Abaphumeleleyo EGiliyadi Babongozwa Ukuba Bahlakulele Ubuchule Obuhle Bokuthetha

NGECAWA, ngoMatshi 4, 1990, iHolo yeNdibano yamaNgqina kaYehova kwisiXeko saseJersey yayizaliswe ngabantu abangaphezu kwama-4 100 ababeze kucwangciso lokuvuyisana neklasi yama-88 kwiSikolo seBhayibhile seWatchtower saseGiliyadi. Abo bangama-24 babephumelele babephuma kumazwe amathandathu ibe ngeli thuba babethunyelwa kumazwe ali-13 ewonke.

Ucwangciso lwaqalisa ngeye–10:00 kusasa. Ngemva kwengoma, uGeorge Gangas, ngoku oneminyaka engaphezu kwama-90 ubudala nokwalilungu leQumrhu Elilawulayo, wavula ngomthandazo wokunyaniseka kuYehova. Emva koku, usihlalo, uC. W. Barber, okwalilungu leQumrhu Elilawulayo nowaphumelela kwiklasi yaseGiliyadi yama-26, wenza amabal’engwe ethetha ngeenguqulelo ezithile ezikhawulezileyo nezibonakalayo ehlabathini. Waqukumbela ngokuthi: “Akuzange nanini na ngaphambili kubekho ithuba elifaneleke kangaka lokuba ngamaNgqina kaYehova obungangamsha nobulungisa bakhe.” Emva koko waqhubeka echaza ngolandelelwano izithethi ezahlukeneyo ezaziza kuba nenxaxheba kucwangciso lwaloo ntsasa.

UVernon Wisegarver, olilungu leKomiti yoMzi-mveliso eBrooklyn, wakhetha umxholo othi “Yiba Nobuchule Ekwenzeni Umsebenzi Wakho.” Esenza umzekeliso ngomntu owayesebenza ngeentsimbi kwidolophana ethile owenza ityathanga elomeleleyo, waza walibophelela kwiankile, esindisa ubomi babo bonke ababekhwele kwinqanawa ebudeni boqhwithela, wafanisa abo babephumelele eGiliyadi naloo mntu osebenza ngeentsimbi. Ngokufundisa abantu iBhayibhile, baya kubanceda ukuba bayile ityathanga elisindisa ubomi leempawu zokuhlonela uThixo, besebenzisa ubuchule abaye babuvelisa kuqeqesho abalufumene eGiliyadi. Wabakhuthaza abo babephumelele ukuba baqhubeke bebuhlaziya ubuchule babo bokufundisa nokuba bame phambi koKumkani omkhulu kubo bonke ‘njengabasebenzi abanobugcisa.’

Owalandelayo, nguJohn Barr, ilungu leQumrhu Elilawulayo nowathetha phantsi komxholo othi “Ngcamlani Nize Nibone Ukuba UYehova Ulungile.” Amagqabaza akhe ayesekelwe kwiNdumiso 34:8, ethi: “Yivani [ngcamlani, NW], nibone ukuba ulungile uYehova. Hayi, uyolo lomfo ozimela ngaye!” Wababongoza esithi: “Ngcamlani konke kwisabelo senu sobuvangeli basemazweni. Zilingeni izinto zonke. Musani ukoyika ukwenjenjalo. Niya kwandula ke nikubone ukulunga kukaYehova ngendlela eningazange niyiqonde ngaphambili. Ningaze nibe ngabakhethayo. Ningaze nithi, ‘Andiyithandi le.’ Yingcamleni.”

UCharles Woody, ilungu leKomiti yeSebe leNkonzo eBrooklyn wathetha ngombandela awayewukhethile othi, “Ukugcina Imbono Elungeleleneyo Ngeziqu Zethu.” Wathi: “Siyakunandipha ukuba nabo banembono elungeleleneyo ngeziqu zabo, abangasoloko befuna ukuba kwenziwe izinto ngendlela yabo, abakhawulezayo ukubancoma baze babakhe abanye, nabathi, nangona benolwazi, bangabenzi abanye bavakalelwe bengenalo.” Wongezelela esithi: “Njengabavangeli basemazweni niya kufuna ukutsalela abantu enyanisweni, kungekhona ukubaphambukisa kuyo. Isimo sengqondo senu sokuthobeka siya kuba sesixabiseke kakhulu ekuncedeni abanye ukuba benze oku.”

