Ibali Lobomi
Intsapho Yethu Imanyene Ekugqibeleni!
KUBALISA USUMIKO HIRANO
Ndandifumene eyona ndlela ibhetele yokuphila, ibe ndandifuna nomyeni wam aphile ngayo. Kwadlula iminyaka engama-42 ngaphambi kokuba oko kwenzeke.
MNA nomyeni wam satshata ngowe-1951, xa ndandineminyaka engama-21 ubudala. Kwiminyaka nje emine, saba noonyana ababini, ibe ndandonwabile.
Ngenye imini ngowe-1957, udadewethu omdala wandixelela ukuba utyelelwa ngumvangeli wasemazweni oliNgqina likaYehova. Nangona wayengumBhuda, waqalisa ukufunda iBhayibhile nalo mvangeli wasemazweni waza wandikhuthaza ukuba nam ndenjenjalo. Ndavuma. Ndazixelela ukuba ekubeni ndandingumProtestanti ndandiza kukwazi ukubonisa amaNgqina kaYehova iimfundiso zawo ezingachananga.
Akuzange kube kudala ndaqonda ukuba andazi nto ngeBhayibhile. Kwafuneka ndibuze lo mvangeli wasemazweni ukuba, “Ngubani uYehova?” Andizange khe ndive elo gama lisetyenziswa ecaweni yam. Lo mvangeli wasemazweni, uDaphne Cooke (kamva owaba nguPettitt) wathi mandifunde uIsaya 42:8, ochaza ngokucacileyo ukuba igama elithi Yehova lelikaThixo uSomandla. UDaphne wayiphendula yonke imibuzo yam esebenzisa iBhayibhile.
Ndabuza umfundisi wam loo mibuzo. Wathi: “Ukubuza imibuzo kusisono. Wena kholelwa nje oko ukuxelelwayo.” Nangona ndandingacingi ukuba ukubuza imibuzo kuphosakele, kangangeenyanga ezintandathu ndandisiya ecaweni ntsasa nganye yangeCawa ndize ndiye kwiintlanganiso zamaNgqina kaYehova emva kwemini.
Indlela Owachaphazeleka Ngayo Umtshato Wam
Kwakundivuyisa gqitha oko ndandikufunda eBhayibhileni, ibe ndakuxelela umyeni wam, uKazuhiko. Emva kwesifundo ngasinye neentlanganiso, ndandimxelela oko ndikufundileyo. Oku kwavula umsantsa phakathi kwethu. Wayengafuni ukuba ndibe liNgqina kaYehova. Sekunjalo, kwakumnandi gqitha ukufunda iBhayibhile kangangokuba ndaqhubeka nesifundo sam nokunxulumana namaNgqina.
Ngaphambi kokuba ndiye kwiintlanganiso zangokuhlwa, ndandiphekela uKazuhiko ukutya akuthandayo, kodwa waqalisa ukuya kutya kwivenkile yokutyela. Ukubuya kwam kwiintlanganiso ndandifika equmbe esisifu engafuni nokuthetha. Emva kweentsuku ezimbini okanye ezintathu, wayephinda atyhileke, kodwa kwakuba sele ilixesha lokuba ndiye kwezinye iintlanganiso.
Malunga nelo xesha, ndagula sisifo sephepha esasisele sibulele abaninzi kwintsapho yakulomyeni wam. UKazuhiko waxhalaba gqitha waza wathi xa ndibhetele, ndingenza nantoni na endiyithandayo. Ndamcela nje ukuba andivumele ndiye kwiintlanganiso veki nganye. Wavuma.
Ndachacha emva kweenyanga ezintandathu, ibe ebudeni belo xesha ndandifunda iBhayibhile ndiyicokisa. Ndandikhangela iimpazamo kwiimfundiso zamaNgqina, ibe ndandizixelele ukuba ndiya kuyeka ukufunda ukuba ndinokufumana nokuba inye. Andizange ndifumane nanye. Kunoko, ndabona iimpazamo zeCawa yamaProtestanti. Ndabona indlela anothando nokusesikweni ngayo uYehova neenzuzo zokuphila ngokuvisisana nemithetho yakhe.
Emva kokuphila kwam, umyeni wam wasigcina isithembiso sakhe, wandivumela ukuba ndiye kwiintlanganiso. Ndenza inkqubela ngokomoya, ibe ngoMeyi 1958, ndabhaptizwa ndaba liNgqina likaYehova. Ndandilangazelela ukuba nayo intsapho yam inqule uThixo oyinyaniso.
