Ulongamo LukaYehova NoBukumkani BukaThixo

“Bobakho, Yehova, ubukhulu namandla nobuhle nokubalasela nesidima . . . Bobakho ubukumkani, Yehova.”—1 KRONIKE 29:11.

1. Kutheni uYehova enelungelo lokuba nguMongami wendalo yonke?

“UYEHOVA uyimise ngokuqinileyo itrone yakhe emazulwini; ubukumkani bakhe bulawula phezu kwayo yonk’ into.” (INdumiso 103:19) Ngaloo mazwi, umdumisi wayechaza inyaniso ecacileyo ngokuphathelele ulawulo. Ekubeni uYehova uThixo enguMdali, unelungelo lokuba nguMlawuli onguMongami wendalo yonke.

2. UDaniyeli wawuchaza njani ummandla onezidalwa zikaYehova zomoya?

² Kakade ke ukuze alawule, kufuneka kubekho abantu aza kubalawula. Okokuqala, uYehova walawula izidalwa zakhe zomoya awazidalayo—eqala ngoNyana wakhe okuphela kwamzeleyo waza walawula nenkitha yeengelosi. (Kolose 1:15-17) Kamva, umprofeti uDaniyeli waboniswa ummandla wezulu. Wathi: “Ndathi ndisabukele njalo, ndabona kubekwa iitrone waza uNyangelemihla wahlala phantsi. . . . Kwakukho amawaka aliwaka awayelungiselela phambi kwakhe, neshumi lamawaka eliphindwe ngeshumi lamawaka elalimi kanye phambi kwakhe.” (Daniyeli 7:9, 10) Kangangexesha elingenakulinganiswa, “uNyangelemihla,” wayenguMongami phezu kwezihlwele zoonyana bakhe bomoya abanocwangco, ‘ababengabalungiseleli’ abenza ukuthanda kwakhe.—INdumiso 103:20, 21.

3. Ulawulo lukaYehova lwafikelela njani kummandla wendalo ebonakalayo?

³ Ekugqibeleni, uYehova walwandisa ulawulo lwakhe ngokudala ummandla omkhulu nontsonkothileyo wendalo ebonakalayo, kuquka umhlaba. (Yobhi 38:4, 7) Kumntu osemhlabeni, izidalwa ezisezulwini zibonakala zisebenza ngocwangco nenyameko kangangokuba kubonakala kungeyomfuneko ukuba zilawulwe. Ukanti, umdumisi wathi: “[UYehova] wayalela, zona zadalwa. Yaye uzigcina zimile ngonaphakade, ukusa kwixesha elingenammiselo. Unikele ummiselo, kwaye awuyi kudlula.” (INdumiso 148:5, 6) UYehova ubesoloko esalathisa yaye elawula oko kwenzeka kummandla womoya nommandla wendalo ebonakalayo.—Nehemiya 9:6.

4. UYehova ubalawula njani abantu?

⁴ Ekudaleni kwakhe isibini sokuqala esingabantu, uThixo wasebenzisa ulongamo lwakhe ngenye indlela. Ngaphandle kokulungiselela abantu yonke into abayifunayo ukuze baphile ubomi obunenjongo nobanelisayo, uYehova wabanika igunya lokulawula izidalwa zasemhlabeni ezingaphantsi kwabo—ebanika imbopheleleko yokulawula. (Genesis 1:26-28; 2:8, 9) Ngaloo ndlela, kucacile ukuba uThixo akapheleli nje ekusilawuleni ngothando nangesisa kodwa usinika imbeko nesidima. Logama nje uAdam noEva babezithoba kulongamo lukaYehova, babenethemba lokuphila ngonaphakade kwiparadesi esemhlabeni.—Genesis 2:15-17.

5. Sinokuyichaza njani indlela uYehova alawula ngayo?

⁵ Sisiphi ke isigqibo esifikelela kuso? Okokuqala, uYehova ubesoloko elawula yonke indalo yakhe. Okwesibini, uThixo ulawula izidalwa zakhe ngothando nesidima. Okokugqibela, ukuba siyazithoba yaye siyaluxhasa ulongamo lukaThixo uya kusisikelela ngonaphakade. Ngoko akumangalisi oko kwathethwa nguKumkani uDavide wakwaSirayeli esithi: “Bobakho, Yehova, ubukhulu namandla nobuhle nokubalasela nesidima; kuba yonk’ into esemazulwini nesemhlabeni yeyakho. Bobakho ubukumkani, Yehova, Wena uphakamileyo njengentloko yezinto zonke.”—1 Kronike 29:11.

Kutheni UBukumkani BukaThixo Bufuneka Nje?

