Ukuqwalasela Imizekelo Yokuzeka Kade Umsindo

“UThixo . . . wathwala enokuzeka kade okukhulu izitya zengqumbo, zilungiselwe intshabalalo.”—ROMA 9:22.

1. (a) Lisinceda njani iLizwi likaThixo eliphefumlelweyo? (b) Ngokuphathelele oku, kutheni apha kuqwalaselwa uphawu lokuzeka kade umsindo?

UYEHOVA uThixo, uMdali wethu, usinike iLizwi lakhe eliphefumlelweyo, iBhayibhile Engcwele. Lisebenza ‘njengesibane seenyawo zethu nokukhanya emendweni wethu.’ (INdumiso 119:105) Kwakhona iLizwi likaThixo lisinceda ukuba ‘sixhobele wonke umsebenzi olungileyo.’ (2 Timoti 3:16, 17) Enye indlela elisixhobisa ngayo kungokusinika imizekelo emihle yabantu ababonakalisa ukuzeka kade umsindo. Olu phawu lusesinye seziqhamo zomoya kaThixo yaye asinakuyifumana inkoliseko yakhe kwaye singenakuhlalisana kakuhle nabantu ngaphandle kwalo.—Galati 5:22, 23.

2. Linayiphi intsingiselo igama lesiGrike eliguqulelwe ngokuthi “ukuzeka kade umsindo,” yaye ngubani obalaseleyo ekubonakaliseni olu phawu?

² Igama lesiGrike eliguqulelwe ngokuthi “ukuzeka kade umsindo” ngokoqobo lithetha “ukuwubamba umsindo.” Ukuzeka kade umsindo kuye kwachazwa “njengophawu lokukwazi ukuzibamba xa ucatshukisiwe ukuze ungangxami ngokuziphindezelela okanye wohlwaye ngokukhawuleza.” (IVine’s Expository Dictionary of Old and New Testament Words, nguW. E. Vine, Umqulu 3, iphepha 12) Ukuzeka kade umsindo kuthetha ukukwazi ukuzeyisa nokuwubamba umsindo. Yaye ngubani oyena ubalaseleyo ekuwubambeni umsindo, ebonakalisa ukuzeka kade umsindo? Akukho wumbi ngaphandle koYehova uThixo. Ngenxa yoko, kwiEksodus 34:6, sifunda ukuba uYehova ‘unguThixo onemfesane, onobabalo, ozeka kade umsindo, omninzi ngenceba nenyaniso.’ Enyanisweni, kangangezihlandlo ezisibhozo ezingakumbi eZibhalweni, kuthethwa ngoYehova ‘njengozeka kade umsindo.’—Numeri 14:18; Nehemiya 9:17; INdumiso 86:15; 103:8; 145:8; Yoweli 2:13; Yona 4:2; Nahum 1:3.

3. Ziziphi iimpawu ezimenza uYehova azeke kade umsindo?

³ Besiya kulindela kanye ukuba uYehova uThixo abe ngozeka kade umsindo, kuba unamandla nobulumko obungenasiphelo, ugqibelele kokusesikweni, yaye uluthando. (Duteronomi 32:4; Yobhi 12:13; Isaya 40:26; 1 Yohane 4:8) Uyazilawula iimpawu zakhe, ezigcina zilungelelene ngokugqibeleleyo ngamaxesha onke. ILizwi lakhe lisichaza njani isizathu nendlela akubonakalise ngayo ukuzeka kade umsindo kubantu abangafezekanga?

Ukuzeka Kade Umsindo Ngenxa Yegama Lakhe

4. Ziziphi izizathu ezibalukileyo ezibangele uThixo abonakalise ukuzeka kade umsindo kuboni?

⁴ Kutheni uYehova ezeka kade umsindo? Kutheni engabohlwayi ngoko nangoko nje aboni? Akungenxa yokuba engakhathali okanye engenamdla ekubonakalisweni kobulungisa. Akunjalo, kodwa uYehova unezizathu ezisengqiqweni zokuzeka kade umsindo aze angakhawulezi ukubohlwaya abantu. Esinye isizathu sikukuze igama lakhe laziswe. Kwakhona esinye isizathu sikukuba kwakufuneka ithuba elaneleyo ukuze kuzinziswe imbambano yolongamo lukaThixo neyengqibelelo yoluntu, eyaphakanyiswa yimvukelo yase-Eden. Kanti esinye isizathu sokuzeka kade umsindo kukaThixo sikukuba kuvulela abanxaxhayo ithuba lokulungisa iindlela zabo.

