Yibani Nokuzeka Kade Umsindo Kubantu Bonke
“Siyanivuselela ke, bazalwana, balulekeni abanxaxhayo; bakhuzeni abamxhelo mncinane; basekeleni abathambileyo; yibani nokuzeka kade umsindo kubantu bonke.”—1 TESALONIKA 5:14.
1. Kuphi yaye kuphantsi kwaziphi iimeko athe amaNgqina kaYehova abonakalisa ukuzeka kade umsindo?
ONJANI wona ukubalasela umzekelo wokuzeka kade umsindo oye wabonakaliswa ngamaNgqina kaYehova ale mihla! Aye anyamezela impatho engqwabalala nentshutshiso kumazwe awayesakuba ngawobuNazi nobuFasi nakumazwe anjengaseMalawi kude kube ngoku. Abanye abakwabonakalisa ukuzeka kade umsindo ngabo bahlala kumakhaya awahluleleneyo ngokonqulo.
2. Ngabaphi oothunywashe ababini abaye babangela iparadisi yokomoya enanditshwa ngabantu bakaYehova?
2 Phezu kwako nje ukutshutshiswa nokuphathwa ngqwabalala, abantu bakaYehova abazahluleleyo bebenandipha iintsikelelo zeparadisi yokomoya. Eneneni, izibakala zibonisa ukuba amaKristu athanjisiweyo aqalisa ukuyinandipha ngonyaka we-1919. Ngabaphi oothunywashe abaye babangela iparadisi yokomoya? Okokuqala, abantu bakaYehova baphila kwimeko enjengeparadisi ngenxa yokuba uThixo uye wababuyisela abakhonzi bakhe abathanjisiweyo ‘kwilizwe,’ okanye kwimeko yabo yonqulo olunyulu. (Isaya 66:7, 8) Enye into eyenza iqaqambe le paradisi yokomoya kukuba mntu ngamnye okuyo ubonakalisa iziqhamo zomoya kaThixo. Ukuzeka kade umsindo kusesinye sazo. (Galati 5:22, 23) Ukubaluleka kolu phawu ngokuphathelele iparadisi yethu yokomoya kunokubonwa kula mazwi omphengululi uWilliam Barclay athi: “Unotshe ukuba kungaze kubekho into ebizwa ngokuba bubudlelane bobuKristu ngaphandle kwemakrothumia [ukuzeka kade umsindo]. . . . Yaye isizathu soko nasi—imakrothumia iluphawu olubalaseleyo lukaThixo (Roma 2.4; 9.22).” (A New Testament Wordbook, iphepha 84) Ewe, leyo yindlela kanye ukuzeka kade umsindo okubaluleke ngayo!
Ukuzeka Kade Umsindo Kubazalwana Bethu
3. Sisiphi isifundo esingokuzeka kade umsindo uYesu awasifundisa uPetros?
3 Kubonakala ukuba umpostile uPetros wayenobunzima obuthile ekubonakaliseni ukuzeka kade umsindo, kuba wakha wambuza oku uYesu: “Nkosi, koba futhi kangaphi na umzalwana wam endona, ndimxolela? Koda kube kasixhenxe na?” UYesu wamluleka esithi: “Andithi kuwe, koda kube kasixhenxe; ndithi, koda kube [kamashumi asixhenxe anesixhenxe, NW].” (Mateyu 18:21, 22) Ngamany’ amazwi, akukho mda wezihlandlo zokunyamezelana nezokumxolela ubani osonayo. Ngapha koko, asinakuyicinga into yokuba kungakho umntu onexesha lokube ebala de kube zizihlandlo ezingama-77! Kanti, ngokuqinisekileyo ukuze ukwazi ukuxolela ngolo hlobo kufuneka ube nokuzeka kade umsindo.