ULyman Swingle, ilungu leQumrhu Elilawulayo, ngokulandelayo wathetha phantsi komxholo othi “Izahluko Ezilandelayo, Yintoni Eziza Kusixelela Yona?” Wahlahl’ indlela ngokuthi: “Namhlanje niqalisa isahluko esitsha kubomi benu. Yintoni ke eniza kuyibhala kwezi zahluko ukususela ngoku kuse kwixesha elizayo?” Wabakhumbuza esithi: “Konke enikwenzayo kufanele kuzise imbeko nozuko kuYehova,” waza wongezelela esithi: “Qinisekani ukuba izigqibo zenu zisekelwe kwiLizwi likaThixo. Khumbulani iMizekeliso 3:7, ethi: ‘Musa ukuba sisilumko kwawakho amehlo.’ Manifunyaniswe nithembekile ekuphumezeni isabelo senu.” Waqukumbela ngokuthi: “Sinentembelo yokuba aninakuze nikugqibe ukubhala ingxelo engobomi benu ukuba niya kuphila ngonaphakade.”

Owalandelayo, nguJack Redford, ongomnye wabayaleli kweso sikolo nowababongoza abo babephumelele esithi: “Yibani Ngamadini Aphilileyo.” Wavul’ umlomo ngokuthi: “Inkonzo yobuvangeli basemazweni ikukuphila ubomi bokuzincama. . . . Siyanithanda ngenxa yomoya eniwubonakalisayo wokuzincama.” Ecaphula kweyabaseFilipi 2:17, apho umpostile uPawulos wathi wathululwa njengedini elithululwayo, ethetha ukuba wayekulungele ukuzincama njengedini eliphilileyo, wabuza esithi: “Kodwa kwenzeka njani ngokufuthi ukuba abavangeli basemazweni babe njengeminikelo ethululwayo?” Wandula ke wabalisa amava abavangeli basemazweni abazincamayo ukusa kumlinganiselo omkhulu. Omnye wenza izitena ezili-16 000 ngezandla zakhe waza wakha iHolo yoBukumkani yokuqala kwilizwe awayabelwe kulo. Amanye amava angodade owapheleka indoda yakhe ukuya kummandla okwintsunguzi yehlathi, apho kwakusaphilwa ubomi benkqubo yakudala. Oodade basekuhlaleni apho bamxabisa kakhulu ngenxa yokuba babesazi ukuba wayezithulula ‘njengedini eliphilileyo.’ Kodwa ke eso sithethi sandula sabakhumbuza abafundi ukuba idini alixabisekanga konke konke ukuba alihambisani nokuthobela. Sisebenzisa ingxelo kaKumkani uSawule nama-Amaleki, sathi: “Ngalo lonke ixesha khumbulani ukuba ukuthobela kulunge ngakumbi kunedini. Ningaze nizame ukuthethathethana noYehova. Ngamaxesha onke yenzani oko anixelela ukuba nikwenze.”

Ngokulandelayo usihlalo wabiza omnye umyaleli kweso sikolo, u-Ulysses Glass. UMzalwan’ uGlass wavul’ umlomo ngokuthi: “Iklasi yama-88 yayiyiklasi eyonwabileyo yaye injalo. Nezinye iiklasi zazonwabile. Ngoko, kutheni ulonwabo lwenu lubalasele?” Wabonisa ukuba ulonwabo “alulosukelo kodwa lungumphumo wemisebenzi emihle. Lubakho ngoxa kuzatyalazelwa ukufikelela okuthile okuzisa umvuzo.” Wacaphula umbhali obomi bakhe baguqulwa kukubona ibinzana elithi: “Impumelelo luhambo oluqhubekayo, kungekhona ukufikelela kwindawo ethile.” Loo mbhali wenza isifungo sokuyeka ukulujonga ulonwabo ngesizinzi sokufikelela usukelo oluthile kunokuba abujonge ubomi bakhe buphela njengohambo oluqhubekayo. Wathi, “Akukho ndlela esinge kulonwabo. Ulonwabo ngokwalo luyindlela.” Ngoko uMzalwan’ uGlass wagqabaza esithi le klasi yayiqonda kakuhle intsingiselo yaloo mazwi. Waqukumbela ngamazwi akwiNdumiso yama-84 waza wathi: “Qhubekani nihamba kwiindawo ezimanzi maninzi. Naziphi na iingxaki enisenokuhlangabezana nazo, ngamana ulonwabo olulolwabo bamthandayo nabamoyikayo uYehova lungaqhubeka lulolwenu.”

