‘Yambathani Ukuzeka Kade Umsindo’
“Yambathani umsa wemfesane . . . nokuzeka kade umsindo.”—KOLOSE 3:12.
1. Balisa umzekelo omhle wokuzeka kade umsindo.
URÉGIS, ohlala kumzantsi-ntshona weFransi, wabhaptizwa njengeNgqina likaYehova ngowe-1952. Kangangeminyaka umfazi wakhe wazama konke okusemandleni ukuze athintele imigudu yakhe yokukhonza uYehova. Wazama ukugqabhuza amavili enqwelo-mafutha yakhe ukuze amthintele ukuba angayi kwiintlanganiso, yaye ngesinye isihlandlo wamlandela njengoko wayengena kwindlu ngendlu eshumayela isigidimi seBhayibhile, emgculela xa ethetha nabanini-mzi ngeendaba ezilungileyo zoBukumkani. Nakuba wayejamelene nale ntshutshiso yayiqhubeka, uRégis waqhubeka ezeka kade umsindo. Ngaloo ndlela, uRégis ngumzekelo omhle kuwo onke amaKristu, ekubeni uYehova efuna bonke abanquli bakhe bazeke kade umsindo kwabanye.
2. Iyintoni intsingiselo yokoqobo yegama lesiGrike elithi ‘ukuzeka kade umsindo,’ yaye lithetha ntoni eli gama?
2 Igama lesiGrike elithi ‘ukuzeka kade umsindo’ ngokoqobo lithetha ukuba “nomoya omde.” INguqulelo Yehlabathi Elitsha yesiXhosa, iguqulela eli gama izihlandlo ezilishumi ngokuthi ‘ukuzeka kade umsindo,’ izihlandlo ezithathu ngokuthi ‘umonde,’ yaye isihlandlo esinye ngokuthi ‘ukuqhelisela umonde.’ Ibinzana lesiHebhere nelesiGrike eliguqulelwe ngokuthi ‘ukuzeka kade umsindo’ liquka ingcamango yokuba nomonde, nokungakhawulezi ukuba nomsindo.
3. Imbono yamaKristu ngokuzeka kade umsindo yayahluke njani kuleyo yamaGrike enkulungwane yokuqala?
3 Ukuzeka kade umsindo kwakungagqalwa njengophawu oluhle ngamaGrike enkulungwane yokuqala. Eli gama lalingasetyenziswa zizithandi-zobulumko zamaStoyike. Ngokutsho komphengululi weBhayibhile, uWilliam Barclay, ukuzeka kade umsindo “sisichasi sesidima samaGrike,” phakathi kwezinye izinto esizibalula “ngokungavumi ukunyamezela ukunyeliswa okanye ukoniwa.” Uthi: “KumaGrike, umntu obalaseleyo yayingumntu owayesenza konke okusemandleni akhe ukuze aziphindezele. KumaKristu, umntu obalaseleyo ngumntu othi, kwanaxa enako ukuziphindezela, angavumi ukwenjenjalo.” Kusenokwenzeka ukuba amaGrike ayekugqala ukuzeka kade umsindo njengobuthathaka, kodwa apha, njengakwezinye iimeko, “into ebubudenge kaThixo inobulumko kunabantu, yaye into ebuthathaka kaThixo yomelele kunabantu.”—1 Korinte 1:25.
Umzekelo KaKristu Wokuzeka Kade Umsindo
4, 5. Nguwuphi umzekelo obalaseleyo wokuzeka kade umsindo owamiselwa nguYesu?
4 Umntu wesibini osondele kuYehova, nguKristu Yesu owamisela umzekelo omhle wokuzeka kade umsindo. Xa wayexinezeleke kakhulu, uYesu wazibamba ngendlela emangalisayo. Kwaprofetwa ngaye kwathiwa: “Wabandezeleka kakhulu, wazivumela waxhwaleka; ukanti wayengawuvuli umlomo wakhe. Waziswa kanye njengemvu esiwa ekuxhelweni; nanjengemazi yegusha eye yasisimumu phambi kwabachebi bayo, naye wayengawuvuli umlomo wakhe.”—Isaya 53:7.
