakathi ‘kokuma kwayo kwindawo engcwele’ nembandezelo enkulu kufanele kuyichaphazele indlela esicinga ngayo. Njani?
10 Abantu bakaThixo bakha bacinga ukuba inqanaba lokuqala lembandezelo enkulu laqalisa ngowe-1914 nokuba inxalenye yokugqibela yayiza kufika kwidabi leArmagedon. (ISityhilelo 16:14, 16; thelekisa IMboniselo [yesiNgesi] ka-Aprili 1, 1939, iphepha 110.) Ngoko ke, sinokusibona isizathu sokuba kucingwe ukuba “into elizothe” yale mihla imele ukuba yema kwindawo engcwele kungekudala emva kweMfazwe Yehlabathi I.
11, 12. Ngowe-1969, kwanikelwa yiphi imbono elungisiweyo ngembandezelo enkulu?
11 Noko ke, kwiminyaka yamvanje izinto siye sazibona ngendlela eyahlukileyo. NgoLwesine, ngoJulayi 10, 1969, kwiNdibano Yezizwe Ngezizwe ‘Yoxolo Lwasemhlabeni’ eyayiqhutywa kwisiXeko saseNew York, uF. W. Franz, ngoko owayengusekela-mongameli weWatch Tower Bible and Tract Society, wanikela intetho eyayibangel’ umdla. Xa wayexubusha ngeendlela ezaziqondwa ngayo ngaphambili iziprofeto zikaYesu, uMzalwan’ uFranz wathi: “Kwakuthiwe ‘imbandezelo enkulu’ yaqalisa ngowe-1914 C.E. yaye ayizange ivunyelwe ukuba ide ifikelele incopho yayo ngoko kunoko uThixo wayiphelisa iMfazwe Yehlabathi I ngoNovemba we-1918. Ukususela ngoko uThixo wayevulela intsalela yabathanjiswa bakhe abangamaKristu anyuliweyo ithuba lokusebenza ngaphambi kokuba avumele inxalenye yokugqibela ‘yembandezelo enkulu’ iqalise kwakhona kwidabi leArmagedon.”
12 Emva koko kwanikelwa ingcaciso elungiswe ngendlela ephawulekayo eyile: “Ukuba ezi ziganeko ziza kuhambisana nezenkulungwane yokuqala, . . . ‘imbandezelo enkulu’ yokomfuziselo ayizange iqalise ngowe-1914 C.E. Kunoko, oko kwenzeka kwiYerusalem yokomfuziselo yanamhlanje ngowe-1914 ukusa kowe-1918 ‘yayikukuqalisa nje kwenimba yenkxwaleko’ . . . Iseza imbandezelo enkulu ekungazange kubekho ifana nayo, kuba iza kutshabalalisa ubukhosi behlabathi bonqulo lobuxoki (kuquka neNgqobhoko) kuze kulandele ‘imfazwe yemini enkulu kaThixo uSomandla’ eArmagedon.” Oku kwakuthetha ukuba imbandezelo enkulu yayiseza.
13. Kutheni kusengqiqweni ukuthi “into elizothe” iseza ‘kuma kwindawo engcwele’?
13 Oku kubaluleke gqitha ukuze siqonde ixesha ethi “into elizothe” ime ngalo kwindawo engcwele. Khumbula okwenzeka ngenkulungwane yokuqala. AmaRoma ahlasela iYerusalem ngowama-66 C.E., kodwa abuya arhoxa ngokukhawuleza, nto leyo eyanika ‘inyama’ engamaKristu ithuba lokusinda. (Mateyu 24:22) Ngokufanelekileyo, silindele ukuba imbandezelo enkulu iqalise kungekudala, kodwa iza kunqunyulwa ibe mfutshane ngenxa yabo banyuliweyo nguThixo. Nantsi ke ingongoma eyintloko: Mandulo, ‘into elizothe emi kwindawo engcwele’ yanxityelelaniswa nohlaselo lwamaRoma awayephantsi kukaNjengele Gallus ngowama-66 C.E. Olwanamhlanje ke uhlaselo—ukuqhambuka kwembandezelo enkulu—luseza. Ngoko kuyabonakala ukuba “into elizothe ebangela isiphanziso,” ebikho ukususela ngowe-1919, iseza kuma kwindawo engcwele.b Kuza kwenzeka njani oku? Yaye inokusichaphazela njani loo nto?