Ukunceda Abantwana Bam Ngokomoya
Oonyana bam babesoloko besiya nam kwiintlanganiso nakumsebenzi wokushumayela, kodwa izinto ezenzekayo zandenza ndabona ukuba luyakhula ulwazi lwabo ngeBhayibhile. Ngenye imini uMasahiko, unyana wam owayeneminyaka emithandathu ubudala, wayedlala esitratweni. Ndeva ingxolo enkulu nesikhalo. Ummelwane wangena edubulekile endlwini yam, ekhala esithi unyana wam utshayiswe yimoto. Ndazibuza enoba ufile kusini na. Ndazama ukuzibamba njengoko ndandibaleka ndiphuma. Ndangcangcazela ndakubona ibhayisekile yakhe ibubutyobo, kodwa ndambona esiza ngakum enzakele nje kancinane. Njengoko wayendibamba, wathi, “Mama, uyabona uYehova undisindisile?” Ukumbona ephila nokuva lo mazwi amnandi kwandenza ndacuntsula kule nto yabantwana.
Ngenye imini, entsimini sadibana nelinye ixhego elandingxolisayo lisithi: “Yintoni le uyenzayo unyanzela umntwana ukuba azule nawe? Kowu, ndiyamvela ke khona.” Ndingekaphenduli, uTomoyoshi, owayeneminyaka esibhozo ubudala, wathi: “Tatomkhulu umama akandinyanzeli ukuba ndishumayele. Ndishumayela kuba ndifuna ukukhonza uYehova.” Eli xhego lasuka lema nematha.
Ngokomoya, oonyana bam babengenayise. Kwafuneka ndibafundise inyaniso yeBhayibhile ngokwam, nangona nam ndandisamele ndifunde okuninzi. Ndahlakulela uthando, ukholo nenzondelelo ndizama nokuba ngumzekelo. Suku ngalunye ndandithandaza ndibulela uYehova phambi kwabantwana bam. Ndandibabalisela amava am okushumayela. Oku kwabakhuthaza. Xa kamva babuzwa isizathu sokuba babe ngoovulindlela, okanye abalungiseleli bexesha elizeleyo bamaNgqina kaYehova, bathi: “Sabona ukuba umama wonwabile njengovulindlela, ibe nathi sasifuna ukonwaba.”
Ndaqinisekisa ukuba andithethi kakubi ngoyise okanye nangabani na ebandleni. Ndandiqonda ukuba ukuthetha kakubi ngabanye kunokubenzakalisa abantwana bam. Basenokuyeka ukumhlonela lowo kuthethwa kakubi ngaye kwanalawo uthetha kakubi.
Ukoyisa Imiqobo Ethintela Inkqubela
Ngowe-1963 ngenxa yomsebenzi womyeni wam kwafuneka sifudukele eTaiwan. Wathi ukuba apho ndiza kushumayela kumaJapan, ndiza kubangela ingxaki. Sasiya kubuyiselwa eJapan, ibe oko kwakuya kubangela ingxaki kwinkampani yakhe. Wayefuna sibe kude namaNgqina.
AmaNgqina aseTaiwan asamkela ngobubele, ibe zonke iintlanganiso zawo zaziqhutywa ngesiTshayina. Ndagqiba ekubeni ndifunde isiTshayina ukuze ndishumayele kubantu basekuhlaleni kunokuba ndishumayele kumaJapan. Ngaloo ndlela, ndandinokukwazi ukuphepha iingxaki awayethetha ngazo umyeni wam.
Ubuhlobo esaba nabo namaNgqina aseTaiwan basomeleza. Esinye isibini esingabavangeli basemazweni, uHarvey noKathy Logan, basinceda gqitha. UMzalwan’ uLogan waba nguyise wokomoya koonyana bam. Wenza babona ukuba ukukhonza uYehova asikokuzibandez’ ulonwabo nokuphila ubomi obungqongqo. Ndicinga ukuba oonyana bam benza isigqibo sokukhonza uYehova xa sasilapho eTaiwan.
UTomoyoshi noMasahiko baya kwisikolo esifundisa ootitshala baseMerika, apho bafunda isiNgesi nesiTshayina. Loo mfundo yabaxhobisela inkonzo yexesha elizayo njengabalungiseleli boThixo oyinyaniso, uYehova. Ndinombulelo gqitha kuYehova ngokuguqula ixesha elalinzima libe lelonwabisa ngendlela engasoze ilibaleke. Emva kokuhlala iminyaka emithathu enesiqingatha eTaiwan, sabuyela eJapan.
