Abaphumeleleyo EGiliyadi Baqalisa Indlela Yobomi Enomvuzo

“ESINJANI isihlandlo ukuvuyisa, ukubona abaphumeleleyo kwiklasi yama-90 yaseGiliyadi!” Ngaloo mazwi, usihlalo, uKarl F. Klein olilungu leQumrhu Elilawulayo, watshayelela ucwangciso lokuvuyisana nabaphumeleleyo. Ekhumbula ukuqaliswa kweSikolo seBhayibhile seWatchtower saseGiliyadi, wongezelela esithi: “Emva phayaa ngowe-1943, xa kwaphumelela iklasi yokuqala yaseGiliyadi, ngubani owayenokuyicinga into yokuba kwiminyaka engama-48 kamva sasisaya kuhlanganisana ndawonye ukuza kuvuyisana nabo baphumelele kwenye iklasi—eyama-90?”

Ukanti, ngoMatshi 3, 1991, imini eyayifudumele ngokungaqhelekanga kweli xesha lonyaka eNew Jersey, abantu abangaphezu kwama-4 000 ababeziindwendwe ezazimenyiwe namalungu entsapho yaseBheteli bahlanganisana kwiHolo yeNdibano kwisiXeko saseJersey, ngaphesheya nje komlambo ukusuka kwisiXeko saseNew York, beze kuvuyisana neqela elitsha labavangeli basemazweni eliphumeleleyo. Ngaphambi kokuba baqalise ubomi bobuvangeli basemazweni, abo baphumeleleyo babeza kufumana isiluleko sokuthi ndlela-ntle ngolu suku lokuvuyisana nabo.

Ucwangciso lwaqalisa ngengoma. Emva kwayo, bonke ababekho bachukumiseka ngokunzulu ngumthandazo wokuvula owenziwa nguFrederick W. Franz, umongameli weSikolo seBhayibhile seWatchtower saseGiliyadi oneminyaka engama-97 ubudala. Kwandula ke, emva kwamazwi engabula-zigcawu kasihlalo, abaphumeleleyo—nabo bonke ababekho—baphulaphula ngomdla kungcelele lweentetho ezimfutshane neziluncedo.

UMax H. Larson olilungu leKomiti yoMzi-mveliso waba sisithethi sokuqala, ngomxholo othi “Abantu Abasebenza NoYehova.” Emva kokutsalel’ ingqalelo kumkhombe wokusindisa owakhiwa nguNowa nentsapho yakhe, wathi: ‘Namhlanje uYehova ubuthela ndawonye intsapho yezigidi zabantu ehlabathini lonke, yaye unenjongo yokuwelisa le ntsapho inkulu kwimbandezelo enkulu.’ Ukwenza njani oku? Ngokusebenzisa umkhombe wezi mini—iparadisi yokomoya! Ebakhumbuza abo baphumeleleyo wathi, ‘Niza kube nisiya kwiindawo ezahlukahlukeneyo zomhlaba, apho niya kuba nisebenza noYehova ekwakheni umkhombe wanamhla.’ Ebenza bakulungele oko baza kujamelana nako, wathi: ‘Kuza kufuneka nisebenze. Kuza kufuneka nibe nomonde. Niza kuhlangabezana nemiqobo. Niza kubusebenzisa kwezi meko ke ubuchule eniye nabuzuza kuqeqesho lwenu.’

UDaniel Sydlik, ilungu leQumrhu Elilawulayo, kutshanje ebekhe watyelela abavangeli basemazweni abangamagqala eJapan naseCosta Rica. Ephuhlisa umxholo othi “Indlela Yenu Yobomi Inomvuzo,” wathetha ngamanye amacebiso aluncedo awawazuza kwaba bavangeli basemazweni banempumelelo. Wacacisa wathi, omnye udade wasebenzisa icebiso elithile awalizuza kunina: ‘Yithande inkonzo yasentsimini. Zenzele ubuhlobo nabantu. Yiba ngumntu wabantu, yaye uya konwaba.’ Omnye udade wathi: ‘Ekuhambeni kweminyaka, siye saqonda ukuba xa singalindeli okukhulu gqitha kwabanye, asidaniswa nje ngokulula. Isenzo sobubele nesolwazelelelo sithetha lukhulu kuthi.’ Ngokungathandabuzekiyo ukusebenzisa la macebiso asengqiqweni kuya kubanceda abo baphumeleleyo ukuba nabo babe ngabavangeli basemazweni abanempumelelo.

