Siluhlobo Olunokholo
Ukunikela Isigidimi Sentuthuzelo EItali
UYEHOVA ‘nguThixo wentuthuzelo yonke.’ Ngokufunda ukumxelisa, abakhonzi bakhe ‘bayakwazi ukuthuthuzela abo bakulo naluphi na uhlobo lwembandezelo.’ (2 Korinte 1:3, 4; Efese 5:1) Le yenye injongo ephambili yomsebenzi wokushumayela owenziwa ngamaNgqina kaYehova.
Ukunceda Ibhinqa Elisweleyo
Ingakumbi kule minyaka yamvanje, abaninzi baye bafudukela kumazwe afumileyo ngenxa yobuhlwempu, imfazwe nomnqweno wokuphila ubomi obubhetele. Kodwa akulula ukuziqhelanisa nendawo entsha. UManjola wayehlala eBorgomanero nabanye awayesuka nabo eAlbania. Ekubeni wayehlala eItali ngokungekho mthethweni, waba mathidala ukuthetha noWanda, ongomnye wamaNgqina kaYehova. Sekunjalo, ekugqibeleni uWanda wenza idinga noManjola, owathi ngokukhawuleza wabonakalisa umdla omkhulu wokufundisisa iLizwi likaThixo, nangona kwakunzima ngenxa yokuba babethetha iilwimi ezingafaniyo. Noko ke, emva kokumtyelela izihlandlo ezimbalwa, uWanda wayengasafumani mntu kwelo khaya. Kwakwenzeke ntoni bethu? UWanda wafumanisa ukuba bonke abantu ababehlala kuloo ndlu babesabile ngenxa yokuba omnye wabo—umfana owayethandana noManjola—wayefunwa ngenxa yokubulala!
Emva kweenyanga ezine, uWanda waphinda wadibana noManjola. Xa ekhumbula oku uWanda uthi “wayexwebile ebhityile, ekhangeleka njengomntu obetsala nzima ngokwenene.” UManjola wachaza ukuba umfana awayefudula ethandana naye wayesentolongweni yaye abahlobo bakhe awayebhenele kubo ukuze afumane uncedo bamphoxa kakhulu. Ebona ukuba utshelwe zizicheku, wathandaza kuThixo ecela uncedo. Kwathi qatha uWanda engqondweni yakhe, owayekhe wathetha naye ngeBhayibhile. Hayi indlela awavuya ngayo uManjola akumbona kwakhona!
Kwavuselelwa isifundo seBhayibhile, yaye ngokukhawuleza uManjola waqalisa ukuya kwiintlanganiso zamaKristu. Waphumelela ekufumaneni imvume esemthethweni yokuhlala eItali. Emva konyaka, uManjola waba liNgqina elibhaptiziweyo. Ethuthuzelwe ngamadinga kaThixo, ubuyele eAlbania ukuze abelane nabantu belizwe lakowabo ngesigidimi sentuthuzelo.
Ukunikela Ubungqina Kwinkampu Yabaphambukeli
Amabandla amaninzi aseItali aye enza amalungiselelo okunikela ubungqina kubaphambukeli abanjengoManjola. Ngokomzekelo, ibandla eliseFlorence lenza amalungiselelo okutyelela inkampu yabaphambukeli rhoqo. Abahlali bale nkampu—abaninzi kubo abavela kwiMpuma Yurophu, eMakedoniya, naseKosovo—babetyhubela amava obunzima obahlukahlukeneyo. Abanye babenengxaki yeziyobisi okanye utywala. Abanye babeziphilisa ngokuba izinto ezingenamsebenzi.
Ukushumayela isigidimi sentuthuzelo phakathi kwaba bantu kwakulucelomngeni. Noko ke, ekugqibeleni uPaola umvangeli wexesha elizeleyo, wadibana noJaklina, inenekazi laseMakedoniya. Emva kweengxubusho ezimbalwa, uJaklina wakhuthaza umhlobo wakhe uSusanna ukuba ahlolisise iBhayibhile. Emva koko noSusanna wathetha nezinye izalamane. Kungekudala, abahlanu kuloo ntsapho babefundisisa iBhayibhile rhoqo, besiya kwiintlanganiso zamaKristu, yaye bekusebenzisa oko babekufunda. Nakuba zikho iingxaki abajamelana nazo, bafumana intuthuzelo kuYehova nakwiLizwi lakhe.
Unongendi Ufumana Intuthuzelo Evela KuYehova
Kwidolophu yaseFormia, uAssunta umvangeli wexesha elizeleyo wathetha nebhinqa elalihamba kabuhlungu. Eli bhinqa lalingunongendi yaye lalilolonqulo olunikela uncedo kwabagulayo nabaneziphene abasezibhedlele nabasemakhaya.
UAssunta wathi kulo nongendi: “Nawe usentlungwini, akunjalo? Kulusizi kuba sonke sineengxaki esijamelene nazo.” Wathi akutsho zaphalala iinyembezi kulo nongendi waza wachaza ukuba ukhathazwa yimpilo kakhulu. UAssunta wamkhuthaza esithi, uThixo weBhayibhile unako ukumthuthuzela. Unongendi wawathabatha amaphephancwadi asekelwe eBhayibhileni awawanikwa nguAssunta.
Xa bephinda bexubusha kwakhona, lo nongendi ogama linguPalmira, wavuma ukuba wayebandezelekile kakhulu. Wayehleli ixesha elide kwiziko elaliphethwe ngoonongendi. Xa kwafuneka emke apho okwethutyana ngenxa yempilo, akazange avunyelwe ukuba abuyele apho. Sekunjalo, uPalmira waziva ebophelelekile kuThixo ngenxa yezifungo awayezenzile njengonongendi. Wabuyela kubaphilisi ukuze afumane “unyango” kodwa wayephazamisekile ngenxa yaloo nto yayimehlele. UPalmira wavuma ukufundisisa iBhayibhile, yaye wayesiya kwiintlanganiso zamaKristu isithuba esingangonyaka. Emva koko wafudukela kwenye indawo, yaye akazange aphinde adibane namaNgqina. UAssunta waphinda wamfumana emva kweminyaka emibini. UPalmira wachaswa kakhulu yintsapho yakhe nangumfundisi. Sekunjalo, wasivuselela isifundo sakhe seBhayibhile, wenza inkqubela ngokomoya, waza wabhaptizwa njengomnye wamaNgqina kaYehova.
Ewe, abaninzi bafumana ukhuthazo kwisigidimi esivela ‘kuThixo onika intuthuzelo.’ (Roma 15:4, 5) Ngenxa yoko, amaNgqina kaYehova aseItali azimisele ukuqhubeka elinganisa uThixo ngokudlulisela isigidimi sentuthuzelo kwabanye.