Abavakalisi BoBukumkani Bayabalisa
Ukwamkelwa Kweendaba Ezilungileyo EBelgium
“NGUBANI na okhe wabona izinto ezinjalo?” la mazwi aphuma kwiofisi yesebe yamaNgqina kaYehova eBelgium. (Thelekisa uIsaya 66:8.) Eli lizwe lihle libika incopho yabavakalisi abangama-24 464 kunyaka wenkonzo yowe-1989. Kwakukwakho nolwando lwesine ekhulwini kumlinganiselo wenani labo banesabelo kumsebenzi wokushumayela nyanga nganye.
◻ Iindaba ezilungileyo ezavakaliswa ngamaNgqina kaYehova zavunywa ngumfundisi wamaKatolika owathi kwidini leMisa langeCawa wathetha oku kumarhamente akhe: “Ukuba amaNgqina kaYehova ayanityelela, zivuleni iingcango zenu. Atheth’ inyaniso!” Oku koko kanye elinye inenekazi lakwenzayo. Xa lathi latyelelwa ngamaNgqina, lawamkela ngokufudumeleyo laza lamkela incwadi ethi Life—How Did It Get Here? By Evolution or by Creation? Kamva lafuna incwadi ethi Unokuphila Ngonaphakade KwiParadisi Esemhlabeni. Kwaqaliswa isifundo seBhayibhile nalo, kodwa indoda yalo ayizange ithelele. Ngoko umzalwana othile wayitsalela umnxeba waza wayibuza enoba yayingathanda na ukuphila nomfazi wayo kwihlabathi elilunge ngakumbi? Umphumo waba kukuba ithelele ekufundisiseni. Esi sibini sasihlalisana ngaphandle komtshato ongokwasemthethweni, kodwa salubhalisa ngokwasemthethweni umanyano lwaso saza kungekudala sabhaptizwa.
◻ Inyaniso yabuguqula ubomi benye intombazana eselula. Yathi ingekafikeleli neminyaka eli-14 ubudala, yashiywa yodwa. Yadibana nenkwenkwe eselula yaza yahlalisana nayo kwindawo yabantu abangoonongogo, isebenzisa iziyobisi yaye ibonakalisa umoya wogonyamelo. Yandula ke le nkwenkwe yafa kwingozi yenqwelo-mafutha. Oku kwayishiya le ntombazana iphazamiseke ngokunzulu ngokwasengqondweni, yaye yayifuna ukuzibulala. Yazibuza ‘Ndinokusifumana phi isicombululo kwiingxaki endinazo?’ Yadibana nomntu owayekhafula owayenza yakholelwa ukuba unako ukuyiqhagamshelanisa neqabane layo elifileyo. Benza ulingelo ngenkqubo yokulalisa ngomlingo nokuba neemvakalelo ezingaphaya kwezemvelo. Ingakufumani ukuthuthuzeleka eyayikulindele koku, yaqalisa ukudandatheka ngokunzulu kwakhona. Kangangeenyanga ezininzi yazinxwema ebantwini ngokupheleleyo. Wandula ke omnye wamaNgqina kaYehova wadibana nayo waza wazama ukuyinceda ngokomoya. Kangangexesha elithile oku kwakusenziwa ngembalelwano, yaye ekuhambeni kwexesha izinto zalunga emva komgudu omkhulu nenkalipho eyayinayo. Ngoku yakhululeka kwimpembelelo yeedemon, kumkhwa wecuba nakwiimvakalelo ezinzulu zokuba netyala. Ekuhambeni kwexesha, ulwazi olungakumbi lweBhayibhile nomoya kaYehova zayinceda kakhulu. Kwakhona, yomelezwa ziintlanganiso, njengoko yayilungiselela ngenzondelelo. Ngoku ibhaptiziwe yaye inomoya wobuvulindlela. Sele iqhuba izifundo zeBhayibhile ezininzi, esinye sazo ngumama wayo, ngoku oyayo kwezinye iintlanganiso. Enyanisweni, uYehova uye wayinceda!
◻ Abo bawasebenzisayo amathuba abanawo esikolweni baba nemiphumo emihle ekusasazeni iindaba ezilungileyo. Omnye udade oselula esikolweni esiseBelgium wabelwa ukuba athethe ngombandela owawuza kukhethwa nguye. Wagqiba ekubeni athethe ngamaNgqina kaYehova noko akukholelwayo, ewusekela umbandela wakhe kwincwadana enemifanekiso ethi AmaNgqina KaYehova Kwinkulungwane Yamashumi Amabini. Unjingalwazi wakhe wachukumiseka. Emva kokunikela intetho yakhe eklasini, abafundi bavunyelwa ukuba babuze imibuzo. Kamva abantwana abaninzi afunda nabo eklasini bambuza ukuba yintoni na ekwakufuneka beyenzile ukuze baphile kwiParadisi kaThixo ekhankanywe kwintetho yakhe. Abaninzi, kuquka unjingalwazi, bafuna imibhalo yeencwadana ezinemifanekiso ezahlukahlukeneyo lo dade awayenazo. Abakwezinye iiklasi bafuna iincwadana ezinemifanekiso kunye nenkcazelo engakumbi, ibe unjingalwazi wonqulo wazihlolisisa ezi ncwadana zinemifanekiso waza wazincomela kwiklasi yakhe.
Isenzo senkalipho esenziwa ngudade wethu oselula sasikelelwa. Kwasasazwa iincwadana ezinemifanekiso ezingamashumi mabini anesithathu koonjingalwazi ababini nakubafundi abaninzi; omnye umfundi, evile ngale ntetho, wawucela lo mbandela ukuze acacisele iklasi yakhe ngomsebenzi wamaNgqina kaYehova.
Abaninzi bayazamkela iindaba ezilungileyo eBelgium. Balamkela iLizwi likaThixo, ‘kungekhona njengelizwi labantu kodwa, njengokuba linjalo ngokwenyaniso, lililizwi likaThixo elisebenzayo nokusebenza kuni bakholwayo.’—1 Tesalonika 2:13.