5 Okunjani kona ukuzeka kade umsindo okwabonakaliswa nguYesu kubo bonke ubulungiseleli bakhe basemhlabeni! Wanyamezela imibuzo yobuqhophololo eyayibuzwa ziintshaba zakhe nokunyeliswa ngabo babemchasa. (Mateyu 22:15-46; 1 Petros 2:23) Wayenomonde kubafundi bakhe, kwanaxa babeqhubeka bexabana ngenxa yokufuna ukwazi ukuba nguwuphi na omkhulu phakathi kwabo. (Marko 9:33-37; 10:35-45; Luka 22:24-27) Yaye hayi indlela awazeyisa ngayo uYesu ngobusuku bokungcatshwa kwakhe xa uPetros noYohane balala ubuthongo emva kokuba bexelelwe ukuba ‘bahlale belindile’!—Mateyu 26:36-41.
6. UPawulos wangenelwa njani kuphawu lukaYesu lokuzeka kade umsindo, yaye sifunda ntoni thina koku?
6 Emva kokufa nokuvuswa kwakhe, uYesu waqhubeka ebonakalisa uphawu lokuzeka kade umsindo. Umpostile uPawulos wayekuqonda kakuhle oku, ekubeni wayefudula etshutshisa amaKristu. UPawulos wabhala: “Lithembekile yaye lifanelwe kukwamkelwa ngokupheleleyo ilizwi elithi uKristu Yesu weza ehlabathini ukuze asindise aboni. Ndingobalaseleyo kubo. Noko ke, isizathu sokuba ndenzelwe inceba sasikukuba njengoko imeko yam yayibalasele uKristu Yesu abonakalise ngam konke ukuzeka kade umsindo kwakhe, ndibe ngumzekelo kwabo baza kukholwa kuye ukuze bazuze ubomi obungunaphakade.” (1 Timoti 1:15, 16) Enoba injani indlela esasifudula siphila ngayo ngaphambili, ukuba sinokholo kuYesu, uya kuzeka kade umsindo kuthi—ngoxa, kakade ke, elindele ukuba senze “imisebenzi efanele inguquko.” (IZenzo 26:20; Roma 2:4) Izigidimi ezathunyelwa nguKristu kumabandla asixhenxe aseAsiya Minor zibonisa ukuba, ngoxa ezeka kade umsindo, ulindele ukuba senze inkqubela phambili.—ISityhilelo, isahluko 2 nesesi-3.
Isiqhamo Somoya
7. Kukuphi ukunxibelelana okukhoyo phakathi kophawu lokuzeka kade umsindo nomoya oyingcwele?
7 Kwisahluko 5 sencwadi yakhe eya kwabaseGalati, uPawulos uthelekisa imisebenzi yenyama nesiqhamo somoya. (Galati 5:19-23) Ekubeni ukuzeka kade umsindo kulolunye lweempawu zikaYehova, kuvela kuye yaye kusisiqhamo somoya wakhe. (Eksodus 34:6, 7) Eneneni, ukuzeka kade umsindo kukwindawo yesine kuluhlu lwezinto ezabalwa nguPawulos xa wayechaza isiqhamo somoya, wabala ‘uthando, uvuyo, uxolo, ukuzeka kade umsindo, ububele, ukulunga, ukholo, ubulali, ukuzeyisa.’ (Galati 5:22, 23) Ngoko ke, xa abakhonzi bakaThixo bebonakalisa umonde wobuthixo, okanye ukuzeka kade umsindo, benjenjalo ngenxa yokuphenjelelwa ngumoya oyingcwele.