Uhlaselo Lwexesha Elizayo
14, 15. ISityhilelo isahluko 17 sisinceda njani siqonde iziganeko ezikhokelela kwiArmagedon?
14 Incwadi yeSityhilelo ichaza uhlaselo lwexesha elizayo oluza kutshabalalisa unqulo lobuxoki. Isahluko 17 sichaza umgwebo kaThixo ‘kwiBhabhiloni Enkulu, unina wamahenyukazi’—ubukhosi behlabathi bonqulo lobuxoki. INgqobhoko iphumeza indima ephambili kuyo yaye ithi yenze umnqophiso noThixo. (Thelekisa uYeremiya 7:4.) Kudala unqulo lobuxoki, kuquka neNgqobhoko, lunolwalamano olungekho mthethweni ‘nookumkani bomhlaba,’ kodwa loo nto iya kufikelela incopho ngokuphanziswa kwezo nkonzo. (ISityhilelo 17:2, 5) Iza kwenziwa ngubani loo nto?
15 ISityhilelo sichaza ‘irhamncwa elimbala ungqombela’ elibakho, lingabikho, lize liphinde libuye. (ISityhilelo 17:3, 8) Eli rhamncwa lixhaswa ngabalawuli behlabathi. Iinkcukacha ezinikelwe kwesi siprofeto ziyasinceda sazi ukuba eli rhamncwa lokomfuziselo limela intlangano elwela uxolo eqalise ukubakho ngowe-1919 iluManyano Lwezizwe (“into elizothe”) yaye ngoku eziZizwe Ezimanyeneyo. ISityhilelo 17:16, 17 sibonisa ukuba uThixo useza kuphembelela iintliziyo zabalawuli abathile abangabantu abaphambili kweli “rhamncwa” ukuba baphanzise ubukhosi behlabathi bonqulo lobuxoki. Olo hlaselo luya kuba sisiqalo sembandezelo enkulu.
16. Ziziphi iziganeko eziphawulekayo ezenzekayo ezibandakanya unqulo?
16 Ekubeni imbandezelo enkulu iseza kuqalisa kwixesha elizayo, ngaba ‘nokuma kwindawo engcwele’ kuza kwenzeka kwixesha elizayo? Kubonakala kunjalo. Ngoxa “into elizothe” yabonakala ebutsheni bale nkulungwane yaza, ngaloo ndlela, yaqhubeka ikho kangangamashumi eminyaka, kungekudala iza kuma “kwindawo engcwele” ngendlela eyahlukileyo. Nanjengoko abalandeli bakaKristu benkulungwane yokuqala bemele ukuba babekulangazelela ukubona indlela eyayiza ‘kuma ngayo kwindawo engcwele,’ kunjalo nakumaKristu anamhlanje. Kuyinyaniso kona ukuba, kuza kufuneka silinde de izaliseke ukuze sizazi zonke iinkcukacha. Ukanti ke, kwamanye amazwe sele kuphawuleka ukuba unqulo lugxeleshwe kabuhlungu yaye luya lucekiswa nangakumbi. Abathile kwabezobupolitika, abalala ngengub’ enye nabo babengamaKristu abatenxayo kunqulo lokwenyaniso, bakhuthaza abantu ukuba baluthiye unqulo lulonke nje ibe ngokukodwa amaKristu okwenyaniso. (INdumiso 94:20, 21; 1 Timoti 6:20, 21) Ngenxa yoko, kwanangoku amagunya ezobupolitika ‘alwa neMvana,’ ibe njengoko ISityhilelo 17:14 sibonisa, le mfazwe iseza kuba mbi. Ngoxa engenakukwazi ukuyichukumisa ngokoqobo iMvana kaThixo—uYesu Kristu ophakanyisiweyo waza wazukiswa—aseza kuyithulula inkcaso yawo kubanquli bokwenyaniso bakaThixo, ngokukodwa “abangcwele” bakhe. (Daniyeli 7:25; thelekisa eyabaseRoma 8:27; Kolose 1:2; ISityhilelo 12:17.) Sinesiqinisekiso esivela kuThixo sokuba iMvana kunye nabo bakunye nayo baza koyisa.—ISityhilelo 19:11-21.
