Abaphumeleleyo EGiliyadi Bamkela Isipho Senkonzo Yobuvangeli Basemazweni
NGOMATSHI 1, 1992, amalungu angama-22 abaphumelele kwiklasi yama-92 yeSikolo seBhayibhile seWatchtower saseGiliyadi amkela isipho—isipho senkonzo yobuvangeli basemazweni. Xa wayethetha naba, uLloyd Barry weQumrhu Elilawulayo wathi: “Kwanga ningasamkela eso sipho simangalisayo ngovuyo olukhulu, ibe kwanga ningasisebenzisela ukuzisela abanye uvuyo.”
Iindwendwe ezazimenyiwe ezinokuba ngama-4 662 namalungu entsapho yaseBheteli zahlanganisana kwiHolo yeNdibano yesiXeko saseJersey, eNew Jersey, zize kucwangciso lwabaphumeleleyo. Abanye abantu abangama-970 kwizakhiwo eziseNew York zeWatchtower Society eBrooklyn, eWallkill nasePatterson badityaniswa nolu cwangciso ngemfonomfono. Bonke baphulaphula ngenyameko njengoko abaphumeleleyo bebephathiswa isiluleko esiya kubanceda ukuba basixabise gqitha isipho senkonzo yobuvangeli basemazweni nokuba basisebenzise ngobulumko.
Ucwangciso lwavulwa ngokuculwa ngehlombe kwengoma 155 ethi, “‘Yamkelanani’!” Emva koko, bonke bachukumiseka njengoko uFrederick W. Franz, umongameli weSikolo saseGiliyadi oneminyaka engama-98 ubudala, wayesenza umthandazo osuka entliziyweni. Wandula ke, usihlalo, uCarey Barber weQumrhu Elilawulayo, wabamkela bonke kucwangciso lwabaphumeleleyo waza wathi: “Akuzange kubekho mfuneko yabavangeli basemazweni abaqeqeshwe eGiliyadi inkulu njenganamhlanje.” Emva kwamagqabaza akhe, wachaza ungcelele lweentetho ezimfutshane neziluncedo ezaziza kulandela.
Kwaqala kwathetha uCurtis Johnson weKomiti yeKhaya laseBheteli, ngomxholo othi “Sinyamekele Kakuhle Isitiya Sakho.” UMzalwana uJohnson wathi xa aba bavangeli basemazweni batsha befika kwizabelo zabo, ngamnye wabo uya kuba nesitiya sakhe sokomoya afanele asihlakulele. (1 Korinte 3:9) Abantu bakaYehova ehlabathini ngokubanzi basisitiya esichume bubulungisa nozuko phambi kwazo zonke iintlanga. (Isaya 61:11) Esi sithethi sagxininisa sisithi: ‘Indlela osinyamekela ngayo isitiya sakho sokomoya kwikamva iya kuyichaphazela ngokunengenelo impumelelo yakho kwisabelo sakho sobuvangeli basemazweni.’ Yintoni eya kubanceda basinyamekele kakuhle isitiya sabo sokomoya? ‘UYehova unokuba ludonga olukhuselayo kwisitiya sakho sokomoya. Ukuba uzimisele ukuhlakulela imisebenzi emihle, sondela kuye ngomthandazo, wandule ke wenze ngokuvisisana nemithandazo yakho.’
Ngokulandelayo, uLloyd Barry wathetha ngomxholo othi “Vuyani ENkosini Amaxesha Onke.” (Filipi 4:4) Erhola kuvimba wakhe wamava obuvangeli basemazweni eJapan kangangeminyaka engaphezu kwama-25, wanikela amacebiso asebenzisekayo okunceda abaphumeleleyo ukuba basinandiphe isipho senkonzo yobuvangeli basemazweni. Wathi: ‘Niya kufumanisa ukuba uvuyo eninalo enkonzweni kaThixo luyaninceda ekoyiseni ukuxinezeleka okuninzi mhlawumbi nezinye iingxaki zomzimba enihlangabezana nazo.’ (IMizekeliso 17:22) Wabakhumbuza abaphumeleleyo ukuba basenokuhlangabezana neemeko ezahluke ngokupheleleyo kwezo baziqhelileyo. Kusenokufuneka bafunde ulwimi olutsha. ‘Kuya kufuneka nisebenze nzima ekufundeni ulwimi. Kodwa xa nikwazi ukunxibelelana ngokukhululekileyo nabantu ngolwimi lwabo, noku kuya kulongeza uvuyo lwenu.’
