Imibuzo Evela Kubafundi

◼ Kutheni uIsaya 11:6 kwiNew World Translation of the Holy Scriptures esithi “ingcuka okunene iya kuhlala okwethutyana nemvana eliduna”? Ngaba uxolo olunjalo aluyi kuba loluhlala luhleli?

Uxolo oluhlaziyayo kwindalo ezizilwanyana okwaprofetwa ngalo kuIsaya 11:6-9 luya kuhlala luhleli. Kodwa inguqulelo yenyameko kaIsaya 11:6 yenza kucace ukuba izilwanyana ezinjalo aziyi kuba kunye ngalo lonke ixesha.

KwiNew World Translation of the Holy Scriptures, uIsaya 11:6 ufundeka ngolu hlobo: “Ingcuka okunene iya kuhlala okwethutyana nemvana eliduna, yaye ihlosi ngokwalo liya kubutha netakane lebhokhwe, yaye ithole lenkomo nengonyama entsha nesilwanyana esityetyisiweyo ziya kubutha ndawonye; yaye inkwenkwana nje encinane iya kuzikhokela.”

Kwiinguqulelo ezininzi zeBhayibhile oku kufundeka ngohlobo olufana nolu: “Kanjalo ingcuka iya kuhlala [okanye, “kuphila”] nemvana.” Iinguqulelo ezinjalo zisenokudlulisela umfanekiso wengcuka nemvana zihleli ngokuqhubekayo zingamaqabane, njengakwintsapho entsha okanye kwilungiselelo lokuphila.

Noko ke, igama lesiHebhere eliguqulelwe ngokuthi “ukuhlala” okanye “ukuphila” ngugur. Ngokutsho kombhali wesichazi-magama uWilliam Gesenius, lithetha “ukuphambukela, ukuhlala okwethutyana, ukuhlala kwindawo engelokhaya, oko kukuthi njengomntu wasemzini, umntu osuka kwelinye ilizwe, undwendwe.” (A Hebrew and English Lexicon of the Old Testament, eguqulelwe nguEdward Robinson) Isichazi-magama esihlelwe nguF. Brown, uS. Driver noC. Briggs sinikela intsingiselo ethi “ukuphambuka, ukuhlala okwexeshana (elimisiweyo okanye elingamiswanga), ukuhlala njengomfiki . . . ongenamalungelo asisiseko.”

UThixo wasebenzisa ugur ekuxeleleni uAbraham ukuba ‘aphambukele’ eKanan. Usolusapho wayengayi kuba ngumnini welo lizwe, kodwa wayenokuba ngummi walapho okhuselekileyo. (Genesis 26:3; Eksodus 6:2-4; Hebhere 11:9, 13) Ngokukwanjalo, uYakobi wathi ‘wayengumphambukeli’ kummandla wakwaHaran, kuba wayeya kubuyela eKanan.—Genesis 29:4; 32:4.

KwiParadisi uThixo aza kuyimisela kungekudala, izilwanyana nabantu baya kube beseluxolweni. Imvana ayiyi kuba sengozini ngokuba nengcuka okanye ithole lenkomo xa likunye nehlosi. Kukwavunyelwa ukuba kuthethwe ngengcamango yokuba ingcuka iya kuba ngummi okhuselwe yimvu, ngokungathi kunjalo ukuze kuboniswe umahluko kwimeko yanamhlanje.—Isaya 35:9; 65:25.a

Sekunjalo, izilwanyana ezinjalo zisenokuba neendawo zazo ezahlukahlukeneyo. Izilwanyana ezithile zifanelwe kukuhlala emahlathini, ezinye emathafeni, ukanti ezinye zikholisa ukuhlala kwimimandla engaselunxwemeni okanye ezintabeni. Kwanangexesha leParadisi yantlandlolo, uThixo wathetha ‘ngezilwanyana zasekhaya namarhamncwa asendle.’ (Genesis 1:24, NW) Kubonakala ukuba izilwanyana zasekhaya yayizezo zazinokuthi ngokuqhelekileyo zibe kufutshane nabantu neendawo abahlala kuzo. Irhamncwa lasendle, nangona lalingenaburhalarhume, kubonakala ukuba lalikhetha ukuhlala kude nabantu. Ngoko, njengoko isiprofeto sikaIsaya sixela kwangaphambili, ingcuka iya “kuhlala okwethutyana nemvana eliduna,” kodwa ayiyi kuthi ngokuqhubekayo ibe phakathi kwezilwanyana zasekhaya ezinjalo.

[Umbhalo osemazantsi]

[Inkcazelo Ngomfanekiso okwiphepha 31]

Zoological Research Center, Tel-Aviv Hebrew University