Ukwakha Iimpawu ZobuKristu Kubantwana Bethu

UNINA kaWanda, owayeshiyiwe yindoda yakhe, wasebenza nzima esakha iimpawu zobuKristu kwintombi yakhe. Xa uWanda wayeneminyaka eli-12, olu qeqesho lwavavanywa. Ngelo xesha, kwanyanzeleka ukuba uWanda, kunye nomnakwabo nodade wabo abancinane, bamshiye unina baze bahlale noyise okwethuba elithile. Uyise wayengakholwa, ngoko wayeza kuqhuba njani uWanda xa unina engekho ukuba amjonge?

Ixesha abangenakuliphepha bonke abazali abangamaKristu lelaxa abantwana babo kufuneka bazenzele ezabo izigqibo, ezivavanya ukholo lwabo. Abantwana basenokuba abakho kunye nabazali babo abangamaKristu, njengokuba kwaba njalo nangoWanda. Basenokujamelana nengcinezelo yoontanga esikolweni yokuba benze okuphosakeleyo. Okanye basenokuba bajamelene nezihendo eziqatha. Abazali abangamaKristu bathemba yaye bathandazela ukuba lisakufika elo xesha, abantwana babo baya kuba neempawu zobuKristu ezomelele ngokwaneleyo ukumelana novavanyo.

Abazali banokuzakha njani iimpawu ezomeleleyo zobuKristu kubantwana babo? Ngaphambi kokuba sifumanise okwenzeka kuWanda, makhe sibone indlela iBhayibhile esinceda ngayo ukuphendula loo mbuzo. Isiseko sempendulo sifumaneka kula mazwi athethwa ngumpostile uPawulos kumaKristu aseKorinte: “Akukho namnye unako ukubeka litye limbi lesiseko, nxamnye nelo libekwe kade, linguYesu onguKristu. Ukuba ke umntu ukhe wakha phezu kweli litye lesiseko igolide, isilivere, amatye anqabileyo, imithi, ingca, iindiza, umsebenzi walowo nalowo wobonakalaliswa; kuba loo mini iya kuwazisa, ngokuba iya kuvela inomlilo; nomsebenzi walowo nalowo, umlilo uya kuwucikida ubunjani bawo.”—1 Korinte 3:11-13.

Isiseko

Kwakutheni ukuze uPawulos abhale la mazwi? Wayeqalise umsebenzi wokwakha iimpawu zobuKristu eKorinte, kodwa kwakuvele iingxaki. Kakade ke, umsebenzi kaPawulos wokwakha wawungabandakanyi abantwana bakhe bokwenyama. Wawubandakanya abo babengamaKristu ngenxa yokushumayela kwakhe. Kodwa aba wayebagqala njengabantwana bokomoya, yaye oko wakuthethayo kubalulekile nakubazali.—1 Korinte 4:15.

UPawulos wayezile eKorinte ngaphambilana yaye wayemisele ibandla apho. Abo basabelayo ekushumayeleni kwakhe benza iinguqulelo eziphawulekayo kubuntu babo. Bambi ngaphambili babengabantu ababeziphethe kakubi ngokwesini, amasela, abakhonzi bezithixo namanxila. (1 Korinte 6:9-11) Kodwa bakwazi ukuguqukela kwindlela yobuKristu yokucinga ngenxa yokuba, ngokungathi kunjalo, uPawulos wayebeke isiseko esihle. Sasiyintoni eso siseko? “Akukho namnye unako ukubeka litye limbi lesiseko, nxamnye nelo libekwe kade, linguYesu onguKristu.”—1 Korinte 3:11.

