‘Ukuhlwayela Uneenyembezi Nokuvuna Unokumemelela’

Ngokubaliswa nguMiyo Idei

“Ndiyafa! Ndiyafa! Ndincedeni!” Ubawo wayetsala nzima ezama ukukhwaza. Kwakuthe nkxwe kuvakala ilizwi lakhe njengokuba ndandiphuma ndigqotsile endlwini. Kwakusezinzulwini zobusuku, yaye utata wayehlaselwa sisifo sentliziyo. Ndabaleka ndaya kumalume, owayehlala kufutshane, kodwa ekubuyeni kwethu, intliziyo kaTata yayimile.

OKO kwenzeka ngoDisemba 14, 1918. Ndineminyaka eli-13 ubudala, ndaba yinkedama. Umama wafa xa ndandineminyaka esixhenxe ubudala. Emva kokuswelekelwa ngabazali bobabini ngoxa ndandiselula, ndaqalisa ukuzibuza, ‘Kutheni abantu besifa? Kwenzeka ntoni emva kokufa?’

Emva kokuba ndigqibile kwisikolo sokufundela ubufundisi-ntsapho, ndaba ngumfundisi-ntsapho eTokyo ndaza ndafundisa kwiSikolo Samabanga Aphantsi eShinagawa. Kamva, omnye umhlobo wam wandazisa kwelinye ityendyana lomfo, uMotohiro, endathi ndazimanya naye xa ndandineminyaka engama-22 ubudala. Kwiminyaka engama-64 edluleyo, siye sabelana ngamava amyoli nakrakra obomi. Kungabanga thuba lide safudukela eTaiwan, eyayiphantsi kolawulo lwamaJapan ngelo xesha. Ngelo xesha akuzange kuthi qatha kum ukuba ndiyakuze ndifumane unobangela wokumemelela kwelo lizwe.

Ukufunda Inyaniso

Ngentlakohlaza yowe-1932, xa sasihlala emaphandleni aseChiai embindini weTaiwan, enye indoda egama linguSaburo Ochiai yasityelela. Yabonisa ukuba iziprofeto zeBhayibhile ziquka ithemba lovuko lwabafileyo. (Yohane 5:28, 29) Elinjani ukumangalisa ithemba! Ndandikulangazelela gqitha ukuphinda ndimbone umama nobawo. Ngeengxoxo zayo ezicacileyo, iingcaciso ezisengqiqweni, nobungqina obubambekayo obuseBhayibhileni, intetho yayo yabonakala iyinyaniso. Ixesha lahamba ngokukhawuleza njengokuba sachitha imini yonke sixubusha ngeBhayibhile. Kwangoko yasuka yaba yincwadi enomtsalane kum.

Kungabanga thuba lide uMnu. Ochiai wahamba waya kwenye indawo, esishiya neencwadi ezinjengezithi Creation, Uhadi LukaThixo, Government, Prophecy, Light, nethi Reconciliation, zonke zipapashwe yiWatch Tower Bible and Tract Society. Ndaba nomdla ogqithiseleyo wokuzifundisisa, yaye njengokuba ndandisenjenjalo, ndaba nomnqweno wokuxelela abanye ngoko ndandikufunda. Ukuba uYesu waqalisa ubulungiseleli bakhe kwidolophu yakokwabo iNazarete, kutheni mna ndingaqali apho ndihlala khona? Ndatyelela ummelwane wam. Kwakungekho bani owandifundisa indlela yokushumayela, ngoko ndaya kwindlu ngendlu neBhayibhile yam neencwadi endandizifundile, ndishumayela ngako konke okusemandleni am. Abantu basabela kakuhle baza bawamkela amaphephancwadi. Ndacela iTodaisha, njengokuba iWatch Tower Society yayibizwa njalo eJapan ngelo xesha, ukuba indithumelele imibhalo eli-150 yencwadana ethi The Kingdom, the Hope of the World yaye ndazihambisa.

Ngenye imini omnye umntu owayamkele uncwadi wandixelela ukuba kwafika abakwantsasana ezinyaweni zam bazihlutha ezo ncwadi. Kungabanga thuba lide emva koko, abecuphi abane beza endlwini yam baza bahlutha zonke iincwadi namaphephancwadi am. Bashiya iBhayibhile kuphela. Kangangeminyaka emihlanu, andizange ndibabone nakancinane abantu bakaYehova, kodwa umnqweno nenzondelelo ngenyaniso azizange ziphelele emoyeni.

