Ukuxakeka Ziindaba Ezilungileyo
UMPOSTILE uPawulos wathubeleza kwingxaki efanayo naleyo athubeleza kuyo amaNgqina kaYehova angabalungiseleli bexesha elizeleyo—wayenemali encinane. Ngoko kwelaseKorinte wavula ishishini elijongelwa phantsi lokwenza iintente awayefunde ukuzenza ngoxa wayeselula. Lo msebenzi wawunzima, yaye kusenokwenzeka ukuba maxa wambi izandla zakhe zazisopha kukusikwa ngaloo malaphu arhabaxa eentente. Ngangendlela eyayincinane ngayo ingeniso kwakunzima nokuthenga into esiwa phantsi kwempumlo okanye into yokwambatha, kodwa wayanelisekile, kuba ekugqibeni kwakhe umsebenzi wakhe wempangelo suku ngalunye, wayelivala ishishini lakhe aze enze umsebenzi ngokuyintloko awayewuzele kwelaseKorinte—wayeshumayela iindaba ezilungileyo!—Filipi 4:11, 12.
NgeSabatha nganye, uPawulos wayesiya kwindlu yesikhungu. Enyanisweni, xa uPawulos wayeqala ukuthetha nabantu baseKorinte ‘wayethambile, esoyika, egubha.’ (1 Korinte 2:1, 3) Kodwa ekhuthazwa kukubona abanye besamkela isigidimi sakhe, uPawulos waqhubeka “exoxa endlwini yesikhungu iisabatha ngeesabatha zonke, ezamela ukweyisa amaYuda namaGrike.”—IZenzo 18:1-4.
Noko ke, okwethutyana uPawulos wanyanzeleka ukuba ashumayele ngamathub’ athile. Ekuhambeni kwexesha kwafika uSilas noTimoti bevela eMakedoni bephethe umnikelo wobubele ‘wokumxhasa ekusweleni kwakhe.’ (2 Korinte 11:9, NW; Filipi 4:15) Enye into eyamkhuthazayo yayiziindaba zokuba abazalwana baseTesalonika babemi beqinile phezu kwayo nje intshutshiso.—1 Tesalonika 3:6.
Oku kwamshukumisela entwenini uPawulos? “UPawulos waqalisa ukuxakeka lilizwi [“ukuchithela lonke ixesha lakhe ekushumayeleni,” The Jerusalem Bible; Today’s English Version], eshumayela kumaYuda ukungqina ukuba uYesu unguye uKristu.” (IZenzo 18:5) Akuba ekhululekile okwexeshana kwiingxaki zemali, uPawulos akazange onwabe de wabe ubuyele kumsebenzi wokushumayela wexesha elizeleyo. Wawufunqula ngentshiseko enkulu lo msebenzi, engapheleli nje ekushumayeleni kumaYuda kodwa wada wachitha ixesha ebhala incwadi yakhe yokuqala kwawazibhalayo neziphefumlelweyo—incwadi eyayisiya kwabaseTesalonika!
Ikhondo Esifanele Sililandele Namhlanje
Ingxelo engokuzibhokoxa kukaPawulos kwelaseKorinte iye yagcinwa ukuze ikhuthaze onke amaKristu ukuba axakeke ziindaba ezilungileyo. UPawulos wayesazi ukuba iNkosi uYesu yayisele ibanike uzuko olukhulu abafundi bayo ngokuthi ‘balukhanyiselo lwehlabathi.’ Babengamele bakufihle oku kukhanya. UYesu wabaxelela oku: “Malukhanye ngokunjalo ukhanyiselo lwenu phambi kwabantu; ukuze bayibone imisebenzi yenu emihle, bamzukise uYihlo osemazulwini.” (Mateyu 5:14-16) Oku kwakuthetha ukuba nesabelo esizeleyo kumsebenzi wokushumayela owaxelwa kwangaphambili nguYesu. (Mateyu 24:14; 28:19, 20; IZenzo 1:6-8) Ukushunyayelwa kweendaba ezilungileyo zoBukumkani kwakusisizathu esiyintloko sokusekwa kwebandla lamaKristu.
AmaKristu okuqala, njengoPawulos, awuthabatha nzulu lo msebenzi wokushumayela. Ngaloo ndlela, xa iintshaba zikaThixo zacinga ukuba zazikubhangisile ukukhanya kwenyaniso ngokubulala ngenkohlakalo “iMbangi yobomi,” abalandeli bayo baqhubeka belukhanyiselo lwehlabathi, beshumayela ngenkalipho. (IZenzo 3:15) Kwanentshutshiso ayizange iyithibaze imigudu yabo. Ingxelo yeBhayibhile ithi: “Imihla yonke etempileni, nasemakhaya, babengayeki ukufundisa nokushumayela iindaba ezilungileyo zokuba uYesu unguye uKristu.” (IZenzo 5:42) Kwakungekho nto yayinokubathintela!