Ngokulandelayo kwathetha uEldor Timm weKomiti yoMzi-mveliso ngomxholo othi “Tsolisani Amehlo Enu Emvuzweni.” Nguwuphi loo mvuzo? Bubomi obungunaphakade! Ukuze sibufumane sifanele sigcine amehlo ethu etsoliswe kubo. Isithethi sathetha ngezinye zeendlela afana nahluke ngazo amaKristu aselugqatsweni lobomi neembaleki kukhuphiswano lweembaleki lwenkulungwane yokuqala. Njengeembaleki, amaKristu afanele aziqeqeshe ngamandla, agcine imigaqo aze ahlukane nemithwalo eluxanduva. Kodwa ngokungafaniyo neembaleki zokoqobo, amaKristu akugqatso lobomi yaye afuna umvuzo ongunaphakade. Kunokuba kubekho umntu omnye kuphela ophumelelayo, bonke abalubaleka de baye kulufeza ugqatso lobomi baya kuwufumana umvuzo. UMzalwana uTimm waqukumbela ngala mazwi: ‘Ukuze sizuze umvuzo wobomi, sifanele sibe seluxolweni noYehova, uMniki womvuzo. Yaye ukuze sibe noxolo noYehova, sifanele sibe seluxolweni nabazalwana bethu.’
Kwalandela uMilton Henschel weQumrhu Elilawulayo ethetha ngomxholo othi “Ngentuthuzelo Evela EZibhalweni, Sinethemba.” (Roma 15:4) Esi sithethi saqala ngokuthi, ‘Kwiinyanga ezintlanu ezidlulileyo, benixakekile nifunda iBhayibhile. Niye nakha ukusondelelana okukhulu. Ninethemba elomeleleyo. Njengokuba nisiya kwizabelo zenu, ncedani nikhumbule isizathu sokuba ithemba lenu lomelele kangaka. Kungenxa yokuba niye nahlala nisondelelene neZibhalo.’ Ukubonisa umzekelo wengxelo yeBhayibhile enika ithemba, isithethi sabhekisela kwincwadi yaBagwebi isahluko 6 ukusa kwesesi-8, ethetha ngendlela uGidiyon awathunywa ngayo ukuba akhulule amaSirayeli kwingcinezelo yamaMidiyan. Emva kokuchaza le ngxelo nentsingiselo yayo kumhla wethu, wathi: ‘Xa ninethuba lokusondelelana neZibhalo nize nicinge ngezi zinto, kuyanihlaziya. Nifumana ukhuthazo.’
Bonke babekhangele phambili ekuveni isiluleko sokwahlukana aba bafundi ababeza kusinikwa ngabayaleli ababini abayintloko kweso sikolo. UJack Redford waqala wathetha phantsi komxholo othi “Yenza Okulungileyo.” Wabakhumbuza oku abaphumeleleyo: ‘EGiliyadi niqeqeshelwe ngenyameko koko kulungileyo ngokweZibhalo. Ngoku niya kwizabelo zobuvangeli basemazweni ezilucelomngeni. Yaye siyazi ukuba kusenokwenzeka ukuba nifumane iingxaki ezinzima endleleni. Phezu kwako nje oku, yaye phezu kwazo nje iimvakalelo zenu, siyazi ukuba ninokwenza okulungileyo.’ Yintoni eya kunceda? Phakathi kwezinye izinto, kukuba nembono elungileyo ngabanye. Isithethi sathi: ‘Musani ukulindela imfezeko ekungafezekini.’ Nokuba nembono elungileyo ngeemeko ezilingayo kuluncedo. Wathi: ‘Sonke siyadibana namahla-ndinyuka ebomini. Wonk’ ubani unokujamelana neemeko ezikhuthazayo. Yindlela enijamelana ngayo neemeko ezidimazayo eya kugqiba enoba niya kunyamezela kwinkonzo yobuvangeli basemazweni.’—Yakobi 1:2-4.
Onyamekela ababhalisa kweso sikolo, u-Ulysses Glass, wakhetha umxholo othi “Liyintoni Ithemba Lekamva?” Ngelizwi lomzali, wabakhuthaza abaphumeleleyo ukuba baligcine ithemba labo liphilile. (IMizekeliso 13:12) Wathi, ‘Sisenokungasiphawuli isiqalo sokuphulukana nethemba. Iimeko zisenokusibangela ukuba sixakeke ngezilangazelelo zethu kunolwalamano lwethu noThixo. Sisenokugula okanye sizive singaphethwanga kakuhle ngabanye. Abanye basenokuba nezinto eziphathekayo ezingakumbi kunezethu okanye basenokufumana imiphumo emihle ngakumbi kunathi kubulungiseleli, yaye ngandlel’ ithile sisenokuba nomona. Ukuba sivumela iingcinga ezinjalo ziye zisendela kuthi, ngokukhawuleza ithemba loBukumkani lisenokuyeka ukuba yinto yokwenene entliziyweni nasengqondweni yethu, yaye sisenokude siyeke ukunyamezela kugqatso lobomi.’ Yintoni enokwenziwa? ‘Sifanele sithabathe amanyathelo afanelekileyo ukuba siza kulenza ithemba lethu liphile kwakhona. Sifanele sizalise iingqondo neentliziyo zethu ngamadinga kaThixo aqinisekileyo size sinikele ingqalelo yethu epheleleyo kubukho bokwenene boBukumkani bukaThixo. Kwakhona sifanele siluhlaziye unxibelelwano lwethu noYehova, kuba oku ngokuqinisekileyo kuya kukhokelela kuvuyo.’