6. Kukuphi ukunxulumana okukhoyo phakathi kolongamo lukaThixo noBukumkani bakhe?

⁶ Ekubeni uYehova, uMongami Wendalo yonke, ebesoloko esebenzisa igunya namandla akhe, kutheni sifuna uBukumkani bukaThixo? Ngokuqhelekileyo, umlawuli udla ngokusebenzisa intlangano ethile ekulawuleni abantu abaphetheyo. Ngoko ke, uBukumkani bukaThixo yindlela uThixo aphumeza ngayo ulongamo lwakhe kwindalo yonke okanye isixhobo asisebenzisayo ekulawuleni izidalwa zakhe.

7. Kwakutheni ukuze uYehova amisele indlela entsha yokulawula?

⁷ UYehova ebelawula ngeendlela ezahlukahlukeneyo ngamaxesha awahlukahlukeneyo. Emva kokuba kuphakame imbambano ethile, wamisela indlela entsha yokulawula. Wamisela le ndlela intsha emva kokuba unyana kaThixo ongumoya, uSathana wavukela waza waphembelela noAdam noEva ukuba bavukele ulongamo lukaYehova. Loo mvukelo yasingela phantsi ulongamo lukaThixo. Ngayiphi indlela? Xa uSathana wayexelela uEva ukuba ‘ngokuqinisekileyo akayi kufa’ ukuba utye isiqhamo esalelweyo, wayethetha ukuthi uYehova uyaxoka yaye ngenxa yoko akafanelanga kuthenjwa. USathana wahlabela mgama wathi kuEva: “UThixo uyazi ukuba mhla nithe nadla kuzo aya kuvuleka amehlo enu nize nibe njengoThixo, nazi okulungileyo nokubi.” USathana wayethetha ukuthi uAdam noEva banokuphila bhetele xa begatya umthetho kaThixo baze bahambe ngabayibonayo. (Genesis 3:1-6) Wayethandabuza ilungelo likaThixo lokulawula. Yintoni eyayiza kwenziwa nguYehova?

8, 9. (a) Yintoni enokwenziwa ngumlawuli xa kukho imvukelo kummandla awulawulayo? (b) Yintoni eyenziwa nguYehova emva kwemvukelo yase-Eden?

⁸ Yintoni esinokulindela ukuba umlawuli ayenze xa kukho imvukelo kummandla awulawulayo? Abo bazazi kakuhle ezembali banokukhumbula okwenzekayo ngezihlandlo ezinjalo. Kunokuba akubethe ngoyaba oko, ngokuqhelekileyo umlawuli—kwanoyena mlawuli unobubele—uyabagweba abavukeli, ababek’ ityala lokungcatsha. Emva koko, lo mlawuli usenokugunyazisa umntu othile ukuba abafak’ endleleni abo bavukeli ukuze kuphinde kubekho uxolo. Ngokufanayo, uYehova wabonisa ukuba iintambo zolawulo zisesandleni sakhe xa wathabatha inyathelo ngoko nangoko nxamnye nabavukeli waza wabagweba. Wagqala uAdam noEva njengabangafanelanga kufumana isipho sobomi obungunaphakade, waza wabagxothela ngaphandle komyezo wase-Eden.—Genesis 3:16-19, 22-24.

⁹ Xa wayewisa isigwebo nxamnye noSathana, uYehova watyhila enye inkalo yolongamo lwakhe, indlela awayeza kubuyisela ngayo uxolo nocwangco kwindalo yakhe. UThixo wathi kuSathana: “Ndiya kubeka ubutshaba phakathi kwakho nomfazi naphakathi kwembewu yakho nembewu yakhe. Yona iya kukutyumza intloko uze wena uyityumze isithende.” (Genesis 3:15) Ngaloo ndlela, uYehova wabonisa ukuba wayenenjongo yokugunyazisa ‘imbewu’ ukuba ityumze uSathana nemikhosi yakhe ukuze abonise ukuba unelungelo lokuba nguMongami.—INdumiso 2:7-9; 110:1, 2

10. (a) Yaba ngubani ‘imbewu’? (b) Wathini uPawulos ngokuzaliseka kwesiprofeto sokuqala?

¹⁰ Loo ‘mbewu’ nguYesu Kristu nabo aza kulawula nabo. Bebonke babumba uBukumkani bukaThixo obungoMesiya. (Daniyeli 7:13, 14, 27; Mateyu 19:28; Luka 12:32; 22:28-30) Noko ke, ezi nkcukacha azizange zityhilwe ngoko nangoko. Eneneni, inzaliseko yesi siprofeto sokuqala yaqhubeka ‘iyimfihlelo engcwele ekwakungathethwa ngayo kangangamaxesha ahlala ehleli.’ (Roma 16:25) Kangangeenkulungwane, amadoda anokholo ayekhangele phambili ekutyhilweni “kwemfihlelo engcwele” ekwisiprofeto sokuqala ukuze kuthethelelwe ulongamo lukaYehova.—Roma 8:19-21.

