UYehova—‘Indoda Elwayo’

UMKHOSI onamandla wamajoni aseYiputa wawutshatyalalisiwe. NgakuLwandle Olubomvu, izidumbu zabaqhubi beenqwelo zokulwa nezabakhweli bamahashe zazilatyuzeliswa ngamaza angaselunxwemeni, nezixhobo zokulwa zazingcolise unxweme. Ekhokelwa nguMoses, amadoda akwaSirayeli ngovuyo avuma ingoma yoloyiso ethi: “Ndiya kuhlabela kuYehova, kuba enobungangamsha obukhulu, ihashe nomkhweli walo ulizulumbele elwandle. UYehova yindoda elwayo, uYehova ligama lakhe.”—Eksodus 15:1, 3.

Uloyiso lukaYehova kuLwandle Olubomvu ngokwenene lwaluyimbonakaliso yokongama kwakhe ekulweni. USirayeli wanduluka eYiputa ngokwemikhosi kodwa enolwazi oluncinane ngezemfazwe. Ngentsika yelifu neyayiguquka ibe yintsika yomlilo ebusuku, uYehova wayebakhokele ukusuka eRameses ukuya “enyeleni yentlango” e-Etam. (Eksodus 12:37; 13:18, 20-22) Waza uYehova wathi kuMoses: “Thetha koonyana bakaSirayeli ukuba bajike, bamise iintente phambi kwePi-hahiroti, phakathi kweMigdoli nolwandle, phambi kweBhahali-tsefon. ‘ . . Uya kuthi uFaro ngoonyana bakaSirayeli, Badidekile ezweni. . . . Abasukele.” (Eksodus 14:1-4) Ngentobelo, uSirayeli wajika waza wanduluka ukuya ePi-hahiroti. Iintlola zikaFaro zanikela ingxelo ngoko okwakubonakala ngathi kukudideka, nanjengokuba kwakuxelwe ngenx’ engaphambili, uFaro wahlanganisa umkhosi wakhe waza walanda ekhondweni.—Eksodus 14:5-9.

Umgibe—Ngaba NgowamaSirayeli Okanye NgokaFaro?

Begutyungelwa ziintaba macala, ilulwandle ngaphambili, ingamaYiputa ngasemva, amaSirayeli oyikayo azibona esemgibeni, ngoko acela uncedo kuThixo. Akubahlanganisa abantu, uMoses wathi: “Musani ukoyika; misani, nilubone usindiso lukaYehova aya kunenzela lona namhla; kuba amaYiputa lawo niwabonileyo namhlanje, anisayi kuphinda niwabone naphakade. UYehova uya kunilwela, ke nina niya kuthi cwaka.” (Eksodus 14:10-14) Ngokweso sithembiso, “wesuka umqulu welifu phambi kwayo, wema emva kwayo; wathi zinzi phakathi kwempi yamaYiputa, nemfuduka yamaSirayeli. . . . Akasondelelana ubusuku bonke.”—Eksodus 14:15-20.

Njengokuba uYehova wayeyalele, uMoses wolula intonga yakhe phezu kolwandle yaye “ahlulelana amanzi” ukuze amaSirayeli asabe. Yaye kwenzeka ummangaliso okhwankqisayo! (Eksodus 14: 16, 21) Umoya onamandla ovela empuma waqalisa ukwahlula amanzi oLwandle Olubomvu, usenza umjelokazi obanzi esasinokungena kuwo eso sizwe sonke—izizigidi ezithathu zonke—ngokwemikhosi. Ngasekhohlo nangasekunene kukaSirayeli, “imiqukuqela” yamanzi yema njengeendonga ezimbini eziphakamileyo.—Eksodus 15:8.

AmaSirayeli, encedwe kukukhanya okuvela kwintsika yomlilo, abalekela kwintsele yolwandle eyayomiswe ngumoya. Ngentsasa elandelayo, amaSirayeli ayengawokugqibela ayesele ewelele kunxweme olungaphesheya. “Asuka amaYiputa, angena emva kwabo elwandle phakathi, enamahashe onke kaFaro, neenqwelo zakhe zokulwa, nabamahashe bakhe.” Aba basukeli bakhawuleza bangena emgibeni!—Eksodus 14:23.

“[UYehova] wayidubaduba impi yamaYiputa. Wayidonyula imilenze yeenqwelo zawo zokulwa, aziqhuba nzima.” UMoses ngeli xesha wolula isandla sakhe phezu kolwandle, yaye “ulwandle lwabuyela ebumeni balo.” Iindonga zamanzi zadilika zaza zagubungela amaYiputa. Azama ukubaleka, “uYehova wawavuthululela amaYiputa phakathi elwandle.” Akukho namnye owasindayo! Ngemincili amaSirayeli avumela uYehova ingoma yoloyiso.—Eksodus 14:24–15:3; INdumiso 106:11.