Kumaxesha anamhlanje, amaKristu aye ngokukwanjalo axakeka kumsebenzi wokunikela ubungqina. Ngasekupheleni kwenkulungwane ye-19, abafundi abaphaphileyo beLizwi likaThixo baqalisa ukubona imfuneko yokwabelana nabanye ngeenyaniso zeBhayibhile. IZion’s Watch Tower Tract Society—umbutho wazwenibanzi—yamiselwa ngokusemthethweni ngowe-1884. Aba Bafundi BeBhayibhile, abathi ukususela ngowe-1931 baziwa njengamaNgqina kaYehova, baye bawuzalisa ngokoqobo umhlaba ngolwazi lweLizwi likaThixo. Ukuxakeka kwabo kulo msebenzi kuye kwaphumela ekubeni babe ngumkhosi omkhulu nowomeleleyo wabantu abangaphezu kwezigidi ezine! Yaye ngokungathandabuzekiyo inani lawo liya kuqhubeka lisanda phantsi kolwalathiso lukaYehova.—Isaya 60:22.
Ngaba Uyayiphumeza Indima Yakho?
UYesu wathi: “Ukuvuna okunene kuninzi, kodwa bona abasebenzi bambalwa.” (Mateyu 9:37, 38) Ngowe-1990 phantse ngabantu abazizigidi ezilishumi abebekho kwiSikhumbuzo sokufa kukaKristu. Esinjani sona ukumangalisa isivuno esingakumbi esinokubakho ehlabathini lonke! Kodwa ngoxa sivuyela olu lwando luqhubekayo, ngamnye umele azibuze oku, ‘Mna ndinesabelo ngomkhamo ongakanani kulo msebenzi mkhulu kangaka? Ngaba ndiba nesabelo kuwo rhoqo—veki nganye ukuba kunokwenzeka?’
Abadala bamele bakhokele kulo msebenzi bemisela ‘umzekelo kumhlambi.’ (1 Petros 5:3) Enyanisweni, inkoliso yabadala iyaphangela. Kwakunjalo nangompostile uPawulos ngoxa wayeseKorinte. Ukanti, wabekela ecaleni ixesha lokuya rhoqo kumsebenzi wokushumayela. Abadala abaninzi namhlanje baxakeke ngokufanayo kwimisebenzi yokomoya ngeempela-veki. Oku kunokubakhuthaza ngamandla bonke abasebandleni. Ngezinye iinyanga xa kukho iphulo elikhethekileyo, kumabandla aliqela inkoliso yabavakalisi ingenela inkonzo yobuvulindlela. Iyintoni imfihlo yabo? Abadala bayakhokela ekushumayeleni nasekwenzeni amalungiselelo enkonzo yasentsimini.
Ngokukwanjalo nezicaka zolungiselelo zinokuba nempembelelo entle ebandleni ukuba zibakho rhoqo kwinkonzo yasentsimini. Khumbula ukuba, iZibhalo zincomela ukuba ‘babe nokundileka, balungiselele kakuhle.’ (1 Timoti 3:8, 13) Ukuthembeka kwinkonzo yasentsimini kungundoqo ukuze umzalwana afaneleke njengomdala okanye isicaka solungiselelo.—Tito 1:8, 9.
NjengoPawulos, bambi bayakwazi ukulinciphisa ixesha lomsebenzi wabo wempangelo baze ngaloo ndlela babe ngoovulindlela. Inani loovulindlela abathe ngxi, abangabancedani nabakhethekileyo liye landa ukususela kwi-137 861 ebudeni beminyaka nje elishumi edluleyo laza lafikelela kuma-536 508 ngowe-1990. Ngokuqinisekileyo, yintsikelelo nenkoliseko kaYehova kuphela ebinokubangela olu lwando. Noko ke, oovulindlela bamele bakuphaphele ukulisebenzisa ngobulumko ixesha, bangashumayeleli ukuzalisa iiyure kuphela. Bovulindlela, ngaba niyixhobela ngokwaneleyo intsimi kwaye nisiba ngabaphumelelayo kubulungiseleli? Ngaba nizabalazela ukusoloko nisenza inkqubela ukuze ubulungiseleli benu bube neziqhamo ngokwenene?