5, 6. Kwakutheni ukuze uYehova abonakalise ukuzeka kade umsindo xa abantu bavukelayo?

⁵ UYehova wabonakalisa ukuzeka kade umsindo ekuqhubaneni nesibini sokuqala esingabantu kumyezo wase-Eden. Xa savukela umthetho wakhe ngokuthi sitye kwisiqhamo esalelweyo somthi wokwazi okulungileyo nokubi, wayenokusitshabalalisa zisuka nje ndawonye nesithunywa sezulu esingendawo esakhohlisa uEva. Alithandabuzeki elokuba oko kwakuphazamisana ngokupheleleyo nemilinganiselo kaYehova yobulungisa neyokusesikweni, nelokuba wayecatshukisiwe ngabo bavukeli bathathu. Wayeya kuba wenza okuselungelweni lakhe ngokupheleleyo ukuba wayebatshabalalise ngoko nangoko. UThixo wayemyalile umntu wokuqala, uAdam wathi: “Ke wona umthi wokwazi okulungileyo nokubi uze ungawudli; kuba mhlana uthe wawudla, uya kufa.” (Genesis 2:17) Kwangolo suku uAdam awona ngalo, uThixo wazibizela ematyaleni ezo zaphuli-mthetho waza wazigwebela ukufa. Ngokuvisisana nesigwebo sabo, uAdam noEva bafa ngolo suku. Ukanti, uMdali wethu ozeka kade umsindo wamvumela uAdam ukuba aphile iminyaka engama-930.—Genesis 5:5.

⁶ UThixo wayenezizathu ezivakalayo zokuzeka kade umsindo, okanye zokuwubamba umsindo wakhe, kule meko. Ukuba wayebatshabalalise ngoko nangoko abo bavukeli, oku ngekwakungazange kuluzinzise ugculelo oluzicaceleyo lukaMtyholi lokuba uYehova uThixo akafanelwanga kukunqulwa yaye akanakuze abe nabo abakhonzi abangabantu abaya kuyigcina ingqibelelo yabo kuye nokuba sekumnyam’ entla. Ngaphezu koko, imibuzo enjengale ilandelayo ibiya kushiywa ingaphendulwanga: Ngubani owayebekek’ ityala ngokona kuka-Adam noEva? Ngaba kwasekuqaleni uYehova wabadala bebuthathaka kangangokuba babengenakusixhathisa isilingo wandula ke wabohlwaya ngokuwela kuso? Konke oku kucacisiwe kwingxelo efumaneka kwincwadi kaYobhi, isahluko 1 nesesi-2. Ngokuvumela uhlanga lwabantu ukuba lwande, uYehova wayevulela uluntu ithuba lokuba luwangqine amabango kaSathana ebubuxoki.

7. Kwakutheni ukuze uYehova angamtshabalalisi ngoko nangoko uFaro?

⁷ Xa uYehova wayeza kuhlangula abantu bakhe, amaSirayeli, kubukhoboka baseYiputa, kwakhona wazingqina engozeka kade umsindo. UYehova ngewayemtshabalalise ngoko nangoko uFaro nomkhosi wakhe. Noko ke, kunokuba enjenjalo, uThixo wabanyamezela kangangethuba elithile. Ziziphi izizathu ezivakalayo ezabangela ukuba enze oku? Enyanisweni, njengoko ixesha lalihamba, uFaro wawalela ngokungqongqo ngakumbi amaSirayeli ukuba ahambe eYiputa njengabantu abakhululekileyo bakaYehova. Ngaloo ndlela wazibonakalisa ‘esisitya sengqumbo’ esifanelwe kukutshatyalaliswa ngenxa yokungamphulaphuli uYehova. (Roma 9:14-24) Kanti, kwakukho isizathu esasibaluleke ngakumbi sokuba uThixo wazeka kade umsindo kule meko. Esebenzisa uMoses, wamxelela oku uFaro: “Kuba ngoku, ukuba bendithe ndasolula isandla sam, ndakubetha wena nabantu bakho ngendyikitya yokufa, ngewuthe shwaka akwabakho ehlabathini. Noko ke ndikumisele eli thuba lokuba ndiwabonakalalise amandla am kuwe, laziswe igama lam ehlabathini lonke.”—Eksodus 9:15, 16.

