Uqeqesho LwaseGiliyadi Kolona Kholo Lungcwele
“ABAFUNDI bethu baqeqeshwe kakuhle kolona kholo lungcwele.” La yayingamazwi okuvula ucwangciso lokuvuyisana nabo baphumelele kwiklasi yama-95 yeSikolo seWatchtower seBhayibhile saseGiliyadi, esiqhutywe ngeCawa, ngoSeptemba 12, 1993. Ngaloo ntsasa iindwendwe ezimenyiweyo namalungu entsapho yaseBheteli bebonke abangama-4 614 ababethe ngqwadalala kwiHolo yeNdibano yesiXeko saseJersey bathelela uGeorge Gangas emthandazweni. UMzalwan’ uGangas ebelilungu lentsapho yaseBheteli iminyaka engama-65 yaye ekubeni eneminyaka engama-97 ulelona lungu lidala leQumrhu Elilawulayo.
UAlbert Schroeder, naye okwalilungu leQumrhu Elilawulayo nosihlalo wolo cwangciso, wathi: “Kangangeenyanga ezintlanu izifundo zaseGiliyadi bezisekelwe kolona kholo lungcwele.” Kodwa luyintoni “olona kholo lungcwele”? Wacacisa ukuba olu ‘kholo lulolona lungcwele,’ ekuthethwa ngalo kuYuda 20, zizo zonke iinyaniso zeBhayibhile. Ngoko izifundo zaseGiliyadi zisekelwe kwiLizwi likaYehova, iBhayibhile, eliyincwadi esisikhokelo ephambili esetyenziswayo kuso.
Abafundi Bafumana Imiyalelo Engakumbi
Isithethi sokuqala yayinguJohn Stuefloten weKomiti yeeFama zeWatchtower, owathetha ngomxholo othi “Ukungenelwa Kwimpembelelo Yabantu Abalumkileyo.” IBhayibhile ithi abo ‘bahamba nezilumko baba zizilumko nabo.’ (IMizekeliso 13:20) Ebudeni bezifundo zaseGiliyadi, abafundi bachithe iiyure ezingaphezu kwama-900 befundisisa iBhayibhile. UMzalwan’ uStuefloten wabuza abafundi oku: “Impembelelo kaYehova iza kunichaphazela njani kwixesha elizayo? Niya kumazwe ali-18 ekuhlala kuwo abantu abamalunga ne-170 lezigidi xa behlanganisiwe. Ngoko niza kubaphembelela njani abo bantu?” Ngokubonakalisa ubulumko bukaYehova, abavangeli basemazweni abatsha baza kukwazi ukunceda abantu babe ngabanquli bakaYehova, uMthombo wobulumko obungasikelwe mda.
Umxholo wentetho elandelayo, eyanikelwa nguLloyd Barry weQumrhu Elilawulayo, wawusithi “Ukuba Zizinto Zonke Kubantu Bonke.” (1 Korinte 9:22, King James Version) Malunga neminyaka engama-45 edluleyo, uMzalwan’ uBarry wayengumfundi kwiklasi ye-11 yaseGiliyadi. Ngoku iklasi yama-95 yakuxabisa ukufumana amacebiso asebenzisekayo kowayesakuba ngumvangeli wasemazweni oneminyaka yamava kwilizwe lasemzini. Wakhuthaza aba bafundi ukuba bazidibanise ngokukhawuleza nabantu abakwintsimi entsha yasemzini ngokuzama ukwazi izithethe zasekuhlaleni nangokufunda ulwimi lomthonyama. Wathi oku kunokwenziwa kakuhle ngokuxubana nangokusebenza nabantu basekuhlaleni kwanangokufunda amasiko abo nangokuwasebenzisa xa kufanelekile.
Kwalandela uDean Songer weKomiti yoMzi-mveliso ngomxholo obangel’ umdla othi “Ukukhululwa Emsebenzini.” Emva kweminyaka engaphezu kwama-35 yenkonzo yexesha elizeleyo, uMzalwan’ uSonger uyakuqonda oko kuthethwa kukuba ubani aphile ubomi obuqhelekileyo, nobutsoliswe emvuzweni, enikela ingqalelo kumsebenzi omele wenziwe, ngaphandle kwamaxhala ezinto eziphathekayo. Yaye oko kwakungundoqo wesiluleko sakhe kwaba bafundi. Iimvumi etempileni kaYehova zazikhululwe kwimisebenzi eqhelekileyo yabanye abaLevi ukuze zizinikele ngokupheleleyo kwisabelo sazo esikhethekileyo. (1 Kronike 9:33) Ngokufanayo, abavangeli basemazweni abaphumelele eGiliyadi bakhululwe kwimicimbi eqhelekileyo efana nomsebenzi wengqesho ukuze bakwazi ukunikela ingqalelo kwinkonzo yabo ekhethekileyo. UMzalwan’ uSonger waqukumbela ngesi siluleko: “Imbono yenu yigcineni itsoliswe emvuzweni nobomi benu bubobuqhelekileyo. Imbopheleleko yenu njengabo bakhululweyo emsebenzini kukuba nisebenze imini nobusuku, nidumisa uYehova.”
