Abavangeli Basemazweni Abangakumbi Balungele Isivuno Sazwenibanzi
USEPTEMBA yinyanga yokuvuna kubalimi, kodwa umsebenzi wokuvuna obaluleke ngakumbi wabangela ukuba inginginya yabantu ithontelane kwiHolo Yendibano yamaNgqina kaYehova ekwisiXeko saseJersey, ngaphesheya nje koMlambo iHudson ukusuka kwisiXeko saseNew York, ngoSeptemba 8, 1991. Yayisisihlandlo sokuvuyisana nabaphumeleleyo beklasi yama-91 kwiSikolo SeBhayibhile SeWatchtower SaseGiliyadi. Kwakukho abantu abanokuba ngama-4 263 abangamalungu entsapho yaseBheteli neendwendwe ezazimenyiwe, nabali-1 151 ababenxityelelaniswe ngeentambo zomnxeba ababekwiofisi elikomkhulu eBrooklyn nakwiifama eziseWallkill nasePatterson.
Umongameli weSikolo saseGiliyadi, uFrederick W. Franz, phantse oneminyaka engama-98 ubudala, waqalisa ucwangciso ngomthandazo ochukumisayo nondilisekileyo. UAlbert D. Schroeder, ilungu leQumrhu Elilawulayo nowayesakuba ngumamkeli wabafundi (registrar) nomyaleli kweso sikolo, wayengusihlalo wocwangciso lokuvuyisana nabaphumeleleyo. Wakhumbuza abaphulaphuli ngeNdumiso 2:1, 2 nezinye iziprofeto ezixela kwangaphambili eli xesha lokunyikimiswa nokuphehluzeliswa kweentlanga. Oku kuphithizeliswa kwazo kuye kwathetha ukuvuleka kwamasimi amaninzi amatsha ukuze kwenziwe umsebenzi wokuvuna.
Intetho yokuqala ngolo suku yanikelwa nguGeorge M. Couch, ilungu leKomiti YaseBheteli. Wayethetha ngomxholo othi “Zibaleni Iintsikelelo Zenu.” Wakhumbuza abafundi abebeseGiliyadi ukuba ubani akaze athi usenexesha elininzi ngaphambi kokuba aqalise ukwenza oku. Wathi ngokuqinisekileyo bona abafundi babesikelelwe kodwa ke ezi ntsikelelo bazifumene emva kokuzibhokoxa kanobom. Ngokufanayo, uYakobi owayeneminyaka engama-97 ubudala wajijisana nesithunywa sezulu ubusuku bonke—ukuze nje afumane intsikelelo. (Genesis 32:24-32) UMzalwan’ uCouch wababongoza abafundi ukuba bangaziqhekez’ intloko becinga ngezinto ezingakhiyo kodwa babe yintsikelelo kwabanye ngokuhlakulela uxolo lwengqondo ngokuthandaza nokuzimisela.
Kwalandela uJohn E. Barr weQumrhu Elilawulayo ethetha ngomxholo othi “Thandanani.” Abalandeli bakaYesu babekulungele ukufelana. Wababuza oku abafundi: “Ngaba niyaluva olu hlobo lothando lukhula ezintliziyweni zenu?” Wathi, ‘ukuba asinalo olu thando, asinto yanto. Leyo yinyaniso engenakukhanyelwa.’ (1 Korinte 13:3) UMzalwan’ uBarr wadwelisa iindlela ezithile ezisebenzisekayo zokubonakalisa uthando. Wakhuthaza abafundi ukuba babahlonele abanye abavangeli basemazweni, ngamaxesha onke befuna indlela yobuchule abanokuzithetha ngayo izinto. Ebacebisa wathi, ‘ziphoseni kwelokulibala iimbambano ezincinane,’ ecaphula eyoku-1 kaPetros 4:8. Wathi kwaneentsuku abapheka ngazo abavangeli basemazweni zizizihlandlo zokubonakalisa uthando ngokuwugqala loo msebenzi njengobalulekileyo. Wabakhumbuza oku abafundi: “Asisokuze siyeke ukuba netyala lokubathanda abazalwana noodade wethu.”—Roma 13:8.
UDavid A. Olson weKomiti Yesebe Lenkonzo wathetha ngomxholo obangel’ umdla othi “Inzulu Kangakanani Intembelo Onayo?” Wabalaselisa iinkalo ezimbini ekufuneka kuboniswe intembelo kuzo: kuYehova nakwintlangano yakhe, esinezizathu ezininzi zokwenjenjalo (IMizekeliso 14:6; Yeremiya 17:8); nokuba nentembelo kwiziqu zethu. Ngokomlinganiselo othile, abavangeli basemazweni banesizathu sokuba nentembelo kwiziqu zabo, ngenxa yemvelaphi yabo njengabalungiseleli nangenxa yembopheleleko abayiphathiswe nguYehova nentlangano yakhe. Umpostile uPawulos wabonisa intembelo enjalo ngenxa yezizathu ezifanayo. (1 Korinte 16:13; Filipi 4:13) Noko ke, uMzalwan’ uOlson wabalumkisa ngokuzithemba ngokugqithiseleyo okukhuthazwa lihlabathi, njengoko kwabonakala kumzekelo wombhali odumileyo ekuthiwa wathi: “Ngokufuthi ndicaphula amazwi am. Oku kuyenza incoko yam ibe mnandi ngakumbi.” Phofu ke, intembelo ehambisana nokuthobeka inokubangela ukuba abanye babe nentembelo kuwe. Ngokuqinisekileyo oku kwakunjalo kwimeko kaPawulos.—Filipi 1:12-14.