17. Singakhange sibethe ngenqindi phantsi, sinokuthi “into elizothe” iya kuma njani kwindawo engcwele?
17 Siyazi ukuba unqulo lobuxoki lulindelwe yintshabalalo. IBhabhiloni Enkulu ‘inxilile ligazi labo bangcwele’ yaye izenza ukumkanikazi, kodwa iza kutshatyalaliswa nakanjani na. Umoya omdaka eye yawutha kookumkani bomhlaba uza kuyijikela kabuhlungu xa obo buhlobo buguquka busiba yintiyo ekhatshwa lugonyamelo ‘yeempondo ezilishumi nerhamncwa.’ (ISityhilelo 17:6, 16; 18:7, 8) Xa ‘irhamncwa elimbala ungqombela’ lihlasela ihenyukazi lonqulo, ‘into elizothe’ iza kube imi ngendlela esisisongelo koko iNgqobhoko ikubiza ngokuba yindawo engcwele.c Ngoko kuza kuqalwa kuphanziswe iNgqobhoko engenalukholo, nezingomb’ isifuba ngelithi ingcwele.
‘Sabani’—Njani?
18, 19. Ziziphi izizathu esinokubonisa ngazo ukuba ‘ukusabela ezintabeni’ akuyi kuthetha ukutshintsha unqulo?
18 Emva kokuxela kwangaphambili ‘ngokuma kwento elizothe kwindawo engcwele,’ uYesu walumkisa abo baqondayo ukuba bathabathe amanyathelo. Ngaba wayethetha ukuba ngelo xesha—xa “into elizothe” “imi kwindawo engcwele”—abantu abaninzi baza kuphuma kunqulo lobuxoki baye kunqulo lokwenyaniso? Akunjalo. Makhe sibuyele kwinzaliseko yokuqala. UYesu wathi: “Mabandule ke abo bakwelakwaYuda baqalise ukusabela ezintabeni. Umntu ophezu kwendlu makangehli, okanye angene ngaphakathi ukuze athabathe nantoni na endlwini yakhe; ibe umntu osentsimini makangabuyeli kwizinto ezisemva ukuze athabathe isambatho sakhe sangaphandle. Yeha abafazi abamithiyo nabo banyisa usana ngaloo mihla! Hlalani nithandazela ukuba kungabikho ngexesha lasebusika.”—Marko 13:14-18.
19 UYesu akazange athi ngabo baseYerusalem kuphela ekwakufuneka babaleke, ngokungathi eyona nto wayeyibethelela kukuba baphume kwisazulu sonqulo lwamaYuda; engazange kananjalo ayikhankanye kwisilumkiso sakhe into yokutshintsha unqulo—ukusaba kunqulo lobuxoki uze ubalekele kunqulo lokwenyaniso. Ngokuqinisekileyo abafundi bakaYesu babengafuni kulunyukiswa ngokusaba kolunye unqulo baze baye kolunye; babesele bengamaKristu okwenyaniso. Ibe uhlaselo lowama-66 C.E. aluzange lukhuthaze abo babeqhelisela ubuYuda eYerusalem nakulo lonke elakwaYuda ukuba balushiye olo nqulo baze bamkele ubuKristu. UNjingalwazi Heinrich Graetz uthi abo babesukela amaRoma awayesaba babuyela kweso sixeko: “AmaZealot abuyela eYerusalem (ngo-Oktobha 8), ehlabela amagwijo emfazwe evuya, imilomo ingahlangani yimincili eyayibangelwa lithemba lokuba aza kukhululeka yaye azimele geqe. . . . Ngapha koko ngaba yayingengoThixo owancedileyo njengoko wayenzile ngenceba yakhe kooyisemkhulu? AmaZealot azixelela ukuba soze aphinde oyike mntu ukususela ngoko.”