UPawulos wasibeka njani esi siseko njengoko wayefundisa la makholwa matsha eKorinte? Uyasixelela: “Mna ke, ndakuba ndizile kuni, bazalwana, andizanga ngabugcisa bakuthetha nabulumko, ndinazisa ubungqina bukaThixo. Kuba ndagqiba kwelokuba ndingazi nto phakathi kwenu, ingenguYesu Kristu, naye ke ebethelelwe [emthini, NW].” (2 Korinte 2:1, 2; IZenzo 18:5) Ingqalelo akazange ayalathisele kuye okanye inyaniso ayihombise ukuze ibe nomtsalane wobukrelekrele bangaphandle. Kunoko, walathisela ingqalelo kuYesu Kristu nakwindlela athe wasetyenziswa ngayo nguThixo.

Enyanisweni, uYesu usisiseko esomelele ngokumangalisayo anokwakhela phezu kwaso umKristu. Walungiselela idini lentlawulelo. Ngoku unguKumkani wasezulwini yaye njengokumkani uya kuthi kungekudala atshabalalise iintshaba zikaThixo eArmagedon. Uya kwandula ke aphumeze ubulungisa bukaThixo ebudeni bolawulo lweminyaka eliwaka, yaye njengoMbingeleli Omkhulu kaThixo, uya kuthi ngokuthe ngcembe abuyisele uluntu emfezekweni. Sisiphi esinye isiseko umntu anokusifuna?

Ngenxa yoko, xa sisakha iimpawu zobuKristu kubantwana bethu, kuhle ukuba sixelise uPawulos size siqinisekise ukuba bayaziqonda ezi zibakala zibalulekileyo. Kwasebusaneni, sifanele sifundise abantwana bethu ukuba bamthande uYesu ngenxa yoko asenzele kona noko asaqhubeka esenzela kona.—1 Petros 1:8.

Ukwakha

Noko ke, nangona uPawulos wayebeke esi siseko silungileyo, kwabakho amagingxigingxi kumsebenzi wokwakha emva kokuba emkile. (1 Korinte 3:10) Ingxaki yayingahlukanga kuleyo abazali abaninzi bajamelana nayo namhlanje. Bakhulisela abantwana babo kukholo lobuKristu yaye baqinisekile ukuba abantwana bayakuqonda oko ikuko inyaniso. Kodwa bakukhula, abantwana bayakhukuliseka balushiye okanye balugatye ukholo. Kwenziwa yintoni oko? Ngokufuthi kuba ngenxa yezixhobo zokwakha ezisetyenzisiweyo.

UPawulos wathi iimpawu zazinokwakhiwa ngezinto zexabiso: igolide, isilivere namatye anqabileyo. Okanye bunokwakhiwa ngezinto ezingezozaxabiso: imithi, ingca neendiza. (1 Korinte 3:12) Ngoku, ukuba umakhi usebenzisa igolide, isilivere namatye anqabileyo, umele ukuba wakha isakhiwo esomeleleyo, esinexabiso elingathethekiyo. Kodwa umakhi osebenzisa imithi, ingca neendiza wakha unomgogwana nje, into yokwexeshana nengenaxabiso.

Kubonakala ukuba eKorinte kwakusetyenziswa izixhobo zokomoya zokwakha ezingomelelanga. Bambi abaqhubeka besakha kwisiseko esasibekwe nguPawulos babesakha ngezixhobo ezingezozaxabiso, bengakhi izakhiwo ezomeleleyo nezihlala zihleli. AmaKorinte ayeqalise ukukhangela kubantu, yaye kwakukho ukungamanyani, umona neembambaniso phakathi kwawo. (1 Korinte 1:10-12; 3:1-4) Ngekwakuthintelwe njani oku? Ngokusebenzisa kwabo izixhobo zomgangatho ophucukileyo nezihlala zihleli.

Ezi zimela ezo mpawu zixabisekileyo eziyinxalenye ebalulekileyo yobuntu bomKristu. Ziphi iimpawu? Umpostile uPetros wakhankanya olunye: “Ukucikideka kokholo lwenu . . . kunqabile kakhulu, ngaphezu kwegolide.” (1 Petros 1:6, 7) UKumkani uSolomon wakhankanya ezinye ezimbini: ubulumko nengqiqo, nto ezo awathi ukuba nazo ‘kulungile ngaphezu korhwebo lwesilivere.’ (IMizekeliso 3:13-15) Yaye uKumkani uDavide wasikhumbuza ukuba ukoyika uYehova nokuqonda imithetho yakhe ‘kunokunqweneleka kunegolide.’—INdumiso 19:9, 10.

