Kutheni Kuthabathe Ixesha Elide Kangaka Ukuzinzisa Le Mbambano?
MALUNGA neminyaka engama-6 000 eyadlulayo, ulongamo lukaThixo lwalungengombandela wembambano. Akuba eyigqibile imisebenzi yakhe emangalisayo yendalo, “wakubona uThixo konke akwenzileyo, nanko, kulungile kunene.” (Genesis 1:31) Wathi ke waqalisa ithuba elide ‘lokuphumla’; kambe ke, kungekhona ukuba wayediniwe. Kunoko, waphumla ngengqiqo yokuba wayiyeka imisebenzi yakhe yokudala emhlabeni, enentembelo yokuba injongo yakhe elungileyo mayela nale ndalo yayiya kuphumelela ngokupheleleyo.—Genesis 2:1-3; Isaya 55:11.
Yayiyiyiphi loo njongo? UYehova wabeka isibini sokuqala esingabantu kwindawo eyayibizwa ngokuba ngumyezo wase-Eden. Imbopheleleko yabo eyintloko yayikukunyamekela ikhaya labo eliyiparadisi, kuquka iintlobo-ntlobo zezilwanyana ezazilapho. Kwakhona, babemele bazale bakhulise abantwana. Ekuhambeni kwexesha, njengokuba intsapho yabo yayikhula, babeza kwandisa iparadisi ukusa eziphelweni zomhlaba bethobela umyalelo kaThixo ‘wokoyisa umhlaba.’ Ngaloo ndlela, ekugqibeleni umhlaba wawuza kuba likhaya elibalaseleyo, elizaliswe yintsapho eyonwabileyo nemanyeneyo ekhonza uYise wasezulwini. Leyo yayiyinjongo kaThixo yantlandlolo.—Genesis 1:27, 28; 2:8, 15, 20-22.
Ngaba uAdam noEva babeya kuba nesabelo ekuzaliseni le njongo izukileyo ukusa esiphelweni? Oko kwakuxhomekeke ekuqhubekeni kwabo besebenzisana nayo ngokuthobela uMdali wabo. Intobelo yabo yayingazi kuba yinto emfamekileyo, engacingwanga. Babenikwe inkululeko yokuzikhethela, kuba uThixo wayefuna bamkhonze ngentliziyo enoxabiso. Njengento ebonakalayo yokubakhumbuza ngokongama kwakhe anelungelo lako, wabavavanya nje ngento elula. Babenokutya nantoni na eyayikho emyezweni ngaphandle kwenye. Kwakukho umthi weziqhamo uThixo awathi ngawo: “Mhlana uthe wawudla, uya kufa.”—Genesis 2:16, 17.
La mazwi asixelela ukuba uAdam noEva babengadalelwanga ukuba baluphale baze bafe. Ukufa kwakuya kubakho kuphela ukuba babengawuthobelanga lo myalelo ulula. Ukuba uAdam noEva babethe bahlala bethobela uThixo, ngebesaphila emhlabeni nanamhlanje njengabazali bentsapho yehlabathi lonke yenzala efezekileyo.—Bona umgaqo okwiNdumiso 37:29.
Noko ke, esinye sezidalwa zikaThixo ezizizithunywa zezulu, ngoku esibizwa ngokuba nguSathana, sagxeka indlela kaThixo yokulawula. Sabongoza uEva ukuba adle kwisiqhamo esalelweyo, ngenkohliso sisithi ngokuzimela geqe kulongamo lukaThixo wayeya kuba kwimeko elunge ngakumbi. Noko ke, intshukumisa yokwenene kaSathana yayingumnqweno wokuba nguthixo waloo ntsapho yayiza kubakho yoluntu.—Genesis 3:1-5; Mateyu 4:8, 9; Yohane 8:44.
Ekubeni uYehova wayenike isibini sokuqala esingabantu yonke into esasiyiswele, uEva wayefanele aluphakamise ulongamo lukaThixo aze aligatye icebiso likaSathana lobuxoki. Noko ke, okuyintlekele kukuba waqhubeka waza wawophula umthetho kaThixo. Emva koko, uAdam wakhetha ukuthelela umfazi wakhe kwikhondo lakhe elingelolabulumko. Ngaloo ndlela esi sibini senza ukuthanda kwaso, kwakunye noSathana, bamvukela uThixo, kwaza ke kwaphakama imbambano yolongamo lukaThixo.—Genesis 3:6.
Kwafuneka Ixesha Ukuze Kuzinziswe Iimbambano Ezibalulekileyo
UYehova ngewayebatshabalalisile abo bavukeli bobathathu ngoko nangoko. Kodwa oko ngekwakungazange kuyizinzise ngokweyisayo imibuzo eyaphakanyiswa yimvukelo yabo. Ngaba umntu wayenokuzilawula ngokunempumelelo ngaphandle koThixo? Ngaba kwakusesikweni ngoThixo ukufuna intobelo kulongamo lwakhe? Ngaphezu koko, ngenxa yendlela esaziphatha ngayo isibini sokuqala, ngaba kwakuya kubakho nabaphi na abantu ababeya kuthi ngokungazingci bakhethe ukukhonza uThixo ngokuzithandela—kwanaxa bevavanywa nguSathana? (Yobhi 1:7-11; 2:4) Kwakuya kuthabath’ ixesha ukuze kuphendulwe le mibuzo. Kwakhona, kwakuya kuthabatha ixesha ukuze kupheliswe imiphumo yaloo mvukelo yantlandlolo kuze kuzalisekiswe injongo kaThixo yokwenza umhlaba ube yiparadisi emiwe sisizwe sabantu abangenasono. Sisalinde ukuzinziswa kokugqibela kwezi mbambano.