8. Yintoni eya kusinceda sikwazi ukuhlakulela isiqhamo somoya, kuquka ukuzeyisa?
8 Noko ke, oku akuthethi ukuba uYehova uyamnyanzela umntu ngomoya wakhe. Simele sivume ngokwethu ukuba usiphembelele. (2 Korinte 3:17; Efese 4:30) Siyawuvumela umoya ukuba usebenze ebomini bethu ngokuhlakulela iziqhamo zawo kuko konke esikwenzayo. Emva kokuchaza imisebenzi yenyama nesiqhamo somoya, uPawulos wongezelela: “Ukuba siphila ngomoya, masihambe ngokulungeleleneyo kwangomoya. Ningalahlekiswa: UThixo akanakwenziwa intlekisa. Loo nto ayihlwayelayo umntu, uya kuvuna kwayona; kuba lowo uhlwayelela eyakhe inyama uya kuvuna ukonakala ngokwasenyameni, kodwa lowo uhlwayelela umoya uya kuvuna ubomi obungunaphakade ngokwasemoyeni.” (Galati 5:25; 6:7, 8) Ukuze siphumelele ekuhlakuleleni ukuzeka kade umsindo, simele sihlakulele zonke iziqhamo eziveliswa ngumoya oyingcwele kumaKristu.
“Uthando Luzeka Kade Umsindo”
9. Yintoni ekusenokwenzeka ukuba yabangela uPawulos axelele abantu baseKorinte ukuba “uthando luzeka kade umsindo”?
9 UPawulos wabonisa ukuba kukho unxulumano olusondeleyo phakathi kothando nokuzeka kade umsindo xa wathi: “Uthando luzeka kade umsindo.” (1 Korinte 13:4) Omnye umphengululi weBhayibhile, uAlbert Barnes, wathi uPawulos wakugxininisa oku ngenxa yosukuzwano nokruthakruthwano olwalukho kwibandla lamaKristu aseKorinte. (1 Korinte 1:11, 12) Lo kaBarnes uthi: “Igama elithi [ukuzeka kade umsindo] elisetyenziswe apha sisichasi segama elithi ukungxama yaye sisichasi sokuvakalisa iingcinga ezibangelwa ngumsindo nokucaphuka. Libonisa ubume enokuba kubo ingqondo ize INYAMEZELE ITHUBA ELIDE xa umniniyo exinezelekile okanye ecatshukisiwe.” Uthando nokuzeka kade umsindo kunegalelo ngamandla kuxolo lwebandla lamaKristu.
10. (a) Uthando lusinceda njani ukuba sizeke kade umsindo, yaye sisiphi isiluleko esinikelwa ngumpostile uPawulos kule nkalo? (b) Wagqabaza wathini omnye umphengululi weBhayibhile ngokuzeka kade umsindo nokuba nobubele kukaThixo? (Bona umbhalo osemazantsi.)
10 “Uthando luzeka kade umsindo yaye lunobubele. Uthando . . . alufuni ezalo izilangazelelo, alucaphuki.” Ngenxa yoko, ngeendlela ezininzi, uthando lusinceda ukuba sizeke kade umsindo.a (1 Korinte 13:4, 5) Uthando lusinceda ukuba sinyamezelane ngomonde size sikhumbule ukuba sonke asifezekanga yaye sinamakhwiniba neentsilelo. Lusinceda sibe nolwazelelelo size sixolele. Umpostile uPawulos usikhuthaza ukuba sihambe ‘ngokuthobeka okupheleleyo kwengqondo nobulali, sinokuzeka kade umsindo, sinyamezelana ngothando, sikuzabalazela ngokunyamekileyo ukugcina ubunye bomoya kumxokelelwane omanyanisayo woxolo.’—Efese 4:1-3.
11. Kutheni kubaluleke ngokukhethekileyo ukuba amaKristu azeke kade umsindo?
11 Ukuzeka kade umsindo kunegalelo kuxolo nolonwabo phakathi kwamaKristu, enoba kusemabandleni, kumakhaya aseBheteli, kumakhaya abavangeli basemazweni, kumaqela abandakanyeke kumsebenzi wokwakha okanye ezikolweni. Ngenxa yokwahluka kobuntu, ukhetho, indlela umntu akhuliswe ngayo, umlinganiselo wenkcubeko, kwanemilinganiselo yococeko, maxa wambi kunokuvela iingxaki. Oku kunokwenzeka naphakathi kwamalungu entsapho. Ukuzeka kade umsindo kubalulekile. (IMizekeliso 14:29; 15:18; 19:11) Ukuzeka kade umsindo—ukunyamezela ngomonde, ngethemba lokuba izinto ziya kulunga—kuyimfuneko kubo bonke.—Roma 15:1-6.
