‘Xineka’ Bubulungiseleli Bakho
1 Xa sifunda ukuba umpostile uPawulos wayesebenza kwishishini lokwenza iintente eKorinte, sisenokugqiba kwelokuba oku kwamnciphisela amathuba okushumayela. Noko ke, IZenzo 18:5 zithi: “UPawulos waxineka lilizwi, enikela ubungqina kumaYuda bokuba uYesu unguKristu.” Kwakutheni ukuze uPawulos axineke kangaka ngumsebenzi wokushumayela? Nangona abaninzi eKorinte babesele bengamakholwa, iNkosi yaqinisekisa ukuba kwakusafuneka kwenziwe abafundi abaninzi kweso sixeko. (IZe. 18:8-11) Ngaba sinesizathu esifanayo sokuxineka bubulungiseleli bethu? Ewe. Abantu abaninzi ngakumbi banokufumaneka baze bafundiswe inyaniso.
2 Chitha Ixesha Elingakumbi Enkonzweni Ebudeni Buka-Aprili: Usukelo lwakho lusenokuba kukuxakeka ushumayela iindaba ezilungileyo kubulungiseleli nyanga nganye. Kodwa iinyanga ezithile zisenokusivulela amathuba okuba ‘sixineke’ ngulo msebenzi. Ezi ziquka inyanga ka-Aprili, incopho yexesha leSikhumbuzo. Ngaba iimeko zakho ziye zakuvumela ukuba ube nguvulindlela ongumncedani okanye wandise ubulungiseleli bakho? Abavakalisi abaninzi ababesoloko besenza oko baye basikelelwa gqitha. (2 Kor. 9:6) Ukuba wenza konke onako, khumbula ukuba uYehova uyakholwa yinkonzo yakho yomphefumlo uphela. (Luka 21:2-4) Enoba zinjani na iimeko, kwenze usukelo lwakho ‘ukuxineka’ bubulungiseleli ngenyanga ka-Aprili. Yaye ungalibali ukudlulisela ingxelo yakho yenkonzo yasentsimini kumqhubi wakho wesifundo sencwadi ekupheleni kwenyanga, ukuze ubalwe umsebenzi wakho kunye nowabanye abantu bakaYehova.
3 Tyelela Abasebatsha Abebeze ESikhumbuzweni: Kulo nyaka uphelileyo eMzantsi Afrika nakumazwe angabamelwane angaphantsi kwesebe lethu, ababeze eSikhumbuzweni babeli-187 588. Isimbuku sabo baza kuza kulo nyaka asikasazi. Kanti, iingxelo zibonisa ukuba kukho ithuba elihle ‘lesivuno’ esingakumbi. (Mat. 9:37, 38) Ngoko ke, ngokukhawuleza lungiselela ukubatyelela abantu abanomdla abebeze eSikhumbuzweni ukuze ubancede ngokomoya. Ukubeka amangomso kunokuvumela ‘ongendawo alixhwile ilizwi lobukumkani elihlwayelwe ezintliziyweni zabo.’ (Mat. 13:19) Utyelelo olukhawulezileyo luya kubonisa ukuba ‘uxinekile’ bubulungiseleli bakho.
4 Qhubeka Unceda Abapholileyo: NgoFebruwari kuye kwaqaliswa iphulo elikhethekileyo lokunceda abapholileyo. Ukuba kukho abathile abangekatyelelwa, abadala bafanele balungiselele ukubatyelela ngaphambi kokuba uAprili aphele. Abadala baya kuzama ukufumana unobangela wengxaki yaloo mntu nendlela yokumnceda aphinde akhuthale ekukhonzeni uYehova. Olu ncedo lothando lubonisa ukuba abadala bayithabatha nzulu imbopheleleko yabo yokwalusa “umhlambi kaThixo.” (1 Pet. 5:2; IZe. 20:28) Inkupho yeMboniselo kaSeptemba 15, 1993 iphepha 22-3 inikela amacebiso asemagqabini anokusetyenziswa ngabadala xa belungisa iingxaki ezintlanu eziqhelekileyo ezinokuba zihlasela abapholileyo. Ngokufanelekileyo, abanye basenokuvuselelwa kubulungiseleli basentsimini ngoAprili.
5 Nceda Abangakumbi Babe Ngabavakalisi Abangabhaptizwanga: Ngaba abantwana bakho bayakufanelekela ukuba ngabavakalisi abatsha beendaba ezilungileyo? Kuthekani ngabanye ofundisisa nabo iBhayibhile? Ukuba banconyelwe ngabadala, ngaba uAprili akazukuba lixesha elihle lokuba baqalise ukuba ngabavakalisi? Ukuba umntu wenza inkqubela yaye uyifundile incwadana enemifanekiso ethi Okufunwa NguThixo nencwadi ethi Ulwazi, isifundo seBhayibhile sinokuqhutywa kwincwadi yesibini—enoba yincwadi ethi ILizwi LikaThixo, Uxolo Lokwenyaniso okanye ethi Ukumanyana Ekunquleni. Usukelo lwakho kukunceda umfundi ayiqonde ngakumbi inyaniso, afaneleke njengomvakalisi ongabhaptizwanga aze abe liNgqina likaYehova elizahluleleyo nelibhaptiziweyo.—Efe. 3:17-19; 1 Tim. 1:12; 1 Pet. 3:21.
6 Umdla onyanisekileyo onawo kwizifundo zeBhayibhile unokuzinceda ekugqibeleni ziyamkele inyaniso. Elinye iNgqina ladibana nesibini esesikhulile esasamkela ngokusuk’ entliziyweni isifundo seBhayibhile. Kodwa esi sibini sasimisa isifundo iiveki ezintathu zilandelelana. Ekugqibeleni isifundo saqaliswa. Sandula ke esi sibini sasimisa isifundo phantse veki nganye. Noko ke, ekugqibeleni umfazi wenza inkqubela wade wabhaptizwa. Lo mzalwana ukhumbula oku: “Emva kokuba ebhaptiziwe, amehlo akhe ayethe gwantyi iinyembezi zovuyo, nto leyo eyenza mna nomfazi wam sayengezelisa iinyembezi zovuyo.” Ewe, ‘ukuxineka’ ziindaba ezilungileyo kuzisa uvuyo olukhulu!
7 Isiprofeto seBhayibhile neziganeko zehlabathi zibonisa ukuba singene nzulu kweli xesha lesiphelo. Ngoku lixesha lokuba bonke abantu bakaThixo ‘baxineke’ kukwazisa abanye iindaba ezilungileyo. Umpostile uPawulos uyasiqinisekisa ukuba umsebenzi onjalo ‘awulolize eNkosini.’—1 Kor. 15:58.