Ubomi Nobulungiseleli BukaYesu
Ukuba Nentembelo Ebudeni Bemihla Yokugqibela
NJENGOKO uLwesibini, kaNisan 11, esondela ekupheleni, uYesu ukunye nabapostile bakhe kwiNtaba yeMinquma. Basandul’ ukuphuma kummandla wetempile, abanokuyibona ngasezantsi kwabo, ibe uYesu ebexubusha nabo ngomqondiso wobukho bakhe esemandleni oBukumkani nowokupheliswa kwenkqubo yezinto.
Ehlabela mgama namagqabaza akhe, uYesu ubalumkisa ngokulandelana nooKristu bobuxoki. Uthi, kuya kwenziwa amalinge okuba, “ukuba bekunokwenzeka, balahlekise nabanyuliweyo.” Kodwa, njengeenkozi ezibona kude, aba banyuliweyo baya kuhlanganisana kwindawo apho ukudla kokomoya kokwenyaniso kunokufunyanwa khona, oko kukuthi, kuKristu wokwenyaniso ngethuba lobukho bakhe obungabonakaliyo. Abayi kulahlekiswa baze bahlanganiselwe kuKristu wobuxoki.
OoKristu bobuxoki banokubakho kuphela ngendlela ebonakalayo. Ngokwahlukileyo koko, ubukho bukaYesu buya kuba bobungabonakaliyo. Buya kwenzeka ebudeni bexesha eloyikekayo kwimbali yoluntu, njengoko uYesu esithi: “Ilanga liya kwenziwa mnyama, ithi nenyanga ifiphale.” Ewe, eli iya kuba lelona xesha lobumnyama kulo lonke ixesha lokubakho komntu. Kuya kuba ngathi ilanga lenziwe mnyama emini, ibe kuya kuba ngathi inyanga ayikhanyisi ebusuku.
UYesu uhlabela mgama esithi, “Namandla amazulu azanyazanyiswe.” Ngaloo ndlela ubonisa ukuba amazulu okoqobo aya kuba nembonakalo enxubisayo. Amazulu awayi kuba yindawo yeentaka nje kuphela, kodwa aya kuzaliswa ziinqwelo-moya zemfazwe, ziziphekepheke, nangoosomajukujuku abenza uphando. Uloyiko nogonyamelo luya kugqwesa nayiphi na into uluntu olukhe lwanamava ayo ngaphambili kwimbali yalo.
Ngenxa yoku, uYesu uthi, “Kuya kubakho ukuxinezeleka kweentlanga, zithingaza; lugquma ulwandle namaza; abantu besifa kukoyika nakukulindela izinto ezilizelayo elimiweyo.” Eneneni, eli xesha lilelona lobumnyama kuko konke ukudla ubomi koluntu liya kukhokelela kwixesha laxa, njengoko uYesu esitsho, ‘kuya kubonakala umqondiso woNyana woMntu ezulwini; zimbambazele ngelo xesha zonke izizwe zomhlaba.’
Kodwa asingabo bonke abaya kwenza isijwili xa ‘uNyana woMntu esiza enamandla’ ukuza kutshabalalisa le nkqubo ingendawo yezinto. ‘Abanyuliweyo,’ i-144 000 labo baya kwabelana noKristu kuBukumkani basezulwini, abayi kwenza sijwili, engayi kwenjenjalo namaqabane abo, abo uYesu ngaphambilana wababiza ngokuba ‘zezinye izimvu.’ Phezu kwako nje ukuba bephila ebudeni bexesha lobona bumnyama kwimbali yoluntu, aba bayasabela kumazwi okhuthazo kaYesu Kristu athi: “Zakubon’ ukuba ezi zinto ziyaqala ukuhla, sukani nime, niziphakamise iintloko zenu, ngenxa yokuba iyasondela inkululeko yenu.”
Ukuze abafundi bakhe ababeya kube bephila ebudeni bemihla yokugqibela baqonde ukusondela kwesiphelo, uYesu unikela lo mzekeliso: “Wukhangeleni umkhiwane nemithi yonke; xa iselithe yavelisa amagqabi, niyabona nazi ngokwenu ukuba ihlobo selikufuphi. Kwangokunjalo nani, xa nithe nazibona ezi zinto zisihla, yazini ukuba bukufuphi ubukumkani bukaThixo. Inene ndithi kuni, Asiyi kukha sidlule esi sizukulwana, zide zihle zonke ezi zinto.”
Ngaloo ndlela, xa abafundi bakhe bebona iinkalo ezininzi ezahlukahlukeneyo zomqondiso zizaliseka, bafanele baqonde ukuba isiphelo senkqubo yezinto sisemnyango nokuba uBukumkani bukaThixo buya kuthi kungekudala butshayele bonke ubungendawo. Enyanisweni, isiphelo siza kufika ebudeni bexesha lokuphila kwabantu abakubonayo ukuzaliseka kwazo zonke izinto uYesu azixela kwangaphambili! Eluleka abafundi ababeya kube bephila ebudeni bemihla ebalulekileyo yokugqibela, uYesu uthi:
“Zilumkeleni ke, hleze zisindwe iintliziyo zenu kukuzingxala, nakukunxila, nangamaxhala obu bomi, ize loo mini inifikele ngebhaqo. Kuba iya kubazela njengomgibe bonke abahleliyo phezu kwehlabathi lonke. Phaphani ngoko, amaxesha onke nikhunga, ukuze kuthiwe nikufanele ukuzisaba zonke ezo zinto ziza kuhla, nokumiswa phambi koNyana woMntu.” Mateyu 24:23-51; Marko 13:21-37; Luka 21:25-36; ISityhilelo 14:1, 3; Yohane 10:16.
◆ Ziziphi iimeko zehlabathi eziphawula ubukho bukaKristu?
◆ Kuya kuba nini apho ‘zonke izizwe zomhlaba ziya kuthi zimbambazele,’ kodwa yintoni abaya kube beyenza abalandeli bakaKristu?
◆ UYesu unikela wuphi umzekeliso ukunceda abafundi bakhe bexesha elizayo ukuba baqonde xa isiphelo sisemnyango?
◆ Sisiphi isiluleko uYesu asinikela kwabo bafundi bakhe baya kube bephila ebudeni bemihla yokugqibela?