Ezi nezinye izixhobo ezixabisekileyo zinokwakhelwa kwiimpawu zamaKristu ukuze zincede abantwana bethu baphumelele iimvavanyo. Noko ke, sinokuqiniseka njani ukuba sakha ngezixhobo ezinjalo? Ngokunyamekela iintliziyo, ezabantwana bethu nezethu.

Umsebenzi Wokwakha Ophumelelayo

Indima yentliziyo yomzali kulo msebenzi wokwakha ibonwa kumthetho owanikelwa nguYehova kubazali kuhlanga lwakwaSirayeli wamandulo: “La mazwi ndikuwisela umthetho ngawo namhlanje, aze abe sentliziyweni yakho.” Waza ke wahlabela mgama wathi: “Uze uwatsolise koonyana bakho.” (Duteronomi 6:6, 7) Ngoko ke, ngaphambi kokuba sakhe abanye, simele sizakhe thina ngokwethu. Abantwana bethu bafanele babone kwizinto esizithethayo nesizenzayo ukuba ubuntu bethu bakhiwe ngezixhobo ezizizo.—Kolose 3:9, 10.

Ngoko, ukufundisa kwethu kumele kufikelele intliziyo yabo. UYesu, oyena mntu wakha wanempumelelo ekwakheni ubuntu bobuKristu, wafikelela iintliziyo ngokusebenzisa imizekeliso nemibuzo. (Mateyu 17:24-27; Marko 13:34) Abazali bafumanisa ukuba obu buchule bokufundisa bufanayo bunempumelelo engathethekiyo. Basebenzisa imizekeliso ukwenza iinyaniso zobuKristu zibe nomtsalane kwiintliziyo zabantwana babo abaselula, yaye basebenzisa imibuzo ecingisisiweyo ukuze baqonde oko abantwana babo abadadlana bakucingayo, indlela abaqiqa ngayo ezintliziyweni zabo.—IMizekeliso 20:5.

Xa uMoses wayezama ukwakha kumaSirayeli umnqweno wokuhlala ethembekile, wathi: “Ugcine imithetho kaYehova, nemimiselo yakhe, . . . ukuba kulunge kuwe.” (Duteronomi 10:13) Ngokufanayo, abazali benza kakuhle ukungapheleli nje ngokubacacisela ngokucacileyo abantwana babo imithetho kaThixo kodwa nokubeyisela ukuba babone isizathu sokuba izinto ezinjengokunyaniseka, ukucoceka ngokokuziphatha nonxulumano olulungileyo zizezokulungelwa kwabo.

Elokugqiba, uYesu wathi: “Bubo ke obu ubomi obungunaphakade, ukuba mabakwazi, wena ukuphela koThixo oyinyaniso, naye uYesu Kristu omthumileyo.” (Yohane 17:3) Xa abantwana bemazi uYehova beselula, befunda ukuthetha naye ngeengxaki zabo, baze babone ephendula imithandazo yabo, bakhulisa eyona nxalenye ibalulekileyo yobuntu bobuKristu: ulwalamano lobuqu noMdali wabo.

Umlilo

UPawulos wafumanisa ukuba umsebenzi wokwakha eKorinte wawungenziwanga kakuhle, kwamila iimpawu zehlabathi, ezinjengamahlelo neeyantlukwano. Oku kwakuyingozi ngenxa yokuba, njengokuba wacacisayo, “nomsebenzi walowo nalowo, umlilo uya kuwucikida ubunjani bawo.”—1 Korinte 3:13.