8. Sisiphi isizathu esabangela uThixo angawatshabalalisi amaSirayeli anemvukelo entlango?

⁸ Kwakhona ngezizathu ezivakalayo uYehova wabonakalisa ukuzeka kade umsindo xa amaSirayeli ayesentlango. Hayi indlela awakubeka eluvavanyweni ngayo ukuba nomonde kukaThixo ngokunqula ithole legolide nangokusilela ukubonakalisa ukholo xa iintlola ezilishumi zabuya nengxelo embi! UThixo akazange awalahle njengabantu bakhe ekubeni kwakubandakanyeke igama nodumo lwakhe. Ewe, uYehova wabonakalisa ukuzeka kade umsindo ngenxa yegama lakhe.—Eksodus 32:10-14; Numeri 14:11-20.

Ukuzeka Kade Umsindo Ngenxa Yabantu

9. Kwakutheni ukuze uYehova abonise ukuzeka kade umsindo ngemihla kaNowa?

⁹ UYehova uye wazeka kade umsindo ngenxa yoluntu ukususela oko uAdam wayonisela yonke inzala yakhe, esenza okungekho sikweni okukhulu kuyo ngokona. Ngenxa yokuzeka kade kwakhe umsindo uThixo uye wabangela ukuba ukubonisela kwakhe kulungiswe ngokuvulela ithuba lokuba abantu abaguqukayo baxolelaniswe kunye naye. (Roma 5:8-10) Kwakhona uYehova uThixo wabonakalisa ukuzeka kade umsindo ebantwini ngomhla kaNowa. Ngelo xesha, “wabona uThixo ukuba ububi babantu bandile ehlabathini, konke ukuyila kweengcinga zentliziyo yabo kubububi bodwa imihla yonke.” (Genesis 6:5) Nangona uThixo wayenokulutshayela kuthi tu uhlanga lwabantu akuba nje ebone le meko, wenza isigqibo sokuyiphelisa le meko kwiminyaka eli-120. (Genesis 6:3) Oku kuzeka kade umsindo kwakhe kwavulela uNowa ithuba lokuzala oonyana abathathu, lokuba bakhule baze batshate, nelokuba loo ntsapho yakhe umkhombe wokusindisa imiphefumlo yayo nowokulondoloza izilwanyana. Ngale ndlela injongo kaThixo yantlandlolo ngomhlaba yayinokuphunyezwa.

10, 11. Kwakutheni ukuze uYehova abonakalise ukuzeka kade umsindo okungaka kuhlanga lwakwaSirayeli?

¹⁰ Enye imbonakaliso yokuzeka kade umsindo ibonakala ngokukhethekileyo kwindlela uThixo awaqhubana ngayo nabantu bakhe. Kuchazwa “njengokunyamezela ngomonde ukoniwa nokucatshukiswa, okuhambisana nokuzibek’ ethembeni lokuba iimeko zobuya zilunge phezu kwako nje ukuphazamiseka kolwalamano.” (Insight on the Scriptures, Umqulu 2, iphepha 262; epapashwe yiWatchtower Bible and Tract Society of New York, Inc.) Oku kuphuhlisa isizathu esongezelelekileyo sokuba uThixo wazeka kade umsindo kumaSirayeli. Atyeka ngokuphindaphindiweyo kuYehova aza aba ngamakhoboka ezizwe zabeeNtlanga. Sekunjalo, wabonakalisa ukuzeka kade umsindo ngokuthi awahlangule amaSirayeli aze awanike ithuba lokuguquka.—ABagwebi 2:16-20.

