Yibakho Kwindibano Yesithili “Yabathandi Benkululeko”!
ULINDELWE ziintsuku ezintathu eziyingenelo zemfundiso engokweBhayibhile. Yibakho xa le ndibano iqala ngengoma nge-10:20 kusasa ngoLwesihlanu. Nandipha intetho yokuvula enomxholo othi, “Kutheni Sifanele Siqondele Emthethweni Ogqibeleleyo Wenkululeko?,” necandelo lokuqukumbela locwangciso lwakusasa, intetho engumxholo ethi: “Injongo Yenkululeko Esiyinikwa NguThixo Nendlela Yokuyisebenzisa.”
Emva kwemini ngoLwesihlanu, kuya kunikelwa isiluleko kumaKristu ukuzalisekisa uthumo lwawo njengabalungiseleli bakaThixo. Kuya kunikelwa iintetho ezimbini, enomxholo othi: “Ngaba Sifanele Sixakeke Yimisebenzi Efileyo Okanye Kwinkonzo KaYehova?” nenothi “Abantu Abakhululekileyo Kodwa Abaya Kuphendula.” Kumdlalo ekunxitywe kuwo iimpahla zamandulo kuya kunikelwa ukhuthazo lokusebenzisa kukabani inkululeko yakhe ekukhonzeni uYehova. Kuwo kuya kucatshulwa kumava kaEzra nezinxulumani zakhe ababuyela eYerusalem bevela eBhabhiloni ngomnyaka wama-468 B.C.E. ukuya kuhombisa itempile kaThixo.
Ucwangciso lwakusasa ngoMgqibelo luya kuba nongcelele lweentetho olunamacandelo amathathu olunomxholo othi, “Inkululeko Ephelekwa Ziimbopheleleko Kwisangqa Sentsapho.” Emva kwale ntetho ichukumisayo kuya kulandela intetho engozahlulelo nobhaptizo lwamaKristu enomxholo othi, “Zigcine Ukhululekile Ukuze Ukhonze UYehova.” Emva kwemini abaninzi baya kube bekhangele phambili kwintetho enomxholo othi, “Ngaba Umtshato Usisikhokelo Solonwabo?” Olu cwangciso luya kuqukunjelwa ngembalasane eya kuthi ngaphandle kwamathandabuzo izise uvuyo olukhulu kubo bonke abathandi benkululeko.
Uya kukuvuyela ukubakho ngentsasa yangeCawa ukuze uve ungcelele lweentetho olunamacandelo amathathu olunomxholo othi, “Ukukhonza Njengababambisi Babantu.” Le iya kuba yingxubusho engomzekeliso kaYesu womnatha neentlanzi yaye kuyo kuya kuqwalaselwa indima esinokuba nayo ekuzahsekeni kwawo. Ucwangciso lwakusasa luya kuqukunjelwa ngeentetho ezibalulekileyo enomxholo othi, “Hlalani Niphaphile ‘Kwixesha Lokuphela”’ nothi, “Ngoobani Abaya Kusinda ‘Kwixesha Lembandezelo’?” Ibe, emva kwemini ungaphoswa yintetho yesidlangalala enomxholo othi, “Ukulothulel’ Umnqwazi Ihlabathi Elitsha LikaThixo Lenkululeko.” Ngaphambi kwentetho yokuqukumbela echukumisayo, kuya kubakho ingxubusho yenqaku lesifundo seMboniselo saloo veki. Yiza nombhalo wakho ofundwayo welo phephancwadi.
Ukususela ngoSeptemba ukuya kuJanuwari, kuza kuqhutywa iindibano ezingaphezu kwama-20 eMzantsi Afrika kuphela, ngoko kuya kubakho enye engekude nekhaya lakho. Dibana namaNgqina kaYehova asekuhlaleni malunga nexesha nendawo yaleyo ikufutshane kuwe.