Ngokulandelayo uLyman A. Swingle weQumrhu Elilawulayo wakhuthaza abafundi: “Yiyani Kumsebenzi Wokuvuna Emasimini, Nina Niphumeleleyo EGiliyadi!” Wathi le yayiyimini yokuvuna kwiSikolo saseGiliyadi nakubuzalwana bazwenibanzi, njengoko abaphumeleleyo babeza kuphuma baye kuthelela amawaka awayephumelele ngaphambili nasekumsebenzi wobuvangeli basemazweni—abanye ababephumelele kwiklasi yokuqala, eyesibini neyesithathu kwiminyaka yee-1940! UMzalwan’ uSwingle wathi emva apho kwakungekho mntu wayesazi ukuba umsebenzi wobuvangeli basemazweni wawuya kuqhubeka kangangeminyaka engama-50, engekho nowayesazi ukuba ubuNazi, ubuFasi, neminye imiqobo eyayibekwe ngoorhulumente kumsebenzi wokushumayela yayiya kudilika. Wabuza oku, “Ukuba oko uYehova akwenzileyo kwixesha elidlulileyo kuyasikhwankqisa, kuthekani ngoko aza kukwenza kwixesha elizayo?” Waqukumbela ngokuhlab’ ikhwelo kubafundi: “Yiyani entsimini!”
Bandula ke abayaleli ababini abaphambili beSikolo saseGiliyadi bathetha neklasi yama-91 okwesihlandlo sokugqibela. UJack D. Redford wathetha ngomxholo othi “Zuzani Ubulumko.” Wabaxelela abafundi ukuba iSikolo saseGiliyadi sibafundise ulwazi nokuqonda, kodwa bona bamele bazuze ubulumko, ubuchule bokusebenzisa ulwazi abanalo ngendlela echanileyo. Wababongoza abafundi ukuba bayibhebhethe intsomi yokuba bafunde yonke into eGiliyadi. “Okubalulekileyo koko nikufunda nakuba niphumile kwesi sikolo.” Nazi ezinye zezinto ekusafuneka bezifundile: ukusebenzisana ngoxolo nabantu, ukukwazi ukuthi “Uxolo” kumaqabane abo, kubavangeli basemazweni abakhonza nabo nakubazalwana noodade basekuhlaleni; bakuphaphele ukuzigqala izinto ngendlela ezibonakala ziyiyo ekuqaleni kwaye baqonde ukuba zonke iingxaki zintsonkothile, zifanele iimeko ziqwalaselwe kakuhle ngaphambi kokunikela isiluleko sobulumko; baze bahlonele abazalwana basekuhlaleni ngenxa yamandla abo okuqhubeka kwiimeko ezinzima.—IMizekeliso 15:28; 16:23; Yakobi 1:19.
U-Ulysses V. Glass, umamkeli wabafundi kwiSikolo saseGiliyadi, wasebenzisa eyabaseFilipi 3:16 njengomxholo wentetho yakhe. Wabancoma abafundi ngenkqubela abayenzileyo waza wabakhuthaza ukuba baqhubeke besenza ngokuvisisana neso sibhalo. Watyatyadula wathi, ngoxa abafundi befanele bahlale bengenisa ulwazi oluchanileyo, abasokuze bazi yonk’ into. Le ngongoma wayizekelisa ngewotshi ye-elektroniki. Umnini-wotshi usenokukwazi amakakwenze ukuze isebenze kodwa abe engayazi eyona ndlela kanye isebenza ngayo. Ngokufanayo, abavangeli basemazweni abafanele babajongele phantsi abo bangenalo ulwazi olunzulu olulingana nolwabo kodwa abakwaziyo okubalulekileyo—indlela yokoyika uYehova. (IMizekeliso 1:7) Wabakhumbuza abafundi ngokubaluleka kokugcina ‘iliso elingenakumbi.’ (Mateyu 6:22) Iliso lokomoya linokuphazamiseka njengoko kunokuba njalo nangelenyama. Ngokomzekelo, bambi banombono olinganiselweyo—betsolise amehlo abo kwiinkcukacha eziliqela ukuze babe nombono opheleleyo ngezinto—ngoxa abanye, ngokwahlukileyo kwabo bokuqala, bona bezikha nje phezulu yaye besoloko bephazamiseka kwiimbambano ezibalulekileyo abafanele bazisingathe.