¹¹ Inkoliso yookumkani bakwaSirayeli bakhokelela abalawulwa babo kunqulo lobuxoki. Ngaba uThixo walulahla olo hlanga ngoko nangoko? Akunjalo, akazange aphelelwe kamsinya lithemba lokuba iimeko zobuya zilunge phezu kwako nje ukuphazaiseka kolwalamano. Ewe, uYehova wazeka kade umsindo. Ebonakalisa ukuzeka kade umsindo, ngokuphindaphindiweyo uThixo wawavulela ithuba lokuguquka. Sifunda oku kweyesi-2 yeziKronike 36:15, 16: “UYehova, uThixo wooyise, wathumela kubo ngabathunywa bakhe, wanyameka ukuthumela; ngokuba wayenemfesane ngabantu bakhe, nekhaya lakhe. Baye bebagculela abathunywa bakaThixo, bewadela amazwi akhe, bebagxeka abaprofeti bakhe, bada benyuka ubushushu bukaYehova, beza kubantu bakhe, kwada akwabakho mpilo.”

12. Bubuphi ubungqina obunikelwe ziZibhalo zamaKristu zesiGrike ngokuphathelele isizathu sokuba uYehova azeke kade umsindo?

¹² IZibhalo zamaKristu zesiGrike nazo zinikela ubungqina bokuba uYehova ubonakalisa ukuzeka kade umsindo ukuze ancede abantu bakhe abanxaxhayo. Ngokomzekelo, umpostile uPawulos uwabuza oku amaKristu akreqayo: “Uyabudela na ubutyebi bobubele bakhe, nonyamezelo, nokuzeka kade umsindo; ungazi ukuba ububele bukaThixo bukusa enguqukweni?” (Roma 2:4) Kwangenjongo efanayo uPetros wabhala la mazwi: “INkosi ayilibali dinga, njengoko abathile baba iyalibala; isuka izeke kade umsindo kuthi, ingangi kungatshabalala nabani; inga bonke bangasinga enguqukweni.” (2 Petros 3:9) Ngokufanelekileyo, sixelelwa ukuba ‘ukuzeka kade umsindo kweNkosi yethu sifanele sikubalele ekuthini lusindiso.’ (2 Petros 3:15) Ngaloo ndlela, siyabona ukuba uYehova uzeka kade umsindo, kungekhona ngenxa yokuqhutywa ziimvakalelo okanye ukungakhathali, kodwa ngenxa yokuba kubandakanyeke igama neenjongo zakhe yaye unenceba nothando.

Umzekelo KaYesu Wokuzeka Kade Umsindo

13. Bubuphi ubungqina obungokweZibhalo obubonakalisa ukuba uYesu Kristu wayenokuzeka kade umsindo?

¹³ Omnye umzekelo ongokuphela kosondele kokaThixo wokuzeka kade umsindo ngulowo woNyana wakhe, uMesiya, uYesu Kristu. Wamisela umzekelo obalaseleyo wokuzeyisa ngokuthi angangxami ngokuziphindezelela phezu kwako nje ukucatshukiswa.a Into yokuba uMesiya wayeya kuzeka kade umsindo yaxelwa kwangaphambili ngumprofeti uIsaya ngala mazwi: “Wakhandaniswa, wazithoba, engawuvuli umlomo wakhe, njengemvana esiwa ekuxhelweni; nanjengegusha esisidenge phambi kwabachebi bayo, akawuvula umlomo wakhe.” (Isaya 53:7) Okungqinela inyaniso efanayo ngamazwi kaPetros athi: “Obesithi etshabhiswa, angaphindezeli atshabhise, athi esiva ubunzima, angaphindezeli asongele; ke ubeyekele kulowo ugwebayo ngokobulungisa.” (1 Petros 2:23) Hayi indlela abafundi bakaYesu abamele ukuba bamlinga ngayo ngokusoloko bephikisana ngokuphathelele oyena umkhulu! Sekunjalo, okunjani kona ukuzeka kade umsindo nokuba nomonde awakubonakalisayo kubo!—Marko 9:34; Luka 9:46; 22:24.