KwakungoDisemba 1937! Oovulindlela ababini abasuka eJapan basityelela. Ndibambe ongezantsi, ndabuza: “Naze njani ngathi?” Bathi: “Igama lenu libhalwe kanye apha.” UYehova usikhumbule! La maNgqina mabini, uYoriichi Oe noYoshiuchi Kosaka, ba beqhube iibhayisekile ezindala umgama oziikhilomitha ezingama-240 ukusuka eTaipei ukuza eChiai, bekhwelise imithwalo yabo ngasemva. Njengokuba babethetha nathi, ndavakalelwa njengethenwa elingumTiyopiya elathi: “Kwala ntoni ukuba ndingabhaptizwa?” (IZenzo 8:36) Ngobo busuku abafika ngabo, mna nomyeni wam sabhaptizwa.

Ukunyamekela Abazalwana Abasentolongweni

Ngowe-1939 amaNgqina kaYehova abanjwa ngokungalindelekanga kulo lonke elaseJapan. Iliza lentshutshiso kungabanga kudala lafika eTaiwan. NgoAprili uMzalwana uOe noMzalwana uKosaka babanjwa. Kwiinyanga ezimbini kamva nathi sabanjwa. Ekubeni ndandingumfundisi-ntsapho, ndakhululwa ngosuku olulandelayo, kodwa umyeni wam wavalelwa kangangeenyanga ezine. Emva kokuba umyeni wam ekhululwe, safudukela eTaipei. Njengokuba sasikufutshane nentolongo ababevalelwe kuyo aba bazalwana, oku kwangqineka kulilungiselelo elihle.

INtolongo yaseTaipei yayiyintolongo enemilinganiselo engqongqo yokulinda amabanjwa. Ndiphethe impahla nokutya, ndaya kubabona aba bazalwana. Okokuqala, uMzalwana uKosaka wavela ehamba nomlindi nomcuphi ngasemva kwifestile eyayiziisentimitha ezingama-30 neyayifakwe ucingo olunemingxuma emincinane. Wayempatsha-mpatsha yaye imilebe yakhe yayibomvu okwamaqunube abomvu. Wayengenwe sisifo sephepha.

Emva koko uMzalwana uOe wavela enoncumo, ephindaphinda ngovuyo esithi: “Ndivuya gqitha xa ukwazile ukuza.” Njengokuba ubuso bakhe babugwangqa yaye budumbile, ndambuza ngempilo yakhe. Waphendula wathi, “Andinawo nowempumlo! Kumnandi gqitha apha. Akukho zincukuthu nazintwala. Nditya neenoodles zengqolowa apha. Ifana nqwa nendawo yeengcungcu.” Lo wakwantsasana kunye nomlindi batsho ngentsini baze bathi: “Yho, asinakumoyisa lo mfo kaOe.”

Ukuvalelwa Kwakhona

Ngasezinzulwini zobusuku ngoNovemba 30, 1941, iintsuku ezimbalwa emva kokuba ndandiye kutyelela aba bazalwana, kwankqonkqozwa ngamandla emnyango. Ndabona izithunzi ezikhulu zeminqwazi elucangweni lwegilasi oluvulwa ngokuthalelwa ecaleni (sliding door). Xa ndazibalayo zazisibhozo. Yayingabakwantsasana. Batyhoboza bangena endlwini yethu baze baguqulula kuyo yonke into esendlwini—kodwa babuya ze. Emva kweyure bephengulula endlwini, bahlutha iialbham zeefoto ezimbini baze basixelela ukuba sibalandele. Ndakhumbula ukuba uYesu wabanjwa ezinzulwini zobusuku. (Mateyu 26:31, 55-57; Yohane 18:3-12) Ingcamango yamadoda asibhozo awayezixhamla ngathi yayindicubhula.

Sasiwa kwesinye isakhiwo esingaqhelekanga esasisikhulu nekwakumnyama kuso. Kamva safumanisa ukuba yayiyiNtolongo iHichisei yaseTaipei. Sasihleliswe phambi kwedesika enkulu, yaye saqalisa ukuncinwa. Ngokuphindaphindiweyo basibuza: “Ngubani omaziyo?” Yaye ngamnye wethu waphendula ngelithi: “Andazi mntu.” Sasinokubazi njani abanye abakwikomkhulu laseJapan? Sasisazi nje uMzalwana uOe noMzalwana uKosaka, yaye savala imilomo yethu asawaxela amanye amagama esasinokuba sasiwavile ngandlel’ ithile.