Intetho yokugqibela ngaloo ntsasa yayinomxholo othi “Ukufanisa Intlangano KaYehova Nokusebenza Nayo,” ibe yanikelwa nguTheodore Jaracz weQumrhu Elilawulayo. UMzalwan’ uJaracz wathi ngoxa kukho iintlangano nemibutho emininzi ehlabathini, inye kuphela kuzo zonke ezi engeyonxalenye yehlabathi. Inokuqondwa njani intlangano emela uYehova? ILizwi likaThixo linikela iimpawu enokuqondwa ngazo. IBhayibhile ibonisa ukuba indalo yakhe yasezulwini ilungelelaniswe kakuhle. (INdumiso 103:20, 21; Isaya 40:26) Kwakhona intlangano kaYehova yasemhlabeni inokuqondwa ngokulungelelana kwayo nokwahluka kwayo ehlabathini, ukunamathela kwayo ngokungqongqo kwimigaqo yeBhayibhile, umlinganiselo wayo ophakamileyo wokucoceka ngokuziphatha nothando olubonakaliswa ngamalungu ayo. UMzalwan’ uJaracz wabongoza abafundi baseGiliyadi ukuba bancede abantu abaninzi kangangoko benako kwizabelo zabo ukuba bakwazi ukuyiqonda intlangano kaYehova ngokuphuma kwiZibhalo. Ngokuvisisana noko, wenza esi saziso sichulumancisayo: Kungekudala iSikolo saseGiliyadi siza kwandiswa ngokuphindwe kabini, ukusa kubafundi abanokuba ngama-50 kwiklasi yama-93! Kwakhona, iiklasi zeSebe leSikolo SaseGiliyadi (Gilead Extension School) ziza kuqalisa kwangaxeshanye eJamani. Kwavakala intswahla kangangethuba elide kwaye ivakala ngamandla!
Njengencopho yocwangciso lwakusasa, bonke abafundi baseGiliyadi abangama-24 banikwa iziqinisekiso. Kungekudala babeza kusinga kumazwe awahlukahlukeneyo ali-12 ehlabathini jikelele. Abafundi bavakalisa amazwi asuk’ entliziyweni, bebulela iQumrhu Elilawulayo nentsapho yaseBheteli. Emva kwesidlo sasemini, uMzalwan’ uCharles J. Rice weKomiti yeeFama zeWatchtower waqhuba iSifundo seMboniselo esifinyeziweyo. Bandula ke abaphumeleleyo batsho ngocwangciso olumnandi, besenza umboniso wamava athile abahlangabezana nawo kwinkonzo yasentsimini ebudeni bemfundo yeenyanga ezintlanu eWallkill, eNew York. Emva koko, abavakalisi abaphuma kumabandla awahlukahlukeneyo asekuhlaleni benza umdlalo owawunomxholo othi Ulutsha Olukhumbula UMdali Walo Ngoku.
Ukuqukumbela ucwangciso, uMzalwana uGeorge Gangas, ilungu leQumrhu Elilawulayo elineminyaka engama-95 ubudala, ebhekisa kuYehova watsho ngomthandazo ochukumisayo. Abaphulaphuli bemka benemincili, ngokungathandabuzekiyo ngamnye eshukunyiselwe ukuba abe nenxaxheba engakumbi kulo msebenzi wokuvuna owenziwa ehlabathini lonke.
[Ibhokisi ekwiphepha 22]
Inkcazelo Engabafundi
Inani lamazwe abavela kuwo: 6
Inani lamazwe ababelwe kuwo: 12
Inani labafundi: 24
Inani lezibini ezitshatileyo: 12
Umlinganiselo wobudala: 33.4
Umlinganiselo weminyaka besenyanisweni: 16.13
Umlinganiselo weminyaka bekubulungiseleli bexesha elizeleyo: 11.3
[Umfanekiso okwiphepha 23]
Abaphumeleleyo Kwiklasi Yama-91 YeSikolo SeBhayibhile SeWatchtower SaseGiliyadi
Kuludwe olungezantsi, kubalwa ukusuka kuluhlu olungaphambili ukuya kwabangasemva yaye amagama adweliswe ukusuka ngasekhohlo ukuya ngasekunene kuluhlu ngalunye.
(1) McDowell, A.; Youngquist, L.; Skokan, B.; Wargnier, N.; Miller, Y.; Muñoz, M. (2) Bales, M.; Perez, D.; Attick, E.; Vainikainen, A.; Mostberg, K. (3) DePriest, D.; DePriest, T.; Perez, R.; Wargnier, J.; Muñoz, J.; Miller, J. (4) McDowell, S.; Bales, D.; Skokan, M.; Attick, C.; Youngquist, W.; Vainikainen, J.; Mostberg, S.