4. Kutheni abadala ngokukhethekileyo kufuneka babe nokuzeka kade umsindo?
4 Ngokuphathelele ukubonakaliswa kokuzeka kade umsindo ngabazalwana bokomoya, alithandabuzeki elokuba abadala bebandla bafanele bamisele umzekelo. Umonde wabo usenokubekwa eluvavanyweni kuba amakholwa athile angoowabo esenokubonakalisa ukungakhathali okanye ukungabi nantsebenziswano. Amanye asenokungasithabathi nzulu kangako isiluleko sokulungisa imikhwa emibi. Abadala bamele balumke bangabi ngabacatshukiswa ngokulula bubuthathaka babazalwana noodade babo abangamaKristu. Kunoko, aba balusi bokomoya bafanele bakhumbule esi siluleko: “Thina ke bomeleleyo sifanele ukukuthwala ukuswela amandla kwabangomeleleyo, singazikholisi.”—Roma 15:1.
5. Yintoni esinokukwazi ukuyinyamezela ukuba sizeka kade umsindo?
5 Kwakhona, kusenokubakho ukungqubana ngeempawu zobuntu ngenxa yobuthathaka neentsilelo esinazo. Ngenxa yotyekelo lwesono okanye imikhwa esinayo, sisenokubacaphukisa abazalwana bethu, yaye nabo basenokwenza okufanayo kuthi. Ngoko ke, hayi indlela esifaneleke ngayo isiluleko esithi: “Ninyamezelana, nixolelana, ukuba ubani uthi abe nokusola ngakubani; njengokuba naye [uYehova, NW] wanixolelayo, yenjani njalo nani.” (Kolose 3:13) ‘Ukunyamezelana’ kuthetha ukuzeka kade umsindo, nangona sisenokuba nezizathu ezivakalayo zokumkhalazela ubani othile. Asifanele sibuyise isixhiba okanye simohlwaye umzalwana wethu, singamkhalazeli nokumkhalazela.—Yakobi 5:9, TE.
6. Kutheni ukuzeka kade umsindo kulikhondo lobulumko?
6 Esinye isiluleko esifanayo seso sifumaneka kwabaseRoma 12:19 esithi: “Musani ukuziphindezelela, zintanda; yikhweleleni ingqumbo; kuba kubhaliwe kwathiwa, Impindezelo yeyam, kuya kubuyekeza mna, itsho iNkosi.” ‘Ukuyikhwelela ingqumbo’ kuthetha ukuzibamba okanye ukuzeka kade umsindo. Ukubonakalisa olu phawu kulikhondo lobulumko, kuba kuyingenelo kuthi nakwabanye. Ukuba kuye kwavela ingxaki, thina siziva sikhululekile kuba ngokuzeka kade umsindo kwethu, asiyenzi ibe mandundu ingxaki leyo. Kwaye umntu lowo esibonakalisa ukuzeka kade umsindo kuye naye uziva ekhululekile kuba asimohlwayi okanye siziphindezelele kuye ngandlel’ ithile. Akumangalisi ke ngoko ukuba uPawulos wabongoza amaKristu angoowabo esithi “bakhuzeni abamxhelo mncinane; basekeleni abathambileyo; yibani nokuzeka kade umsindo kubantu bonke”!—1 Tesalonika 5:14.
Kwisangqa Sentsapho
7. Kutheni abantu abatshatileyo befanele babonakalise ukuzeka kade umsindo?
7 Ngokufanelekileyo kuye kwathiwa umtshato owonwabisayo ulumanyano lwabo babini babalasele ngokuxolela. Kutheth’ ukuthini oko? Abantu abonwabileyo emtshatweni wabo bazeka kade umsindo omnye komnye. Abantu batsaleleka omnye komnye ngenxa yeempawu zabo ezingafaniyo. Ezi mpawu zahlukeneyo zisenokuba nomtsalane, ukanti zisenokuba ngunobangela wokungavisisani nto leyo eyongezelela kwiingcinezelo nakunxunguphalo olusele kakade lubangela ukuba amaKristu atshatileyo abe “nembandezelo enyameni.” (1 Korinte 7:28) Ngokomzekelo, masithi indoda asimntu unikela ingqalelo engako kwiinkcukacha okanye ityekele ekubeni yengakhathaliyo okanye elixelegu. Oku kusenokuba sisilingo ngokwenene kumfazi wayo. Kodwa ukuba amacebiso avakaliswa ngobubele awaphumeleli, kusenokufuneka nje ukuba umfazi abunyamezele ubuthathaka bayo ngokuthi azeke kade umsindo.