UKarl Klein weQumrhu Elilawulayo wanikela intetho eyayingumxholo ngeso sihlandlo. Umxholo wakhe wawusithi “Kutheni Ufanele Uthobeke?” Iyintoni ke impendulo kuloo mbuzo? Kwintshayelelo yakhe wathi, ‘Kungenxa yokuba kuyinto efanelekileyo nesesikweni yokwenziwa, into yobulumko neyothando efanele ukwenziwa.’ Abaphulaphuli bachukumiseka njengoko wayethetha ngemizekelo emine yokuthobeka esenza kakuhle ukuyixelisa: (1) UYehova uThixo, ngokuqinisekileyo owayethobekile xa wayeqhubana noAbraham noMoses (Genesis 18:22-23; Numeri 14:11-21; Efese 5:1); (2) uYesu Kristu, ‘owazithobayo waba ngolulamileyo wada wasa ekufeni emthini wentuthumbo’ (Filipi 2:5-8; 1 Petros 2:21); (3) umpostile uPawulos, ‘owakhonza iNkosi ngokuthobeka kwentliziyo’ (IZenzo 20:18, 19, NW; 1 Korinte 11:1); kunye (4) ‘nabo bakhokelayo phakathi kwethu,’ njengomongameli wokuqala woMbutho, uMzalwana uRussell, owakha wabhala oku: “Lo msebenzi ekuye kwakholeka eNkosini ukuba isebenzise isakhono sethu esingento kuwo ubungengomsebenzi wokusungula izinto koko ubungowokuvuselela oko sekwakhiwe, owokulungisa nowokuvisisanisa izinto.” (Hebhere 13:7) UMzalwana uKlein wandlala izizathu ezingakumbi ezinamandla zokuthobeka. Ngokuqinisekileyo, ukuthobela isiluleko sokuthobeka kuya kubanceda abaphumeleleyo ukuba basisebenzise ngobulumko isipho senkonzo yobuvangeli basemazweni!
Ngemva kwezo ntetho, usihlalo wabelana nabaphulaphuli ngemibuliso efunyenweyo evela kwimimandla eyahlukahlukeneyo yomhlaba. Ngoku lalifikile ixesha lokuba abaphumeleleyo bafumane iziqinisekiso zabo. Babephuma kumazwe asixhenxe—eFinland, eFransi, eKhanada, eMauritius, eNetherlands, eSweden naseUnited States. Kodwa izabelo zabo zobuvangeli basemazweni zibasa kumazwe ali-11—eBolivia, e-Estonia, eGrenada, eGuatemala, eHonduras, eHungary, eMauritius, ePeru, eTogo, eTurkey naseVenezuela.
Emva konqumamo, ucwangciso lwasemva kwemini lwaqalisa ngeSifundo SeMboniselo esifutshanisiweyo esasiqhutywa nguJoel Adams weKomiti yeSebe leNkonzo. Emva koko, abaphumeleleyo banikela amava athile enkonzo yasentsimini abawafumana ngexesha ebebesesikolweni ngalo. Ekugqibeleni, kwaboniswa umdlalo onomxholo othi Kutheni Ufanele Uwahlonele Amalungiselelo Obuthixo? ukuze kukhuthazwe bonke abaphulaphuli, kuquka abo baphumeleleyo.
Enyanisweni, aba baphumeleleyo baya kwizabelo zabo zasemazweni bexakathe isiluleko nokhuthazo oluya kubanceda basebenzise isipho sabo sobuvangeli basemazweni ukuze bazizisele uvuyo ingekuphela bona bodwa kodwa nabanye.
[Ibhokisi ekwiphepha 22]
Amanani Abafundi
Inani lamazwe abawameleyo: 7
Inani lamazwe ababelwe kuwo: 11
Isimbuku senani labafundi: 22
Umlinganiselo weminyaka yabo: 33,4
Umlinganiselo weminyaka besenyanisweni: 16,7
Umlinganiselo weminyaka bekwinkonzo yexesha elizeleyo: 11,8
[Umfanekiso okwiphepha 23]
Abaphumelele Kwiklasi Yama-92 YeSikolo SeBhayibhile SeWatchtower SaseGiliyadi
Kuludwe olungezantsi, kubalwa ukusuka kwabemi kuluhlu olungaphambili ukuya kwabangasemva, yaye amagama adweliswe ukusuka ngasekhohlo ukuya ngasekunene kuluhlu ngalunye.
(1) Chan Chin Wah, M.; Bouancheaux, N.; Chapman, B.; Östberg, A.; Cole, L.; Jackson, K.; Meerwijk, A. (2) Smith, J.; Wollin, K.; Chapman, R.; Gabour, N.; Chan Chin Wah, J.; Smith, C.; Edvik, L. (3) Bouancheaux, E.; Östberg, S.; Cole, K.; Jackson, R.; Gabour, S.; Edvik, V.; Meerwijk, R.; Wollin, G.