Isizathu Sokuba Unqulo LobuKristu Luphawuleka
Iimbalasane Zencwadi Eya KumaHebhere
UYEHOVA UTHIXO waseka iimbalasane eziphawulekayo zonqulo xa wathumela uNyana wakhe, uYesu Kristu, emhlabeni. Oku kwaba njalo ngenxa yokuba uYesu, uMseki wobuKristu, uphakamile kunezithunywa zezulu nomprofeti uMoses. Ububingeleli bukaKristu bubobuphawuleka kakhulu xa buthelekiswa nobo babaLevi kuSirayeli wamandulo. Yaye idini likaYesu lingaphezulu kakhulu kunalawo ezilwanyana awayenikelwa ngaphantsi koMthetho kaMoses.
Ezi ngongoma zicaciswa kwincwadi eya kumaHebhere. Kubonakala ukuba yabhalwa ngumpostile uPawulos eRoma malunga nowama-61 C.E. yaza yathunyelwa kumakholwa angamaHebhere kwelakwaYuda. Kususela kumaxesha amandulo, amaKristu angamaGrike nawaseAsiya ayekholelwa ukuba yabhalwa nguPawulos, yaye oku kuxhaswa kukuzazi kwalo mbhali iZibhalo zesiHebhere nokusebenzisa kwakhe ukhuliso lwengqiqo, zinto ezo lo mpostile aziwa ngazo. Usenokuba akazange alibhale igama lakhe ngenxa yendlela awayemthiye ngayo amaYuda nangenxa yokuba wayesaziwa ‘njengompostile weentlanga.’ (Roma 11:13) Ngoku makhe siqwalasele ngokusondeleyo iimbalasane eziphawulekayo zobuKristu, njengoko ziboniswa kwincwadi kaPawulos eya kumaHebhere.
UKristu Uphakamile Kunezithunywa Zezulu NoMoses
Kuqala kuboniswa isikhundla esiphakamileyo soNyana kaThixo. (Heb 1:1–3:6) Izithunywa zezulu ziqubuda kuye, yaye ulawulo lwakhe lobukumkani luxhaswa nguThixo. Ngoko sifanele sinikele ingqalelo engaphezu kwekhethekileyo koko kwathethwa nguNyana. Ngaphezu koko, sifanele sikhumbule ukuba nakubeni umntu onguYesu wayengaphantsi kunezithunywa zezulu, waphakanyiswa ngaphezu kwazo waza wanikwa ulawulo phezu kwehlabathi elimiweyo elaliza kubakho.
UYesu Kristu ukwaphakamile kunoMoses. Njani? Kaloku, uMoses wayengumlungiseleli nje kuphela kwindlu kaThixo yakwaSirayeli. Noko ke, uYehova wamisa uYesu phezu kwalo ndlu iphela, okanye ibandla labantu bakaThixo.
AmaKristu Angena Ekuphumleni KukaThixo
Ngokulandelayo lo mpostile ubonisa ukuba kuyinto enokwenzeka ukungena ekuphumleni kukaThixo. (3:7–4:13) AmaSirayeli awayekhululwe ebukhobokeni eYiputa asilela ukungena kuko ngenxa yokuba ayengathobeli yaye eswele ukholo. Kodwa sinokungena koko kuphumla ukuba sibonakalisa ukholo kuThixo size ngentobelo silandele uKristu. Ngoko, kunokuhlonela iSabatha yeeveki ngeeveki kuphela, imihla yonke siya kunandipha intsikelelo ephawulekayo yokuphumla kuyo yonke imisebenzi yokuzingca.
Ukungena ekuphumleni kukaThixo lelinye lamadinga elizwi lakhe, ‘elibukhali ngaphezu kwamakrele onke antlangothi mbini; elihlaba liphumele, lide lahlule umphefumlo kwanomoya.’ Likwenza oko ngokuba liyagqobhoza ukuze liqonde iintshukumisa nesimo sengqondo, ukuze lahlule iminqweno yokwenyama notyekelo lwengqondo. (Thelekisa eyabaseRoma 7:25.) Ukuba “umphefumlo” wethu, okanye ubomi njengomntu, udityaniswe ‘nomoya,’ okanye utyekelo lokuhlonel’ uThixo, sinokungena ekuphumleni kukaThixo.