8. Kutheni amadoda kusenokufuneka ebonakalise ukuzeka kade umsindo?
8 Kwelinye icala, umfazi usenokuba ngumntu onobucukubhede aze atyekele ekubeni ngoyikruqulayo indoda yakhe. Oku kusenokusikhumbuza isibhalo esithi: “Kulungile ukuhlala elungqamekweni oluphezu kwendlu, kunokuhlala ndlwini-nye nomfazi okruqulayo.” (IMizekeliso 25:24, Today’s English Version) Kwimeko enjalo, kufuneka kubonakaliswe ukuzeka kade umsindo ngokuvisisana nesiluleko sikaPawulos esithi: “Nina madoda, bathandeni abafazi benu, ningabi bukhali kubo.” (Kolose 3:19) Kwakhona kufuneka amadoda abonakalise ukuzeka kade umsindo ukuze abe nokuthobela isiluleko sompostile uPetros esithi: “Ngokunjalo, nina madoda, hlalani nabo [abafazi benu] ngokokwazi, nimbeka umfazi, njengesona sitya siethe-ethe, njengeendlalifa kunye nani zobabalo lobomi, ukuze imithandazo yenu ingathinteleki.” (1 Petros 3:7) Maxa wambi ubuthathaka bomfazi busenokuba sisilingo endodeni, kodwa ukuzeka kade umsindo kuya kuyinceda ukuba ibunyamezele.
9. Kutheni kufuneka abazali babonakalise ukuzeka kade umsindo?
9 Abazali kufuneka babonakalise ukuzeka kade umsindo ukuze bakwazi ukubakhulisa ngokunempumelelo abantwana babo. Abaselula basenokuphindaphinda iimpazamo ezifanayo. Basenokubonakala beneenkani okanye beneentloko ezilukhuni yaye basenokuba sisilingo kubazali babo. Kwiimeko ezinjalo, abazali abangamaKristu bafanele bazibambe, bangabhabhazeli ngumsindo kodwa bahlale bezolile ngoxa benamathele ngokuqinileyo kwimilinganiselo yobulungisa. Ooyise bafanele bakhumbule ukuba nabo bakhe babatsha yaye babezenza iimpazamo. Kufuneka basebenzise isiluleko sikaPawulos esithi: “Nina boyise, musani ukubacaphukisa abantwana benu, ukuze bangafi iintliziyo.”—Kolose 3:21.
Kwabo Bangaphandle
10. Sifanele siziphathe njani kwiindawo esiphangela kuzo, yaye nguwuphi umzekelo okhoyo woku?
10 Ngenxa yokungafezeki nokuzingca koluntu, kusenokuvela iimeko ezingathandekiyo kwindawo umKristu aphangela kuyo. Kungalikhondo lobulumko ngaye ukusebenzisa ubuchule nokunyamezela ukoniwa ukuze alondoloze uxolo. Into ebonisa indlela ekunokuba bubulumko ngayo oku ngamava omKristu owaba lixhoba lokungcikivwa ngenxa yokuchukelwa ngomnye umqeshwa awayesebenza naye. Ngenxa yokuba lo mzalwana engazange adale mbambano ngako oku kodwa wabonakalisa ukuzeka kade umsindo, ekuhambeni kwethuba wakwazi ukuqalisa isifundo seBhayibhile kunye naloo mqeshwa wayenochuku.