20. Abafundi bokuqala basabela njani kwisilumkiso sikaYesu sokuba basabele ezintabeni?
20 Ngoko ke, iqaqobana labo banyuliweyo lalithobela njani icebiso likaYesu ngaloo mihla? Xa lashiya elakwaYuda laza labalekela ezintabeni ezingaphesheya kweYordan, labonisa ukuba lalingeyonxalenye yenkqubo yamaYuda yezobupolitika okanye yonqulo. Lashiya amasimi namakhaya, lazishiya apho nezinto elalinazo ezindlwini. Laliqinisekile ukuba uYehova wayeza kulikhusela aze alixhase, yaye labeka unqulo lwakhe ngaphambi kwayo yonke enye into eyayinokubonakala ibalulekile.—Marko 10:29, 30; Luka 9:57-62.
21. Yintoni esingafanele siyilindele xa “into elizothe” ihlasela?
21 Ngoku masize kwinzaliseko enkulu. Sele kudlule amashumi eminyaka sibongoza abantu ukuba bahlukane nonqulo lobuxoki baze bangene kunqulo lokwenyaniso. (ISityhilelo 18:4, 5) Izigidi ziye zenjenjalo. Isiprofeto sikaYesu asitsho ukuba kuya kuthi kwakuqhambuka imbandezelo enkulu, izihlwele zabantu ziguqukele kunqulo lokwenyaniso; ngokuqinisekileyo akuzange kubekho kuguquka kwezihlwele zamaYuda ngowama-66 C.E. Ukanti, amaKristu okwenyaniso aza kuba enesizathu esibambekayo sokwamkela isilumkiso sikaYesu aze asabe.
22. Kusenokuquka ntoni ukusebenzisa kwethu icebiso likaYesu lokusabela ezintabeni?
22 Asikabi nazo iinkcukacha ezipheleleyo zembandezelo enkulu, kodwa kusengqiqweni ukugqiba kwelokuba ukusaba okwakhankanywa nguYesu akuyi kuba kukusabela kwindawo ethile yokoqobo. Abantu bakaThixo sele bekulo lonke ihlabathi, phantse kuzo zonke iimbombo zomhlaba. Noko ke, sinokuqiniseka ukuba xa kufuneka kusatyiwe, amaKristu amele awugcine ubonakala umahluko phakathi kwawo neenkonzo zobuxoki. Kwakhona sibalulekile isilumkiso sikaYesu sokungabuyeli ezindlwini ukuya kuphuthuma izambatho okanye ezinye izinto. (Mateyu 24:17, 18) Ngoko isenokuvavanywa indlela esizijonga ngayo izinto eziphathekayo; ngaba zibaluleke ngenene nangenyaniso, okanye ngaba kukusindisa kukaThixo abantu bonke okubalukele ngakumbi? Kuyinyaniso kona ukuba, ukusaba kwethu kusenokubandakanya ubunzima kunye nokuswela okuthile. Kuza kufuneka silindele ukwenza nantoni na eyimfuneko, njengoko benzayo abenkulungwane yokuqala abasaba besuka kwelakwaYuda bawelela ePereya, ngaphesheya kweYordan.
23, 24. (a) Yiyiphi ekuphela kwendawo esinokufumana kuyo inkuselo? (b) Sifanele sisichaphazele njani isilumkiso sikaYesu esiphathelele ‘into elizothe emi kwindawo engcwele’?