Uyintoni umlilo? Usengalulo naluphi na uvavanyo uSathana aluzisela umKristu. Usenokuba yingcinezelo yoontanga, izilingo ezingokwenyama, izinto eziphathekayo, intshutshiso kwanempembelelo eyingozi yamathandabuzo. Ngokuqinisekileyo iimvavanyo ezinjalo ziza kufika. “Umsebenzi walowo nalowo wobonakalaliswa; kuba loo mini iya kuwazisa, ngokuba iya kuvela inomlilo.” Abazali abalumkileyo bakha iimpawu kubantwana babo ngolindelo lokuba abantwana baya kuvavanywa. Kodwa banentembelo yokuba ngoncedo lukaYehova, abantwana babo baya kumelana nokuvavanywa. Ukuba abazali banesi simo sengqondo, baya kusikelelwa kakhulu.

Umvuzo

UPawulos wathi: “Ukuba umsebenzi awawakhayo umntu phezu kwalo, uthe wahlala uhleli, wowamkela umvuzo.” (1 Korinte 3:14) Umpostile uPawulos wawamkela umvuzo. Ebhalela amaKristu akwisixeko saseTesalonika, apho wayenze umsebenzi wokwakha nakhona, wathi: “Kuba liyintoni na ithemba lethu, novuyo lwethu, nesithsaba sethu soqhayiso? Asinini aba na, phambi kweNkosi yethu uYesu Kristu ekufikeni kwayo? Inene, nini uzuko novuyo lwethu.”—1 Tesalonika 2:19, 20.

Unina kaWanda wawufumana lo mvuzo. Xa uWanda oneminyaka eli-12 wahlukaniswayo nonina, ekuqaleni wakhalela ukuzibulala. Wandula ke wakhumbula isiluleko sikanina sokuxubusha iingxaki zakhe noYehova emthandazweni. Wathandaza yaye kungekudala wacinga icebo lokukhangela kwincwadi eneenombolo zemfonomfono ukuze abone ukuba kwakungekho maNgqina kaYehova kufutshane na. Waqhagamshelana nawo waza wafumanisa ukuba kwakukho intsapho eyayihlala ngezantsi kwisitrato esinendlu kayise. UWanda uthi: “Hayi indlela endandichwayite ngayo!”

Ngokukhuthazwa yile ntsapho, uWanda walungiselela ukuba umnakwabo nodade wabo abancinane babe ngamaKristu akhutheleyo kwakhona. Ucacisa athi: “Kwakuyimbopheleleko yam ukuqinisekisa ukuba sizilungele iintlanganiso. Kwakufuneka ndihlambe impahla yethu, ndikame iinwele zethu ndize ndiqinisekise ukuba sicocekile kwaye siyabukeka.” Kwakungumsebenzi onzima kwintombazana eselula, kodwa wawenza. Ngasihlandlo sithile uyise wazama ukukuthintela ukuya kwabo kwiintlanganiso, kodwa aba bantwana bamcenga kwaye wabavumela baya.

Kamva, aba bantwana bamanyaniswa nonina kwakhona. Xa uWanda wayeneminyaka eli-15 ubudala, waba ngumKristu obhaptiziweyo, yaye ekugqibeleni wathi usukelo lwakhe lukukuba ngumvangeli wasemazweni. Ewe, umsebenzi kanina kaWanda waluphumelela uvavanyo. Wafumana umvuzo wokubona intombi yakhe iyimela iyodwa inyaniso. Ngamana bonke abazali abangamaKristu banganempumelelo efanayo njengoko besebenzela ukwakha ubuntu bobuKristu kubantwana babo.

[Ibhokisi ekwiphepha 27]

Njengokuba eli nqaku libonisa, ngoxa abazali bezama nzima ukwakha iimpawu zobuKristu kubantwana babo, abantwana nabo banembopheleleko. Nabo, njengawo onke amaKristu, bamele benze umsebenzi wokuzakha ngokwabo. (Efese 4:22-24) Nangona abazali benethuba elihle lokunceda koku, ekugqibeleni mntu ngamnye umele enze esakhe isigqibo sokukhonza uYehova.