Ukuzeka Kade Umsindo Kusinceda Sinyamezele
12. Kutheni kubalulekile ukuzeka kade umsindo xa sijamelene nezilingo?
12 Ukuzeka kade umsindo kusinceda sinyamezele izilingo ezibonakala zingenakuphela okanye ezo kungafumaneki ndlela yakuzicombulula ngokukhawuleza. Kwaba njalo kuRégis, okhankanywe ekuqaleni. Kangangeminyaka, inkosikazi yakhe yayiyichasa imigudu yakhe yokukhonza uYehova. Noko ke, ngenye imini yeza kuye ilila yaza yathi: “Ndiyazi ukuba yinyaniso le. Ndincede. Ndifuna isifundo seBhayibhile.” Ekugqibeleni yabhaptizwa njengeNgqina. URégis uthi: “Obu yaba bubungqina bokuba uYehova wandisikelela kuloo mizamo ndandiyenza kangangeminyaka, ndibonakalisa umonde nonyamezelo.” Ukuzeka kade umsindo kwakhe kwavuzwa.
13. Yintoni eyabangela uPawulos ukuba anyamezele, yaye umzekelo wakhe unokusinceda njani sinyamezele?
13 Emva phayaa ngenkulungwane yokuqala yeXesha Eliqhelekileyo, umpostile uPawulos wayengumzekelo omhle ekubonakaliseni uphawu lokuzeka kade umsindo. (2 Korinte 6:3-10; 1 Timoti 1:16) Ngasekupheleni kobomi bakhe, xa wayeluleka iqabane lakhe eliselula uTimoti, uPawulos wamlumkisa esithi onke amaKristu ayeza kujamelana nezilingo. UPawulos wamenzela umzekelo ngaye siqu waza wancomela iimpawu ezisisiseko zamaKristu eziyimfuneko ukuze ubani anyamezele. Wabhala: “Wena uyilandele ngokusondeleyo imfundiso yam, ikhondo lam lobomi, injongo yam, ukholo lwam, ukuzeka kade umsindo kwam, uthando lwam, unyamezelo lwam, iintshutshiso zam, iimbandezelo zam, uhlobo lwezinto ezenzeka kum kwa-Antiyokwe, eIkoniyo, eListra, uhlobo lweentshutshiso endizinyamezeleyo; ukanti kuzo zonke iNkosi yandihlangula. Enyanisweni, bonke abo banqwenela ukuphila ngozinikelo lobuthixo ngokunxulumene noKristu Yesu, nabo baya kutshutshiswa.” (2 Timoti 3:10-12; IZenzo 13:49-51; 14:19-22) Ukuze sikwazi ukunyamezela, sonke kufuneka sibe nokholo, uthando nokuzeka kade umsindo.
Ukwambatha Ukuzeka Kade Umsindo
14. UPawulos wazifanisa nantoni iimpawu zobuthixo ezifana nokuzeka kade umsindo, yaye sisiphi isiluleko awasinika amaKristu aseKolose?
14 Umpostile uPawulos wafanisa ukuzeka kade umsindo nezinye iimpawu zobuthixo kunye nesambatho amaKristu afanele asinxibe emva kokuba eye ahluba imikhwa ‘yobuntu obudala.’ (Kolose 3:5-10) Wabhala: “Njengabanyulwa bakaThixo, abangcwele nabathandwayo, yambathani umsa wemfesane, ububele, ukuthobeka kwengqondo, ubulali, nokuzeka kade umsindo. Qhubekani ninyamezelana yaye nixolelana ngesisa ukuba nabani na unesizathu sokukhalazela omnye. Kanye njengoko uYehova wanixolela ngesisa, yenzani njalo nani. Ke, phezu kwazo zonke ezi zinto, yambathani uthando, kuba lungumxokelelwane ogqibeleleyo womanyano.”—Kolose 3:12-14.