‘Imfihlelo Engcwele’ Ityhilwa Ngokuthe Ngcembe

11. Wamxelela ntoni uYehova uAbraham?

¹¹ Ekuhambeni kwexesha, uYehova wabangela ukuba iinkalo ezithile ‘zemfihlelo engcwele yobukumkani bukaThixo’ zaziwe ngokuthe ngcembe. (Marko 4:11) Omnye wabantu uYehova awatyhila kubo le mfihlelo, nguAbraham lowo wabizwa ngokuba “ngumhlobo kaYehova.” (Yakobi 2:23) UYehova wathembisa uAbraham ukuba uya ‘kumenza abe luhlanga olukhulu.’ Kamva, uThixo wathi kuAbraham: ‘Kuya kuphuma ookumkani kuwe,’ yaye “ngokuqinisekileyo ziya kuzisikelela ngawe zonke iintsapho zasemhlabeni.”—Genesis 12:2, 3; 17:6; 22:17, 18.

12. Imbewu kaSathana yazityhila njani emva koMkhukula?

¹² Ngexesha lika-Abraham, babekho abantu abazama ukulawula. Ngokomzekelo, iBhayibhile ithi ngoNimrodi, umzukulwana kaNowa: “Yena waqala waba ngonamandla emhlabeni. Wazibonakalisa engumzingeli onamandla ngokuchasene noYehova.” (Genesis 10:8, 9) Kucacile ukuba, uNimrodi nabanye abalawuli abazibeka ngokwabo esihlalweni babesetyenziswa nguSathana. Bona nabaxhasi babo baba yinxalenye yembewu kaSathana.—1 Yohane 5:19.

13. Waprofeta ngantoni uYehova esebenzisa uYakobi?

¹³ Phezu kwazo nje iinzame zikaSathana zokuvelisa abalawuli babantu, injongo kaYehova ayizange itshintshe. Esebenzisa umzukulwana ka-Abraham uYakobi, uYehova watyhila oku: “Intonga yobukhosi ayisayi kusuka kuYuda, nomsimelelo womyaleli phakathi kweenyawo zakhe, ade afike uShilo; zize zithobele yena izizwana.” (Genesis 49:10) Igama elithi “Shilo” lithetha “Lowo Inguye; Lowo Izezakhe Izinto.” Ngenxa yoko, la mazwi esiprofeto ayebonisa ukuba kuza umntu onelungelo lokufumana “intonga,” okanye ulawulo, ‘nomsimelelo womyaleli,’ okanye ulawulo phezu ‘kwezizwana,’ okanye phezu kwalo lonke uluntu. Yayiza kuba ngubani?

“Ade Afike UShilo”

14. UYehova wenza wuphi umnqophiso noDavide?

¹⁴ Kwinzala kaYuda, umntu wokuqala ukunyulwa nguYehova ukuba alawule abantu bakhe yayingumalusi uDavide, unyana kaYese.a (1 Samuweli 16:1-13) Phezu kwazo nje izono neempazamo zakhe, uYehova wayekholiswa nguDavide ngenxa yokunyaniseka kwakhe kulongamo Lwakhe. Etyhila okungakumbi ngesiprofeto sase-Eden, uYehova wenza umnqophiso noDavide, waza wathi: “Ndiya kwandula ke ngokuqinisekileyo ndikuvelisele imbewu yakho emva kwakho, eya kuphuma ezibilinini zakho; yaye eneneni ndiya kubumisela ngokuqinileyo ubukumkani bayo.” Oku kwakungaquki kuphela unyana kaDavide nelandela lakhe, kuba lo mnqophiso wawusithi: “Ndiya kuyimisela ngokuqinileyo itrone yobukumkani bayo ukusa kwixesha elingenammiselo.” Lo mnqophiso kaDavide wakwenza kwacaca ukuba ekuhambeni kwexesha ‘imbewu’ ethenjisiweyo yoBukumkani yayiza kuvela kumnombo kaDavide.—2 Samuweli 7:12, 13.

15. Kutheni ubukumkani bakwaYuda bunokugqalwa njengobufanekisela uBukumkani bukaThixo?

¹⁵ Waqala kuDavide umnombo wookumkani, yaye babethanjiswa ngeoli engcwele ngumbingeleli omkhulu. Ngenxa yoko aba kumkani babenokubizwa ngokuba ngabathanjiswa, okanye oomesiya. (1 Samuweli 16:13; 2 Samuweli 2:4; 5:3; 1 Kumkani 1:39) Kuthiwa babehleli kwitrone kaYehova yaye belawula njengookumkani abamiselwa nguYehova eYerusalem. (2 Kronike 9:8) Ngaloo ndlela, ubukumkani bakwaYuda babumela uBukumkani bukaThixo, ulongamo lukaYehova.