Ilungu leQumrhu Elilawulayo uDaniel Sydlik walandela ngomxholo othi “Ukufundisa Abanye Indlela Yokufumana Okona Kulungileyo Ebomini.” Wakhuthaza aba bafundi ukuba “bangapheleli nje ngokufundisa iimfundiso kodwa kwanokuba babe nenkalipho ngokwaneleyo ukuba babonise abantu oko bamele bakwenze ukuze bavisisanise ubomi babo nokuthanda kukaThixo.” Abafundisi abalungileyo bafanele babaphembelele baze babashukumisele esenzweni abanye. Wathi: “Kuphapheleni ukwakha kwabanye imilinganiselo yobuKristu kunokufundisa imithetho nemiqathango nje kuphela,” waza ekuqukumbeleni wongezelela oku: “Phezu kweento zonke, bazalwana abathandekayo, zifundiseni nifundise nabanye indlela yokuba nothando, kuba luyintambo egqibeleleyo yomanyano.”—1 Korinte 13:1-3; Kolose 3:14, NW.
Emva kokuqeqeshwa kangangeenyanga eziliqela, abafundi babathande gqitha abahlohli babo baseGiliyadi ababini. UJack Redford, naye owayesakuba ngumvangeli wasemazweni, waba ngowokuqala ukuthetha, ngombandela othi “Nenze Ukhetho Oluchanileyo.” Kwinkqubo yobuYuda yamandulo, ngaphambi kokuba ngumpostile ongumKristu, uPawulos wayenesikhundla, udumo, impembelelo yaye emi kakuhle ngokwasemalini. Kodwa kwabaseFilipi 3:8, uPawulos wazichaza zonke ezi zinto ngokuthi “ziyinkunkuma,” okanye ‘umgquba,’ ngokutsho kweTestamente Entsha yenguqulelo entsha yeBhayibhile yesiXhosa. Wayebuxhalabele kakhulu ubulungiseleli, ibe wenza ukhetho oluchanileyo. Ngokwahlukileyo koko, uninzi loluntu namhlanje lubonisa ngezinto oluzikhethayo ebomini ukuba luzigqala izinto eziphathekayo olunazo zibaluleke ngakumbi kunobomi obungunaphakade. Abavangeli basemazweni abaphumelele eGiliyadi benze ukhetho oluchanileyo. UJack Redford waqukumbela ngokuthi: “Akukho nanye into eli hlabathi likaMtyholi elinokuninika yona enokufana nenkonzo yobuvangeli basemazweni. Nilinyamekele elo lungelo lingenakuthelekiswa nanto, niyeke ihlabathi linyamekele umgquba walo!”
Kule minyaka ingama-32 edluleyo, u-Ulysses Glass ebengumhlohli eGiliyadi. Wanikela isiluleko sokwahlukana kwaba bafundi ngomxholo othi “NguThixo Kuphela Onokwenza Umthi,” intetho yakhe eyisekele kwiNdumiso 1:3. Ubugcisa banamhlanje abukwazanga ukwenza nantoni na efana nomthi, oyilwe nguThixo. Ngandlel’ ithile, amaKristu okwenyaniso afana nemithi, etyalwe nenkcenkceshelwa nguYehova. UMzalwan’ uGlass waphawula ukuba kangangeenyanga ezintlanu, abafundi “bebenkcenkceshelwa rhoqo ngomthombo wamanzi anik’ ubomi eLizwi likaThixo,” njengemithi ekwigcume okanye iparadisi yokomoya. Sekunjalo, njengabavangeli basemazweni, bamele bazinyamekele “iingcambu zabo zokomoya zingonakali.” Babongozwa ukuba ‘baqhubeke besela kumanzi obomi avela kuYehova kuba nguThixo kuphela onokwenza umthi.’