15. Uba yintoni umphumo xa amaKristu ‘esambatha’ ukuzeka kade umsindo nezinye iimpawu zobuthixo?
15 Xa amalungu ebandla ‘esambatha’ imfesane, ububele, ukuthobeka kwengqondo, ubulali, ukuzeka kade umsindo nothando ayakwazi ukulungisa iingxaki aze aqhubeke emanyene enkonzweni kaYehova. Abaveleli abangamaKristu ngokukhethekileyo, kufuneka bazeke kade umsindo. Kukho amaxesha ekusenokufuneka ukuba bakhalimele omnye umKristu, kodwa kukho iindlela ezahlukahlukeneyo zokwenza oku. UPawulos wachaza esona simo sengqondo sifanelekileyo xa wayebhalela uTimoti: “Yohlwaya, khalimela, bongoza, ngako konke ukuzeka kade umsindo nobugcisa bokufundisa.” (2 Timoti 4:2) Ewe, ngalo lonke ixesha izimvu zikaYehova zifanele ziphathwe ngendlela yokuzeka kade umsindo, ngesidima nangothantamiso.—Mateyu 7:12; 11:28; IZenzo 20:28, 29; Roma 12:10.
‘Ukuzeka Kade Umsindo Kubo Bonke’
16. Unokuba yintoni umphumo xa ‘sizeka kade umsindo kubo bonke’?
16 Ukuzeka kade umsindo kukaYehova ngoluntu kusinika imbopheleleko yokuba ‘sizeke kade umsindo kubo bonke.’ (1 Tesalonika 5:14) Oku kuthetha ukuba nomonde kumalungu entsapho, kubamelwane, kubantu esisebenza nabo nabantu esifunda nabo, abangengomaNgqina. Amanye amaNgqina, lawo maxa wambi aye anyamezela ukugculelwa okanye inkcaso engqalileyo yabantu ebenxulumana nabo emsebenzini okanye esikolweni kangangeminyaka, aye ayoyisa inkcaso. (Kolose 4:5, 6) Umpostile uPetros wabhala: “Ihambo yenu mayibe ntle phakathi kweentlanga, ukuze, nokuba zithetha kakubi ngani njengabenzi-bubi, zithi ngokubona imisebenzi yenu emihle, zimzukise uThixo ngemini yokuvelela kwakhe.”—1 Petros 2:12.
17. Sinokuluxelisa njani uthando nokuzeka kade umsindo kukaYehova, yaye kutheni sifanele senjenjalo?
17 Ukuzeka kade umsindo kukaYehova kuya kubangela ukuba izigidi zabantu zisindiswe. (2 Petros 3:9, 15) Ukuba sixelisa uthando nokuzeka kade umsindo kukaYehova, ngomonde siya kuqhubeka sishumayela iindaba ezilungileyo zoBukumkani bukaThixo size sifundise abanye ukuba bazithobe kulawulo lukaKristu loBukumkani. (Mateyu 28:18-20; Marko 13:10) Ukuba besinokuyeka ukushumayela, bekuya kufana nokuba sifuna ukukusingela phantsi ukuzeka kade umsindo kukaYehova yaye asiyiqondi injongo yako, ekukuzisa abantu enguqukweni.—Roma 2:4.
18. Yintoni eyayithandazelwa nguPawulos ngokuphathelele abantu baseKolose?
18 Kwincwadi yakhe eyayisiya kumaKristu aseKolose, eAsiya Minor, uPawulos wabhala: “Kungenxa yoko le nto nathi, kususela kwimini esakuvayo oko, singayekanga ukunithandazela nokunicelela ukuba nizaliswe ngolwazi oluchanileyo lokuthanda kwakhe kubulumko bonke nokuqiqa kokomoya, ukuze nihambe ngokumfaneleyo uYehova nize nimkholise ngokupheleleyo njengoko niqhubeka nivelisa isiqhamo kuwo wonke umsebenzi olungileyo lusanda nolwazi lwenu oluchanileyo ngoThixo, nisomelezwa ngawo onke amandla ukusa kumkhamo wamandla akhe azukileyo khon’ ukuze ninyamezele ngokupheleleyo nize nizeke kade umsindo ninovuyo.”—Kolose 1:9-11.
19, 20. (a) Sinokukuphepha njani ukugqala ukuzeka kade umsindo kukaYehova njengovavanyo? (b) Ziziphi iingenelo esiya kuzifumana xa sizeka kade umsindo?