11. Kuxa kutheni apho ngokukhethekileyo sifanele sibonakalise ukuzeka kade umsindo khona, yaye ngoba?
11 Abantu bakaYehova bafanele babonakalise ukuzeka kade umsindo ngokukhethekileyo xa benikela ubungqina kwabo bangaphandle kwebandla lamaKristu. Ngokufuthi, amaKristu afumana intsabelo ekrwada okanye engqwabalala. Ngaba bekuya kuba kokufanelekileyo okanye bubulumko ukuphendula ngendlela efanayo? Akunjalo, kuba oko bekungayi kuba kukubonakalisa ukuzeka kade umsindo. Ikhondo lobulumko likukukhumbula nokuthobela lo mzekeliso wobulumko: “Impendulo ethambileyo ibuyisa ubushushu; ilizwi elidubulayo linyusa umsindo.”—IMizekeliso 15:1.
Ukholo Nethemba Ziyanceda Ekubonakaliseni Ukuzeka Kade Umsindo
12, 13. Ziziphi iimpawu eziya kusinceda ukuze sizeke kade umsindo?
12 Yintoni enokusinceda ukuze sibonakalise ukuzeka kade umsindo, xa sijamelene neemeko ezimbi gqitha? Enye into kukuba nokholo kumadinga kaThixo. Simele sibe nentembelo koko uThixo akuthethayo. IZibhalo zithi: “Anibanjwanga silingo singesesabantu. Uthembekile ke uThixo, ongayi kuvumela ukuba nilingwe ngaphezu kweninako; owothi, kunye nesilingo eso, avelise ithuba lokuphuma kuso, ukuba nibe nako ukuthwala.” (1 Korinte 10:13) Ngamany’ amazwi, kunjengokuba elinye igqala lakuchaza oku ngokuthi: “Ukuba uThixo uyasivumela, ndinokusinyamezela.” Ewe, sinokusinyamezela ngokuzeka kade umsindo.
13 Into ehambisana ngokusondeleyo nokholo kukuthembela kuBukumkani bukaThixo. Xa bulawula emhlabeni, zonke iimeko ezingendawo ezisenza sibandezeleke ziya kushenxiswa. Ngokuphathelele oku, umdumisi uDavide wathi: “Lahla umsindo, ushiye ubushushu; musa ukuzivuthisa ngomsindo, kuba oko kusingisa ekwenzeni ububi kuphela. Ngokuba abenzi bobubi baya kunqunyulwa; ke bona abamthembayo uYehova, baya kulidla ilifa ilizwe.” (INdumiso 37:8, 9) Ithemba eliqinisekileyo lokuba uThixo uya kuzishenxisa kwakamsinya zonke ezi meko zilingayo liyasinceda ukuba sizeke kade umsindo.
14. Ngawaphi amava abonisa isizathu sokuzeka kade umsindo kwiqabane elingakholwayo?
14 Sifanele sisabele njani ukuba iqabane elingakholwayo lisibangela ukubandezeleka? Hlala ufuna uncedo lukaThixo, yaye hlala unethemba lokuba umchasi lowo uya kuba ngumnquli kaYehova. Umfazi womnye umKristu maxa wambi wayengafuni ukumlungiselela ukudla nokuhlamba impahla yakhe. Wayethetha krwada, ziqengqeleke iintsuku engathethi naye, yaye wade wamyela egqirheni. Indoda yakhe yathi, “Kodwa sihlandlo ngasinye ndandiguqukela kuYehova ngomthandazo, yaye ndakholosa ngaye ukuba andincede ndihlakulele uphawu oluhle lokuzeka kade umsindo ukuze ndingalahlekani nokulungelelana kwam kobuKristu. Kwakhona ndandinethemba lokuba ngenye imini woze aguquke kwisimo sakhe sengqondo.” Emva kokunyamezela loo mpatho kangangeminyaka engama-20, umfazi wakhe waqalisa ukuguquka, kwaye le ndoda yathi: “Hayi indlela endinombulelo ngayo kuYehova ngenxa yokuba endincedile ndahlakulela isiqhamo somoya, ukuzeka kade umsindo, kuba ngoku ndiyayibona imiphumo: Umfazi wam uye waqalisa ukuhamba emendweni wobomi!”