14. Ufanele usishukumisele entwenini umzekelo kaYesu wokuzeka kade umsindo?

¹⁴ Sifanele silandele umzekelo owamiselwa nguYesu wokuzeka kade umsindo. UPawulos wabhala oku: “[Masilubaleke] ngomonde ugqatso olubekwe phambi kwethu; sise amehlo kuyo iMbangi noMgqibelelisi wokholo lwethu, uYesu, owathi, ngenxa yovuyo olwalubekwe phambi kwakhe, wawunyamezela [umthi wentuthumbo, NW], elidelile ihlazo, waza wahlala phantsi ngasekunene kwetrone kaThixo. Ewe, mqondeni lowo ukunyamezeleyo ukumphikisa okungaka kwaboni, ukuze ningadinwa, ingatyhafi imiphefumlo yenu.”—Hebhere 12:1-3.

15. Sazi njani ukuba uYesu wayenokuzeka kade umsindo yaye wayekulungele ukunyamezela izilingo?

¹⁵ Isibakala sokuba uYesu wayenokuzeka kade umsindo yaye ekulungele ukunyamezela izilingo sinokubonwa kwisimo sengqondo awasibonakalisayo ngexesha lokubanjwa kwakhe. Emva kokukhalimela uPetros ngenxa yokusebenzisa ikrele ukuze akhusele iNkosi yakhe, uYesu wathi: “Uba andinako na ngoku ukumbongoza uBawo, andikhuphele imikhosi yezithunywa zezulu engaphezu kweshumi elinamibini? Bezingathini na ke oko ukuzaliseka izibhalo ezithi, kumele ukuba kube nje?”—Mateyu 26:51-54; Yohane 18:10, 11.

Abanye Abantu Abayimizekelo Yokuzeka Kade Umsindo

16. IZibhalo zibonisa njani ukuba unyana kaYakobi uYosefu wayenokuzeka kade umsindo?

¹⁶ Kwanabantu abangafezekanga nabanesono banako ukubonakalisa ukuzeka kade umsindo. IZibhalo zesiHebhere ziqulethe imizekelo yabantu abangafezekanga abathi banyamezela ngomonde ngoxa besoniwa. Ngokomzekelo, uYosefu, unyana wosolusapho ongumHebhere uYakobi. Hayi indlela awakunyamezela ngomonde ngayo ukuphathwa ngokungekho sikweni ngabantakwabo ngoyise nangumkaPotifare! (Genesis 37:18-28; 39:1-20) UYosefu akazange azivumele ezi zilingo zimenze abe lugcwabevu ngumsindo. Oku kwacaca kumazwi akhe awawabhekisa kubantakwabo esithi: “Musani ukuba buhlungu, ningaziqumbeli, ukuba nathengisa ngam apha; kuba uThixo wandithuma phambi kwenu ukuze ndisindise abantu.” (Genesis 45:4, 5) Onjani wona ukuba mhle umzekelo wokuzeka kade umsindo owamiselwa nguYosefu!

17, 18. Bubuphi ubungqina bokuzeka kade umsindo esibubonayo kwimeko kaDavide?

¹⁷ UDavide ungomnye umzekelo womkhonzi othembekileyo kaYehova owanyamezela ngomonde ngoxa wayesoniwa, ebonakalisa ukuzeka kade umsindo. Ezingelwa okwenja nguKumkani uSawule onomona, kangangezihlandlo ezibini uDavide ngewayeziphindezelele ngokumbulala. (1 Samuweli 24:1-22; 26:1-25) Kodwa uDavide walindela kuThixo, njengoko kunokubonwa kumazwi akhe awawabhekisa kuAbhishayi: “Ukuba akathanga uYehova ambulale [uSawule], mhlawumbi kwafika imini yakhe wafa, mhlawumbi wehla waya emfazweni wabulawa: makube lee kum ngenxa kaYehova ukukha ndise isandla sam kumthanjiswa kaYehova.” (1 Samuweli 26:10, 11) Ewe, uDavide wayenawo amandla okukuphelisa ukuzingelwa kwakhe nguSawule. Kunoko, uDavide wakhetha ukuzeka kade umsindo.