Kungekudala kwaba yintsimbi yesihlanu kusasa, yaye abecuphi ababini bandithabatha bandisa esiseleni sam. Kwandithabatha ixesha elide ukuba ndiyiqhele le ntlalo intsha. Okwesihlandlo sokuqala ebomini bam, ndadibana neencukuthu. Ezi zinambuzane zincinane, zazinenjongo yokuziyolisa ngabo bafikayo, zandimfimfitha kanobom, ziyeka amanye amabhinqa amabini ayekwesi sisele—phezu kwako nje ukuzityoba ezo ndandizifumana. Ekugqibeleni ndoyisakala ndaza ndaziyeka ukuba zizenzele.

Ukutya kwethu kwakuyikomityi yomgraxalala wesidudu serayisi esingamanzi, kodwa emlonyeni wam yayingcamleka njengerayisi ekrwada. Okwakukhatshwa ngulo mgraxalala yayiyintwana enetyuwa yedaikon (iradish yaseJapan) amagqabi esenentlabathi. Ekuqaleni, ngenxa yokuba oku kutya kwakunuka kakubi yaye kumdaka, kwakungangeni, yaye abanye endandivalelwe kunye nabo babekuthabatha bakutye. Kambe ke, ngokuthe ngcembe ndaya ndiziqhelanisa ukuze ndiphile.

Ubomi basentolongweni babungaginyisi mathe. Ngesinye isihlandlo, ndeva enye indoda, eyayikrokrelwa ukuba inguntamnani, ijweda usuku emva kolunye ngenxa yokuthuthunjiswa. Kwakhona ndabona omnye umntu owayesesiseleni esisecaleni kwesi sethu esifa kabuhlungu. Konke oku kwakusenzeka phambi kwamehlo am, ngolangazelelo ndavakalelwa kukuba le nkqubo indala imele iphele, yaye nethemba lam kwizithembiso zikaThixo lasuka laqina ngakumbi kunangaphambili.

Ukuncinwa

Ndavalelwa entolongweni kangangonyaka yaye ndajamelana nokuncinwa izihlandlo ezihlanu. Ngenye imini umtshutshisi weza okwesihlandlo sokuqala, yaye ndakhokelelwa kwigunjana elincinane kakhulu lokuncina. Into yokuqala awayithethayo yayiyile: “Ngubani omkhulu, nguAmaterasu Omikami [uthixokazi welanga] okanye nguYehova? Ndixelele!” Ndacinga okomzuzwana ngendlela yokuphendula.

“Ndixelele ngubani omkhulu, okanye ndiza kukutywatyusha!” Wandithi ntsho ngamehlo.

Ndaphendula ngokuzolileyo ndathi: “Kumazwi okuqala eBhayibhile kubhaliwe kwathiwa, ‘Ekuqaleni uThixo wadala amazulu nomhlaba.’” Andizange ndibone mfuneko yokuba ndongeze enye into. Wasuka wandijamela ebusweni ngaphandle kokuthetha nelimdaka waza watshintsha umbandela.

Ngapha koko sasiyintoni isizathu sokuba ndivalelwe? Ingxelo yokucikidwa yathi: “Koyikelwa ukuba unokulahlekisa abantu ngeentetho nangezenzo zakhe.” Yayiyile nto eyabangela ukuba ndivalelwe ngaphandle kokuvavanywa enkundleni.

UYehova wayesoloko ekufutshane nam ngoxa ndandityhubela konke oku. Ngokulunga kukaYehova, ndanikwa iBhayibhile encinane yeZibhalo zamaKristu zesiGrike. Omnye umcuphi wayiphosa esiseleni sam ngenye imini, esithi: “Ungayifumana.” Ndandiyifunda zonke iintsuku ukusa kwinqanaba lokuba kubetheleleke engqondweni oko ndandikufunda. Imizekelo yenkalipho yamaKristu enkulungwane yokuqala encwadini yeZenzo yaba ngumthombo wokhuthazo olukhulu. Iincwadi ezili-14 zikaPawulos nazo zandomeleza. UPawulos wajamelana nentshutshiso eqatha, kodwa umoya oyingcwele wasoloko umxhasa. Iingxelo ezinjalo zandomeleza.