Ngoku oonyana bam babesele bekhulile ibe babefuna ukwenza oko bakuthandayo. Ndachitha ixesha elininzi ndiqiqa nabo ngemigaqo yeZibhalo, ibe uYehova wabanceda kwelo xesha linzima. Emva kokuba uTomoyoshi egqibile kwisikolo samabanga aphakamileyo waba nguvulindlela. Wakwazi ukunceda abantu abane ukuba bazahlulele baze babhaptizwe kwiminyaka yakhe yokuqala embalwa enguvulindlela. UMasahiko walandela ekhondweni lomkhuluwa wakhe waba nguvulindlela akugqiba isikolo. Wanceda abaselula abane baba ngamaNgqina kwiminyaka yakhe yokuqala emine enguvulindlela.
UYehova wabasikelela ngakumbi aba bantwana. UTomoyoshi wafunda nomyeni webhinqa endandilifundisa inyaniso yeBhayibhile. Iintombi zabo ezimbini nazo zaba ngamaNgqina. Kamva, uTomoyoshi watshata nomafungwashe, uNobuko, waza yena uMasahiko watshata nentombi encinane, uMasako. UTomoyoshi noNobuko basebenza kwikomkhulu lamaNgqina kaYehova eBrooklyn, eNew York. Bona uMasahiko noMasako ngabavangeli basemazweni eParaguay.
Umyeni Wam Uyatshintsha Kancinane
Umyeni wam wayebonakala engenamdla kunqulo lwethu ngaloo minyaka, kodwa saphawula ukuba uyatshintsha. Xa abanye bendichasa, wayezithethelela iinkolelo zam eneneni wayexhasa inyaniso yeBhayibhile engaqondanga. Wayewanceda amaNgqina asweleyo. Ethetha kumtshato womnye woonyana bethu, wathi: “Ukufundisa abantu indlela efanelekileyo yokuphila ngowona msebenzi mhle nonzima. Oonyana bam namakhosikazi abo bakhethe le ndlela inzima njengomsebenzi wabo. Ndicela nibancede.” Iziganeko ezifana nezi zazindenza ndiqiniseke ukuba uya kuze akhonze uYehova nathi.
Ndandiye ndimeme amanye amaNgqina ekhayeni lethu. Ndandimema uKazuhiko kwiintlanganiso zamaKristu neendibano nakwiSikhumbuzo sokufa kukaKristu. Xa engaxinwanga ngumsebenzi, wayesiya nangona wayemadolw’ anzima. Izihlandlo ezininzi ndandivakalelwa kukuba angasamkela isifundo seBhayibhile, ngoko ndamema abadala abangamaKristu ukuba beze ekhayeni lethu. Kodwa wayesala ukufunda. Ndandizibuza unobangela woko.
Ndakhumbula amazwi ompostile uPetros athi: “Nina bafazi, wathobeleni amadoda enu, ukuze kuthi, nokuba kukho kuwo angalithobeliyo ilizwi, azuzeke ngaphandle kwelizwi ngenxa yehambo yabafazi bawo, kuba eye angamangqina okuzibonela ehambo yenu enyulu ndawonye nentlonelo enzulu.” (1 Petros 3:1, 2) Ndaqonda ukuba ndandingasoloko ndisilandela esi siluleko. Ukuze ndenze ngokuvisisana naso ngokupheleleyo, kwafuneka ndikhule ngakumbi ngokomoya.
Ngowe-1970, ndaba nguvulindlela ndinosukelo lokuba ndikhule ngakumbi ngokomoya. Kwadlula iminyaka engama-20, sekunjalo umyeni wam wayengenamdla kwizinto zokomoya. Esinye isifundo sam seBhayibhile sakha sathi: “Inokuba kunzima ukunceda abanye abantu ekubeni ungakwazi ukunceda owakho omyeni.” Lo mazwi ayedimaza, kodwa andizange ndinikezele.
Ngasekupheleni kweminyaka yowe-1980, abazali bethu babesele baluphele kakhulu. Ukubanyamekela nokwenza eminye imisebenzi kwakundiqoba. Kangangeminyaka, babeluchasile ukholo lwam kuYehova, kodwa ndazama ukuba nothando kubo kangangoko ndinako. Ngaphambi kokuba afe umama wam owayeneminyaka engama-96 ubudala wathi, “Sumiko, ukuba ndivusiwe, ndiya kuhamba icawa yakho.” Oku kwandenza ndaqonda ukuba imigudu yam ayiwanga phantsi.
Umyeni wam wakuphawula konke endandikwenzela abazali bethu. Ebonisa uxabiso, waqalisa ukuya kwiintlanganiso rhoqo. Kangangeminyaka wayesenza oku kodwa engenzi nkqubela ngokomoya. Ndaqhubeka ndizama ukumkholisa. Ndandisenza izidlo ndize ndimeme abahlobo bakhe kwanabo asebenza nabo bavela kwamanye amazwe. Ndandihamba naye ukuya kwiindawo zokuzonwabisa. Xa kwancitshiswa iiyure zoovulindlela zaba ngama-70 ngenyanga, ndachitha ixesha elingakumbi naye.