19 Ukuqhubeka kukaYehova ezeka kade umsindo, okanye enomonde, akuyi kuba luvavanyo kuthi xa ‘sizaliswe ngolwazi oluchanileyo lokuthanda kwakhe,’ olukukuba “zonke iintlobo zabantu zisindiswe zize zifikelele elwazini oluchanileyo lwenyaniso.” (1 Timoti 2:4) Siya ‘kuqhubeka sivelisa isiqhamo kuwo wonke umsebenzi olungileyo,’ ngokukodwa lowo wokushumayela ‘iindaba ezilungileyo zobukumkani.’ (Mateyu 24:14) Ukuba siqhubeka sikwenza oku ngokuthembeka, uYehova uya ‘kusomeleza ngawo onke amandla,’ ukuze sikwazi ‘ukunyamezela ngokupheleleyo size sizeke kade umsindo sinovuyo.’ Xa sisenjenjalo, siya ‘kuhamba ngokumfaneleyo uYehova,’ yaye siya kuba noxolo olufumaneka ngokwazi ukuba ‘simkholisa ngokupheleleyo.’
20 Ngamana singeyiseka ngokupheleleyo ngobulumko bokuzeka kade umsindo kukaYehova. Kubangela ukuba sisindiswe kuze kusindiswe nabo basiphulaphulayo xa sishumayela kubo naxa sibafundisa. (1 Timoti 4:16) Ukuhlakulela isiqhamo somoya—uthando, ububele, ukulunga, ubulali, nokuzeyisa—kuya kusibangela ukuba sizeke kade umsindo sinovuyo. Siya kukwazi ngakumbi ukuhlala ngoxolo namalungu eentsapho zethu kunye nabazalwana noodade wethu abasebandleni. Ukuzeka kade umsindo kuya kusinceda nokuba sibe nomonde kubantu esisebenza nabo okanye kwabo sifunda nabo. Yaye ukuzeka kade umsindo kwethu kuya kuba nenjongo, ukusindisa abenzi bobubi nokuzukisa uThixo wokuzeka kade umsindo, uYehova.
[Umbhalo osemazantsi]
a Egqabaza ngamazwi awathethwa nguPawulos athi “uthando luzeka kade umsindo yaye lunobubele,” umphengululi weBhayibhile uGordon D. Fee uthi: “Kwiincwadi zikaPawulos la mabinzana [ukuzeka kade umsindo nobubele] abonisa isimo sengqondo sikaThixo esintlu-mbini ngokuphathelele abantu (thelekisa amaRoma 2:4). Kwelinye icala, umonde kaThixo ubonakaliswa ngokubamba kwakhe umsindo nxamnye nabantu abanemvukelo, ukanti kwelinye, ububele bakhe bubonakala kwizenzo zakhe zenceba eziphindwe kaliwaka. Ngaloo ndlela, uPawulos xa echaza uthando, uqalisa ngokuchaza uThixo ngendlela entlu-mbini, lowo uye ngoKristu wazibonakalisa enomonde nobubele kwabo bafanelwe ngumgwebo kaThixo.”
Ngaba Unokuchaza?
• Ziziphi iindlela uKristu angumzekelo obalaseleyo wokuzeka kade umsindo ngazo?
• Yintoni eya kusinceda sihlakulele ukuzeka kade umsindo?
• Ukuzeka kade umsindo kuzinceda njani iintsapho, amaKristu nabadala?
• Ukuzeka kade umsindo kwethu kuya kusizisela iingenelo njani thina nabanye?
[Umfanekiso okwiphepha 15]
Kwanaxa wayexinezeleke kakhulu, uYesu wayenomonde kubafundi bakhe
[Umfanekiso okwiphepha 16]
Abaveleli abangamaKristu babongozwa ukuba bamisele umzekelo omhle wokuzeka kade umsindo kwindlela ababaphatha ngayo abazalwana babo
[Umfanekiso okwiphepha 17]
Ukuba sixelisa uthando nokuzeka kade umsindo kukaYehova, siya kuqhubeka sishumayela iindaba ezilungileyo
[Umfanekiso okwiphepha 18]
UPawulos wathandazela ukuba amaKristu ‘azeke kade umsindo enovuyo’