Ndasuka ndanqina yaye ndacekeceke, kodwa uYehova wandizimasa, ngokufuthi ngeendlela ezingalindelekanga. Ngenye iCawa omnye umcuphi endandingazange ndimbone ngaphambili weza ephethe ipasile ebotshwe ngeqhiya. Wavula ucango lwam lwesisele waza wandikhuphela entendelezweni. Xa safika kumthi omkhulu wekhamfala, wavula ipasile leyo. Khawufan’ ucinge! Ngaphakathi kwakukho iibhanana namaqebengwana. Wandixelela ukuba ndizityele apho ezo zinto. Lo mcuphi wathi: “Nonke nina ningabantu abalunge gqitha. Kodwa sifanele siniphathe ngolu hlobo. Ndingathanda ukuba ndiwuyeke lo msebenzi kungekudala.” Ngenxa yoku abalindi nabecuphi baqalisa ukundiphatha ngobubele. Babendithembile yaye bandivumela ukuba ndicoce amagumbi abo yaye bandinika neminye imisebenzi eyahlukahlukeneyo ekhethekileyo.

Kamva ngowe-1942 ndabizwa ngomnye wabacuphi ababesibambile. Wathi, “Nangona ubufanelwe sisigwebo sokufa, uza kukhululwa namhlanje.” Umyeni wam wayebuyele ekhaya kangangenyanga ngaphambi kokukhululwa kwam.

Ukuhlaziya Unxulumano NamaNgqina

Ngoxa sasisentolongweni, iJapan yabandakanyeka kwiMfazwe Yehlabathi II. Kwakhona, ngowe-1945, sava ukuba iJapan yayoyisiwe emfazweni, yaye safunda kumaphephandaba ukuba onke amabanjwa ezobupolitika ayeza kukhululwa. Sasisazi ukuba uMzalwana uKosaka wafa ngenxa yokugula entolongweni, kodwa ngokukhawuleza ndathumela iileta kwiintolongo eziseTaipei, eHsinchu, nakwezinye iidolophu yaye ndibuzisa ngoMzalwana uOe. Phofu ke, andizange ndifumane mpendulo. Kamva ndafumanisa ukuba uMzalwana uOe wayebulewe ngokudutyulwa.

Ngowe-1948 singalindelanga safumana ileta evela eShanghai. Yayivela kuMzalwana uStanley Jones, owayethunyelwe eTshayina esuka eGiliyadi, isikolo sabavangeli basemazweni samaNgqina kaYehova esasisandul’ ukuvulwa. UYehova wayephinde wasikhumbula kwakhona! Ndandiphuphuma luvuyo ngokuba nolo qhagamshelwano nentlangano kaYehova. Iminyaka esixhenxe yayisele idlulile ekubeni sahlanganayo noMzalwana uOe. Nangona sasisodwa ngokupheleleyo ngalo lonke elo xesha, ndandixelela abanye ngeendaba ezilungileyo.

Xa uMzalwana uJones wasityelela okwesihlandlo sokuqala, yaba lixesha lovuyo. Wayenobuhlobo gqitha. Nangona singazange sikhe simbone ngaphambili, saba ngathi samkela isizalwana esisondeleyo ekhayeni lethu. Kungekudala emva koko, uMzalwana uJones wahamba waya eT’ai-tung, ngapha kweentaba, ehamba nomyeni wam owayesebenza njengetoliki yakhe! Babuya emva kweveki, ebudeni belo xesha baye banendibano yosuku olunye yaye babhaptiza abantu abanokuba ngama-300 besizwe sama-Amis abakunxweme lwasempuma.

Utyelelo lukaMzalwana uJones lwaluthetha okukhulu ngenye indlela kum. Ndandishumayela ndedwa de kwalelo xesha. Yaye ngoku esinye isibini, indoda ingumnini wendlu esasihlala kuyo, sabhaptizwa ebudeni botyelelo lukaMzalwana uJones. Ukususela ngoko, ndiye ndaba nexesha elimyoli ndifumana uvuyo ngokwenza abafundi ukongezelela kuvuyo lokuvakalisa uBukumkani. Kamva safudukela eHsinchu, apho uMzalwana uJones wasityelela izihlandlo ezithathu, sihlandlo ngasinye kangangeeveki ezimbini. Ndalunandipha kakhulu olo nxulumano lwaluneengenelo. Okwesihlandlo sokugqibela, wathi: “Kwixesha elizayo, ndiza kuza neqabane lam uHarold King.” Kodwa elo “xesha lizayo” alizange lifike, kuba kungabanga thuba lide emva koko bobabini bavalelwa entolongweni eTshayina.