23 Simele siqiniseke ukuba sihlala sizimela ngoYehova nangentlangano yakhe enjengentaba. (2 Samuweli 22:2, 3; INdumiso 18:2; Daniyeli 2:35, 44) Kulapho siya kukhuselwa khona! Asiyi kuxelisa izihlwele zoluntu eziya kusabela “emiqolombeni” zize zizifihle “emaweni eentaba”—iintlangano nemibutho yabantu esenokuqhubeka ikho okwexeshana emva kokuphanziswa kweBhabhiloni Enkulu. (ISityhilelo 6:15; 18:9-11) Kuyinyaniso ukuba, kusenokuba nzima gqitha—njengoko kusenokuba kwakunjalo ngowama-66 C.E. kubafazi abamithiyo ababesaba besuka kwelakwaYuda okanye kuye nabani na ekwakufuneka ethabathe uhambo kuloo mozulu eyayiqhaqhazelis’ amazinyo yaye kusina nemvula. Kodwa ke sinokuqiniseka ukuba uThixo uya kuyenza indlela yokusinda. Masiqalise kwangoku ukuqinisa intembelo yethu kuYehova nakuNyana wakhe, ngoku olawula njengoKumkani woBukumkani.
24 Asikho isizathu sokuba sityhwatyhwe ngenxa yoko kuza kwenzeka. UYesu akazange afune ukuba abafundi bakhe bangoko boyike, yaye akafuni ukuba soyike ngoku okanye kwimihla ezayo. Wasilumkisa ukuze iintliziyo neengqondo zethu ziyilungele loo nto. Ngapha koko, amaKristu athobelayo akasayi kohlwaywa xa kutshatyalaliswa unqulo lobuxoki nayo yonke le nkqubo ingendawo yezinto. Aza kuba esiqonda yaye esithobela isilumkiso esiphathelele ‘into elizothe emi kwindawo engcwele.’ Yaye aza kuthabatha amanyathelo afanelekileyo asekelwe kukholo lwawo olungenakugungqiswa. Ngamana singangaze sikulibale oko uYesu wakuthembisayo: “Lowo unyamezele kwada kwasekupheleni uya kusindiswa.”—Marko 13:13.
[Imibhalo esemazantsi]
a “Iibhanile zamaRoma zazinqulwa kwiitempile zaseRoma; ibe intlonelo olwalunayo olu hlanga ngeembasa zalo yayinento yokwenza nokuphakama kwalo kwezinye iintlanga . . . [Kumajoni] mhlawumbi zazizezona zinto zingcwele emhlabeni. Ijoni elingumRoma lalifunga ngembasa yalo.”—The Encyclopædia Britannica, uHlelo lwe-11.
b Phawula ukuba ngoxa ukuzaliseka kwamazwi kaYesu ebudeni bowama-66 ukusa kowama-70 C.E. kunokusinceda siqonde indlela aza kuzaliseka ngayo kwimbandezelo enkulu, ezi nzaliseko zimbini azinakufaniswa ncam kuba zenzeka phantsi kweemeko ezingafaniyo.
c Bona IMboniselo kaMeyi 1, 1976, iphepha 3.
Ngaba Uyakhumbula?
◻ “Into elizothe ebangela isiphanziso” yazibonakalisa njani ngenkulungwane yokuqala?
◻ Kutheni kusengqiqweni ukucinga ukuba “into elizothe” yale mihla iseza kuma kwindawo engcwele?
◻ Luluphi uhlaselo ‘lwento elizothe’ oluxelwe kwangaphambili kwiSityhilelo?
◻ Yiyiphi indlela ekusenokufuneka ‘sisabe’ ngayo?
[Umfanekiso okwiphepha 16]
IBhabhiloni Enkulu ibizwa ngokuba ‘ngunina wamahenyukazi’
[Umfanekiso okwiphepha 17]
Irhamncwa elimbala ungqombela elikwiSityhilelo isahluko 17 ‘yinto elizothe’ awathetha ngayo uYesu
[Umfanekiso okwiphepha 18]
Irhamncwa elimbala ungqombela liya kukhokela xa kuphanziswa unqulo