¹⁸ Kwakhona, qwalasela okwenzekayo xa uKumkani uDavide wayesaba kunyana wakhe onobungozi uAbhisalom. UShimehi, umBhenjamin ongowendlu kaSawule, wamxuluba ngamatye uDavide waza wamtshabhisa, ememeza esithi: “Phuma, phuma, mfondini wamagazi, mfondini ulitshijolo.” UAbhishayi wayefuna ukumbulala uShimehi, kodwa uDavide akazange afune ukuziphindezelela. Kunokuba enjenjalo, kwakhona wabonakalisa uphawu lokuzeka kade umsindo.—2 Samuweli 16:5-13.

Qwalasela Umzekelo KaPawulos

19, 20. Umpostile uPawulos wazibonakalisa njani enokuzeka kade umsindo?

¹⁹ KwiZibhalo zamaKristu zesiGrike, sinomnye umzekelo omhle womntu ongafezekanga owabonakalisa ukuzeka kade umsindo—umpostile uPawulos. Wabonakalisa ukunyamezela ngomonde, ukuzeka kade umsindo, ngokuphathelele iintshaba zakhe ezingokonqulo nabantu abazibanga bengamaKristu. Ewe, uPawulos wabonakalisa ukuzeka kade umsindo nangona bambi ebandleni laseKorinte babesithi: “Iincwadi ezi zakhe okunene zinzima, zinamandla; kodwa ke akubakho ngenkqu akanamandla, nokuthetha kwakhe akunto yanto.”—2 Korinte 10:10; 11:5, 6, 22-33.

²⁰ Ngoko ke, ngesizathu esihle, uPawulos wawaxelela oku amaKorinte: “Sisuka sithi emicimbini yonke siziqondakalise ngokwabalungiseleli bakaThixo, ngokunyamezela okukhulu, sisezimbandezelweni, sisezingxakekweni, sisezingxinanweni, sinemivumbo, sisezintolongweni, siseziphithiphithini, sibulaleka, singalali, sizila ukudla, sinobunyulu, sinokwazi, sinokuzeka kade umsindo, sinobubele, sinoMoya oyiNgcwele, sinothando olungahanahanisiyo.” (2 Korinte 6:4-6) Ngendlela efanayo, lo mpostile wakwazi ukumbhalela uTimoti owayesebenza naye athi: “Ke wena uyilandile eyam imfundiso, ihambo, ingqibo, ukholo, ukuzeka kade umsindo, uthando, unyamezelo, iintshutshiso, iintlungu, . . . yaza iNkosi yandihlangula kuko konke.” (2 Timoti 3:10, 11) Onjani wona ukuba mhle umzekelo wokuzeka kade umsindo umpostile uPawulos asimisele wona!

21. Lisenokusinceda njani inqaku elilandelayo?

²¹ Ngokucacileyo, iZibhalo zinothotho lwemizekelo yokuzeka kade umsindo. UYehova noNyana wakhe othandekayo bayimizekelo ebalaseleyo. Kodwa hayi indlela ekukhuthaza ngayo ukuphawula ukuba olu phawu luye lwabonakaliswa ngabantu abangafezekanga, njengoYosefu, uDavide nompostile uPawulos! Inqaku elilandelayo lilungiselelwe ukusinceda sixelise loo mizekelo mihle.

[Umbhalo osemazantsi]

Ubuya Kuphendula Njani?

◻ Kuthetha ukuthini ukuzeka kade umsindo?

◻ Ziziphi izizathu eziyintloko ezabangela ukuba uYehova azeke kade umsindo?

◻ UYesu wazibonakalisa ngaziphi iindlela enokuzeka kade umsindo?

◻ Bubuphi ubungqina obungokweZibhalo obubonisa ukuba nabantu abangafezekanga banokubonakalisa ukuzeka kade umsindo?

[Umfanekiso okwiphepha 10]

UYosefu, uYesu, uDavide, uPawulos noYobhi babeyimizekelo yokuzeka kade umsindo

[Umfanekiso okwiphepha 13]

UYesu wabonakalisa ukuzeka kade umsindo kubafundi bakhe