Ngowe-1949, uJoseph McGrath noCyril Charles, abavangeli basemazweni beklasi ye-11 yaseGiliyadi, bafika eTaiwan. Bawandisa umsebenzi eTaiwan, besebenzisa ikhaya lethu njengesazulu sabo. Imizekelo yabo yandikhuthaza ngokwenene. Noko ke, imeko yezobupolitika yabanyanzelela ukuba baye eHong Kong. Andizange ndikwazi ukuzibamba iinyembezi njengokuba babehamba nowakwantsasana. UJoe wathi, “Musa ukulila, Miyo.” Waleka umsundulo ngelithi, “Ndiyabulela,” yaye wandinika usiba lwakhe lokubhala olwalusetyenziswe kanobom njengento esisikhumbuzo.

Ukuzama Ukuqeqesha Umntwana

Mna nomyeni wam sasingenabantwana, ngoko samkela umtshana womyeni wam njengomntwana wethu xa wayeneenyanga ezine ubudala. Ubomi bukanina babusengozini ngenxa yombefu.

Ngowe-1952, uMzalwana Lloyd Barry, owayekhonza njengomvangeli wasemazweni eJapan, watyelela eTaiwan eyokulwela ukuba umsebenzi wamaNgqina kaYehova wamkelwe ngokwasemthethweni. Wahlala nathi yaye wasikhuthaza kakhulu. Ngelo xesha intombazana yethu yayineenyanga ezili-18 ubudala. Wayifunqula waza wayibuza esithi: “Ngubani igama likaThixo?” Ndothukile, ndambuza: “Utheth’ ukuba sifanele simfundise esemncinane kangaka?” Egxininisa waphendula wathi, “Ewe.” Waza emva koko wathetha nam ngembaluleka yokuqeqesha umntwana esemncinane kakhulu. Amazwi akhe athi: “Usisipho esivela kuThixo sokukuthuthuzela,” ahlala engqondweni yam.

Ngoko nangoko, ndaqalisa ukuqeqesha intombazana yam, uAkemi, ukuba imazi ize imthande uYehova yaye ibe ngumkhonzi wakhe. Ndayifundisa oonobumba befonetiki, ndiqala ngoonobumba abathathu abangue, noho noba abenza igama elithi “Ehoba,” okanye Yehova, ngesiJapan. Xa yayifikelela kwiminyaka emibini ubudala yayisele ikwazi ukukuqonda oko ndandiyixelela kona. Ngoko busuku ngabunye ngaphambi kokuba ilale, ndandiyibalisela amabali eBhayibhile. Yayiphulaphula ngomdla yaye yayingawalibali.

Xa yayineminyaka emithathu enesiqingatha ubudala, uMzalwana uBarry wasityelela kwakhona waza wapha uAkemi iBhayibhile ebhalwe ngesiJapan esasithethwa ngelo xesha. Wahamba waya egumbini lakhe neBhayibhile yakhe, esithi: “IBhayibhile ka-Akemi! IBhayibhile ka-Akemi!” Emva kwemizuzu kamva, wadanduluka ecaphukile esithi: “IBhayibhile ka-Akemi ayinaye uYehova! Andiyifuni le Bhayibhile!” Wayigibisela phantsi. Ndothukile, ndahlolisisa okungaphakathi. Okokuqala ndatyhila kuIsaya isahluko 42, indinyana 8. Apho igama elithi Yehova lalithatyathelwe indawo ligama elithi “Nkosi.” Ndajonga kwezinye izibhalo, kodwa andizange ndilifumane igama likaThixo, uYehova. UAkemi waxola ndakumbonisa kwakhona igama likaYehova eBhayibhileni yam endala, eyayibhalwe ngesiJapan samandulo.

Ukubuyela EJapan

Sabuyela eJapan ngowe-1958 yaye sanxulumana neBandla laseSannomiya eKobe. Ndinezizathu ezininzi kangako zokuba nombulelo kuYehova, ndafuna ukubonakalisa loo mbulelo ngokuba nguvulindlela—umlungiseleli wexesha elizeleyo wamaNgqina kaYehova. Ndazinikela ngokupheleleyo kwinkonzo yobuvulindlela. Ngenxa yoko ndakwazi ukuqhuba izifundo zeBhayibhile zamakhaya ezininzi yaye ndangcamla uvuyo lokunceda abantu abanokuba ngama-70 ukuya kuma-80 ukuba bangene enyanisweni. Kangangexesha elithile ndafumana kwanelungelo lokukhonza njengovulindlela okhethekileyo, ndisebenza iiyure ezingaphezu kwe-150 nyanga nganye entsimini, ngoxa ndandikwanyamekela umyeni wam nentombi yam.