Umthandazo, Ukuthobeka Nothando Ziya Kunceda
15. Kutheni umthandazo unokusinceda ekubonakaliseni ukuzeka kade umsindo?
15 Umthandazo uyenye inkalo eluncedo kakhulu ekubonakaliseni ukuzeka kade umsindo. UPawulos wabongoza esithi: “Ningaxhaleli nto; mazithi iingcelo zenu ezintweni zonke, ngako ukuthandaza nokukhunga, ndawonye nokubulela, zaziswe kuye uThixo. Lwaye uxolo lukaThixo, olugqithisele kuko konke ukuqonda, luya kuzigcina iintliziyo zenu neengqiqo zenu kuKristu Yesu.” (Filipi 4:6, 7) Kwakhona khumbula ukuthobela umyalelo othi: “Umthwalo wakho wulahlele kuYehova; yena wokuzimasa; akayi kuliyekela ilungisa lishukunyiswe naphakade.”—INdumiso 55:22.
16. Ukuthobeka kunokusinceda njani ekubonakaliseni ukuzeka kade umsindo?
16 Kwakhona ukuthobeka kuyenye inkalo eluncedo kakhulu ekuhlakuleleni isiqhamo somoya sokuzeka kade umsindo. Umntu onekratshi akanamonde. Ucaphuka msinya, ukhawuleza abe nomsindo, yaye akayinyamezeli nayiphi na impatho engathandekiyo. Konke oku kuchasene nokuzeka kade umsindo. Kodwa umntu ozithobileyo akazicingeli ngokugqithiseleyo. Ulindela kuYehova, njengokuba uDavide wenzayo xa wayezingelwa nguKumkani uSawule yaye etshabhiswa nguShimehi ongumBhenjamin. (1 Samuweli 24:4-6; 2 Samuweli 16:5-13) Ngenxa yoku, sifanele sinqwenele ukuhamba ‘sinako konke ukuthobeka kwentliziyo nobulali, sinokuzeka kade umsindo, sinyamezelana.’ (Efese 4:2) Ngaphezu koko, sifanele ‘sizithobe emehlweni kaYehova.’—Yakobi 4:10, NW.
17. Kutheni le nto uthando luya kusinceda ekubonakaliseni ukuzeka kade umsindo?
17 Ukuba nothando lokungazingci kuluncedo ngokukhethekileyo ekubonakaliseni ukuzeka kade umsindo. Ngokwenene, “uthando luzeka kade umsindo,” kuba lusibangela sibe nomdla wokwenene nosuk’ entliziyweni ngabanye. (1 Korinte 13:4) Uthando lusibangela ukuba sibe nolwazelelelo, sizibeke kwimeko yabanye. Ngaphezu koko, uthando luyasinceda ukuba sizeke kade umsindo kuba “luthwala iinto zonke; lukholwa ziinto zonke; luthemba iinto zonke; lunyamezela iinto zonke. Uthando aluze lutshitshe.” (1 Korinte 13:7, 8) Ewe, kunjengokuba ingoma yoBukumkani yama-200 kwincwadi ethi Mvumeleni Iindumiso UYehova iluchaza ngokuthi:
“Lubona ukulunga.
Lwakha ubuzalwana.
Ke kwabo banxaxhayo
Lugubungel’ izono.”
Ngaba Ubonakalisa Ukuzeka Kade Umsindo Ngovuyo?