Emva koko kwalandela intetho eyaba yimbalasane kuloo ntsasa, eyayinikelwa lelinye lamalungu eQumrhu Elilawulayo, uKarl Klein, owakhetha umxholo othi “Ukuhlakulela Indlela Yokuthetha YamaKristu.” Waqalisa ngokukhumbuza bonke ukuba uYehova ungoyena ubalaseleyo kwiindlela zokuthetha. ULogos, okuphela koNyana amzeleyo, wasetyenziswa njengeSithethi esiyiNtloko sikaYehova, ibe wathetha ngokuthanda nemiyalelo kaThixo kwindalo esemhlabeni. Ngoxa wayesemhlabeni, izihlwele zamangaliswa yindlela yakhe yokufundisa. Zazingazange zimve umntu owayethetha njengaye. KuMateyu 28:19, 20, uYesu wakhuthaza abafundi bakhe ukuba babe ngabantu abathetha kakuhle ngokuya ehlabathini, befundisa abanye izinto awayebawisele umthetho ngazo baze nabo babenze abafundi.

Wandula ke uMzalwan’ uKlein, ethetha ngokungqalileyo ebhekisa kwabo babeza kuba ngabavangeli basemazweni bexesha elizayo, wathi kukho iinkalo ezine abavangeli basemazweni abamele bazixhalabele ngokuphathelele ukuhlakulela ubuchule bokuthetha kakuhle: phakathi kwendoda nomfazi, kwabanye kwikhaya labavangeli, kwabo bakwiofisi yesebe apho babelwe khona nakwabo badibana nabo kwinkonzo yasentsimini. UMzalwan’ uKlein wathi, “Uqalisa ukuthetha ngaphambi kokuba uvule umlomo wakho. Indlela obonakala ngayo nokuzilungisa kwakho kuthetha okuthile kumninimzi.” Emva koko wathi gqabagqaba esenza imizekeliso ukungqina ingongoma yakhe waza waqukumbela ngala mazwi abongozayo: “Yibani ngabathobekileyo engqondweni. Benzeni abanye bazive bekhululekile ukuthetha nani. Zabalazelani ukuba ngabantu abathetha ngokufaneleke ngakumbi.”

Emva kokuba kufundwe imibuliso, usihlalo wadlulisela iziqinisekiso zokuphumelela kuye ngamnye kwabo babephumelele. Emva koko iklasi yavakalisa amazwi ombulelo kwiQumrhu Elilawulayo nakwintsapho yaseBheteli, awafundwa nguPaul Angerville waseGuadeloupe.

Ucwangciso lwasemva kwemini lwaqaliswa ngeSifundo seMboniselo. Emva koko, abafundi balungiselela ucwangciso olwanikela ithuba lokuba abaphulaphuli babone oko kwakuqhubeka kwigumbi labo lokufundela, baze babone izinto ababezenza kwiimbutho zabo kumagumbi abo, nelokuba bave izinto ezininzi ababenamava azo kwinkonzo yasentsimini ukususela kwithuba lokufika kwabo eGiliyadi kwiinyanga ezintlanu ezidluleyo. Ekugqibeleni, kwabakho umdlalo owawunomxholo othi Ukwenza Okulungileyo Emehlweni KaYehova. Lo mdlalo wawulungiselelwe ngabavakalisi beBandla laseLyndhurst, eNew Jersey. Olo suku lwasongwa ngengoma yokuqukumbela, eyalandelwa ngumthandazo owenziwa nguFred Franz, umongameli woMbutho oneminyaka engama-96 ubudala.

[Ibhokisi ekwiphepha 27]

INKCAZELO ENGABAFUNDI

Inani lamazwe abavela kuwo: 6

Inani lamazwe ababelwe kuwo: 13

Inani labazalwana abangatshatanga: 2

Inani lezibini ezitshatileyo: 11

Inani labafundi: 24

Umlinganiselo wobudala: 32.7

Umlinganiselo weminyaka besenyanisweni: 14

Umlinganiselo weminyaka bekwinkonzo yexesha elizeleyo: 9

[Umfanekiso okwiphepha 26]

Abaphumelele Kwiklasi Yama-88 Yesikolo SeBhayibhile SeWatchtower SaseGiliyadi