Intetho yokuqukumbela yanikelwa nguCarey Barber, ilungu leQumrhu Elilawulayo. Emva kweminyaka engama-70 yenkonzo yexesha elizeleyo, uMzalwan’ uBarber wayenokuthetha ngokuqiniseka ngombandela othi “Zinikele KuYehova Ngokupheleleyo.” Inkoliso yoluntu ayizinikelanga ngokupheleleyo kuYehova. (Duteronomi 5:9, NW) Noko ke, njengoko uMzalwan’ uBarber wabonisa, phezu kwako nje ukungafezeki kwethu, “sinako ukuzinikela ngokupheleleyo kuThixo.” Wongezelela wathi: “Akukho namnye onokuthi ngokwenene: ‘NguMtyholi ondibangele ndenza oku.’” Kodwa uMtyholi unokusoyisa ukuba siyasilela ukumchasa. (Yakobi 4:7) Ukuzigcina sixakekile emsebenzini kaYehova yeyona ndlela iphambili yokuchasa uSathana nehlabathi lakhe neyokuzinikela ngokupheleleyo kuYehova.
Ukumiselwa Njengabavangeli Basemazweni Abamiselweyo
Ucwangciso lwaloo ntsasa lwaqukunjelwa ngokumiselwa ngokusemthethweni kwabo bonke abafundi abangama-46 njengabavangeli basemazweni. Ezi zibini zingama-23 zafumana iziqinisekiso ngokuyinxenye ezichaza ukuba aba baphumeleleyo “bakufanelekele ngokukodwa ukuba nesabelo kumsebenzi wokufundisa, ukukhuthaza inkoleko nokusebenzela uxolo oluhlala luhleli nomthetho wolungelelwano olugqibeleleyo nobulungisa phakathi kwabantu bonke.” Ngokuqinisekileyo iklasi yama-95 yaseGiliyadi iya kuzabalazela ukulufeza olu thumo luphakamileyo kumazwe ali-18 eyabelwe kuwo. Izabelo zabo zibathumela ehlabathini lonke yaye ziquka amazwe anjengeAsia, iAfrika, iYurophu, uMbindi noMzantsi Merika, namazwe akwiCaribbean.
Emva kwemini, emva kweSifundo seMboniselo esishwankathelweyo esaqhutywa nguCharles Woody weKomiti yeSebe leNkonzo, aba babesandul’ ukuphumelela eGiliyadi baqhuba ucwangciso lwabafundi, olunomxholo othi “IGiliyadi Isilungiselele Ukufundisa Njengabavangeli Basemazweni.” Ucwangciso lwaqukunjelwa ngomdlalo othi “Ukhetho Esijamelene Nalo.”
Emva kolu cwangciso luhlaziyayo, ngoku aba bavangeli basemazweni batsha babekulungele ukuthunyelwa kwiimbombo zone zomhlaba ukuze babelane nabanye “ngolona kholo lungcwele.”
[Ibhokisi ekwiphepha 26]
Inkcazelo Engabafundi
Inani lamazwe abavela kuwo: 7
Inani lamazwe ababelwe kuwo: 18
Inani labafundi: 46
Inani lezibini ezitshatileyo: 23
Umlinganiselo wobudala: 30,06
Umlinganiselo weminyaka besenyanisweni: 12,92
Umlinganiselo weminyaka bekubulungiseleli bexesha elizeleyo: 9,4
[Umfanekiso okwiphepha 26]
Abapelele Kwiklasi Yama-95 YeSikolo SeBhayibhile SeWatchtower SaseGiliyadi
Kuludwe olungezantsi, kuqalwa kuluhlu olungaphambili ukuya kolungasemva, yaye amagama adweliswe ukusuka ngasekhohlo ukuya ngasekunene kuluhlu ngalunye.
(1) Buelow, D.; Donzé, V.; Innes, S.; Fulk, N.; Billingsby, M.; Hoddinott, L.; Nygren, B.; Eriksson, L. (2) Boker, J.; Thomas, M.; Stedman, S.; Billingsby, D.; Waugh, I.; Purves, M.; Luttrell, M. (3) Jacobsen, T.; Boker, J.; Martínez, L.; Nilsson, E.; Purves, P.; Holt, L.; Larsen, M.; Jones, L. (4) Numminen, P.; Numminen, H.; Buelow, M.; Olson, W.; Holt, S.; Donzé, G.; DesJardins, C.; DesJardins, D. (5) Larsen, K.; Martínez, D.; Nygren, P.; Waugh, P.; Jones, D.; Hoddinott, J.; Thomas, G. (6) Innes, B.; Fulk, R.; Eriksson, A.; Nilsson, S.; Stedman, J.; Olson, K.; Jacobsen, F.; Luttrell, J.