18. Sinokukwazi njani ukubonakalisa ukuzeka kade umsindo ngovuyo?
18 UPawulos wathandazela ukuba amakholwa angoowabo eKolose azaliswe kukukwazi kakuhle ukuthanda kukaThixo ukuze ahambe ngokumfaneleyo uYehova, amkholise, aze axakathe isiqhamo kuwo wonke umsebenzi olungileyo. Ngaloo ndlela ayeya ‘komelezwa ngokomelela konke, ngokokuqina kozuko lwakhe, ade ase kuko konke ukunyamezela, nokuzeka kade umsindo ngovuyo.’ (Kolose 1:9-11) Sekunjalo, umntu anganako njani ‘ukuzeka kade umsindo ngovuyo’? Oko akuphikisani, kuba ukuba novuyo olukhankanywe kwiZibhalo akungombandela nje wokuchwayita okanye ukugcoba. Isiqhamo somoya esiluvuyo siquka imvakalelo yolwaneliseko olunzulu lokwenza okufanelekileyo emehlweni kaThixo. Kwakhona lubangelwa lithemba lokufumana umvuzo othenjisiweyo ngenxa yokuzeka kade umsindo. Kungenxa yoko uYesu wathi: “Ninoyolo nina, xa bathe abantu baningcikiva, banitshutshisa, bathetha zonke izinto ezikhohlakeleyo ngani bexoka, ngenxa yam. Vuyani nigcobe kunene; ngokuba umvuzo wenu mkhulu emazulwini; benjenjalo ukubatshutshisa abaprofeti ababekho phambi kwenu.”—Mateyu 5:11, 12.
19. Yiyiphi imizekelo ebonisa ukuba kuyinto enokwenzeka ukubonakalisa ukuzeka kade umsindo novuyo?
19 UYesu wayenovuyo olunjalo. Enyanisweni, “ngenxa yovuyo olwalubekwe phambi kwakhe, wawunyamezela [umthi wentuthumbo, NW] elidelile ihlazo.” (Hebhere 12:2) Olo vuyo lwambangela uYesu ukuba azeke kade umsindo. Ngokufanayo, qwalasela okwenzekayo xa abapostile batyatyulwayo baza bayalelwa ukuba “bangathethi ngegama likaYesu.” “Bemka ke ngoko entlanganisweni yamatyala, bevuya, ngokuba kuthiwe bakufanele ukuhlaziswa ngenxa yegama lakhe. Kananjalo imihla yonke etempileni, nasemakhaya, babengayeki ukufundisa nokushumayela iindaba ezilungileyo zokuba uYesu unguye uKristu.” (IZenzo 5:40-42) Onjani wona ukuba mhle umzekelo obonisa ukuba abalandeli bakaKristu banako ukuzeka kade umsindo ngovuyo!
20. Ukuba sibonakalisa ukuzeka kade umsindo, oku kunokuluchaphazela njani ulwalamano lwethu nabanye?
20 Ngokuqinisekileyo iLizwi likaThixo linikela isiluleko sobulumko xa lisibongoza ukuba singaziphindezeleli, siwubambe umsindo wethu ngoxa sithemba ukuba izinto ziza kulunga—ewe, sizeke kade umsindo! Sifanele sithandaze rhoqo size sihlakulele esi siqhamo somoya kaThixo ukuze sikwazi ukuqhubana kakuhle nabazalwana noodade wethu ebandleni, nabo bakwisangqa sentsapho yethu, nabantu esiphangela nabo, kwanabantu esidibana nabo kubulungiseleli bobuKristu. Yaye yintoni enokusinceda ukuba sibonakalise ukuzeka kade umsindo? Lukholo, ithemba, ukuthobeka, uvuyo nothando. Ngokwenyaniso, xa sinezo mpawu sinokukwazi ukubonakalisa ukuzeka kade umsindo kubantu bonke.
Uyakhumbula Na?
◻ Kutheni kuyimfuneko ukuzeka kade umsindo ukuze sinandiphe iparadisi yokomoya?
◻ Kutheni abadala ngokukhethekileyo befanele babe nokuzeka kade umsindo?
◻ Kutheni amadoda nabafazi befanele bahlakulele ukuzeka kade umsindo?
◻ Ziziphi ezinye iimpawu eziya kusinceda ukuze sizeke kade umsindo?
[Umfanekiso okwiphepha 17]
Sisiphi isiluleko esivela kuYesu esanceda uPetros ukuba azeke kade umsindo?