Ububingeleli Nomnqophiso Ophakamileyo
Ngokulandelayo uPawulos ubonisa ukuphawuleka kobubingeleli bukaKristu nokomnqophiso omtsha. (4:14–10:31) UYesu Kristu ongenasono unovelwano ngabantu abanesono ngenxa yokuba, njengathi, uye wahendwa ngeendlela zonke. Ngaphezu koko, uThixo uye wammisela yena ‘wangumbingeleli ngonaphakade, ngokohlobo lukaMelkitsedeke.’ Ngokungafaniyo nababingeleli abakhulu babaLevi, uYesu unobomi obungapheliyo yaye ngaloo ndlela akuyomfuneko ukuba abe nelandela kumsebenzi wakhe wokusindisa. Akuyomfuneko ukuba anikele imibingelelo yezilwanyana, kuba uye wanikela ngomzimba wakhe ophakamileyo ongenasono yaye uye wangena emazulwini enexabiso legazi lakhe.
Umnqophiso omtsha, osekelwe egazini likaYesu, ungophawulekayo kunomnqophiso woMthetho. Abo bakumnqophiso omtsha banemithetho kaThixo ezintliziyweni zabo yaye banandipha ukuxolelwa izono. (Yeremiya 31:31-34) Umbulelo ngoku ubashukumisela ukuba benze uvumo lwasekuhleni lwethemba labo nokuba bahlanganisane namakholwa angoowabo. Ngokungafaniyo nabo, akusekho mbingelelo useleyo ngenxa yezono zabo bona ngabom.
Ukholo Lubalulekile!
Ukuze singenelwe kumnqophiso omtsha ophawulekayo, kufuneka sibe nokholo. (10:32–12:29) Kukwafuneka unyamezelo ukuze sifumane oko uYehova akuthembisileyo. Njengokhuthazo lokuba sinyamezele, ‘sinelifu elikhulu’ elisingqongileyo lamangqina angaphambi kwexesha lobuKristu. Noko ke, sifanele siliqwalasele ngokusondele ngokukodwa ikhondo likaYesu eligqibeleleyo ngaphantsi kokubandezeleka. Nakuphi na ukubandezeleka uThixo akuvumelayo ukuba kusehlele sisenokukugqala njengoqeqesho olusenokuvelisa isiqhamo soxolo esibubulungisa. Ukuthembeka kwamadinga kaYehova kufanele kuwukhulise umnqweno wethu wokunikela inkonzo engcwele kuye “sinokuhlonela nokoyika.”
UPawulos uqukumbela ngezibongozo. (13:1-25) Ukholo lufanele lusishukumisele ukuba sibonise uthando lobuzalwana, sibuke iindwendwe, sikhumbule amakholwa angoowethu abandezelekileyo, siwugcine umtshato ubekekile, size ‘sanele zizinto esinazo.’ Sifanele sixelise ukholo lwabo bakhokelayo ebandleni yaye sifanele sibalulamele. Ngaphezu koko, simele siluphephe uwexuko, sithwale ungcikivo uYesu awaluthwalayo, “sinyuse ngamaxesha onke kuye uThixo umbingelelo wendumiso,” yaye siqhubeke sisenza okulungileyo. Ihambo enjalo ikwayinxalenye yeenkalo eziphawulekayo zobuKristu.
[Ibhokisi/Umfanekiso okwiphepha 24]
Iindidi Ezahlukahlukeneyo Zobhaptizo: Iinkalo zonqulo kumnquba wakwaSirayeli zazinokuthanani “kuphela nokudla neziselo neendidi ezahlukahlukeneyo zobhaptizo.” (Hebhere 9:9, 10, NW) Ezi ndidi zobhaptizo zazikukuhlamba okungokwesithethe okwakufunwa kuMthetho kaMoses. Izitya ezenziwe inqambi zazihlanjwa, yaye ukuhlanjululwa okungokwesithethe kwakuquka ukuhlanjwa kweempahla nokuba ubani ahlambe umzimba ngamanzi. (Levitikus 11:32; 14:8, 9; 15:5) Ababingeleli babehlamba imizimba ngamanzi, yaye izinto ezinento yokwenza nemibingelelo zazihlanjwa ngamanzi. (Eksodus 29:4; 30:17-21; Levitikus 1:13; 2 Kronike 4:6) Kodwa “iindidi ezahlukahlukeneyo zobhaptizo” zazingaquki ‘ukubhaptizwa kweendebe, neebhekile nezitya zobhedu’ okungokwesithethe okwakuqheliselwa ngamaYuda athile ngexesha lokufika kukaMesiya; yaye amaHebhere 9:10 awabhekiseli kuntywiliselo lwasemanzini olwalusenziwa nguYohane uMbhaptizi okanye kubhaptizo lwabo bafuzisela ukuzahlulela kwabo kuThixo njengamaKristu.—Mateyu 28:19, 20; Marko 7:4; Luka 3:3.