16. Waba yintoni umphumo wokulawula kookumkani bakwaYuda?

¹⁶ Xa ukumkani nabantu bethobela ulongamo lukaYehova, wayebakhusela aze abasikelele. Ngokukhethekileyo xa kwakulawula uSolomon kwakukho uxolo nendyebo engenakuthelekiswa namanye amaxesha, yaye oku kwakufuzisela isiprofeto solawulo loBukumkani bukaThixo, xa impembelelo kaSathana iya kuba ingasekho yaye ulongamo lukaYehova luthethelelwe. (1 Kumkani 4:20, 25) Okubuhlungu kukuba, inkoliso yookumkani kumnombo kaDavide ayizange iyithobele imilinganiselo kaYehova, yaye abantu banqula izithixo baza baziphatha kakubi. Ekugqibeleni, uYehova wavumela ukuba obo bukumkani butshatyalaliswe ngamaBhabhiloni ngowama-607 B.C.E. Kwakubonakala ngathi uSathana uphumelele ekunyeliseni ulongamo lukaYehova.

17. Yintoni ebonisa ukuba uYehova wayesalawula phezu kwako nje ukubhukuqwa kobukumkani bukaDavide?

¹⁷ Ukubhukuqwa kobukumkani bukaDavide—nokubhukuqwa kwangaphambili kobukumkani basemntla bukaSirayeli—kwakungqina, kungekhona ukusilela kolongamo lukaYehova, kodwa imiphumo emibi yempembelelo kaSathana nokufuna kwabantu ukuzimela geqe kuThixo. (IMizekeliso 16:25; Yeremiya 10:23) Ukubonisa ukuba uYehova wayesalawula, wathetha la mazwi esebenzisa umprofeti uHezekile: “Shenxisa unkontsho, uze uphakamise ususe isithsaba. . . . Ndiya kukonakalisa, ndikonakalise, ndikonakalise. Nako oku ke, ngokuqinisekileyo akuyi kuba kokukabani ade afike lowo unelungelo elisemthethweni, yaye ndimele ndikunike yena.” (Hezekile 21:26, 27) Loo mazwi abonisa ukuba ‘imbewu’ ethenjisiweyo, Lowo ‘wayenelungelo elisemthethweni,’ yayingekafiki.

18. Ingelosi uGabriyeli yathini kuMariya?

¹⁸ Makhe siye kunyaka wesi-2 B.C.E. Ingelosi uGabriyeli yathunyelwa kuMariya, intombi enyulu eNazarete, isixeko saseGalili kumntla wePalestina. Le ngelosi yathi: “Khangela! uya kukhawula esibelekweni sakho uze uzale unyana, umbize ngokuba nguYesu igama lakhe. Yena uya kuba mkhulu, abizwe ngokuba nguNyana wOyena Uphakamileyo; yaye uYehova uThixo uya kumnika itrone kaDavide uyise, kwaye uya kulawula njengokumkani phezu kwendlu kaYakobi ngonaphakade, yaye ubukumkani bakhe abuyi kuba nasiphelo.”—Luka 1:31-33.

19. Kusondele ixesha laziphi iziganeko ezichulumancisayo?

¹⁹ Lade lasondela ke ixesha lokutyhilwa “kwemfihlelo engcwele.” Kungekudala Lowo ‘uyimbewu’ wayeza kuvela. (Galati 4:4; 1 Timoti 3:16) Wayeza kutyunyuzwa nguSathana esithendeni. Kodwa loo “mbewu” yona yayiza kutyumza uSathana entloko, imbulale yena namahlakani akhe. Kwakhona yayiza kungqina ukuba ngoBukumkani bukaThixo, wonke umonakalo owenziwe nguSathana uya kususwa, luze luthethelelwe ulongamo lukaYehova. (Hebhere 2:14; 1 Yohane 3:8) Wayeza kukufeza njani oku uYesu? Nguwuphi umzekelo awasishiyela wona ukuba siwuxelise? Iimpendulo siza kuzifumana kwinqaku elilandelayo.

[Umbhalo osemazantsi]

Ungachaza Na?

• Yintoni eyenza uYehova abe nguMlawuli ofanelekileyo wendalo yonke?

• Kwakutheni ukuze uYehova afune ukuseka uBukumkani?

• UYehova wayityhila njani ngokuthe ngcembe ‘imfihlelo engcwele’?

• Yintoni ebonisa ukuba uYehova wayesalawula phezu kwako nje ukubhukuqwa kobukumkani bukaDavide?

[Umfanekiso okwiphepha 23]

Esebenzisa uAbraham uYehova waprofeta ngantoni?

[Umfanekiso okwiphepha 25]

Kutheni ukubhukuqwa kobukumkani bukaDavide kungabonisi ukuba ulongamo lukaYehova lusilele?