UYehova Ulwela UYoshuwa

UYehova wangqineka ‘eyindoda elwayo’ kwamanye amadabi. Elinye yayilidabi laseAyi. Uhlaselo lokuqala lwesixeko aluzange lube nampumelelo ngenxa yesenzo esinzulu esiphosakeleyo sika-Akan. Xa lo mcimbi walungiswayo, uYehova wamyalela uYoshuwa indlela abafanele balwe ngayo.—Yoshuwa 7:1, 4, 5, 11-26; 8:1, 2.

Elandela imiyalelo kaYehova, uYoshuwa ebusuku walalela ngemva kwesixeko, ngasentshona kwaso. Owona mkhosi wakhe mkhulu waya ngasentla kwintlambo ethile engaphandle nje kancinane kweAyi yaye wabonakala ulungele ukuhlasela ngaphambili. Amadoda aseAyi abanjiswa ngulo mgibe. Esenehlombe ngempumelelo yedabi elingaphambi kweli, ngokudyuduzela asukela amaSirayeli ukuphuma esixekweni. Ezenza arhoxayo, amaSirayeli ahlehla aphindela “ngendlela yaseNtlango,” etsalela iintshaba kude nelaseAyi.—Yoshuwa 8:3-17.

Kanye ngexesha elifanelekileyo, uYehova wathi kuYoshuwa: “Wolule umkhonto osesandleni sakho ngaseAyi; kuba ndiya kuyinikela esandleni sakho.” Ngalo mqondiso, abo babebalalele basihlasela eso sixeko, bebulala abantu ngamakrele nangomlilo. Ubona umsi, umkhosi weentshaba owawungaphandle wasuka watyhafa ngokupheleleyo. UYoshuwa, epheza ukuhlehla kodwa ehlasela, utshaba walufaka phakathi kwemikhosi yakhe emibini. Ngaba olo yayiluloyiso lomntu? Akunjalo. AmaSirayeli aphumelela ngenxa yokuba, njengokuba uYoshuwa kamva watsho kuwo: “UYehova uThixo wenu nguye onilweleyo.”—Yoshuwa 8:18-27; 23:3.

Idabi LaseKishon

Ukongama kukaYehova edabini kwakhona kwabonakaliswa kwiNtlambo yeKishon, kufutshane naseMegido. Ukumkani uYabhin ongumKanan wayecinezele uSirayeli kangangeminyaka engama-20. Umkhosi wakhe, phantsi komthetheli-mkhosi uSisera, wawuquka iinqwelo zokulwa ezingama-900 ezineerhengqa zentsimbi emavilini azo—umkhosi owawubonakala ungenakoyiswa ngaloo mihla.—ABagwebi 4:1-3.

Sekunjalo, ngomprofeti uDebhora, uYehova wamema uMgwebi uBharaki ukuba ahlanganise amajoni angamawaka alishumi encochoyini yeNtaba yeTabhore ukuze acele undikho kumkhosi kaYabhin. Kwakamsinyane uSisera wathabatha amanyathelo ngalo mkhosi wamajoni wandayo, engxamile ukusuka eHarosheti ukuya kwintlambo enesikhukula yaseKishon, phakathi kweNtaba yaseTabhore neMegido. Ngokungathandabuzekiyo waqiqa ngelokuba kumhlaba othe tyaba, umkhosi weenyawo nowawungaxhobe kangako wamaSirayeli wawungenakumelana neenqwelo zakhe zokulwa. Noko ke, akazange aqonde ukuba ulwa noTshaba lwasezulwini.—ABagwebi 4:4-7, 12, 13.

UYehova wayalela uBharaki ukuba asuke kwiindawo eziphakamileyo nezinqabisekileyo zaseTabhore aye kwithafa lentlambo, atsalele amajoni kaSisera edabini. Ngoko uYehova wangenelela! Isikhukula esabakho ngokukhawuleza saguqulela ibala ledabi kumgxobhozo, sibangela imikhosi kaSisera ingakwazi ukuhamba. Ngokudideka okwalandelayo, amajoni amaSirayeli ahamba ngeenyawo ngokulula aloyisa utshaba lwawo ngokupheleleyo. “Wawa wonke umkhosi kaSisera ngohlangothi lwekrele, akwasala noko amnye.” Ukunyuka kwamanzi esikhukula saseKishon kwaxingisa iinqwelo zamaKanan yaye kusenokuba kwazikhukulisa nezinye izidumbu.—ABagwebi 4:14-16; 5:20, 21.