Ngokuvisisana nomthetho wakhe, uThixo walihlutha kuAdam noEva ilungelo lokuphila ngonaphakade. Babengasakufanelekeli ukuba nesabelo ekuzalisekisweni kwenjongo yakhe enkulu. Noko ke, ngaphambi kokuba bafe, bavunyelwa ukuba bavelise baze bakhulise abantwana. Enyanisweni, uAdam noEva babengasenako ukudlulisela kwinzala yabo ubomi obuzele udlamko nobungenasono. (Roma 5:12) Kodwa nangona izizukulwana ezalandelayo zazalwa zingafezekanga yaye ziqinisekile ukuba zaziya kufa, abantu abaninzi baba nethuba lokubonisa apho bemi khona kwimbambano enkulu yolongamo.
Ukuzinzisa Imbambano
UThixo uya kuyizinzisa njani le mibandela ephathelele ulongamo lwakhe? Ngangqiqo ithile imibuzo eyaphakanyiswa emva apho e-Eden iye ngoku yaphendulwa. Iminyaka engamawaka yembali yabantu iye yenza kwacaca kabuhlungu ukuba isityholo sikaSathana sokuba uEva wayeya kuba kwimeko elunge ngakumbi xa ezimele geqe kuThixo sasibubuxoki. Ulawulo lomntu olumtyeshelayo uThixo luye lwaqhubeka lusilela. Kunjengokuba iBhayibhile isithi: ‘Umntu uye wagunyazela umntu kwakubi kuye.’—INtshumayeli 8:9.
Kwelinye icala, kuye kwenzeka izinto ezininzi ezilungileyo ebudeni beminyaka emide ukususela ekubeni uAdam noEva bonayo. Uninzi loluntu luye lwabonakalisa ukunamathela ngokungenakushukunyiswa kulongamo lukaThixo, owona mzekelo ubalaseleyo woku ‘inguNyana womntu,’ uYesu Kristu. (Mateyu 20:18; Hebhere 11:1–12:3) Abo baye balandela imithetho kaThixo baza babonakalisa uxabiso ngolongamo lwakhe baye bafumanisa ukuba le ngokwenene yeyona ndlela ilungileyo. Baye babona ubunyaniso balo mzekeliso: “Intsikelelo kaYehova, yiyo etyebisayo, imbulaleko ayongezi nento kuyo.” (IMizekeliso 10:22) Ngaphezu koko, ngenxa yelungiselelo lovuko, ekugqibeleni baya kuba nesabelo ekuzalisekeni kwenjongo kaThixo ezukileyo.—Yohane 5:28, 29.
UYehova akayilibalanga injongo yakhe yantlandlolo. Abo balugatyayo ulongamo lwakhe abayi kuvunyelwa ukuba balawule umhlaba ngonaphakade, yaye iBhayibhile ilumkisa ukuba kungekudala uThixo uya kwenza okuthile nxamnye nabo. Sifunda oku: “Ityhilekile ingqumbo kaThixo ivela emazulwini, ichase konke ukungahloneli Thixo.” (Roma 1:18) Oku kutyhileka komsindo kaThixo kusondelayo, iBhayibhile ekubiza ngokuba yiArmagedon, ngokungathandabuzekiyo kuya kubonakalisa ukuba ukho ngokwenene. Kuphela ngabo balwamkelayo ulongamo abaya kusinda kweso siganeko. “Abathe tye baya kulima ilizwe, basale kulo abagqibeleleyo, banqunyulwe ezweni abangendawo.”—IMizekeliso 2:21, 22.
Imbambano Enkulu Nawe
Ngenxa yezi zibakala, ngamnye wethu—njengoAdam noEva—umele enze ukhetho. Ngaba siya kuzama ukuphila ngokuzimele geqe kuThixo? Okanye siya kuzithoba kulongamo lwakhe? Khumbula, le yeyona mbambano ibalulekileyo ojamelene nayo namhlanje. Ezinye iimbambano, nangona zisenokubonakala zibalulekile, zinento yokwenza nobomi bakho bangoku. Le yona inento yokwenza nobomi obungunaphakade. Isigqibo osenzayo siya kuchaphazela ikamva lakho ngonaphakade.
Unokubonisa njani ukuba uyalwamkela ulongamo lukaThixo? Ngokulifundisisa ngenkuthalo iLizwi lakhe, iBhayibhile, nangokufuna ukuthobela ukuthanda kwakhe unxulumene namanye amaKristu okwenyaniso. (Zefaniya 2:2, 3) Ukuba wenjenjalo, uya kuba nethemba elonwabisayo lokubona ukuzalisekiswa kwenjongo kaThixo ezukileyo. Uya kufumana ilungelo lokubona ukuzalisekiswa kweli dinga limangalisayo: “Kusaya kuba mzuzwana, angabikho ongendawo . . . Ke bona abalulamileyo baya kulidla ilifa ilizwe, baziyolise ngobuninzi boxolo.” (INdumiso 37:10, 11) Esinjani ukumangalisa isiphelo esilungiselelwe bonke abazithoba kulongamo lukaThixo! Esinjani ukuba namandla isizathu sokwenza isigqibo ngobulumko kulo mbandela ubaluleke ngokwenene!