Ubomi Nobulungiseleli BukaYesu
INQAKU elithi “UYesu Uyakugqiba Konke Akuyalelwe NguThixo,” elikumaphepha alandelayo yinxalenye yokugqibela yongcelele lwethu oluthi “Ubomi Nobulungiseleli BukaYesu.” Le mbalasane iye yabonakala kwiMboniselo ngaphezu kweminyaka emithathu, kwiinkupho ezilandelelanayo ezili-149, ukususela kweka-Aprili 1985.
Siyathemba ukuba olu ngcelele lukwiMboniselo luye lwakunceda ukulandela isiluleko sompostile uPawulos sokuba ‘siwathi ntsho amehlo ethu kuYesu’ kwanokuthobela umyalelo kaThixo wokuba ‘simve yena.’ (Hebhere 12:2, 3, TE; Mateyu 17:5) Ukutyhubela iminyaka, abaninzi baye babhala besithi baye bancedakala ukwenjenjalo. Omnye umfundi wabhala oku, “Kufana nokungathi ndilapho ndimphulaphule yaye ndibukele oko akwenzayo. Ndiye ndamthanda ngakumbi ngenxa yala manqaku.”
Omnye umfundi wabhala: “Nkupho nganye ibonakala iqulethe ingongoma endayiphosayo xa ndandizifundela ingxelo yeBhayibhile. Ndiye ndakunandipha ukungenisa engqondweni iziganeko ezahlukeneyo zobomi bukaYesu ezibhalwe ngokolandelelwano lwamaxesha olulunge ngakumbi ngokufunda inqaku ngalinye.” Abaninzi baye babonakalisa uxabiso olufanayo ngokufunda ngexesha nangeendawo uYesu awayefundisa kuzo yaye esenza nezinye izinto ebudeni bobulungiseleli bakhe.
Elinye ibhinqa eSpeyin lathi: “Ndiye ndawagcina onke amanqaku ukususela ekuqaleni. Anemfundiso ebaluleke kakhulu kubantu abakhulu kwanasebantwaneni. Ndineminyaka engama-44 ubudala, ibe ndiyavuya xa ndifunda ezi ngxelo. Ndiba ngathi ndandikho kwisiganeko ngasinye esingokwembali.”
Omnye umama waseUnited States wabhala: “Ngenxa yobufutshane bala manqaku nendlela elula achazwe ngayo, umyeni wam uye wathelela kwisifundo sentsapho. Unyana wam oneminyaka esibhozo ubudala undicele ukuba ndinibhalele ndinibulele kuba uyise ngoku efundisisa iBhayibhile. Ucela ukuba ngamhla uthile xa olu ngcelele lufikelele esiphelweni amanqaku apapashwe encwadini ukuze akwazi ukwabelana ngawo namaqabane akhe esikolo.”
Mhlawumbi uvakalelwa ngendlela efanayo neyomfundi osandula ukuvakalisa ukuba buhlungu esenjenje: “Ndiziva ndidakumbile noko xa ndicinga ukuba olu ngcelele luza kuphela kungekudala njengoko kuhlolisiswa iintsuku zokugqibela zobomi bukaYesu. Ngokwenene ndiza kuwakhumbula la manqaku xa ndibona IMboniselo.” Siyathemba ukuba uya kuyinandipha le nxalenye yokugqibela yongcelele lwethu oluthi, “Ubomi Nobulungiseleli BukaYesu.”