Eyoku-1 kwabaseTesalonika 5:14 ithi, “Yibani nokuzeka kade umsindo kubantu bonke.” ULeon Weaver okwiKomiti yeSebe leNkonzo wagqabaza ngesi sibhalo njengoko wayethetha ngomxholo othi “Yibani Nomonde Kuko Konke Enikwenzayo.” Ngoobani abaqukwe kwigama elithi “konke” esimele sibe nomonde kubo? Isithethi saphendula ngelithi: ‘Ngabo uza kudibana nabo kwinkonzo yasentsimini. Ngabazalwana noodade kwibandla elitsha oza kuba kulo. Ngabavangeli basemazweni okhonza nabo. Ngabo bakwiofisi yesebe. Liqabane lakho. Nguwe ngokwakho.’ Kutheni simele sibe nomonde kuko konke esikwenzayo? Isithethi sacacisa sisithi: ‘Bazalwana noodade, umonde unciphisa iingcinezelo namaxhala. Umonde uzala uxolo. Umonde uligcina liqaqambile ithemba. Umonde uyasinceda ukuze sihlale sinovuyo enkonzweni.’

Isithethi esilandelayo yaba nguAlbert D. Schroeder, ilungu leQumrhu Elilawulayo ngaphambili owayesamkela abafundi kwiSikolo saseGiliyadi. Ethetha ngomxholo othi “Qhubekani Nilandela Umzekelo Wenu—UKristu,” wasekela intetho yakhe kweyabaseFilipi isahluko 2. Fil 2 Indinyana 5 ithi, “Yibani nale ngcinga kuni, wayenayo uKristu Yesu.” Isithethi satyondyotha sisithi, ‘Oku kubonisa ukuba kufuneka sibe ngabalungeleleneyo xa sicinga, kwanjengoko noYesu wayelungelelene ekucingeni.’ Ukususela kwindinyana 6, watsho ngenkcazelo enik’ umdla, ebonisa ukuba uPawulos uqalisa ngokunikela ubungqina bokuba uYesu wayenengcinga elungeleleneyo (Fil 2 indinyana 6-8) waza ke wabonisa iindlela uYehova awamvuza ngazo ngekhondo lakhe lokuthobela (Fil 2 indinyana 9-11). Waqukumbela ngala mazwi, ‘Le yinxalenye yelungelo lenu, ukuba nivakalise iNkosi uYesu Kristu, nincede abanye babe nengcinga efana naleyo wayenayo.’

Abayaleli besikolo babeza kuthini kubafundi babo njengoko babesahlukana? UJack D. Redford wathetha ngomxholo othi “Amandla Okucinga Aya Kukugcina.” (IMizekeliso 2:10, 11, NW) Ecacisa wathi, ‘Njengoko ngoku niphuma, ulonwabo lwenu aluzi kuxhomekeka ekuthini ungubani na okanye koko unako yaye lungazi kuxhomekeka kwanakwisibakala sokuba uphumelele eGiliyadi. Ulonwabo lwakho luza kuxhomekeka kwindlela ocinga ngayo. Ukuba uyawasebenzisa amandla akho okucinga nolwazi lwakho, uya konwaba.’ Ebonisa ukubaluleka kwamandla okucinga, wacacisa wathi: ‘Into eyenza umahluko phakathi kwesenzo esilungileyo nesiphosakeleyo kukucinga. Oko ukucingayo kumisela oko uza kukwenza.’ UJ. D. Redford waqukumbela ngokubakhuthaza abafundi ngala mazwi: ‘Kukho abantu abaninzi abakrelekrele gqitha ehlabathini abangakwaziyo ukucinga, yaye kukho abantu abaninzi abakrelekrele nje ngomlinganiselo oqhelekileyo abaye baba ziinkcuba-buchopho. Ngoko zabalazela ukuba yinkcuba-buchopho. Zimisele ukuyisebenzisa ingqondo yakho. Lusebenzise ulwazi onalo. Zicombulule iingxaki. Hlalisana kakuhle nabantu. Zithobe egunyeni. Yiba nemveliso koko ukwenzayo. Nyamezela kwisabelo sakho.’

U-Ulysses V. Glass, owamkela abafundi kwesi sikolo, wakhetha umxholo othi “UYehova Uyasixhasa Isandla Sethu,” osekelwe kwiNdumiso 37:23, 24. Wathi, ‘Ndimele ndiyincome le klasi, kuba ibinomdla wokufunda.’ Wayikhumbuza ngezinye zezinto zokuyinceda uYehova ayilungiselele zona ukuyixhasa—iLizwi likaThixo, umkhonzi othembekileyo noqondayo owalathiswa nguYesu ukuba acacise intsingiselo nokuqonda iZibhalo, iimpapasho ezahlukahlukeneyo, iintlanganiso neendibano. Wahambisa wathi, ‘Izinto eziluncedo eniye nazisebenzisa kwizifundo zenu zinjengomsimelelo nentonga yokomoya. Siyazifuna ukuze zisixhase ngokomoya, kwaye zikwasenza sithethe ngegunya ekudluliseleni iLizwi likaThixo kwabanye.’ Ekuqosheliseni wabaxhobisa ngala mazwi abafundi: ‘Ukuba iintliziyo zenu ziphuphuma uthando ngabantu, abo baneentliziyo ezinyanisekileyo baya kusabela. Niya kuphumelela kubulungiseleli benu, ibe niya kwazi ukuba uYehova uyazixhasa izandla zenu.’