Umhlala-phantsi Ubangela Utshintsho
Ngowe-1993 umyeni wam wathabatha umhla-phantsi. Ndacinga ukuba uya kuba nexesha lokufunda iBhayibhile. Kodwa wathi ukuba uza kukhonza uThixo kuba nje enexesha oko kuya kuthetha ukuba akanantlonelo kuThixo. Kunoko, wathi uya kukhonza uThixo xa intliziyo yakhe imshukumisela ukuba enjenjalo ibe andimele ndimnyanzele.
Ngenye imini uKazuhiko wandibuza enoba ngoku ndandiza kuphilela yena ubomi bam bonke. Oku kwandikhathaza, kuba ndandimenzela konke endinako ukususela oko satshatayo. Ndandizama kangangoko ukuba ndimonwabise, kodwa wayevakalelwa kukuba ndandiphilela uYehova kunaye. Emva kokucinga ngako oku okwethutyana, ndamxelela ukuba kwanele oko ndimenzela kona. Kodwa ukuba angandincedisa koko ndikwenzayo, sinokuqalisa ubomi obutsha obumnandi kunye, kungekhona nje iminyaka embalwa, kodwa ngonaphakade. Kwaqengqeleka iintsuku umyeni wam engaphenduli. Ekugqibeleni wandibuza: “Ungafunda nam iBhayibhile?” Xa ndicinga ngalo mazwi ndiye ndibe nemincili.
Ekuqaleni ndacela umdala ongumKristu ukuba afunde naye, kodwa wathi: “Ndiza kufunda nawe qha.” Ngoko saqalisa isifundo sethu seBhayibhile semihla ngemihla. Ekubeni ndikwibandla lesiTshayina, ibe naye elazi kakuhle olo lwimi, safunda ngesiTshayina. Safunda neBhayibhile yonke kwisithuba esingaphantsi konyaka.
Ngelo xesha, umdala webandla lesiTshayina, kunye nenkosikazi yakhe, baba nomdla kuthi. Nangona bebancinane nakubantwana bethu, baba ngabahlobo bethu abasenyongweni. Amanye amaNgqina amaninzi nawo aba nomdla okhethekileyo kumyeni wam. Ayenobubele kuthi ibe ayencokola noKazuhiko ngokungathi unguyise. Oko kwakumvuyisa gqitha.
Ngenye imini sathunyelelwa isimemo somtshato wabantu ababesebandleni lethu sibhalwe igama lomyeni wam. Wachukumiseka gqitha akubona ukuba ugqalwa njengentloko-ntsapho, ibe wagqiba ekubeni aye. Kungekudala waqhelana namaNgqina waza waqalisa ukufunda iBhayibhile nomdala ongumKristu. Isifundo sakhe seBhayibhile, ukuya kwiintlanganiso, nothando awayelufumana ebandleni zamnceda wenza inkqubela entle ngokomoya.
Intsapho Emanyeneyo Ekugqibeleni
NgoDisemba 2000, umyeni wam wabhaptizwa efuzisela ukuzahlulela kwakhe kuYehova. Oonyana bam namakhosikazi abo basuka kude beze kubona lo “mmangaliso.” Ekugqibeleni sasiyintsapho emanyeneyo nangona oku kwathabatha iminyaka engama-42.
Ngoku ntsasa nganye, sixubusha itekisi yosuku size sifunde iBhayibhile kunye. Suku ngalunye sincokola kunye size sibe nenxaxheba kwizinto zokomoya. Umyeni wam ngoku usisicaka solungiselelo ebandleni ibe usandul’ ukunikela intetho yesidlangalala ngesiTshayina. Ndimbulela gqitha uYehova ngokusimanyanisa. Ndijonge phambili ekuphakamiseni igama lakhe nolongamo lwakhe ngonaphakade, kunye nazo zonke izalamane nezihlobo zam endizithandayo.
[Imaphu ekwiphepha 13]
(Ukuba ufuna inkcazelo ehlahlelwe kakuhle, yiya kwimpapasho)
CHINA
DEMOCRATIC PEOPLE’S REPUBLIC OF KOREA
REPUBLIC OF KOREA
Sea of Japan
JAPAN
Tokyo
East China Sea
TAIWAN
Taipei
[Umfanekiso okwiphepha 12]
Ndikunye nentsapho yam ngowe-1958, unyaka endabhaptizwa ngawo
[Imifanekiso ekwiphepha 13]
Abahlobo abafana noHarvey noKathy Logan basomeleza ngokomoya xa sasifudukele eTaipei sivela eTokyo
[Umfanekiso okwiphepha 15]
Namhlanje intsapho yam imanyene kunqulo lokwenyaniso