Njengokuba sasihlale eTaiwan ngaphezu kweminyaka engama-30, ubomi baseJapan babunamasiko aqhiphukis’ umbilini, yaye ndatyhubela amava amaninzi alingayo. Kumaxesha anjalo uAkemi wayesiba yintuthuzelo kum yaye endixhasa, kanye njengokuba uMzalwana uBarry wayendixelele kwiminyaka engaphambili. Xa ndixinezelekile, wayedla ngokuthi: “Yomelela Mama. UYehova uza kuvelisa icebo. Ewe, uza kulivelisa akunjalo na?” Ndandidla ngokuphendula ndize ndimange. Onjani umthombo wokhuthazo! Ekuphela kwento endandinokuyenza kukumbulela uYehova!

Ukunikela Ngentombi Yam KuYehova

UAkemi waba ngumvakalisi xa wayeneminyaka esi-7 ubudala yaye wabhaptizwa xa wayeneminyaka eli-12 ubudala, ngehlobo lowe-1963. Ndazama ukuchitha ixesha elininzi kangangoko ndandinako kunye naye. (Duteronomi 6:6, 7) Kwabakho amaxesha anzima ngoxa wayekwixesha lokufikisa, kodwa ngemizekelo emihle nokhuthazo oluvela koovulindlela abakhethekileyo ababethunyelwe ebandleni lethu, ekugqibeleni uAkemi wazenzela usukelo lokuba nguvulindlela kwimimandla emitsha.

Kwindibano yesithili yowe-1968, wadlala indawo yentombi kaYifeta kumdlalo weBhayibhile. Njengokuba ndandibukele loo mdlalo, ndagqiba kwelokuba, njengoko uYifeta wenzayo, ndinikele ngekuphela kwentombi yam, endandiyinyamekele kwada kwangoko, kuYehova ukuze ibe kubulungiseleli bexesha elizeleyo. Babuza kuba njani ubomi ngaphandle kwentombi yam? Yayilucelomngeni, nanjengokuba ndandisele ndineminyaka engaphezu kwama-60 ubudala.

Ngowe-1970 lagaleleka ixesha lokuba intombi yethu isishiye. Yafumana imvume kumyeni wam yaye yahamba yaya eKyoto ukuya kukhonza njengovulindlela. Iziqonda iimvakalelo zethu, intliziyo yayo yabonakala ngathi iqhothoza igazi njengokuba yayihamba. Ndayicaphulela INdumiso 126:5, 6 njengesibhalo sokuyikhapha ethi: “Abahlwayelayo beneenyembezi baya kuvuna benokumemelela. Ohamba ahambe elila, ephethe intlwayelelo, uyabuya eze ememelela, ethwele izithungu zakhe.” La mazwi angqineka elukhuthazo nakum.

Kamva uAkemi watshata yaye waqhubeka nobuvulindlela obukhethekileyo kunye nomyeni wakhe. Ukususela ngowe-1977, xa umyeni wakhe wamiselwa njengomveleli wesiphaluka, baye bakhonza kumsebenzi wokuhambahamba. Ngokuthe rhoqo ndandlala imaphu ndize “ndithabathe uhambo” kunye nentombi yam. Ndiba nolwaneliseko kukuva amava abo yaye ndazi oodade abaninzi ngenxa yentombi yam.

Sele ndineminyaka engama-86 ubudala. Iintsuku ezidluleyo zibonakala njengomlindo wasebusuku. Andisenako ukusebenza ngendlela endandisenza ngayo ngangaphambili, kodwa inkonzo yasentsimini isandizisela uvuyo. Xa ndicamngca ngeminyaka engama-60 edluleyo ukususela oko ndafunda inyaniso, amathemba aqinisekileyo kaThixo ahlela nzulu entliziyweni yam. Ewe, uYehova oya kwenza ngokunyanisekileyo kwabanyanisekileyo usivumela ukuba sivune intabalala yovuyo.—INdumiso 18:25.

[Picture of Miyo Idei on page 10]