Uloyiso Nxamnye NoGogi Nesihlwele Sakhe

Ezi ziganeko zamandulo zasikrobisa kwangaphambili olona loyiso lukhulu lukaYehova oluseza kuza. Elivele bunkungu elundini phayaa lidabi eliza kwenzeka “ekupheleni kweminyaka leyo.” Ngokuvisisana nesiprofeto sikaHezekile, uGogi, igama elimele ‘umphathi walo eli hlabathi,’ uSathana uMtyholi, uya kuhlanganisa umkhosi wohlaselo wezizwe ngezizwe. Uya kukhokela amajoni akhe ukuba ahlasele “ezintabeni zakwaSirayeli” zokomfuziselo, oko kukuthi, ilifa lokomoya elingamaKristu azukisiweyo “angamaSirayeli kaThixo.”—Hezekile 38:1-9; Yohane 12:31; Galati 6:16.

Yintoni ehenda uGogi ukuba ngamandla akhe onke ahlasele abantu bakaThixo? Isiprofeto salatha kwimeko yabo yoxolo nempumelelo yabo yokomoya. UGogi uthi: “Ndiya kunyuka ndiye ezweni lamaphandle; ndiya kubafikela abazolileyo, abahleli bengenazindonga, bengenamivalo nazingcango; ukuba uthimbe, uhlasele amaxhoba . . . nakubantu . . . bazuze imfuyo nempahla.”—Hezekile 38:10-12.

Ngokuqhelekileyo, abantu bakaYehova abazozityebi ngokwendlela yezinto eziphathekayo. Phofu ke, baye bavelisa ubutyebi obuninzi bokomoya ngenxa yomsebenzi wabo wokushumayela wazwenibanzi. Kuye kwahlanganiswa “isihlwele esikhulu . . . siphuma kuzo zonke iintlanga,” ngoku esingaphezu kwezigidi ezine. (ISityhilelo 7:9, 10) Obunjani bona ubutyebi! USathana—enomsindo omkhulu ngale mpumelelo yokomoya—uzama ukutshabalalisa abantu bakaThixo.

Kodwa, ngokuza kumhlaba wokomfuziselo wakwaSirayeli, enyanisweni uGogi, uhlasela uYehova uThixo ngokwakhe. UYehova oya kuphindezelela abantu bakhe uthi, “Bunyuke ubushushu bam emathatheni am.” Kuya kubakho isiphithiphithi esiya kubangela ukuba imikhosi kaGogi itshabalalisane. “Ikrele lomntu liya kuma kumzalwane wakhe.” Ngoko uYehova usebenzisa amandla akhe okutshabalalisa—“ngesiphango esikhukulayo, nangamatye esichotho, umlilo nesulfure.” NjengakuLwandle Olubomvu, eAyi naseKishon, uYehova uya kuphinda alwele abantu bakhe aze azukise igama lakhe. “Ndiya kuzikhulisa, ndizingcwalise, ndizazise ngokwam emehlweni eentlanga ezininzi; zazi ukuba ndinguYehova.”—Hezekile 38:18-23.

Ingxelo engembali yamadabi kaYehova kumaxesha amandulo isinika isizathu sokuba nentembelo epheleleyo kuloyiso oluzayo ebudeni ‘bembandezelo enkulu.’ (Mateyu 24:21, 22) Ekubeni ngamaxesha onke izinto ziphantsi kolawulo lwakhe, uYehova unokuzodlula iintshaba zakhe ngokucinga aze alungelelanise iimeko ukwenzela usindiso lwabantu bakhe. Ngokwenene, kuyakungqineka njengoko uIsaya waprofetayo wathi: “UYehova uya kuphuma njengegorha, uya kuxhoxha ikhwele njengendoda yokulwa; uya kuduma ewe, uya kunkqangaza; uya kuba ligorha ezintshabeni zakhe.” (Isaya 42:13) Emehlweni amaNgqina akhe, uya kuhlala enguYEHOVA, “INDODA ELWAYO”!—Eksodus 15:3.

[Imaphu ekwiphepha 25]

(Ukuba ufuna inkcazelo ehlahlelwe kakuhle, yiya kwimpapasho)

Indlela yeMfuduko evela eYiputa

IGOSHEN

IMofi

IRameses

ISukoti

IMigdoli

IPi-hahiroti

IEtam

[Imifanekiso ekwiphepha 26]

Apha, kulo mmandla waseAyi, uYehova wakhokela uYoshuwa nabantu Bakhe kuloyiso oluvuyisayo

Amanzi aseKishon anyuka ngokukhawuleza, nto leyo eyafaka isandla ekoyisweni kweentshaba zikaYehova

[Inkcazelo]

Photos: Pictorial Archive (Near Eastern History) Est.