Imivuzo Yobulungiseleli Obulungeleleneyo
Ngaba uyayixabisa inkcazelo ezimas’ ubomi ekhutshwa nyanga nganye kwiMboniselo nakwiqabane layo, uVukani!? Ngokungathandabuzekiyo uyayixabisa. Ngaba uxabiso lwakho lukushukumisele ekubeni nesabelo ekusasazeni aba lindixesha? Omnye udade waseBotswana wakwenza oku. Ekuqaleni wayeyichasile inyaniso, kodwa umyeni wakhe wamfundela la maphephancwadi. Ekuhambeni kwexesha waguquka waza waba liNgqina. Nangona engakwazi ukufunda, uphumelela gqitha ekusasazeni amaphephancwadi, yaye uwasasaza ngokuthi, “Andikwaz’ ukufunda, kodwa umyeni wam uyandifundela la maphephancwadi. Ndiyawanandipha, yaye ndiqinisekile ukuba nawe uya kuwanandipha.”
Kutheni ungabi nesabelo nje veki nganye kulo msebenzi wokusindis’ ubomi? Wakuba nje ufaneleka ngokomoya, ibandla lamaKristu liya kukuvuyela ukukunceda uqalise kulo msebenzi. Phofu ke, ukusasaza amaphephancwadi kuyinkalo nje enye yenkonzo. Nabani na oxakeke ziindaba ezilungileyo uzabalazela ukuba ngolungeleleneyo kubulungiseleli bakhe. Ngokomzekelo, iWatch Tower Society ipapasha izigidi zeencwadi ezinoqweqwe olulukhuni, yaye zinikwa abantu ngokubanzi njengomthombo ohlala uhleli wesidlo esilunge ngakumbi sokomoya. Ngaba uye wanobuchule ngokwaneleyo kubulungiseleli bakho ngokokude ube nokusasaza iincwadi, njengethi Unokuphila Ngonaphakade Emhlabeni EParadisi?
Yaye kuthekani ngabantu ababonakalisa umdla? Ngaba ugcina ingxelo echanileyo ukuze ubabuyele? Amabuyelo anjalo anokukhokelela kwinkalo yenkonzo ezisa olona vuyo lukhulu—ukuqhuba isifundo seBhayibhile sekhaya. Khumbula ukuba, uYesu wasiyalela kuMateyu 28:19, 20 ukuba ‘senze abafundi, sibabhaptize.’ Oko kuthetha ukufundisisa iBhayibhile kunye nabo. Enyanisweni, ngokufuthi ukuqalisa isifundo kufuna ukuzingisa. Elinye iNgqina ladibana nesibini esikhulileyo esathi sasamkela ngothakazelelo isifundo seBhayibhile sekhaya. Kodwa sasihlehlisa isifundo kangangeeveki ezintathu ezilandelelanayo. Ekugqibeleni sade saqaliswa isifundo. Emva koko, kangangethuba elithile, esi sibini saye asakulungela ukufunda phantse veki nganye. Noko ke, ekugqibeleni umfazi wenza inkqubela ukusa kwinqanaba lokubhaptizwa. Lo mzalwana ubalisa esithi, “Emva kokubhaptizwa, amehlo akhe athi gwantyi iinyembezi zovuyo, ezasibangela ukuba mna nowakwam sichiphichiphize iinyembezi zovuyo.” Ewe, ukuxakeka ziindaba ezilungileyo kuzisa uvuyo olungathethekiyo!
Zenze Ufumaneke!
UYesu Kristu nompostile uPawulos bamisela umzekelo omhle wokuzinikela esinokuwuxelisa. Yaye sinabantu abaninzi abayimizekelo emininzi emihle yamaNgqina kaYehova ale mihla. Ngoku lixesha lokuba bonke abazaziyo iindaba ezilungileyo bazibhokoxe ngokupheleleyo ekuzivakaliseni kwabanye. IBhayibhile iyasiqinisekisa ukuba yonke inkonzo elolo hlobo ‘ayilambathi.’—1 Korinte 15:58.
NjengoPawulos, abaninzi bafanele banyamekele iintswelo ezingokwemali. Ngenxa yoku, abaninzi basenokungakwazi ukuba ngoovulindlela. Kodwa ngoncedo lukaYehova, sonke sinokulithobela icebiso elihle elikwabaseRoma 12:11: “Musani ukunqena; mayela nomoya lo, vuthani; mayela neNkosi le, khonzani.” Yaye ukuba iimeko ziyaguquka zize zivulele ithuba elingakumbi onokulichithela enkonzweni kaYehova, nabani na okuthandayo ukwenza ukuthanda kukaYehova, njengoPawulos, uyalixhakamfula elo thuba. Zixakekise ngeendaba ezilungileyo! Ukwenjenjalo akusayi kuzisa nje kuphela iingenelo ngoku kodwa kuya kuphumela kubomi obungunaphakade nakuvuyo nolonwabo olungenasiphelo kwixesha elizayo!—Mateyu 19:28, 29.