Isithethi sokugqibela kucwangciso lwakusasa yayinguCarey W. Barber weQumrhu Elilawulayo, owazikhethela umxholo othi “Ngenani Ngesango Elimxinwa.” Egqabaza ngoLuka 13:23, 24, wathi: ‘Baninzi abazifunayo iintsikelelo ebomini, kodwa yimbinana ekuvumayo ukuzama ngamandla awaneleyo ukuze izifumane.’ Kuthekani ngathi? ‘Kuhle ukuba sizibuze oku, “Uthetha ntoni kum lo mfanekiso wesango elimxinwa?”’ Isizathu sokuba abanye bangangeni asikukuba kungenakwenzeka ukuba bangene, kodwa kungenxa yokuba abafuni kuzama ngamandla. Isithethi sacacisa ukuba, ‘uYehova akafuni kuthi okungaphezu kwamandla ethu.’ Saphosa awokugqibela sisithi, ‘Ngoncedo lukaYehova, ngamana sonke ngovuyo singazama ngamandla awaneleyo ukuba singene ngesango elimxinwa sisinge kwihlabathi elitsha lobomi obungunaphakade, uxolo, uvuyo nolonwabo, kuse kuzuko lukaYehova lukanaphakade!’

Emva kwale ntetho, usihlalo wadlulisela imibuliso eyayivela kwiindawo ezahlukahlukeneyo zomhlaba. Ngoku lalifikile ixesha lokuba abaphumeleleyo banikwe iziqinisekiso zabo. Abafundi babevela kumazwe amathandathu—eKhanada, eFinland, eJamani, eBritane, eSwitzerland naseUnited States. Noko ke, izabelo zabo zazibathumela kumazwe anjengeArgentina, iBenin, iBolivia, iDominican Republic, iPapua New Guinea, iPeru, iSt. Lucia neTaiwan. Yaye abaphumeleleyo babeziva njani ngosuku lokunikwa kwabo iziqinisekiso? Kwileta echukumisayo eyayibhalelwe iQumrhu Elilawulayo nentsapho yaseBheteli, ngokuyinxenye babesithi: “Sinentembelo yokuba iQumrhu Elilawulayo, intsapho yaseBheteli, nentlangano kaYehova iphela iyasixhasa. Njengoko sijamelene neemvavanyo ezingaphambili, siya kuyixabisa gqitha inkxaso enjalo. Ngokwenene sithi maz’ enethole ngenxa yoku.”

Emva konqumamo, ucwangciso lwasemva kwemini lwaqalisa ngoshwankathelo lweSifundo seMboniselo, esasiqhutywa nguKarl A. Adams. Emva koko, abafundi benza umboniso woko kwenzeka ngokoqobo xa bezama ukufikelela intliziyo ekufundiseni iLizwi likaThixo. Ekugqibeleni, bonke ababekho, kuquka abaphumeleleyo beklasi yama-90, banandipha umdlalo osexesheni onomxholo othi Waphephe Amaxhala Obu Bomi, owawusenziwa ngabavakalisi basekuhlaleni.

Kumagqabaza akhe okuqukumbela uKarl Klein owayengusihlalo egameni labo bonke wathi: “Ngokwenene sikuvuyele ukuba lapha ngolu suku lwesithathu lukaMatshi 1991!” Lwandula ke olu cwangciso luvuyisayo lwasongwa ngengoma yokuqukumbela, eyalandelwa ngumthandazo owenziwa nguHarold J. Dies.

[Ibhokisi ekwiphepha 27]

Inkcazelo Engabafundi

Inani lamazwe abavela kuwo: 6

Inani lamazwe ababelwe kuwo: 10

Inani labafundi: 24

Umlinganiselo wobudala: 31,2

Umlinganiselo weminyaka besenyanisweni: 15

Umlinganiselo weminyaka bekubulungiseleli bexesha elizeleyo: 11

[Umfanekiso okwiphepha 26]

Abaphumelele Kwiklasi Yama-90 YeSikolo SeBhayibhile SeWatchtower SaseGiliyadi